“Sila Nsangu Zambote, . . . Umbangi”
1. Nkia nsangu zambote tusamunanga?
1 Muna nza eyi ina vo e nsangu zambote ke ziwakananga ko, tuvwidi elau dia “sila nsangu zambote za nsambu za Nzambi o umbangi.” (Mav. 20:24) Tufwete zaisa kwa wantu vo e “lumbu yambaninu” tuzingilanga se ifokoka yo sisa e fulu kwa nza yansongi ya Yave ina ikala vo “oma mantete [mevioka].” (2 Tim. 3:1-5; Lus. 21:4) Muna kolo kiokio mayela ke mekala diaka ko. (Yes. 33:24) Azolwa eto ana bafwa bevaikiswa muna ziami yo wanana diaka ye yitu ye akundi. (Yoa. 5:28, 29) E nza yawonso ikituka se paradiso. (Yes. 65:21-23) E yayi i nona yakete ya nsangu zambote ezi tusamunanga!
2. Ekolo kia Luyindulu lwa lufwa lwa Kristu ekuma kinina se nsungi ambote mu sila nsangu zambote umbangi?
2 Muna ngonde ya Malusu, Abidi ye Mayu tukala y’elau dia samuna nsangu zazi zambote. Muna fulu yayingi ya nza, e lumbu ya ngonde zazi, yambote ikalanga mu sala kwayingi muna salu kia umbangi, kadi e lumbu zingila yizingilanga mu bwita. Edi disundidi o mfunu muna mvu i Luyindulu lwa lufwa lwa Kristu olu luyindulwa mu nza yawonso kina Kiasabala kia 22 kia ngonde a Malusu kunima ndimuk’a ntangwa. E yayi i ntangwa ya yantika kubama muna wokesa e salu kieto.
3. Adieyi dilenda kutusadisa mu wokesa e salu kieto kia umbangi muna nzo?
3 Mviti a Nzila a Nsadisi: Nga okubamanga mu sala se mviti a nzila a nsadisi mu ngonde mosi, zole yovo ngonde zau tatu? Ekuma lembi vaulwila ntangwa mun’elongi dieno dia esi zo mu mokena e diambu diadi? Avo nutomene kubama, mosi yovo ayingi muna nzo balenda sala se aviti a nzila a nsadisi. (Nga. 15:22) Yika ediambu diadi muna sambu yo tala una Yave ke sambulwila e ngolo zaku. (Nga. 16:3) Avo ke vena muntu ko o sala se mviti a nzila a nsadisi muna nzo, yeno awonso nulenda kala y’etima dia wokesa e salu kieno kia umbangi muna salanga kumosi ye aviti a nzila.
4. Avo lumbu kia mvimba tusalanga aweyi tulenda kubamena kiambote mu sala se mviti a nzila a nsadisi?
4 Avo unsadi a lumbu kia mvimba, lenda kubama mu sala se mviti a nzila a nsadisi. Nanga lenda sadila e ntangwa ya vundu mu samuna e nsangu zambote. Yovo lenda sola e zunga kia ngeye kibeni kiafinama ye nzo yovo fulu kin’o sadilanga mu sila umbangi mu ola mosi una kuyantikidi ko salu yovo kuna mfoko a salu. Lenda kudikila ola zaku za salu muna soba e nkubika za mambu ma zingu ke mena mfunu wayingi ko wa sala mo mu ngonde zakaka yo sala ola zayingi muna konso lumbu kia lumingu. Akaka bavaulanga lumbu kimosi yovo yole ya vundu mu sala kwayingi mu salu kia umbangi.
5. Aweyi olenda sadisila anunu ye mbevo mu sala se aviti a nzila a nsadisi?
5 Avo ununu, mbevo yovo kuna yo nkuma wayingi ko, olenda sala se mviti a nzila a nsadisi muna salanga ola zakete konso lumbu muna salu kia umbangi. Lomba kwa Yave muna sambu kavana “ulolo wa nkuma.” (2 Kor. 4:7) Mpangi mosi wa nkento una ye kimbuta kia mvu 106 walenda sala se mviti a nzila a nsadisi! Muna lusadisu lwa yitu yandi ya Akristu ye akaka muna nkutakani, wasilanga umbangi mu nzo ke nzo yo vutukila kingula, longoka ye alongoki a Nkand’a Nzambi yo sala mu mpila zakaka za salu kia umbangi. Wasadisa wantu kumi mu yantika longoka o Nkand’a Nzambi. Wa vova vo: “Ekolo yayindulanga elau diampwena yakala diau, yasala se mviti a nzila a nsadisi. O ntim’ame wazala yo zola ye luyangalalu muna Yave, Mwan’a ndi ye nkubik’andi. Dialudi, nzolele tonda Yave!”
6. O toko yovo ndumba wavubwa una mu sikola aweyi kalenda sadila se mviti a nzila a nsadisi?
6 Kele vo u toko yovo ndumba wavubwa ye wakinu longoka, olenda sala mpe se mviti a nzila a nsadisi. Nze awana besalanga muna salu yakaka, ngeye mpe nanga olenda kubama mu salanga mu nsuka lumingu mu salu kia umbangi. Nanga olenda vaula ola mosi muna lumbu mu sila umbangi kuna mfoko a sikola. Nga vena ye lumbu ya vundu kuna sikola ina olenda sadila una ufwene mu salu kia umbangi? Avo zolele sala se mviti a nzila a nsadisi, mokena dio ye mase maku.
7. Akuluntu adieyi bafwete vanga mu kasakesa e salu kia umbangi muna kolo kia luyindulu?
7 Kasakesa: Akuluntu balenda vanga mayingi mu kasakesa e nkutakani muna mbandu’au. (1 Pet. 5:2, 3) Balenda kubika lukutakanu lwa mpaika mu salu kia umbangi mu kuma ki’awana besalanga e salu kia umbangi mu mene, kuna mfoko a sikola yovo kuna mfoko a salu. O nkengi a salu kafwete kala ye ziku vo vena ye nteleki wavubwa wasolwa mu fila lukutakanu lwa mpaika mu salu kia umbangi ye zunga kisadilwa ye yinkanda-nkanda yafwana yisadilwa muna ngonde zazi zamfunu.
8. Adieyi tulongokele muna nona kia nkutakani mosi?
8 Akuluntu a nkutakani mosi bakasakesa ateleki mu sala se aviti a nzila a nsadisi muna ngonde zayingi. Konso lumingu, bazayisang’e nkutakani mu songa lutangu lw’ateleki ana basalanga se aviti a nzila a nsadisi. Ediadi dia vana e vuvu kw’awana bakala ye luzolo lwa wokesa e salu kiau kia umbangi vo vena ye wantu ana balenda sala yau muna salu kia umbangi. Vakala e nkubika zakaka za lukutakanu lwa mpaika mu salu kia umbangi mu mene ye ola za fuku. Nkia nluta diatwasa? Muna ngonde ya Abidi 53 ma ateleki basala se mviti a nzila a nsadisi, i sia vo bula kati kia nkutakani!
9. E nsungi a Luyindulu ekuma inina se nsungi ambote kw’awana bayifwanisi mu yantika sala se ateleki a nsangu zambote?
9 Sadisa Akaka mu Samun’e Nsangu Zambote: Avo wantu ampa yovo aleke bayifwanisi mu kituka se ateleki a nsangu zambote, balenda sala kumosi ye ateleki azikuka mu salu kia umbangi. E nsungi a Luyindulu lwa lufwa lwa Kristu ilenda kala se nsungi ambote mu vanga wo vava wantu ayingi muna nkutakani bevavanga wokesa e salu kiau kia umbangi. Nga zingu kia nlongoki aku a Nkand’a Nzambi ngwizani kina ye nkanikinu mia Yave? Nga una ye mwana wa nkwa fu yambote ona nungunukanga mu mwanda kansi ke nteleki ko? Avo osongele luzolo lwa kituka se nteleki walembi vubwa yo mona vo wafwana kwandi, ediadi difwete zaiswa kwa nkuluntu. O nkengi a mfidi obokela akuluntu wole mu mokena yaku kumosi yo mwana yovo nteleki.
10. Akuluntu adieyi bafwete vanga mu sadisa awana bayambula samuna e nsangu zambote?
10 E ngonde zazi ntangw’ambote mpe kw’awana bayambula samuna nsangu zambote mu vutukila salu kiau muna nkutakani. Akengi elongi dia nkanda dia nkutakani ye akuluntu akaka bafwete vanga ngolo za kubakingula yo kubabokela mu vaika yau mu salu kia umbangi. Kele vo se kolo bayambula samuna nsangu zambote, akuluntu wole bafwete mokena yau ntete mu zaya kana vo bafwana yovo ve.—km 11/00 lukaya lwa 3.
11. Nkia diambu disundidi muna “nsambu za Nzambi?”
11 Kubama mu Kuma kia Luyindulu: Lukulu i diambu disundidi muna “nsambu za Nzambi.” (Mav. 20:24) Mazunda ye mazunda ma akwa luyangalalu mu nz’amvimba bekutakana kina Kiasabala kia 22 kia ngonde a Malusu kunima ndimuk’a ntangwa mu Luyindulu lwa Lufwa lwa Kristu. Tuzolele bokela yo sadisa akwa ntima mia nsongi awonso mu kwiza muna lumbu kiaki kiamfunu kisilanga e nsambu za Yave umbangi kuna kwa wantu.
12. Akinani tufwete bokela muna Luyindulu lwa lufwa lwa Kristu?
12 Soneka e nkumbu z’awana obokela. Kalukatikisu ko vo obokela yitu yaku, mfinangani zaku, akundi aku a salu ye asikola ye ana walongoka yau kala ye awonso ana okingulanga ntangwa zawonso. Avo muntu obokele uyuvwidi mu kuma kia luyindulu, dikala diambote mu sadila nkundikilu ina yo ntu a diambu Nlekelo a Mfumu, muna nkanda, O Nkand’a Nzambi Adieyi Kieleka Kelonganga lukaya lwa 206-208. Ediadi dilenda ziula nzila mu yantika longoka o Nkand’a Nzambi, kadi e moko kiaki kisadisa mu sunzula o nkanda tusadilanga mu longoka o Nkand’a Nzambi yo wantu.
13. Yave nkia mpila kasambulwila e ngolo z’ateleki wole babokela akaka ku luyindulu?
13 Mpangi mosi wa nkento wasoneka nkumbu za yitu 48 kebokela. Ekolo kabazayisanga, wasoneka nkumbu zau muna nkanda ye lumbu kina kababokela. Ekw’e mpila kiese kakala kiau mu mona 26 m’awana kabokela bayiza kuna luyindulu! Mpangi mosi wabokela muntu wasalanga kuna kompani diandi ona wakala mfumu a dibundu. O muntu ndioyo wayiza, kuna mfoko wavova vo: “Ndongokele mayingi mu ola mosi mana kialongoka ko mu mvu 30 ngina muna dibundu dia Katolika.” Ke kolo ko vava luyindulu lwafokoka watambulwila elongi muna O Nkand’a Nzambi Adieyi Kieleka Kelonganga.
14. Nkia salu kia nz’amvimba kiyantika kina kiantete kia Malusu?
14 Mpaika mu Buka: Tuka kina Kiasabala kia 1 kia ngonde a Malusu, yakuna kia 22 kia ngonde a Malusu kikaywa e mboka za Luyindulu lwa lufwa lwa Kristu mu nz’amvimba. Yeto awonso tukala ye luzolo lwa vanga salu kiaki kiamfunu. Diawete twavana e mboka kwa wantu vana moko, ke mu sisa zo ko vana mwelo. Avo zunga kieno kianene, akuluntu balenda baka nzengo za sisa e mboka vana mielo mia wantu nulembi wana muna nzo. Muna nsuka lumingu, tukaya yinkanda-nkanda yampa.
15. Aweyi tufwete sunzulwila e mboka za luyindulu?
15 Wau vo e ntangwa muna kaya e mboka zazi yakete, diambote e nsunzula zeto zakalanga zankufi. Songa ngemba ye kiese. Olenda vova diambu nze diadi: “Tuzolele kala ye ziku kiasia vo ngeye, yitu yaku ye akundi aku nubokelo muna diambu diamfunu edi divangama kina kia 22 kia Malusu. Eyayi i mbok’aku. E kuma kia diambu, kina muna mboka.” O muntu otambwidi mboka kalenda yuvula e yuvu. Kalenda tambula e mboka yo yika vo ikala kuna. Soneka e nkumbu z’awana batambwidi e mboka yo vutukila kubasusumuna.
16. Nkia nona kisonganga e nluta mina mu kaya e mboka za luyindulu muna mpaika mu buka?
16 Muna mvu uviokele soladi dimosi wawana e mboka ya Luyindulu kuna nsi a mwelo andi. Wasonga luzolo lwa kwenda, kansi, e ntete kafwete lomba nswa kwa mfumu a makesa. Vava kasonga e mboka kwa mfumu a makesa, o mfumu wadingalala, i bosi wanzayisa vo mase mandi Mbangi za Yave, yandi mpe wayendanga lungana yau. O mfumu a makesa kavana kaka nswa ko kwa soladi mu kwenda, kansi wayenda yandi kumosi.
17. Aweyi tusongelanga vo ke tuvidisanga ekani dieto ko muna nsambu za Nzambi?
17 Songanga e Kiese: E kolo nsungi ya luyindulu lwa 2008, ifinamanga, konso muntu mu yeto kabadik’e nsambu za Yave muna wete dieto. Paulu wa ntumwa wasoneka vo: “Tudodokele wo vo, Ke nutambula nsambu za Nzambi e ngofwila ko.” (2 Kor. 6:1) Aweyi tusongelanga vo ke tuvidisanga ekani dia nsambu za Nzambi ko? Paulu wasoneka vo: “Kansi muna mambu mawonso tukusonga vo tu selo ya Nzambi.” (2 Kor. 6:4) Ozevo, tusonganga luyangalalu lweto muna lukau lwa Yave muna fu yeto yambote yo kuyivana kweto muna samuna e nsangu zambote. Mu luyindulu lwa mvu wau tukala y’elau dia wokesa e salu kieto muna sila e nsangu zambote o umbangi.
[Babu kina muna lukaya 3]
Akinani Balenda Sala se Aviti a Nzila?
◼ Esi nzo
◼ Ana besalanga muna makompani
◼ Anunu ye ambevo
◼ An’a sikola
[Babu kina muna lukaya 4]
Vava Tukaya e Mboka za Luyindulu:
◼ Mu mvovo miankufi: vova ye kiese
◼ Soneka e nkumbu z’awana basongele luzolo lwambote yo vutukila kubasusumuna
◼ Kaya yinkanda-nkanda muna nsuk’a lumingu