“Samuna e Diambu dia Nzambi Una Ufwene”

¹ Kele vo oyangalele lukau lwambote oveno nga kusonga luyangalalu lwalu ko muna fu ye mpanga zaku? Kieleka vo osonganga lo! Tala una kayika o Paulu wa ntumwa mu kuma kia wete ye walakazi kesongang’o Yave kwa wantu awonso. Oyandi wavova vo: “Matondo kwa Nzambi muna lukau luandi lulembi vovakana”! Nki i lukau “lulembi vovakana?” I “ulolo wa nsambu [zawonso] za Nzambi” zisongwanga oku kwa yeto, o lukau lwa Mwan’andi lwa lukulu mu kuma kia masumu meto i mpila yampwena kasongela zo.—2 Kor. 9:14, 15; Yoa. 3:16.

² O Paulu nga mu nua kaka kavutwilang’o matondo? Ve! Wasonganga o tonda kwandi mu mpila zayingi. Oyandi watokanenanga kwayingi mu kuma kia wete dia kimwanda dia Akristu y’akwandi ye wavanga mawonso kalenda muna kubasadisa batambula e ndandu za walakazi wa Nzambi. Mu kuma kiau, o Paulu wavova vo: “Tuzolele wo beni o kunukawulwila, ke nsangu zambote za Nzambi kaka ko, emieto mioyo mpe, e kuma kadi, nuzolelo kikilu kwa yeto.” (1 Tes. 2:8) Vana ntandu muna sadisa awana bakala muna nkutakani mu kuma kia tanina o luvuluku lwau, o Paulu wasia ngolo za samuna e nsangu zambote ye wakangala mafunda ma kilometa mu malu ye mu nzaza muna solola “ana basianga etima mu moyo a mvu ya mvu.” (Mav. 13:48, NW) E kiese kia Paulu muna mawonso kavanga Yave kwa yandi mamfila muna ‘samuna e diambu dia Nzambi.’—Kol. 1:25.

³ O luyangalalu lweto muna mawonso kevangang’o Yave oku kwa yeto nga ke ufwene kutufila ko mu sadisa awana bavwidi o mfunu wa lusadisu muna nkutakani eto? (Ngal. 6:10) Nga ke tufilwanga ko mu lungana una ufwene muna samuna e nsangu zambote za Kintinu muna zunga kieto kiawonso?—Mat. 24:14.

⁴ Elau Muna Songa Luyangalalu Lweto: Konso mvu o Luyindulu lwa Lufwa lwa Kristu lukutuvananga elau diampwena muna songa luyangalalu lweto kwa Yave yo Yesu mu mana bevanganga mu kuma kieto. O lwalu ke lukutakanu yovo luyindulu lwa nkatu ko. O Yesu wavova vo: “Nukwamanana wo vanga muna luyindulu lwame.” (Luka 22:19, NW) O Luyindulu lwa Lufwa lwa Kristu i ntangwa ya yindula empila muntu kena o Yesu. E yayi i ntangwa ya zaya vo oyandi wina moyo ye wavewa o nkembo wa luyalu mu kuma kia kwikizi ye kimenga kiandi. O luyindulu lwalu lukutuvananga mpe elau dia songa lusakalalu lweto muna kintinu kia Kristu ndiona ofilang’o mambu ye salu kiawonso kia nkutakani a Kikristu. (Kol. 1:17-20) O nkangu a Nzambi wawonso ufwete songanga luzitu muna lunganananga mu Luyindulu Lwa Lufwa Lwa Kristu. Omu mvu wau o Luyindulu lukala kina kia yá kia 28 kia Malusu, 2002 kunima dimuka ntangwa.

⁵ Muna ngolo zawonso twavanga za lungana mu Luyindulu lwa mvu wa vioka oku Angola, twakala ye lutangu lusundidi lwa 182.709 ma wantu. Aweyi ukala o lutangu lwa mvu wau? Ediadi ditadidila kwayingi e ngolo zeto “[za]funtuka yo siamanana,” mu sadisa wantu ayingi una ufwene muna lungana.—1 Tim. 4:10.

⁶ Vana ntandu a lungana mu Nlekelo a Mfumu, nanga tulenda wokesa e salu kieto kia umbangi. Ke lukatikisu ko, mazunda ye mazunda ma mpangi z’ayakala ye zamakento bekuyivananga mu salu kia kimviti a nzila a nsadisi mu ngonde imosi yovo zayingi. Muna mvu tanu miavioka konso mvu, twakala ye lutangu lwa 3.250 ma aviti a nzila a nsadisi muna kolo kia Luyindulu, tuka Malusu yakuna Mayu. Nga olenda vanga e nkubika muna vwa elau dia sala nze mviti a nzila a nsadisi omu mvu wau? Eyayi i mpila ambote yasongela luyangalalu lwaku muna nkubika a nzola ya Nzambi ya kimenga kia Kristu. Olenda kala ye ziku kia nsambu za Yave, nze una usonganga oma malende:

⁷ Mpangi mosi wa nkento osalanga e lumbu yawonso kuna kompani wasoneka mu kuma kia salu kiandi kia kimviti a nzila a nsadisi mu ngonde ya Malusu yavioka: “E Salu Kieto kia Kintinu kia Fevelelo kia 2001 kia kasakesa konso ona olenda muna kala mviti a nzila a nsadisi mu kolo kia Luyindulu. Wau vo e ngonde ya Malusu yakala ye sabala tanu, ediadi dia toma fwanana ye program’ame. Ozevo, yabaka e nzengo za sadila zo.” Vava kayantika e ngonde, wasia ekani dia teza yantika fil’elongi dia Nkand’a Nzambi mu nzo. Nga wabaka e nsendo? Elo, wa lungisa 52 ma ola muna salu kia umbangi kia ngonde yayina. Adieyi kavova ku mfoko? Vena ye nsambu zayingi kele vo tuwokese ngolo zeto.

⁸ Nkia ndandu zina kwa esi nzo muna salanga entwadi nze aviti a nzila a nsadisi? Esi nzo mosi dia yá dia wantu basala e salu kiaki bamona vo e ngonde ya Abidi ya mvu wavioka ifwete sungamenwanga ntangwa zawonso. O ngudi wavova vo: “Nkia vuvu kiasikila twakala kiau konso lumbu, wau vo twasalanga e ntwadi muna salu kia umbangi! E mbokena za salu yeto ya lumbu ke lumbu zatomesa e ntangwa ya madia mafuku.” O mwana wavova vo: “Yayangalela sala entwadi yo Se diame muna salu kia umbangi mu kati kwa lumingu, kadi i kolo ketoma salanga mu salu kiaki.” O se wakudikila vo: “Wau vo i mfidi a nzo, yayangalel’o zaya vo twasalanga entwadi muna salu kisundidi o mfunu omu lumbu yeto.” Nga esi nzo aku balenda sala ntwadi e salu kia kimviti a nzila a nsadisi? Ekuma olembi mokena ye esi nzo aku muna zaya kele vo nulenda sala entwadi nze aviti a nzila a nsadisi mu kolo kia Luyindulu?

⁹ Nga Tulenda Toma Sadila e Ngonde ya Malusu? Muna lubantiku lwa 2000, e Salu Kieto kia Kintinu kia yuvula vo: “Nga tulenda toma sadila e ngonde ya Abidi ya 2000”? Nkia mvutu zavewa? Twatambula lutangu lwayingi lwampa. Twakala ye lutangu lwa 4.327 ma aviti a nzila a nsadisi. Vana ntandu, twatambula lutangu lwampa lwa ola, lwa kayanesa e yinkanda-nkanda ye nkingula ya wantu. Nga osungamenanga e kiese kia nkutakani aku mu kuma kia salu kia mwanda mu ngonde yayina yamfunu? Nga tulenda lwaka muna lutangu luna yovo vioka lo omu mvu wau? Muna siamanana ye ngolo zawonso, e ngonde a Malusu 2002 ilenda kituka se “Ngonde Eto Yamfunu.” Ekuma ngonde ya Malusu?

¹⁰ Vena ye kuma yole e ngonde a Malusu ifwete kadila yamfunu muna salu kia umbangi. Diantete, o Luyindulu luvangwa kuna nsuka a ngonde ya Malusu, kikutuvana e ntangwa yayingi mu bokela wantu ayingi una ufwene muna lungana. Dianzole, e ngonde ya Malusu ivwidi tumingu yá twamvimba ye kivana elau dia sala e salu kia kimviti a nzila a nsadisi kw’awana besalanga muna makompani yovo kwa wan’a sikola. Ekuma olembi vwanda muna kubika e programa ya salu ye sadila e manaka makubikwa mu nkudikilwa yayi? E salu kia kimviti a nzila a nsadisi kilenda kala kiavevoka ke una oyindulanga ko. Nze nona, muna kubika ola 8 muna konso nsuka lumingu, muna tumingu tanu ovwa o mfunu wakudikila kaka 10 dia ola, mu nsuka a ngonde olungisa 50 ma ola zivavwanga.

¹¹ Adieyi balenda vanga akuluntu muna sadisa awonso muna nkutakani muna “samuna diambu dia Nzambi una ufwene?” Songa e kiese muna malongi ma lukutakanu ye mbokena za yeno kibeni. Afidi y’Elongi dia Nkanda dia Nkutakani ye asadisi au bafwete kuyivana muna mokenanga yo konso muntu una muna buka kiau ye kumvana lusadisu lwa yandi kibeni. Mvovo miakete lukasakeso yovo luludiku lwafwana nanga i luvwilu o mfunu. (Nga. 25:11) Wantu ayingi bemona vo muna soba e programa zau, balenda kala y’elau dia sala e salu kia kimviti a nzila a nsadisi. Mu nkutakani zayingi, wantu ayingi yovo awonso, akuluntu ye selo a salu yo akento au besonganga mbandu ambote muna salanga entwadi nze aviti a nzila a nsadisi mu kolo kia Luyindulu. Ediadi dikasakesanga ateleki ayingi muna kubayikama. Mu kuma kia yimbevo yovo mambu makaka, ateleki akaka nanga ke bafwana ko mu salu kia kimviti a nzila a nsadisi, kansi balenda kasakeswa mu songa o luyangalalu lwau muna sala e salu kia umbangi una balenda kumosi ye ateleki akaka muna nkutakani.

¹² Muna tambula e nluta mu salu kiaki ditadidi e nkubika zafwana za akuluntu. O lukutakanu lwa mpaika mu salu kia umbangi lufwete kubikwa mu ntangwa yambote mu lumingu lwawonso. Avo dilendakana, o nkengi a salu oteka sola mpangi zafwana muna fila e tukutakanu twawonso twa mpaika mu salu kia umbangi. Nkubika yambote ivavwanga ekuma vo e tukutakanu twatu ke tufwete vioka miniti 10 yaku 15 ko, mawonso mafwete vangilwa muna ntangwa yayi i sia vo nkubikilu za buka, songa zunga yisadilwa ye sambu. (Tala e tini kia Mvutu za Yuvu muna Salu Kieto kia Kintinu kia Setemba kia 2001.) E programa ya mpaika muna ngonde ilenda zayiswa muna tukutakanu ye lamika yo vana fulu kia tuzayisu.

¹³ Vafwete kubikwa e zunga yafwana. O nkengi a salu ofwete mokena yo mpangi olunga-lunganga e zunga muna vanga e nkubika za sadila muna zunga ilembi sadilwanga kwayingi. Nufwete sia e ngolo za kingula awana balembi wanukanga muna nzo muna silanga umbangi muna mpambu za nzila, muna nzo za tekela ye muna fuku. Avo dilendakana ateleki akaka balenda sadiswa muna sila umbangi muna telefone.

¹⁴ Nubasadisa Bavutukila e Salu: Nga muna zunga kia nkutakani aku muna ye ateleki bayambula samuna e nsangu zambote? Oyau bena kaka ateleki a nkutakani ye lusadisu bavwidi o mfunu. (Nku. 119:176) Wau vo e nza yayi ke kolo ko isinga fwaswa ye nz’ampa ifinamene, i kuma kiambote muna sia e ngolo zayingi muna sadisa ateleki awana bayambul’o samuna e nsangu zambote. (Roma 13:11, 12) Mu mvu tanu miavioka, tezo kia 26.500 za wantu batambulwil’o lusadisu yo vutukila e salu kia umbangi. Adieyi tulenda vanga muna sadisa wantu ayingi bavutukila o zola ye vuvu bakala kiau muna lubantiku?—Ayib. 3:12-14.

¹⁵ E buka kia akuluntu bafwete mokena e mpila balenda sadisila ateleki bayambula samuna e nsangu zambote mu mvu miavioka. (Mat. 18:12-14) O nsoneki a nkutakani ofwete tala e Registro de Publicador de Congregação muna zaya awonso bayambula samuna e nsangu zambote. Nufwete sia ngolo zafwana kimana vakala ye nkubika ya kingula yo vungula yo vana lusadisu. Nanga nkuluntu mosi olenda kingula nteleki ona kavita kala yandi kikundi, yovo lomba kwa ateleki akaka muna kubasadisa. Ateleki azikuka balenda longoka yo nteleki ona wayambula samuna e nsangu, ediadi dilenda kala elau dia kituka nsadisi a mfunu mu ntangwa yayi ya lusadisu. Vavingilwanga vo, wantu ayingi ana bayambula samuna e nsangu bayantik’o samuna diaka e diambu dia Nzambi. Kele vo bayifwanisi, ekolo kia Luyindulu i ntangwa ambote balenda yantika sala!—Tala tini kia Mvutu za Yuvu muna Salu Kieto kia Kintinu kia Novemba, 2000.

¹⁶ Nga Vena ye Akaka Bayifwanisi Muna Samuna e Nsangu Zambote? O Yave okwamananang’o sambula nkangu andi muna twasanga “e lekwa yamfunu ya zula yawonso.” (Kang. 2:7, NW) Konso mvu mafunda ma wantu bekuyifwanisanga nze ateleki alembi vubwa. Aki nani? I wan’a Mbangi za Yave ye alongoki a Nkand’a Nzambi ana benungunukanga. Aweyi tulenda zayila vo bafwene muna kituka se ateleki a nsangu zambote?

¹⁷ Wan’a Mbangi za Yave: Wana ayingi bekwendanga kumosi yo mase mau muna salu kia nzo ke nzo mu mvu miayingi, kana una vo ke ateleki alembi vubwa ko. E ngonde ya Malusu ilenda kala yambote kwa yau muna yantika samuna e nsangu zambote. Aweyi olenda zayila vo mwan’aku wafwana? O nkanda Nosso Ministério muna lukaya lwa 98-99 uvovanga vo: “kele vo mwana una ye fu yambote ye ozeye vovela o lukwikilu lwandi kwa wantu akaka mu kuma kia nsangu zambote ye ovanganga dio kuna nsia a ntima.” Avo mwan’aku wafwana, mokena yo nkuluntu mosi wa Buka kia Salu kia Nkutakani.

¹⁸ Alongoki a Nkand’a Nzambi Afwana: O nlongoki kunima vwa zayi ye lungananga muna lukutakanu se kolo kiayingi, olenda zola kituka nteleki a Kintinu. Avo ofilanga elongi kwa nlongoki ndiona, badika yuvu yayi: Nga onungunukanga landila e kimbuta ye ngangu zandi? Nga wayantik’o vovela lukwikilu lwandi kwa wantu akaka? Nga ovwatanga “uwuntu wampa?” (Kol. 3:10) Nga olungisanga mana mevavwanga muna nkanda Nosso Ministério muna lukaya lwa 96-98 muna kuyifwanisa nze nteleki walembi vubwa? Kele vo i wau, ofwete zayisa kwa Buka kia Salu kia Nkutakani muna vanga nkubika mpasi vo akuluntu wole bamokena yaku ye nlongoki. Avo ofwene, akuluntu wole bekunzayisa vo olenda kwandi yantika lungana muna salu kia umbangi.

¹⁹ Adieyi Tuvova mu Kuma kia Abidi ye Mayu? E zazi zifwete kala mpe ngonde zamfunu muna wokesa e salu kia umbangi. Ayingi ana besala e salu kia kimviti a nzila a nsadisi mu ngonde ya Malusu balenda wo vanga diaka mu Abidi yovo mu Mayu. Muna ngonde ya Abidi ye Mayu, tusia ngolo za kayanesa e yinkanda-nkanda ya Sentinela ye Despertai! muna salu kia umbangi. Nkia ndandu zambote e yinkanda-nkanda yayi itwasanga mu zingu ki’awana betanganga yo? E yinkanda-nkanda yayi salu kiamfunu yisalanga mu ngwokela asivi yimonekanga omu nza yawonso. Mu ngonde ya Abidi ye Mayu tusia e ngolo za kayanesa e yinkanda-nkanda kwa wantu ayingi una ufwene. Vanga e nkubika owau muna lungana.

²⁰ Mu kuma kia wokela kwa salu kia umbangi, nga ovwidi o mfunu wakudikila yinkanda-nkanda otambulanga muna nkutakani? Muna mvu awonso wa salu, tukayanesa e Sentinela ye Despertai! muna konso Kiasabala, kina vo Lumbu kieto kiasolwa mu kayanesa e Yinkanda-nkanda. Wau vo ayingi besala e salu kia kimviti a nzila a nsadisi ye mpe yeto awonso tukayanesa yinkanda-nkanda mu ngonde zole zamvimba, nanga dikala diamfunu mu kudikila e ndomba aku ya yinkanda-nkanda muna nkutakani. Kele vo iwau, vanga luzolo lwa zayisa mu nzaki e selo kia salu olunga-lunganga e yinkanda-nkanda ya nkutakani. Diau adimosi mpe, e selo kia salu olunga-lunganga o nkanda ofwete sungamena vo e nkutakani yakala ye finkanda-nkanda yafwana ya Gostaria de Aprender Mais a Respeito da Bíblia? kimana vo awonso basadila yo.

²¹ Wantu ayingi beyangalelanga e tini kia Salu Kieto kia Kintinu kiyikanga vo “Adieyi Ovova Muna Sunzula e Yinkanda-nkanda.” Nga obakanga e ndandu za nkubika yayi muna longokanga e nsunzula za vevoka za yinkanda-nkanda? Ekuma olembi vaula efi ntangwa mun’elongi dia Nkand’a Nzambi dia esi nzo dia konso lumingu muna sadila e nsunzula zazi?

²² Toma Sadila Ekolo Kiaki kia Luyindulu: Nze Paulu wa ntumwa, mbula twasonga kwa Yave e mpila tuyangalelanga o “lukau luandi lulembi vovakana” muna lungananga mu salu ya mwanda yikubikilu omu kolo kiaki kia Luyindulu. Ediadi divavanga vo (1) lungana mu lumbu kia mvu kisundidi o mfunu, kia Nlekelo a Mfumu kina kia yá kia 28 kia Malusu, 2002; (2) sadisa ana bayambula samuna e nsangu zambote muna vutikila e ‘nzol’au yantete’ (Lus. 2:4; Roma 12:11); (3) tusadisa wan’eto ye konso nlongoki wa Nkand’a Nzambi muna kuyifwanisa nze nteleki alembi vubwa; ye (4) kuyivana mu salu kia umbangi una ufwene, nanga sala e salu kia kimviti a nzila a nsadisi mu Malusu ye ngonde zilanda.—2 Tim. 4:5.

²³ I sambu kieto kia kwikizi kiawonso vo yeto awonso twatoma lungana mu salu kia samuna e nsangu zambote za Kintinu mu kolo kiaki kia Luyindulu yo songanga o luyangalalu lweto muna mawonso kevanganga o Yave oku kwa yeto.