Aweyi Tusadila o Nkanda ‘Zola kwa Nzambi’ mu Longoka Nkand’a Nzambi yo Wantu.

1. Adieyi i kani diakubikilwa o nkanda “Zola kwa Nzambi”?

¹ Ekwe kiese twamona vava twatambula nkanda wampa, “Nusikila Muna Zola kwa Nzambi” muna Lukutakanu lwa Mvivu lwakala ye ntu a diambu vo: “Filwa kwa Mwand’a Nzambi”! Nze una twazayiswa, o nkanda wau wakubikwa mu kutusadisa twazaya yo zola nkanikinu mia Yave mia nkal’ambote. Ke ulonga malongi ma sina ma Nkand’a Nzambi ko. O nkanda wau ke tukaya wo mu salu kia nzo ye nzo ko.

2. Nkia mpila usadilwa o nkanda wau? Akinani bafwete wo longoka?

² O nkanda wau, usadilwa se nkanda w’ezole, avo nlongoki ofokwele longoka O Nkand’a Nzambi Adieyi Kieleka Kelonganga? Sungamena wo vo e ndungunuka ya wantu muna mambu ma mwanda, yaswaswana. Elongi difwete fidilwa mun’owu wa umbakuzi wa nlongoki. Vavang’o zaya kana vo o nlongoki otomene bakula dina nulongokele. Kuna diak’esambu, o nkanda wau ka ufwete sadilwa ko mu yantika longoka Nkand’a Nzambi yo wantu ana balongoka kala nkanda miayingi, kansi ke bekalanga yeto ko mu tukutakanu, aya ke bezolanga sadila ko e ludi kia Nkand’a Nzambi balongoka muna zingu kiau.

3. Adieyi tufwete vanga kele vo muntu tulongokanga yandi mu nkanda Sambila Nzambi?

³ Kele vo muntu olongokanga yandi nkanda Sambila Nzambi yo mona vo kapu yakete kaka isidi, nulenda fokola nkanda wau yo kunkasakesa katanganga nkanda “Zola kwa Nzambi” mun’elongi dia yandi kibeni. Ovo ke wau ko, dilenda kala diambote mu soba elongi mu nkanda ampa yo yantikila kuna lubantiku lwa nkanda. Nze una usadilwanga nkanda, Kelonganga Nkand’a Nzambi, e nkundikilu isadilwa kaka kele vo diambu divava toma sasilwa.

4. Adieyi tufwete vanga kele vo o nlongoki wavubwa una kafokwele ko longoka nkanda Kelonganga Nkand’a Nzambi ye nkanda, “Zola kwa Nzambi”?

⁴ Ovo nlongoki wavubwa una kafokwele ko longoka nkanda miau miole, olenda kwamanana longoka muna nkanda “Zola kwa Nzambi” yavana kefokola wo. Kana nkutu vo nlongoki wavubwa, olenda soneka ola nuvangidi ye nkumbu unkingwidi yo kuntanga nze nlongoki. E nteleki ona vayikidi yandi mpe, olenda soneka ola nuvangidi.

5. Aweyi tulenda sadila nkanda “Zola kwa Nzambi” mu sadisa nteleki wayambula salu kia umbangi?

⁵ Avo nkuluntu a Buka kia Salu kia Nkutakani uvene kiyekwa kia longoka Nkand’a Nzambi yo nteleki wayambula e salu kia umbangi, nanga olenda kulomba walongoka yandi eyaka kapu muna nkanda “Zola kwa Nzambi.” Ke dina mfunu ko mu longoka yau kolo kiandá. Kieleka, nkubika yambote tutambwidi ya nkanda wau wampa ukubikilu mu kutusadisa twasikila “muna zola kwa Nzambi.”—Yuda 21.