Zayisa “Ntemo a Nza” Kw’akaka
1. Nkia ntemo wazayiswa muna Nkand’a Nzambi? Ayeyi i nsungi ambote ya zayisa ntemo wau kw’akaka?
1 Muna Yesaya wa ngunza, Yave wavova vo: “Ankangu ana badiatidi muna tombe bamwene ntemo ayingi: awana bakedi mu nsi a kini kia fwa batemenw’o ntemo.” (Yes. 9:2) O “ntemo ayingi” wamoneka muna zingu kia Yesu Kristu wa Mwan’a Nzambi. E salu kia samuna nsangu zambote kasala ekolo kakala ova ntoto ye nluta mia kimenga kiandi kiakatula wantu muna tombe kia mwanda. O ntemo wau wamfunu kwa wantu ana bena mu tombe kia tandu kiaki. O Nlekelo a Mfumu ukutuvanang’elau diambote mu zayisa oma ma “ntemo a nza” kw’akaka. (Yoa. 8:12) Muna mvu waviokele, wantu ayingi basonga lukwikilu lwau muna kutuyikama mu lemvokela nkanikinu a Yesu: “I wau wuwu nuvanga muna luyindulu luame.” (Luka 22:19) Ekolo Luyindulu lwa mvu wau lufinamanga, aweyi tulenda zayisila kw’akaka o ntemo ayingi ketemesanga Yave?—Fili. 2:15.
2. Aweyi tulenda wokesela luyangalalu lweto muna kimenga kia lukulu? Nkia nluta ditwasa?
2 Songa Luyangalalu lwa Ntima: E nsungi a Luyindulu i ntangwa ambote ya yindula o zola basonga Yave yo Yesu muna vana kimenga mu kuma kia wantu. (Yoa. 3:16; 2 Kor. 5:14, 15) Muna vanga wo diwokesa luyangalalu lweto muna nsungi yayi yavauka. Selo ya Yave besiang’e ngolo muna vaulanga e ntangwa ya tanga yo badika e sono ya Nkand’a Nzambi yiyikanga oma ma Luyindulu muna Examine as Escrituras Diariamete. Oyindula e nzola ina kasonga Yave muna kubika lukulu, dikutuvana unkabu wa kunyikila vo Nzambi eto. O zaya e nsasa ya lukulu kwa yeto, diwokesa o zola kweto muna Nzambi ye muna Mwan’andi. Dikutufila mu kwamanana vanga luzolo lwa Nzambi.—Ngal. 2:20.
3. Aweyi tulenda songela luyangalalu lweto muna Luyindulu?
3 Avo tuwokese luyangalalu lweto muna nkubik’a Yave ya luvuluku, e kiese kieto muna Luyindulu kisambukila alongoki a Nkand’a Nzambi ye awana tukingulanga, yitu yeto, mfinangani zeto, akundi a sikola yovo a salu ye ana tubokela mu kwiza ku Luyindulu lwa lufwa lwa Kristu. (Luka 6:45) Muna kuma kiaki, tusia e ngolo mu bokela wantu awaya yo kubavana e mboka za Luyindulu zanietekwa muna kubasungamesa e lumbu kiaki. Muna lembi vilakana muntu, ampangi zakaka nkumbu besonekanga z’awana bebokela mu kwiza ku Luyindulu. Konso mvu bekudikilanga wantu ampa muna nkanda miau mia bokelela wantu. Avo tuvanga wawonso tulenda mu bokela akwa luzolo lwambote tusonga luyangalalu lweto kwa Yave wa Nzambi mu kuma kia “lukau luandi lulembi vovakana.”—2 Kor. 9:15.
4. Nki kilenda kutusadisa mu wokesa e salu kia umbangi muna ngonde ya Malusu ye Abidi?
4 Wokesa e Salu kia Umbangi: Nga olenda wokesa e salu kia umbangi muna ngonde ya Malusu ye Abidi? O samuna ‘o ntemo a nsangu zambote za nkembo a Kristu’ kw’akaka, ditwasa nsambu za Nzambi. O Yave una vo i nto a ntemo a mwanda, wakanikina vo: “Muna tombe mutemen’o ntemo.” (2 Kor. 4:4-6) Avo dilendakana, akuluntu bafwete kubika tukutakanu twa salu kia umbangi mu ola ye fulu yaswaswana. Bafwete yikama mpe ateleki ana bekala ye luzolo lwa sala ola zayingi muna salu kia umbangi. Ediadi dilenda kala vo sila umbangi muna mpambu za nzila, mu mene-mene, muna mazandu, mu telefone, ku masika yo mu fuku. Muna wokesa salu kiaku kia umbangi, sikidisa lutangu lwa ola zina lenda sala yo sia ngolo mu lungisa lo. Muna sadila Yave una ufwene, ateleki ayingi bekuyivananga mu salu kia kimviti a nzila a nsadisi.—Kol. 3:23, 24.
5. Nki’elau bebakanga ateleki wau vo ola za salu kia mviti a nzila a nsadisi zakululwa?
5 Nga Lenda Sala Nze Mviti a Nzila a Nsadisi? Mvu nsambwadi miviokele kala tuka kiakululwilwa e ola za salu kia kimviti a nzila a nsadisi. Ediadi disadisanga ateleki ayingi mu sala e salu kia kimviti a nzila a nsadisi. Nga wa sala kio kala? Akaka besalanga kio konso mvu. Muna nkutakani zakaka, ateleki ayingi bewizananga mu sala entwadi muna salu kiaki, ediadi ditwasanga nsambu zayingi muna nkutakani. Nga lenda kubama mu sala se mviti a nzila a nsadisi muna nsungi ya kiese ya Luyindulu? Wau vo ngonde ya Abidi yivwidi tumingu tanu, i nsungi ambote kw’akaka mu sala se mviti a nzila a nsadisi.
6. Nkia nkubika yambote yavangama?
6 Nga nkengi a zunga o kingula nkutakani aku muna ngonde ya Malusu yovo mu ngonde ya Abidi? Avo i wau, dikala s’elau diambote mpe mu sala se mviti a nzila a nsadisi. Nze una wateka zayiswa, mu mvu wau wa salu wa 2006, muna ngonde ina nkengi a zunga kekingulanga e nkutakani, awonso besala se mviti a nzila a nsadisi bekala muna kunku kiantete kia lukutakanu lwa aviti a nzila a ngonde ke ngonde. Kieleka, malongi ma mwanda mevewa muna lukutakanu lwalu mesadisa aviti a nzila ayingi a nsadisi mu kota mu salu kia mviti a nzila a ngonde ke ngonde. Vana ntandu, muna ngonde ya Malusu tukala ye kiese kia yantika sadila O Nkand’a Nzambi Adieyi Kieleka Kelonganga? mu sadisa wantu batemoka muna mwanda. Sia ngolo za yantika fila elongi dia Nkand’a Nzambi muna sadila nkanda wau wampa.
7, 8. (a) Adieyi dilenda kutusadisa mu toma kubama mu sala se aviti a nzila a nsadisi? (b) Salanga entwadi muna nzo aweyi dilenda sadisila? Aweyi esi nzo mosi babakila nluta muna salu kia mviti a nzila a nsadisi?
7 Muna sala ola 50 zilombwanga kwa mviti a nzila a nsadisi, sola programa olenda sadila muna salanga ola 12 konso lumingu. Mokena y’awana basala kala salu kia mviti a nzila a nsadisi ye ateleki akaka. Nanga dilenda kubakasakesa mu kuyikama. Muna toma kubamanga, ateleki ayingi bavubwa, tuka ambuta ye aleke, bemonanga vo ke diampasi ko mu sala e salu kiaki. Lomba lusadisu kwa Yave muna sambu. Avo dilendakana, toma kubama mu sala se mviti a nzila a nsadisi.—Mal. 3:10.
8 Esi nzo zayingi bemonanga vo muna toma kubama dilenda sadisa akaka muna nzo mu sala se aviti a nzila a nsadisi. Esi nzo mosi babaka e nzengo vo ateleki atanu bavubwa muna nzo basala se aviti a nzila a nsadisi. Ateleki wole aleke balembi vubwa basia ngolo mu wokesa e salu kiau kia umbangi. Nkia nluta babaka muna ngolo bavanga? Basoneka vo: “Eyayina yakala se ngonde ya kiese. Twakumika ngwizani eto muna nzo. Tuvutulanga matondo kwa Yave mu mpila katusambulwila.”
9. Aweyi tulenda temesena o ntemo eto muna nsungi a Luyindulu?
9 Nga salu kieto kia umbangi kia ngonde ya Malusu ye Abidi kia lukasakeso kikala? Nga kikutufila mu finama S’eto ezulu? Avo tuwokesa e salu kieto kia umbangi yo zola kweto muna Yave yo Mwan’andi tutambula nsambu zazi. Yambula nzengo zeto zakala nze za ntozi a nkunga ona wayimbila vo: “Mvana matondo kwa Yave muna nu’ame; ikunkembelela vana vena ndonga.” (Nku. 109:30) O Yave osambula e salu kieto muna nsungi a Luyindulu. Yambula twatemesa o ntemo kimana wantu ayingi bakatuka muna tombe yo vwa “ntemo a moyo.”—Yoa. 8:12.