Toma Lunga-lunga Ngindu Zaku
1. Aweyi i ntu a diambu wa lukutakanu lwa zunga lwa mvu wa salu wa 2013? Nki’ekani lukubikilu?
1 Yesu walonga alongoki andi bazola Yave yamuna nsi a ntim’au wawonso yo muna fulumwinu kiau kiawonso yo muna nyindu au wawonso. (Mat. 22:37, 38) O lukutakanu lwa mvivu lwa mvu wau ye lukutakanu lwa zunga lukubikilu mu siamisa kiwuntu kieto kia kati. O lukutakanu lweto lwa mvivu lwakala yo ntu a diambu vo: “Toma Lunga-Lunga Ntim’aku.” O lukutakanu lwa lumbu kimosi lwa mvu wa salu wa 2013 luna ye ntu a diambu vo: “Toma Lunga-Lunga e Ntona Zaku.” Vo i lukutakanu lwa zunga luyantika muna ngonde yikwiza luna ye ntu a diambu vo: “Toma Lunga-lunga Ngindu Zaku,” ubongelo muna Matai 22:37. O lukutakanu lwalu lukubikilu muna kutusadisa twafimpa e ngindu zeto y’ekani diasikila dia kembelela Yave.
2. Nkia yuvu tufwete vavila e mvutu muna lukutakanu lwa zunga?
2 Nkia Mambu Tuwá: Ekolo tuwá malongi ma lukutakanu lwa zunga, tufwete vav’o zaya e mvutu za yuvu ya mambu mama masina:
• Aweyi tulenda vengela ‘ngindu za wantu’?
• Adieyi dilenda kutusadisa mu katula e fukwa kifukanga e ngindu za mindembi kwikila?
• Nkia nyindu tufwete kala wau?
• Amieyi i nluta mia badika mambu mambote?
• Aweyi tulenda yambulwila vo Yave kafila ngindu zeto?
• Aweyi akala, akento, mase yo wana balenda sadisila mu kala ye zingu kia nzo yakiese?
• Aweyi tulenda kadila twakubama muna lumbu kia Yave?
• O kamina tuketo twa nyindu mieto muna salu aweyi disongele?
• Nkia nluta bevwanga awana belemvokelanga mana belongokanga?
3. Ekuma dinina o mfunu twakala lumbu yau yole ya lukutakanu lwa zunga yo toma tamba o matu yo sadila mana tulongoka?
3 Satana ovanganga mawonso muna yivisa e ngindu zeto. (2 Kor. 11:3) Muna kuma kiaki, tufwete lunga-lunganga e ngindu ye makani meto. Tufwete kwamanana tanginina nyindu a Kristu yo sia ngolo mu lembi bwa mu umpukumuni wa nza yayi yakondwa nsiku. (1 Kor. 2:16) Muna kuma kiaki, vanga nkubika kimana wakala lumbu yau yole ya lukutakanu lwalu lwa zunga. Toma tamba o matu. O lemvokela malongi mamfunu tuwa dikutusadisa mu sia e ngindu zeto muna salu kia Kintinu.—1 Pet. 1:13.