Mboka za Luyindulu Zikaywa mu Nza Yawonso!
1. Nkia salu kia mfunu kikubikilu mu nza yawonso una lumbu kia Luyindulu ka kilweke ko?
1 “I wau wuwu nuvanga muna luyindulu luame.” (Luka 22:19) Muna lemvokela nkanikinu wau, kina kia 30 kia ngonde Malusu ya mvu wa 2010, asambidi a Yave bekutakana vamosi ye akwa luzolo lwambote mu yindula lufwa lwa Yesu. Tuka kina kia 13 yakuna 30 kia ngonde Malusu, tukaya e mboka zamfunu za Luyindulu mu nza yawonso.
2. Nkia mpila tulenda kayila mboka za Luyindulu?
2 Mpila Tusadila Kio: Vava otambika e mboka kwa muntu yo kunsonga e fwaniswa ina vana fukwa, vova vo: “Muna fuku wa kia 30 kia ngonde Malusu, ndonga mu nza yawonso bekutakana mu yindula lufwa lwa Yesu. Obokelo y’esi nzo aku nwiza ku lukutakanu lwalu lwamfunu. Lenda bokela mpe akundi aku. Soneka e ola ye fulu kivangamena Luyindulu.” Avo dilendakana, tanga e sono kia Luka 22:19 kisonganga o nkanikinu a luyindulu. Wau vo tufwete kaya mboka zazi muna zunga kiawonso kia nkutakani eto, kuvovi kwayingi ko mu lembi fwasa ntangwa.
3. Akinani tulenda bokela ku Luyindulu?
3 Avo zunga kia nkutakani eno kianene, akuluntu balenda vana luludiku lwa sisa mboka muna nzo ke ziwanuka wantu ko muna nkingula antete. Avo dilendakana, nulenda kaya yinkanda-nkanda kumosi ye mboka za Luyindulu. Kuvilakani ko bokela akwa luzolo lwambote ana okingulanga, alongoki aku a Nkand’a Nzambi, akundi a salu, a sikola, yitu yaku, mfinangani ye wantu akaka ana zeye.
4. Adieyi tulenda vanga avo tuyangalelang’o zola kasonga Yave mu kubika lukulu?
4 Kubama mu Sala Una Ufwene: Nsungi a Luyindulu i ntangwa yambote mu wokesa salu kieto. Nga lenda kubika salu yaku kimana wasala se mviti a nzila a nsadisi? Nga mwan’aku yovo nlongoki aku a Nkand’a Nzambi mu nungunuka kena muna kimwanda? Avo i wau, mokena ye akuluntu kimana bafimpa kana vo balenda kifwanisa se ateleki alembi vubwa yo kutuyikama mu salu kiaki. Oyangalela o zola kasonga Yave mu kubika lukulu, difwene kutufila mu bokela akaka twakala vamosi muna Luyindulu.—Yoa. 3:16.