Kina kia 2 kia Abidi Tuyantika Kaya Mboka za Luyindulu
1. Nkia lumbu tukaya e mboka za Luyindulu lwa mvu wau? E salu kiaki kia kaya mboka nkia mfunu kina?
1 Tuka kina kia 2 yakuna kia 17 kia ngonde Abidi, tukaya e mboka za Luyindulu lwa lufwa lwa Kristu luna vo i lukutakanu lulutidi o mfunu muna mvu. Muna mvu wavioka, ndonga batambulwila e mboka za Luyindulu. Kasikil’owu, muna lumbu kia Luyindulu nkento mosi wabokela kuna evula yo vova vo: “Vava ndweke mu nzo nsolwele mboka kuna nsi a kielo. Nzolele kwenda kuna Luyindulu, kansi kizeye ola luyantika ko.” O mpangi wansasila vo e ola ye fulu kina muna mboka. O nkento wasia nsilu vo, “Kwenda ikwenda kuna lukutakanu lweno muna fuku!”
2. Adieyi tuvova vava tukaya e mboka?
2 Una Tusadila Kio: Wau vo ke tukala ye lumbu yayingi ko mu kaya e mboka zazi mu zunga kiawonso, diamfunu twakufikanga e moko yeto. Tulenda vova vo: “Kiambote kiaku! Tuzolele vana mboka yayi kwa esi nzo aku mu kuma kia lukutakanu lusundidi o mfunu muna konso mvu. O lukutakanu lwalu luvangama mu nza yawonso kina kia Lumingu kia 17 kia ngonde Abidi. [Tambika mboka kwa mwisi nzo.] Kiaki i lumbu tuyindula lufwa lwa Yesu. Elongi dia Nkand’a Nzambi dia ngovo divovwa ko disonga nluta tulenda vwa muna lukûlu lwa Kristu. E ola ye fulu kivangamena lukutakanu lwalu mu zunga kieto kina mu mboka yayi.”
3. Aweyi tulenda bokela wantu ayingi?
3 Avo zunga kia nkutakani kianene, akuluntu balenda vana luludiku lwa sisa mboka muna nzo zilembi wanuka wantu yo sisa zo va fulu kiambote. Sia sungididi kia bokela wantu ana okingulanga, yitu, akw’aku a salu ye a sikola ye wantu akaka ozayane yau. Vava okaya mboka muna nsuka lumingu, avo dilendakana kaya mpe Eyingidilu ye Despertai! Nga lenda sala se mviti a nzila a nsadisi muna ngonde Abidi kimana wakivana mvimba muna salu kiaki?
4. Ekuma tuzolela vo akwa luzolo lwambote bakala muna Luyindulu?
4 Ekwe umbangi wambote betambula awana bekala muna Luyindulu! Bezaya vo Yave zola kwampwena kasonga muna vana lukûlu. (Yoa. 3:16) Belongoka una Kintinu kia Nzambi kitwasila nsambu kwa wantu. (Yes. 65:21-23) Muna zaya mambu makaka bekasakeswa bamokena y’asongi a fulu mu lomba elongi dia Nkand’a Nzambi. Tusambanga kimana akwa ntima miansongi ayingi batambula mboka yo kutuyikama muna Luyindulu.