Vutulanga Matondo mu Kuma kia Lukau Lwampwena lwa Nzambi
1. Ekuma tuvutulwilanga matondo kwa Yave?
1 O lukulu lwa Mwan’andi anzolwa, i lukau lusundidi muna tukau twambote twa Yave. (Yak. 1:17) Lukau lwalu nsambu zayingi lwatwasa yo ziula nzila a luloloko lwa masumu meto. (Ef. 1:7) Muna kuma kiaki, tufwete vutulanga matondo. Muna lumbu kia Luyindulu, tukalanga ye ntangwa ya badika lukau lwalu luantalu.
2. Aweyi tulenda songela luyangalalu muna lukulu y’esi nzo eto?
2 Songa Luyangalalu: Muna songa luyangalalu lwaku y’esi nzo aku vava kifinama Luyindulu lukala kina kia 30 kia ngonde a Malusu, nuvaulang’e ntangwa muna Fuku wa Nsambila ya Esi Nzo mu fimpulula oma ma lukulu. Konso lumbu nutanganga mpe e sono ya Nkand’a Nzambi ya Luyindulu. Yindula mpe nluta o vwanga mu kuma kia lukulu, nze ngwizani aku yo Yave, y’akaka ye vuvu kiaku kia kusentu. Oyangalela mpe muna longoka e nkunga miole miampa miyimbilwa muna Luyindulu, nkunga 8 ye 109.—Nku. 77:12.
3. Aweyi tulenda vutulwila matondo mu kuma kia lukulu?
3 Una Tulenda Vutulwila Matondo: O luyangalalu lweto mu kuma kia lukulu lulenda kutufila mu samuna oma ma Yave kw’akaka yo zola kwampwena kasonga muna tuma Mwan’andi. (Nku. 145:2-7) Muna ngonde a Malusu, Abidi ye Mayu, esi nzo zayingi bekubikang’e salu yau kimana mosi mu yau kasala se mviti a nzila a nsadisi. Kele vo ka dilendakana ko, nga lenda ‘sumba e ntangwa’ mu wokesa e salu kiaku kia umbangi? (Ef. 5:16) O luyangalalu lweto lulenda kutufila mpe mu sadisa akaka bakala yeto mu Luyindulu. (Lus. 22:17) Soneka nkumbu za wantu obokela, nze alongoki a Nkand’a Nzambi, akwa luzolo lwambote ana okingulanga, yitu yaku, akundi a salu ye mfinangani zaku. I bosi, ukivana emvimba muna salu kia mpaika mu buka mu kaya mboka za Luyindulu.
4. Nkia mpila tulenda sadila nsungi a Luyindulu una ufwene?
4 E nsungi a Luyindulu ilenda kutuvana elau dia songa kwa Yave vo tuyangalelanga lukau kavana kwa wantu. Yambula twasadila nsungi yayi mu songa luyangalalu yo vutula matondo muna lukulu ye “umvwama wa Kristu, owu ke usatakani.”—Ef. 3:8.