Kuvidisa Elau Diadi ko dia Songa Luyangalalu?
1. O Luyindulu nkia lau lukutuvana?
1 O Luyindulu lukala kina kia 14 kia Abidi, lukutuvana elau dia songa luyangalalu yo vutula matondo muna wete wa Yave. O lusansu luna muna Luka 17:11-18 lusonganga una Yave yo Yesu bebadikilanga e fu kia vutula matondo. Diankenda vo muna wantu kumi bawukwa muna kimbevo kia wazi, mosi kaka wavutula matondo. Kuna sentu, o lukau lwa lukûlu luwuka yimbevo yawonso yo twasa moyo a mvu ya mvu. Kalukatikisu ko vo lumbu yawonso, tukwamanana vutula matondo kwa Yave muna nsambu zazi. Kansi, aweyi tulenda songela luyangalalu lweto muna tumingu tulanda?
2. Aweyi tulenda songela luyangalalu lweto muna lukûlu?
2 Kala ye Fu kia Vutula Matondo: E fu kia vutula matondo mu ntima kitukanga. Muna kutusadisa twawokesa luyangalalu lweto muna lukûlu, vena ye nkubika ya tanga e sono ya Nkand’a Nzambi ya Luyindulu. Olenda yo solola muna finkanda, Fimpanga e Sono Lumbu Yawonso ye muna manaka. Ekuma olembi badikila e sono yayi kumosi ye esi nzo aku? O vanga wo diwokesa luyangalalu lweto muna lukûlu. Ediadi dilenda vanga diambu muna mavangu ye kiwuntu kieto.—2 Kor. 5:14, 15; 1 Yoa. 4:11.
3. Aweyi tulenda songela luyangalalu lweto muna nsungi a Luyindulu?
3 Vutulanga Matondo: E fu kia vutula matondo mu mavangu kisongelwanga. (Kol. 3:15) O luyangalalu kasonga o nkwa wazi, lwamfila mu vava Yesu yo kumvutula matondo. Kalukatikisu ko vo e mpil’esivi kawukilwa, yamfila mu zayisa kw’akaka masivi mama ye kiese kiawonso. (Luka 6:45) Nga luyangalalu lweto muna lukûlu lukutufila mu wokesa vema kweto muna salu kia kaya e mboka za Luyindulu? O sala se mviti a nzila a nsadisi yovo wokesa e salu kieto kia umbangi muna nsungi a Luyindulu, i mpila yankaka tulenda songela luyangalalu lweto. Muna fuku wa Luyindulu, o luyangalalu lwa nsia ntima lukutufila mu vana e ngizilu ambote kw’awana bekwiza lungana yeto yo vana mvutu za yuvu yau.
4. Adieyi tulenda vanga mu Luyindulu lwalu muna lembi kuyibanza?
4 Nga lwalu i Luyindulu lwansuka? (1 Kor. 11:26) Ka tuzeye ko. Kansi tuzeye wo vo avo Luyindulu lwalu luviokele, tuviokese elau dia vutula matondo kwa Yave. Nga osadila elau diadi? Yambula vo e mvovo mia luyangalalu mia nua mieto ye mbalu za ntima mieto zatufila mu kembelela Yave wa Mvani a lukûlu.—Nku. 19:14.