UNA OLENDA YAMBULWILA E FU KIA MENGA AKAKA

1 | Kusie Mpambula Ko

Bibila kivovanga vo:

“Nzambi ke sianga mpambula ko, kansi muna zula yawonso, [konso] ndiona okumvumina yo vanga mambu mansongi otondwa kwa yandi.”—MAVANGU 10:34, 35.

E sono kiaki aweyi kisongele?

O Yavea wa Nzambi ke talanga nsi eto ko ngatu se kieto kia nitu yovo fu yeto ya kisi nsi. Kansi osianga e sungididi muna kiwuntu kieto, i sia vo, e mpila muntu twina muna kati. E Bibila kivovanga mpe vo “o muntu ndose ketalanga, kansi o Yave ntima ketalanga.”—1 Samuele 16:7.

Aweyi e sono kiaki kilenda kusadisila?

Kanale vo ke tulendi zaya ntim’a muntu ko nze una Nzambi kevanganga, tulenda kweto kuntanginina yo badikila wantu una Nzambi kekubabadikilanga. Vanga e ngolo za sia sungididi kwa muntu mosi ke kwa buka kia wantu ko. Avo omwene vo ngindu zabendomoka okalanga zau mu kuma kia wantu ankaka, nze wantu a nsi yankaka yovo wantu a se kia nitu kiaswaswana, samba kwa Nzambi kimana kasadisa wakatula e ngindu zazi. (Nkunga 139:23, 24) Avo olombela kwa Yave kavana o nkuma wa venga e fu kia sia mpambula, oyandi owá e sambu kiaku ye okusadisa.—1 Petelo 3:12.

a Yave i nkumbu a Nzambi.—Nkunga 83:18.

“Kiasidi vuanda vamosi ko kuna luvuvamu yo mundele . . . Tuka wauna yamona vo nkotele kikilu mu kintwadi kia wan’a ngudi omu nza yawonso.”—TITUS

Lusansu lwa—TITUS

Wayambula e Fu kia Menga Akaka

Titus wayikotesa mu buka kia wantu banuananga mu kuma kia nsiku miasianga e mpambula vana kati kwa wantu baswaswana muna se kia nitu. Wavova vo: “Twayendanga mu fulu yayingi muna mbanza eyi yakala vo e ndombe ke bazolakananga ko, nze hotele ye nzo za makinu, kimana twayangumuna e nkindu.” Yandi kibeni Titus wavova vo fu kia menga akaka kakala kiau, ediadi diamfilanga mu vanga mambu mansoki. Wakudikila mpe vo: “Vava yazonzanga ye konso muntu, kiakala yakala yo nkento, mono i muntu antete yawandanga.”

Titus wayantika soba vava kayantika longoka e Bibila ye Mbangi za Yave. Vava katanga e Bibila, mana katanga masoba e ngindu zandi. E diambu diatoma simba o ntim’andi i ungunza ulungana kuna ntwala owu uvovanga vo: “O lufwa ke lukala diaka ko, ngatu kala diaka dilu, yovo kazu ngatu mpasi.”—Lusengomono 21:3, 4.

Kuna lubantiku, diamapsi diakala kwa Titus mu yambula e fu kia menga akaka. Wavova vo: “Diampasi kikilu diakala mu soba e ngindu ye mavangu mame.” Kansi, dina kalongoka muna sono kia Mavangu 10:34, 35 diatoma kunsadisa, e sono kiaki kivovanga vo “Nzambi ke sianga mpambula ko.”

Ediadi nkia nluta diantwasila? Titus wavova vo: “Vava yamona o zola besongaziananga e Mbangi za Yave kiakala nkia se kia nitu kena kiau o muntu, ediadi diankwikidisa vo e nsambil’au yaludi kikilu. Vitila yavubwa, Mbangi a Yave mosi una vo mundele wambokelesa kuna nzo andi twadila vamosi. Ediadi diakala nze ndozi kwa mono. Kadi kiasidi vuanda vamosi ko yo muntu una vo mundele, kansi owau yakala ye lau dia dila vamosi yo mundele muna nzo andi. Tuka wauna yamona vo nkotele kikilu mu kintwadi kia wan’a ngudi omu nza yawonso.”