UNA OLENDA YAMBULWILA E FU KIA MENGA AKAKA

3 | Yambula Menga Akaka Muna Ngindu

Bibila kivovanga vo:

“Nuvanguluka muna soba nyindu mieno, kimana nuazaya owu wina luzolo lwa Nzambi, lwambote, lwatondakana ye lwalunga.”—ROMA 12:2.

E sono kiaki aweyi kisongele?

O mambu tuyindulanga mfunu mena kwa Nzambi. (Yeremiya 17:10) Mayingi tufwete vanga, ke yambula kaka mvovo ko ye mavangu mesonganga vo akaka tumenganga. E fu kia menga akaka mu nyindu yo ntima kiyantikilanga. Muna kuma kiaki, tufwete venganga e fu kia yindula mambu malenda kutufila mu menga akaka. Muna mpila yayi, tulenda ‘vanguluka’ yo yambula e fu kia menga akaka.

Aweyi e sono kiaki kilenda kusadisila?

Toma kuyifimpa wazaya kana vo aweyi obadikilanga wantu akaka, musungula awana bena ye se kia nitu kiaswaswana ye kiaku yovo ana batuka mu nsi zankaka. Ukuyivula: ‘Aweyi ikubabadikilanga? Nga ikubabadikilanga mun’owu wa mana nzeye mu kuma kiau? Yovo muna ngindu zame mpambula isianga?’ Venga tala e nsangu, filme ye nsaka zivovelanga e fu kia menga akaka ye mavangu mansoki.

E Diambu dia Nzambi dilenda katula muna ntima ye ngindu zeto e fu kia menga akaka

Dialudi vo, ezak’e ntangwa diampasi mu toma fimpa e ngindu yo makani meto una ufwene. Kansi, e Diambu dia Nzambi dilenda kutusadisa mu “sengomona e ngindu ye makani ma ntima” mieto. (Ayibere 4:12) Muna diadi, kwamanana longoka e Bibila. Tezanesanga e ngindu zaku ye mana olongokanga muna Bibila, vanga e ngolo za wizanesa e ngindu zaku ye mana e Bibila kilonganga. E Diambu dia Nzambi dilenda kutusadisa mu “bangula e nzo zangolo,” i sia vo, katula fu kia menga akaka eki kina muna ngindu ye ntima mieto.—2 Korinto 10:4, 5.

Lusansu lwa—STEPHEN

Wasoba e Ngindu Zandi

O Stephen ye yitu yandi bamengwanga kwa mindele. Muna kuma kiaki, watambulwila kota mu buka kia mbumba kia nuananga muna sikidisa nsiku mia unsongi mu kuma kia wantu. Kansi, vakala ye ntangwa ina yandi kibeni kasonga e fu kia menga akaka. Wavova vo: “Lumbu kimosi, omono ye akundi ame twatala filme yavovelanga e mpasi bamweswanga abundu a nsi za Africa kuna Estados Unidos. Twafunga makasi, vana vau twayiya e lekwa ya aleke bakala vo mindele muna nzo twatadilanga e filme. I bosi, twayenda vava e mfinangani ana bakala vo mindele kimana twabawanda.”

Kansi, e ngindu za Stephen zasoba emvimba vava kayantika longoka e Bibila ye Mbangi za Yave. Wavova vo: “Wau vo fu kia sia mpambula yakala kiau, o mambu yamona vana kati kwa Mbangi za Yave matoma kunsivikisa kibeni. Kasikil’owu, vava Mbangi a Yave mosi wakala vo mundele kayenda mu nkangalu, wasisa wan’andi kwa esi nzo mosi bakala vo ndombe kimana babalunga-lunga. Kuna diaka e sambu, esi nzo mosi bakala vo mindele, banata nleke mosi wakala vo ndombe kimana kazingila kuna nzo au wau vo kakala ye fulu kia zingila ko.” O mambu mama mafila Stephen mu kwikila vo e Mbangi za Yave i kintwadi kia wana-ngudi kina o Yesu kayika kikala vana kati kwa Akristu akieleka.—Yoane 13:35.

Nki kiasadisa Stephen mu yambula mavanu mansoki ye fu kia menga akaka? Sono kia Roma 12:2 kiansadisa. Wavova vo: “Yabakula vo mfwete soba e ngindu zame. Diavava vo yayambula mavangu mame mansoki yo longoka vo o kadila mu luvuvamu i mpila yambote ya zingila.” Se mvu 40 miviokele kala tuka kayambulwila e ngindu za menga akaka, owau una ye zingu kiakiese.