Yambula o Zola Kwafila mu Kwamanana Samuna e Nsangu Zambote!

1. Nkia mambu twalongoka muna lukutakanu lwa mvu wa 2023?

MUNA lukutakanu lwa mvu wa 2023,a twakala ye kiese kia wá mambu masingikwa mu mana tukwikilanga ye tuzayisu twakiese mu kuma kia salu kieto kia samuna e nsangu zambote. Kasikil’owu, twalongoka vo wantu ankaka nanga bekala ye lau dia yikama o nkangu a Yave kana nkutu kuna nim’a lufwasu lwa Babele Anene. Twatambula mpe luzayisu lwasonga vo tuka muna ngonde a Setemba ya mvu wa 2023, ateleki a Kintinu ke belombwa diaka ola za salu kia umbangi ko. Nga nsobani zazi zisonganga vo owau e salu kia samuna e nsangu zambote ke kina diaka mfunu ayingi ko? Ke wau ko.

2. E salu kieto kia samuna e nsangu zambote, ekuma kifwete sadilwa mu nzaki ekolo e lumbu iviokanga? (Maku 13:10)

² Ekolo e lumbu iviokanga, dimonekanga vo e salu kieto kia samuna e nsangu zambote kifwete salwa mu nzaki. Ekuma? Ekuma kadi, e ntangwa isidi yandwelo kikilu. Tala dina Yesu kasakula mu kuma kia salu kia samuna e nsangu zambote mu lumbu yambaninu. (Tanga Maku 13:10.) Muna nsangu zambote zasoneka Matai, Yesu wavova vo e nsangu zambote zisamunua mu nza yawonso muna umbangi kwa zula yawonso, i bosi “e mbaninu” ikwiza. (Mat. 24:14) E mbaninu iyikwanga ovava i mfoko a nza yawonso yambi ya Satana. E “lumbu ye ola” ina o Yave kasikidisa muna lungisa e diambu diadi, ifinamene. (Mat. 24:36; 25:13; Mav. 1:7) Konso lumbu kiviokanga, tufinamanga muna kolo kiakina. (Roma 13:11) Muna kuma kiaki, vitila e mbaninu yiza, tufwete kwamanana samuna e nsangu zambote.

3. Nki kikutufilanga mu samuna e nsangu zambote?

³ Tala e kiuvu kiamfunu tufwete kukiyuvulanga mu kuma kia salu kieto kia samuna e nsangu zambote: Ekuma tusamunuinanga e nsangu zambote? Muna mvovo miankufi tulenda vova vo zola kukutufilanga. Mawonso tuvanganga muna salu kia samuna e nsangu zambote i mu kuma kia zola kweto, i sia vo, zola kweto muna nsangu zambote, zola kweto muna wantu, ye edi disundidi o mfunu, zola kweto muna Yave ye nkumbu andi. Yambula twafimpa dimosi-dimosi muna mambu mama.

TUSAMUNANGA KADI TUZOLANGA E NSANGU ZAMBOTE

4. Adieyi tuvanganga vava tutambulanga e nsangu za kiese?

⁴ Nga olenda sungamena una wamona vava watambula e nsangu za kiese? Nanga nsangu za luwutuku lwa mwana muna kanda diaku yovo nsangu za salu kiambote kina wavuanga o mfunu. Kalukatikisu ko vo diasazu diakala mu zayisa e nsangu zazi za kiese kwa yitu yaku ye akundi aku. Nga i diau mpe diavangama vava wawá e nsangu zambote za Kintinu kia Nzambi zina vo i nsangu zisundidi o wete?

5. Aweyi wamona vava walongoka e ludi kia Diambu dia Nzambi mu nkumbu antete? (Tala mpe mafoto.)

⁵ Yindula una wamona vava walongoka e ludi kia Diambu dia Nzambi mu nkumbu antete. Walongoka vo e Se diaku dia zulu zola kekuzolanga. Yave ozolele vo wakala mosi muna asambidi andi. Nzambi wasia nsilu vo e mpasi zawonso zifokoka emvimba ye olenda kala ye vuvu vo muna nz’ampa owanana diaka ye yitu ye akundi aku ana bafwa ye mankaka mpe. (Maku 10:29, 30; Yoa. 5:28, 29; Roma 8:38, 39; Lus. 21:3, 4) E ludi kiaki kiatoma simba o ntim’aku yo kuyangidika. (Luka 24:32) Watoma zola mana walongoka. Muna diadi, wamona vo diambote wayantika zayisa e ludi kiaki kw’akaka.—Tezanesa ye Yeremiya 20:9.

6. Adieyi olongokele muna nona kia mpangi Ernest yo Rose wa nkaz’andi?

⁶ Tala nona kimosi. Mpangi mosi a yakala una ye nkumbu Ernest,b tezo kia mvu kumi kakala miau vava se diandi kafwa. Ernest wavova vo: “Yakiyuvulanga: ‘Nga o papa wele ku zulu? Nga ofwidi yakwele mvu ye kevutuka diaka zinga ko?’ Yamwenanga kimpala awana bakala ye mase mau.” Ernest ntangwa zawonso wayendanga kuna ziami yo fukama vana ziami kia se diandi. I bosi wasambanga vo: “Dodokolo, e Nzambi, nzolele zaya kana akweyi kena o papa.” Vioka mvu 17 tuka se diandi kafwila, Ernest wavewa e lau dia longoka e Bibila ye watambulwila. Wakala ye kiese kiayingi vava kalongoka vo amafwa ke bazeye diambu ko, dina nze yau bena ku tulu. E Bibila kisianga o nsilu vo vekala yo lufuluku kuna sentu. (Kim. 9:5, 10; Mav. 24:15) Kuna kwalanda, Ernest wasolola e mvutu za yuvu ina yantokanesanga mu mvu miayingi. Watoma yangalala mu kuma kia ludi kia Bibila kina kalongoka. O Rose wa nkaz’andi wanyikama muna longoka e Bibila, yandi mpe watoma yangalela e nsangu za Kintinu kalongoka. Muna mvu wa 1978 yau awole bavubwa. Kuna vema kwawonso basamunanga kwa yitu yau, akundi ye akaka o tusalu twa ludi kina balongokanga. Nkia nluta batambula? Mpangi Ernest yo Rose wa nkaz’andi basadisa vioka 70 lwa wantu mu nungunuka muna kimwanda yo vubwa.

7. Adieyi divangamanga avo e ludi kia Bibila kisimamene mianzi mu ntima mieto? (Luka 6:45)

⁷ Kieleka, avo ludi kia Bibila kisimamene e mianzi mu ntima mieto, ke tulenda butama ko. (Tanga Luka 6:45.) Tumona nze una bamona alongoki a tandu kiantete ana bavova vo: “Oyeto, ke tulendi yambula vova mana twamona yo wá ko.” (Mav. 4:20) Wau vo tutoma zolanga e ludi, tukalanga ye tima dia samuna kio kwa wantu ayingi avo dilendakana.

TUSAMUNANGA E NSANGU ZAMBOTE KADI TUZOLANGA WANTU

8. Nki kikutufilanga mu samuna e nsangu zambote kwa akaka? (Tala e babu, “Zolanga o Wantu—Ubakitula se Alongoki”) (Tala mpe e foto.)

⁸ Nze Yave yo Mwan’andi, oyeto mpe tutoma zolanga o wantu. (Nga. 8:31; Yoa. 3:16) Nkenda kikilu tumonanga mu kuma kia awana ‘ke bazeye Nzambi ko’ ye awana ‘ke bena ye vuvu ko.’ (Efe. 2:12) Mu kuma kia mambu mampasi benuananga mau, balenda mona nze yau bena mu wulu diakoboka. Kansi, oyeto tuna yo nsinga una tulenda kubatombolwela muna wulu diodio, i sia vo, tuna ye nsangu zambote za Kintinu. O zola ye nkenda tumonanga mu kuma kia wantu awaya, zikutufilanga muna kubasamunuina e nsangu zambote. E nsangu tusamunanga zilenda kubavana e vuvu kiasikila yo kubasadisa mu solola e mpila zingu kisundidi o mfunu tuka owau. Zilenda kubasadisa mpe mu kala ye lau dia vua “moyo una vo moyo kikilu,” i sia vo, moyo a mvu ya mvu muna nz’ampa ya Nzambi.—1 Tim. 6:19.

9. Nkia lulukisu tuvananga kwa wantu mu kuma kia kusentu? Ekuma? (Yezekele 33:7, 8)

⁹ O zola kweto muna wantu kukutufilanga mpe muna kubalukisa mu kuma kia mbaninu a nza yayi yambi ifinamene. (Tanga Yezekele 33:7, 8.) Nkenda kikilu tumonanga mu kuma kia akweto ye yitu yeto ana bena vo ke Mbangi za Yave ko. Ndonga muna yau e mpila benatinanga e zingu kiau isonganga vo ke bazeye wo ko vo vonza kiampwena kifinamene, i sia vo, “mpasi zayingi zina ke zateka kala ko tuka kiasemenua e nza yamu wau, ke zisinga kala diaka ko.” (Mat. 24:21) Tuzolele vo bazaya mana mebwa muna kolo kia mfundisa. Entete nsambila za luvunu zifwaswa, i bosi e vita ya Armangedo ifwasa e nza yawonso yambi. (Lus. 16:14, 16; 17:16, 17; 19:11, 19, 20) Tusambanga kimana wantu ayingi batambulwila lulukisu lwalu yo kutuyikama muna nsambila avelela tuka owau. Adieyi tuvova mu kuma kia awana ke bazolele lemvokela lulukisu lwalu ko kumosi ye yitu yeto?

10. Ekuma tufwete kwamanena lukisila o wantu mu nzaki zawonso?

¹⁰ Nze una twalongokele muna longi diaviokele, nanga Yave ovuluza wantu ana beviluka o ntima vava bemona lufwaswa lwa Babele Anene. Avo i wau, diambote twakwamanana lukisa wantu mu nzaki zawonso. Badika diambu edi: Mana tukubazayisa owau malenda kubasungamesa diambu kuna sentu. (Tezanesa ye Yezekele 33:33.) Nanga beyindula lulukisu luna bawá yo kubafila mu kutuyikama muna nsambil’aludi wau vo bekala ye fintangwa. Nze una kavanga o nlundi abakami muna mbanz’a Filipo ona waviluka o ntima vava kamona e “nzakama yangolo ya ntoto,” akaka ana ke betambulwilanga e nsangu zambote ko owau, nanga beviluka o ntima vava wantu a nza bezakama mu kuma kia lufwasu lwa Babele Anene.—Mav. 16:25-34.

TUSAMUNANGA E NSANGU ZAMBOTE KADI TUZOLANGA YAVE YE NKUMBU ANDI

11. Aweyi tuvaninanga nkembo, zitu ye ngolo kwa Yave? (Lusengomono 4:11) (Tala mpe mafoto.)

¹¹ E kuma kisundidi o mfunu tusamunuinanga e nsangu zambote i zola kweto muna Yave wa Nzambi ye nkumbu andi avauka. E salu kia samuna e nsangu zambote i mpila tuvaninanga o nkembo kwa Nzambi ona tuzolanga. (Tanga Lusengomono 4:11.) Tukwikilanga ye nsi a ntima yawonso vo Yave wa Nzambi ofwene tambula o nkembo yo zitu ye ngolo za asambidi andi. Tukumvananga o nkembo vava tusamunanga kwa kaka e mambu mesonganga e ziku vo yandi “wasema lekwa yawonso” ye muna luzolo lwandi katusemena. Tukumvananga e ngolo zeto vava tusadilanga e ntangwa eto, nkuma eto ye mavua meto muna salu kia umbangi mun’owu wa tezo kieto. (Mat. 6:33; Luka 13:24; Kol. 3:23) Muna mvovo miankufi, tuyangalelanga samuna kwa akaka e mambu ma Nzambi eto ona tuzolanga. Tuyangalelanga mpe zayisa kwa akaka e nkumbu andi ye nsas’andi. Ekuma?

12. Aweyi tuzitisilanga e nkumbu a Yave muna salu kia umbangi?

¹² O zola kweto muna Yave kukutufilanga mu zitisa e nkumbu andi. (Mat. 6:9) Ediadi disongele vo tuzolanga zayisa kwa wantu vo mana Satana kavova mu kuma kia nkumbu a Yave ma luvunu. (Tuku 3:1-5; Yobi 2:4; Yoa. 8:44) Muna salu kia umbangi, tukalanga ye tima dia zayisa kwa awana bekalanga ye luzolo lwa kutuwá, kana nani i Yave ye mambu mana kezolanga. Tuzolele vo wantu awonso bazaya vo e fu kiandi kisundidi i zola, mu mpila ansongi ye ndungidi keyadilanga. Tuzolele bazaya mpe vo ke kolo ko e Kintinu kiandi kifokola e mpasi yo twasa luvuvamu ye kiese kwa kanda dia wantu. (Nku. 37:10, 11, 29; 1 Yoa. 4:8) Vava tuzayisanga mambu mama kwa akaka muna salu kia umbangi, nkumbu a Yave tuzitisanga. Tukalanga mpe ye kiese mu zaya vo tuzingilanga e ngwizani ye nkumbu Mbangi za Yave ina tuyikilwanga. Mu nkia mpila?

13. Ekuma tuyangalelanga yikilwa vo Mbangi za Yave? (Yesaya 43:10-12)

¹³ Yave watusola kimana twakala se “mbangi” zandi. (Tanga Yesaya 43:10-12.) Muna mvu miavioka nkanda mosi watuka kwa Selo Yambuta wavova vo: “O zitu usundidi konso muntu omu yeto kalenda tambula i yikilwa vo Mbangi a Yave.”c Ekuma? Badika nona kimosi. Avo ofundilu kuna mbazi a nkanu vo diambu diambi ovangidi, nani osola kimana kakala se mbangi aku? Kalukatikisu ko vo osola muntu ona otomene zaya, ona obundanga e vuvu ye una ye nkumbu ambote kimana o wantu bakwikila muna kimbangi kiandi. Vava Yave katusola kimana twakala se Mbangi zandi, wasonga vo otomene kutuzaya ye okutubundanga e vuvu vo tulenda tá kimbangi kiakieleka vo yandi kaka i Nzambi aludi. Kieleka, dia luyangalalu kikilu kwa yeto mu yikilwa Mbangi zandi. Tuzolele sadila malau mawonso tuwanananga mau muna zayisa kwa akaka e nkumbu andi yo vunisa mambu mawonso maluvunu o wantu bevovanga mu kuma kiandi. Vava tuvanganga mawonso mama, tusonganga vo tuzingilanga e ngwizani ye nkumbu eto eyi tuyangalelanga, i sia vo, Mbangi za Yave.—Nku. 83:18; Roma 10:13-15.

TUKWAMANANA SAMUNA E NSANGU ZAMBOTE YAKUNA MBANINU

14. Nkia mambu mambote mekutuvingilanga kuna sentu?

¹⁴ Ekwe mambu mambote mekutuvingilanga kuna sentu! Muna nsambu za Yave, tuna ye vuvu vo wantu ayingi besinga tambulwila e ludi vitila mpasi zayingi zayantika. Tuna mpe ye vuvu vo kana nkutu mu kolo kina e tombe kisaka muna lusansu lwa wantu, i sia vo muna kolo kia mpasi zayingi, vekala ye wantu ayingi bebembola e nzila za nza ya Satana ye bekutuyikama muna kembelela Yave.—Mav. 13:48.

15-16. Nkia salu tukwamanana sala? Yamu nkia ntangwa?

¹⁵ Ekolo tuvingilanga e mambu mama, tufwete vanganga e ngolo. Tuvuidi e lau dia samuna e nsangu zambote za Kintinu mu nza yawonso, ezi ke zisinga vutukilwa ko. Kuna diaka e sambu, tufwete kwamanana lukisa o wantu. Wantu bafwete wo zaya vo e mbaninu a nza yayi yambi ifinamene. Vava lufwasu lwalu lulwaka, bezaya wo vo e nsangu tusamunanga kwa Yave wa Nzambi zatuka.—Yez. 38:23.

¹⁶ Nkia kani tufwete kala diau? Mu kuma kia zola kweto muna nsangu zambote, zola kweto muna wantu ye edi disundidi o mfunu, zola kweto muna Yave wa Nzambi ye nkumbu andi, tukwamanana samuna e nsangu zambote ye tima diawonso, vema kwawonso ye nzaki zawonso yavana Yave kevova vo: “Kimene!”