Tanginina o Vema kwa Yesu Muna Salu kia Samuna e Nsangu Zambote

1. Nkia diambu diswaswanesanga e selo ya Yave ye Akristu a kimpangila?

DIMOSI muna mambu meswaswanesanga e selo ya Yave ye Akristu a kimpangila, i vemaa kwau muna salu kia samuna e nsangu zambote. (Tito 2:14) Kansi, ezak’e ntangwa nanga diampasi dikalanga kwa ngeye mu kala ye kiese kia samuna e nsangu zambote. Nanga wawá kala nkuluntu ona osonganga o vema wavova vo: “Ezak’e ntangwa, kikalanga ye tima ko dia samuna e nsangu zambote.”

2. Ezak’e ntangwa, nki kilenda kitula e salu kieto kia samuna e nsangu zambote se kiampasi?

² Tulenda luta yangalela sala e salu yankaka muna salu kia Yave ke mu salu kia samuna e nsangu zambote ko. Ekuma? Kadi muna salu yankaka tulenda mona e nluta mia salu kieto vana vau yo mona e kiese, nze vava tusalanga e salu kia tunga yovo vangulula fulu ya nsambila, sadisa awana babwidilu sumbula yovo kasakesa mpangi zeto. Vava tusalanga kumosi ye mpangi zeto, tusiamisanga luvuvamu yo zola kwa muntu yo nkwandi ye tukalanga ye ziku vo betoma yangalelanga mana tuvanganga mu kuma kiau. Kuna diak’e sambu, nanga se mvu miayingi tusamunanga e nsangu zambote muna zunga kina vo wantu akete kaka betambulwilanga e nsangu za Bibila. Ayingi muna yau bemenganga zo yo kutusia nkutu kitantu. Tuzeye wo mpe vo, ekolo e mbaninu ifinamanga o wantu bewokesa kutusia e kitantu. (Mat. 10:22) Nki kilenda kutusadisa muna kwamanana wokesa o vema kweto muna salu kia samuna e nsangu zambote?

3. Aweyi e sono kia Luka 13:6-9 kisongelanga o vema kakala kwau Yesu?

³ Tulenda longoka mayingi muna mbandu a Yesu muna diambu ditadidi songa vema muna salu kia samuna e nsangu zambote. Vava kakala ova ntoto, Yesu kasidi kulula vema kwandi ko muna sila umbangi kwa wantu. Ekolo e ntangwa yaviokanga, o vema kwandi kwawokelanga kaka. (Tanga Luka 13:6-9.) Nze muntu ona waviokesa mvu tatu muna lunga-lunga nti andi a nsanda muna mpatu a vinyu, kansi ke wayima bundu ko, Yesu mvu tatu kasamuna e nsangu zambote kwa Ayuda, kansi ayingi muna yau ke batambulwila zo ko. Wauna o mvati a nsengo kadimbulwila vuvu ko vo o nsanda usinga yima bundu, Yesu mpe kayoya ko ngatu kulula o vema kwandi muna salu kia samuna e nsangu zambote. Kansi, wakwamanana sia e ngolo muna sadisa Ayuda kimana batambulwila e nsangu zambote.

4. Nkia mambu yá tulongoka muna mbandu a Yesu?

⁴ Mu longi diadi, tuvovela una Yesu kasongela o vema, musungula muna ngonde sambanu za nsuka muna salu kiandi kia umbangi. (Tala e nota de estudo “Depois disso” muna Luka 10:1.) O longoka mana kalonga yo tanginina mana kavanga dikutusadisa mu kala yo vema o unu. O wau, yambula twabadika mambu yá tulenda longoka muna mbandu a Yesu: (1) Wasianga luzolo lwa Yave va fulu kiantete, (2) wasianga e sungididi muna ungunza wa Bibila, (3) wabundanga e vuvu muna lusadisu lwa Yave ye (4) wakala ye vuvu vo wantu ankaka betambulwila e nsangu zandi.

YESU WASIA LUZOLO LWA YAVE VA FULU KIANTETE

5. Aweyi Yesu kasongela vo wasianga e sungididi muna vanga luzolo lwa Nzambi?

⁵ Kuna vema kwawonso Yesu wasamunanga e “nsangu zambote za Kintinu” kadi wazaya wo vo i salu kina o Nzambi kamvana. (Luka 4:43) Kuna kwa Yesu o samuna e nsangu zambote i salu kiasunda o mfunu muna zingu kiandi. Kana nkutu kuna mfoko a uselo wandi, wayendanga muna “mbanza ye muna mavata” muna longa akaka. (Luka 13:22) Walonga mpe alongoki ankaka kimana basalanga yandi entwadi muna salu kia samuna e nsangu zambote.—Luka 10:1.

6. E salu kia samuna e nsangu zambote, aweyi kinina e ngwizani ye salu yankaka tusalanga muna salu kia Yave? (Tala mpe mafoto.)

⁶ O unu mpe, o samuna e nsangu zambote i salu kisundidi o mfunu kina Yave yo Yesu bazolele vo twasalanga. (Mat. 24:14; 28:19, 20) E salu kia samuna e nsangu zambote ngwizani kina ye salu yankaka tusalanga muna salu kia Nzambi. Kasikil’owu, tutunganga fulu ya nsambila yovo sadila kuna Betele muna yikama e salu kia samuna e nsangu zambote. Tusadisanga mpangi zeto ana bebwilwanga e sumbula tuka muna kinitu ye muna kimwanda. Vava tuzayanga o mfunu wa salu kia samuna e nsangu zambote yo sungamena vo i salu kisundidi o mfunu kina Yave kazolele vo twasala, dikutukasakesanga muna kuyivana emvimba muna salu kiaki. Mpangi János una vo nkuluntu kuna Hungria wavova vo: “Isungamenanga vo ke vena salu kiankaka ko tusalanga muna salu kia Yave kilenda vinga vana fulu kia salu kia samuna e nsangu zambote; ekiaki i salu kieto kiantete.”

7. Ekuma Yave kazolele vo twakwamanana samuna e nsangu zambote? (1 Timoteo 2:3, 4)

⁷ Muna kala yo vema muna salu kia samuna e nsangu zambote, tufwete badikilanga wantu nze una Yave kekubabadikilanga. Ozolele vo wantu ayingi bawá e nsangu zambote yo tambulwila zo. (Tanga 1 Timoteo 2:3, 4.) Vana ntandu, Yave okutulonganga kimana twatoma samunanga e nsangu ezi zivuluza mioyo mia wantu. Kasikil’owu, o nkanda Zolanga o Wantu—Ubakitula se Alongoki uvuidi malongi malenda kutusadisa mu yantika mokena yo wantu ye kani dia kubakitula se alongoki. Kana nkutu vo owau o wantu ke batambulwidi kituka selo ya Yave ko, balenda kala ye lau dia tambulwila vitila e mfoko a kolo kia mpasi zayingi. Mana tukubasamunuinanga owau, malenda kubafila mu tambulwila kuna sentu. Kansi, ediadi divangama kaka avo tukwamanene kubasamunuina e nsangu zambote.

YESU WASIA E SUNGIDIDI MUNA UNGUNZA WA BIBILA

8. Ozaya o ungunza wa Bibila aweyi diasadisila Yesu mu toma sadila e ntangw’andi?

⁸ Yesu wabakula e ndungan’a ungunza wa Bibila. Wazaya wo vo e salu kiandi, mvu tatu kaka ye ndambu kizingila. (Dan. 9:26, 27) Muna lusadisu lwa ungunza, wazaya mpe e ntangwa kefwa ye una kefwila. (Luka 18:31-34) Wau vo Yesu wazaya mana mateka sakulwa, wasadila e ntangw’andi una ufwene. Muna kuma kiaki, muna fokola e salu kina kavewa, wasamunanga e nsangu zambote yo vema kwawonso.

9. O bakula ungunza wa Bibila, aweyi dikutusadisilanga muna samuna e nsangu zambote yo vema?

⁹ Avo tubakwidi o ungunza wa Bibila ulungananga mu lumbu yeto ye una ulungana ke kolo ko, o vema kweto muna salu kia samuna e nsangu zambote kuwokela. Tuzeye wo vo e mbaninu a nza yayi ifinamene kibeni. Tuzeye wo mpe vo e mambu mebwanga ye kadilu kia wantu o unu, betela kina ye mana masakulwa muna Bibila mu kuma kia lumbu yambaninu. E Bibila kiasakula mpe vo ntinu a sude ye ntinu a node benuana “muna ntangw’a mbaninu.” Tubakulanga vo e kitantu kia Luyalu lwa Ngolo lwa Nz’amvimba lwa Anglo-Americana ye luyalu lwa Rússia ye nsi zina zikunyikamanga kilungisanga ungunza wau. (Dan. 11:40) Tubakulanga mpe vo Luyalu lwa Ngolo lwa Nz’amvimba lwa Anglo-Americana lusunzulanga malu mateke kiyikwanga muna Daniele 2:43-45. Nze una usonganga ungunza, tuna ye ziku vo ke kolo ko e Kintinu kia Nzambi kifwasa tuyalu twa wantu. O ungunza wau wawonso usonganga vo ku mfoko a lumbu ya mbaninu a nza yayi tuzingilanga. Muna diadi, tufwete toma sadilanga e ntangwa eto muna samuna e nsangu zambote una ufwene.

10. Nkia mpila yankaka o ungunza wa Bibila ukutukasakeselanga muna kwamanana samuna e nsangu zambote?

¹⁰ O ungunza wa Bibila uyikanga mpe e nsangu zina tuyangalelanga samuna kwa akaka. Mpangi ankento Carrie, osadilanga kuna República Dominicana wavova vo: “Vava iyindulanga e mambu mambote mana Yave kasila o nsilu mu kuma kia kusentu, dikunkasakesanga mu samuna e ludi kwa akaka.” I bosi, wavova diaka vo: “Vava imonanga mambu mana wantu benuananga mau o unu, ibakulanga vo e nsilu miami ke mitadidi kaka mono ko kansi yo yau mpe.” Ungunza wa Bibila ukutukasakesanga mu lembi yoya, kadi tuzeye wo vo Yave ofilanga e salu kia samuna e nsangu zambote. Mpangi ankento Leila ona ozingilanga kuna Hungria wavova vo: “E sono kia Yesaya 11:6-9 kikunkasakesanga muna samuna e nsangu zambote kana nkutu kwa awana bemonekanga vo ke betambulwila zo ko. Nzeye wo vo muna lusadisu lwa Yave konso muntu olenda kwandi soba.” Mpangi Christopher kuna Zâmbia wavova vo: “Nze una wasakulwa muna Maku 13:10, e nsangu zambote mu samunua zina mu nza yawonso. Kiese kiayingi imonanga muna vana e moko muna ndungan’a ungunza wau.” Ongeye nkia ungunza wa Bibila ukukasakesanga mu kwamanana samuna e nsangu zambote?

YESU WABUNDA E VUVU MUNA LUSADISU LWA YAVE

11. Ekuma diavavilanga vo Yesu kabunda e vuvu muna lusadisu lwa Yave muna kwamanana samuna e nsangu zambote kuna vema? (Luka 12:49, 53)

¹¹ Muna kwamanana samuna e nsangu zambote kuna vema, Yesu wabundanga e vuvu kwa Yave. Kana una vo Yesu ndekwa zayingi kakala zau, wazaya wo vo e nsangu zambote za Kintinu ntantani ye kitantu kiangolo zitwasa. (Tanga Luka 12:49, 53.) Mu kuma kia nsangu zambote zina Yesu kasamunanga, e mfumu za nsambila nkumbu miayingi bavava kumvonda. (Yoa. 8:59; 10:31, 39) Kana una vo i wau, Yesu wakwamanana samuna e nsangu zambote kadi wazaya wo vo Yave wakala yandi. Wavova vo: “Kina mono mosi ko, kansi o Se ona wantuma una yame . . . Kangiambwidi mono mosi ko, e kuma kadi, lumbu yawonso ivanganga mambu mekunyangidikanga.”—Yoa. 8:16, 29.

12. Aweyi Yesu kakubikila alongoki andi mu kwamanana samuna e nsangu zambote kana nkutu muna lubangamu?

¹² Yesu wasungamesa alongoki andi vo muna vua lusadisu, bafwete bundanga Yave e vuvu. Nkumbu miayingi wabavovesa vo Yave okubasadisa kana nkutu muna ntangwa lubangamu. (Mat. 10:18-20; Luka 12:11, 12) Kuna diak’e sambu, wabalukisa vo bakalanga alungaladi. (Mat. 10:16; Luka 10:3) Wabakanikina vo balembi komekenanga awana ke bakala ye luzolo lwa wá e nsangu zambote ko. (Luka 10:10, 11) Wabavovesa mpe vo batina avo babangikilu. (Mat. 10:23) Kana una vo Yesu wasonga vema yo bunda e vuvu kwa Yave, kayisianga mu vonza nkatu-nkatu ko.—Yoa. 11:53, 54.

13. Ekuma olenda kadila ye ziku vo Yave okusadisa?

¹³ O unu mpe lusadisu lwa Yave tuvuanga o mfunu muna kwamanana samuna e nsangu zambote kana nkutu vava tusiwanga kitantu. (Lus. 12:17) Ekuma olenda kadila ye ziku vo Yave okusadisa? Badika e sambu kia Yesu kiasonama muna Yoane kapu kia 17. Yesu walomba kwa Yave vo katanina e ntumwa zandi. Yave wavana e mvutu za sambu kiaki. O nkand’a Mavangu usonganga una Yave kasadisila antumwa muna samuna e nsangu zambote kuna vema kana nkutu muna lubangamu. Muna sambu kiandi, Yesu walomba mpe kwa Yave vo katanina awana bekwikila muna nsangu zambote zisamunua kwa antumwa. Ongeye u mosi muna wantu awaya. Yave okwamanananga vana e mvutu za sambu kia Yesu; okusadisa wauna kasadisila antumwa.—Yoa. 17:11, 15, 20.

14. Ekuma tulenda kadila ye ziku vo tukwamanana samuna e nsangu zambote kuna vema kwawonso? (Tala mpe foto.)

¹⁴ Ekolo e mbaninu ifinamanga, dikwamanana kala diampasi kwa yeto muna samuna e nsangu zambote. Kansi, Yesu wasia nsilu vo tutambula lusadisu tuvua o mfunu muna kwamanana samuna e nsangu zambote kuna vema. (Luka 21:12-15) Nze Yesu ye ntumwa zandi, tuyambula vo wantu yau kibeni babaka e nzengo za tambulwila yovo lembi tambulwila e nsangu zambote ye tufwete venganga kuyisia muna ntantani zakondwa mfunu. Kana nkutu vava e salu kieto kisimwanga, mpangi zeto bekwamanananga samuna e nsangu zambote, kadi bebundanga e vuvu muna Yave ke mu ngolo za yau kibeni ko. Wauna o Yave kavanina o nkuma kwa selo yandi muna tandu kiantete, o unu mpe Yave okutuvananga o nkuma kimana “e nsangu zambote zatoma samunua” yavana kevova vo e salu kiaki kifokokele. (2 Tim. 4:17) Avo obundidi e vuvu muna Yave, olenda kala ye ziku vo okwamanana samuna e nsangu zambote kuna vema kwawonso.

YESU WAKALA YE VUVU VO AKAKA BETAMBULWILA E NSANGU ZAMBOTE

15. Nki kisonganga vo Yesu wakala ye vuvu vo wantu betambulwila e nsangu zambote?

¹⁵ Yesu wakala ye vuvu vo vekala ye wantu bewá e nsangu zambote. Ediadi diansadisa mu sala e salu kia umbangi ye kiese kiawonso. Kasikil’owu, kuna mfoko a mvu wa 30 wa tandu kieto, Yesu wamona vo wantu ayingi bakala yo luzolo lwa wá e nsangu zambote. Wabatezanesa ye mbongo ibweke muna mpatu ivavanga vo yakutikwa. (Yoa. 4:35) Vioka mvu mosi, Yesu wavovesa alongoki andi vo: “E mbongo yayingi ina muna kutika.” (Mat. 9:37, 38) I bosi, watoma dio sikidisa diaka vo: “E mbongo yayingi ina muna kutika . . . Nudodokela Mfumu a nkutika katuma asadi muna nkutika andi.” (Luka 10:2) Yesu wakala ye vuvu vo vekala ye wantu betambulwila e nsangu zambote ye wakalanga ye kiese kiayingi vava wantu batambulwilanga zo.—Luka 10:21.

16. Nkia yingana o Yesu katá muna songa vo vekala yo wantu betambulwila e nsangu zambote? (Luka 13:18-21) (Tala mpe foto.)

¹⁶ Muna sadisa alongoki andi bakala yo vema muna salu kia samuna e nsangu zambote, Yesu wabalonga vo vekala kaka yo wantu betambulwila e nsangu zambote. Kasikil’owu, badika yingana yole katá. (Tanga Luka 13:18-21.) Muna kingana kimosi, Yesu watezanesa e nsangu za Kintinu ye mbongo yakete-kete imenanga yo kituka se nti ampwena. Ediadi disongele vo vekala ye wantu betambulwila e nsangu zambote ye ke vekala diambu ko dikubakakidila. Muna kingana kiankaka, watezanesa Kintinu kia Nzambi ye mfuna. Ediadi disonganga vo e nsangu za Kintinu zisamunua mu fulu yayingi ova nza ye zifila wantu ayingi mu vanga e nsobani muna zingu kiau, kana nkutu vo e nsobani zazi ke zimoneka vana vau ko kwa wantu ayingi. Muna mpila yayi, Yesu wasadisa alongoki andi mu mona vo e nsangu za Kintinu zina besamuna nluta zitwasa.

17. Ekuma tulenda kadila ye vuvu vo vena ye wantu ayingi balenda tambulwila e nsangu zambote?

¹⁷ Vava tuyindulanga e mpila e nsangu zambote zisadisilanga wantu ayingi mu nza yawonso, dikutukasakesanga mu kwamanana zo samuna kuna vema kwawonso. Konso mvu, mafunda ye mafunda ma akwa luzolo lwambote belungananga yeto muna Luyindulu yo tambulwila longoka e Bibila. Ndonga bevubwanga yo kutuyikama muna salu kia samuna e nsangu zambote. Ozevo, ke tuzeye ko lutangu lwa wantu betambulwila e nsangu zambote, kansi tuzeye wo vo Yave mu kutika kena e ndong’ayingi eyi ivuluzwa muna mpasi zayingi. (Lus. 7:9, 14) Yave una vo i mfumu a salu, wakinu ye vuvu vo wantu ayingi besinga tambulwila e nsangu zambote. Muna diadi, tuvuidi kuma kiambote muna kwamanana samuna e nsangu zambote.

18. Adieyi tuzolele vo wantu bamona ekolo tusamunanga e nsangu zambote?

¹⁸ Ntangwa zawonso, alongoki a Yesu bezayakananga mu kuma kia vema kwau muna salu kia samuna e nsangu zambote. Muna bonga e nona, vava antumwa basamuna e nsangu zambote kuna unkabu ye kiese kiawonso, o wantu ‘basungamena vo kumosi bakala yo Yesu.’ (Mav. 4:13) Vava wantu bekutumonanga muna salu kia umbangi, bafwete bakulanga mpe vo mbandu a vema kwa Yesu tulandanga.