Ke Tuna Yeto Mosi Ko

1-2. (a) Vava tukalanga mu mpasi, ekuma ke tulendi vovela ko vo yeto mosi twina? (b) Nkia mambu tulongoka mu longi diadi?

VAVA tukalanga mu mpasi, tulenda mona nze yeto tuna mu mfinda yampwena yeto mosi kaka ye tuvididi e nzila. Kansi, muna vova e ludi, ke tuna yeto mosi ko. O Se dieto dia nzodi ke monanga kaka mpasi zeto ko, kansi okutusadisanga kimana twazizidila zo. Kuna zola kwawonso, Yave osianga nsilu vo: “Ikusadisa.”—Yes. 41:10.

² Mu longi diadi tulongoka mpila yá zina Yave kekutusadisilanga: (1) okutufilanga, (2) okutuvananga ina tuvuidi o mfunu, (3) okututaninanga ye (4) okutufiaulwisanga. Kiakala nkia mpasi tuwanana zau muna zingu, Yave osianga nsilu vo kalendi kutuvilakana ko. Ke singa kutubembola ko. Muna kuma kiaki, ke tuna yeto mosi ko.

YAVE OKUTUFILANGA

3-4. Aweyi Yave kekutufidilanga? (Nkunga 48:14)

³ Tanga Nkunga 48:14. Yave ozeye wo vo ke tulenda fila e ntambi zeto ko ye luludiku lwandi tuvuidi o mfunu. Aweyi kefidilanga nkangu andi o unu? I mosi muna mpila kevangilanga wo i sadila e Bibila. (Nku. 119:105) Yave osadilanga e Diambu diandi muna kutusadisa twabakanga e nzengo zambote, twakala ye fu ilenda kututwasila e kiese tuka owau yo vua moyo a mvu ya mvu kuna sentu.a Kasikil’owu, okutulonganga twayambula e fu kia lunda makasi, twakala akwa ziku muna mambu mawonso ye twazolananga ye nsi a ntima yawonso. (Nku. 37:8; Ayib. 13:18; 1 Pet. 1:22) Vava tusonganga e fu yayi yawonso, tukitukanga mase mambote, ngudi zambote, akala ambote kuna kwa akazi eto, akento ambote kuna kwa akala eto ye akundi ambote.

⁴ Vana ntandu, muna Bibila Yave wasonekesa tusansu twa wantu ana banuana ye mambu mampasi nze mana yeto tunuananga mau ye bakala ye ngindu nze i zeto. (1 Kor. 10:13; Yak. 5:17) Vava tutanganga tusansu twatu yo sadila mana tulongokanga, tuvuanga nluta mu mpila zole. Yantete, tubakulanga vo ke tuna yeto mosi ko. Kadi, vakala ye akaka banuana ye mpasi zau zimosi tunuananga zau ye balenda zizidila muna lusadisu lwa Yave. (1 Pet. 5:9) Yazole, tulongokanga zizidila e mpasi zeto.—Roma 15:4.

5. Aki nani Yave kesadilanga muna kutufila?

⁵ Yave mpangi zeto mpe kesadilanga muna kutufila.b Kasikil’owu, ntangwa zawonso akengi a zunga bekingulanga e nkutakani muna kutukasakesa. Malongi mau mekumikanga lukwikilu lweto ye kutusadisa mu tatidila kintwadi kieto. (Mav. 15:40–16:5) Akuluntu mpe bevanganga e ngolo mu sadisa konso nteleki muna nkutakani kimana kakala ye lukwikilu lwasikila. (1 Pet. 5:2, 3) Mase belonganga wan’au bazolanga Yave, babakanga nzengo zambote yo kala ye fu yambote. (Nga. 22:6) Mpangi zamakento ana bazikuka, muna mbandu au ambote besadisanga aleke, bekubavananga malongi mambote yo lukasakeso.—Tito 2:3-5.

6. Aweyi tulenda vutulwila matondo muna mawonso Yave kevanganga muna kutufila?

⁶ Yave ovanganga mawonso muna kutuvana luludiku tuvuidi o mfunu. Aweyi tulenda vutulwila matondo muna mawonso kevanganga muna kutufila? E sono kia Ngana 3:5, 6 kivovanga vo: “Bunda Yave e vuvu ye ntim’aku wawonso, kubundi vuvu muna umbakuzi wa ngeye kibeni ko.” Avo tuvangidi ediadi “yandi osingika e nzila [zeto].” Ediadi disongele vo okutusadisa mu venga e mpasi zayingi ye tukala ye zingu kiakiese. Tutoma vutulanga matondo wau vo Yave otomene zaya konso muntu omu yeto ye kuna zola kwawonso okutuvananga malongi mambote.—Nku. 32:8.

YAVE OKUTUVANANGA INA TUVUIDI O MFUNU

7. Nkia mpila zankaka o Yave kekutuvaninanga ina tuvuidi o mfunu? (Filipi 4:19)

⁷ Tanga Filipi 4:19. Vana ntandu a kutufila, Yave okutuvananga ina tuvuidi o mfunu. Mu nkia mpila? Osambulanga e ngolo tuvanganga muna lenda madia, mvuatu ye nzo ya zingila. (Mat. 6:33; 2 Tes. 3:12) Dialudi vo ke diambi ko mu tokana mu kuma kia diambu dia lungisa e nsatu zeto za kinitu, kansi Yave wavova vo twayambula tokananga kwasaka mu kuma kia diambu diadi. (Tala e nota de estudo muna Matai 6:25) Yave wasia nsilu vo ke singa bembola selo yandi yakwikizi ko muna kolo kina bevua lusadisu o mfunu. (Mat. 6:8; Ayib. 13:5) Muna kuma kiaki, tulenda kumbunda e vuvu vava kevovanga vo okutuvana ina tuvuidi o mfunu.

8. Aweyi Yave kasadisila Davidi?

⁸ Tala una Yave kasadisila Davidi. Muna mvu miawonso mina Davidi katinanga Saulu wa ntinu, Yave wavana Davidi kumosi ye makesa mandi ina bavuanga o mfunu muna zinga. Vava kayindula una Yave kabasadisila muna mvu miamina miawonso, Davidi wasoneka vo: “Toko yakala, owau ndunini, kansi kisidi mona nsongi ko kabembolwa, ngatu wan’andi bavava madia.” (Nku. 37:25) Nze Davidi, ngeye mpe nanga wamona kala una Yave kasadisila kuna zola kwawonso yovo una kasadisila mpangi zankaka muna ntangw’a mpasi.

9. Aweyi o Yave kesadisilanga nkangu andi vava vebwanga e sumbula? (Tala mpe mafoto.)

⁹ Yave ovananga mpe kwa nkangu andi ina bavuidi o mfunu vava vebwanga e sumbula. Kasikil’owu, vava mvengele wakota muna Yerusaleme muna tandu kiantete, Akristu muna zunga yankaka batwikila mpangi zau o lusadisu luna bavuanga o mfunu. (Mav. 11:27-30; Roma 15:25, 26) O unu nkangu a Yave ntim’amvevo a mpila yayi mpe besonganga. Vava vebwanga e sumbula, Yave kuna zola kwawonso osadilanga ampangi kimana bavana madia, maza, mvuatu ye nlongo kwa nkangu andi bena mu zunga ibwididi e sumbula. Ampangi bena muna buka ya tunga e fulu ya nsambila, besadisanga muna vangulula e nzo z’ampangi zibangukidi kumosi ye Maseka ma Kintinu. Vana ntandu, selo ya Yave ke bezingilanga ko muna fiaulwisa yo kasakesa awana bena vo e nzo zau zifwasakene yovo awana befwilwanga e yitu ye akundi au.c

10-11. Adieyi olongokele muna nona kia Borys?

¹⁰ Mu kuma kia ntim’andi amvevo, Yave osadisanga mpe awana bena vo ke bekunsadilanga ntete ko. Muna kuntanginina, yeto mpe tuvavanga malau muna vanga o wete kwa awana bena vo ke besadilanga Yave ko. (Ngal. 6:10) Nkumbu miayingi vava tuvanganga wo, kimbangi kiambote divananga. Tala e nona kia Borys, mfidi mosi a sikola kuna Ucrânia. Kana una vo ke Mbangi a Yave ko, Borys ntangwa zawonso wasonganga ngemba kwa wan’a sikola ana bakala vo Mbangi za Yave ye watoma zitisanga mana bekwikilanga. Vava Borys kabaka e nzengo za tina muna zunga kiakala e vita yo kwenda kuna zunga kiankaka kiakala kiavuvama, mpangi zeto bansadisa. I bosi, Borys walungana muna Luyindulu lwa lufwa lwa Kristu. Vava kayindula lusadisu luna katambula kw’ampangi, Borys wavova vo: “Mbangi za Yave batomene kunsonga ngemba ye kundunga-ndunga. Ikubavutulanga funda dia matondo.”

¹¹ Yeto mpe tulenda tanginina e nkenda za Yave. Tulenda wo vanga muna songanga o zola yo sadisa awonso ana bevavanga lusadisu, kiakala mpangi zeto ye awana bena vo ke besadilanga Yave ko. (Luka 6:31, 36) Tuzolele vo e fu yeto yambote yo zola tusonganga kwa wantu, kwabafila mu kituka se alongoki a Kristu. (1 Pet. 2:12) Kansi, kana nkutu vo ke batambulwidi sadila Yave ko, kiese kiayingi tukala kiau, kadi “e diambu disundidi e kiese i vana.”—Mav. 20:35.

YAVE OKUTUTANINANGA

12. Nkia nsilu o Yave kesianga kwa nkangu andi? (Nkunga 91:1, 2, 14)

¹² Tanga Nkunga 91:1, 2, 14. O unu, Yave osianga nsilu vo okututanina muna kimwanda. Ke yambula ko vo Satana kafwasa e nsambil’a ludi. (Yoa. 17:15) Vava e “mpasi zayingi” ziyantika, tuna ye ziku vo Yave otanina nkangu andi muna kimwanda ye muna kinitu.—Lus. 7:9, 14.

13. O Yave aweyi ketaninanga konso muntu omu yeto?

¹³ O Yave aweyi ketaninanga konso muntu omu yeto? Yave Bibila kesadilanga muna kutusadisa twazaya swaswanesa edi diambote ye edi diambi. (Ayib. 5:14) Vava tulemvokelanga e nkanikinu miasonama muna Diambu diandi, tutaninuanga tuka muna kimwanda yamuna kinitu. (Nku. 91:4) Vana ntandu, Yave nkutakani mpe kesadilanga muna kututanina. (Yes. 32:1, 2) E mpangi zeto muna nkutakani betoma zolanga Yave yo kunlemvokela. Ovaulanga e ntangwa muna kalanga yau entwadi muna tukutakanu, muna salu kia umbangi ye muna fulu ya nsaka, dilenda kutusadisa mu lembi bwa muna sumu.—Nga. 13:20.

14. (a) Ekuma Yave ke kutuvevolwelanga ko muna mpasi zawonso? (b) E sono kia Nkunga 9:10, nkia nsilu kikutuvananga? (Tala mpe mvovo vana yand’a lukaya.)

¹⁴ Dialudi vo kuna nz’ankulu Yave watanina asambidi andi akaka muna kinitu. Kansi, ayingi muna yau bamweswa e mpasi yo vondwa nkutu mu kuma yaswaswana. O unu mpe konso muntu omu yeto olenda mona e mpasi mu kuma kia “mambu makinsalukisa.” (Kim. 9:11) Kuna diak’e sambu, akaka muna selo ya Yave kuna nz’ankulu babangikwa yo vondwa nkutu. Ediadi dilenda vangama mpe o unu. Yave oyambulanga vo ediadi diavangama muna songa e ziku vo Satana mvuni akola. (Yobi 2:4-6; Mat. 23:34) Kana una vo Yave ke kutuvevolanga ko muna mpasi zawonso, tulenda kala ye ziku vo ke singa bembola ko awana bekunzolanga.d—Nku. 9:10.

YAVE OKUTUFIAULWISANGA

15. Aweyi tutambulwilanga lufiaulwisu muna sambu, muna Diambu dia Nzambi ye kwa akweto Akristu? (2 Korinto 1:3, 4)

¹⁵ Tanga 2 Korinto 1:3, 4. Ezak’e ntangwa, tunuananga ye ntantu za fwila, ntokani zasaka yovo lukendalalu. Nanga owau onuananga ye diambu dikufilanga mu mona vo ngeye mosi kaka wina. Nga vena yo muntu obakulanga una omonanga? Elo, Yave obakulanga wo. Kansi, Yave ke monanga kaka lukendalalu lweto ko, “okutufiaulwisanga muna mpasi zeto zawonso.” Mu nkia mpila? Avo tundodokele muna sambu, okutuvana “luvuvamu lwa Nzambi luna luviokele umbakuzi wawonso.” (Fili. 4:6, 7) Okutufiaulwisanga mpe vava tutanganga e Bibila kina vo i Diambu dia Yave. E Bibila kisonganga vo Yave otoma kutuzolanga, okutulonganga una tulenda kadila akwa ngangu ye kutuvana e vuvu kiasikila. Kuna diak’e sambu, tutambulanga lufiaulwisu muna tukutakanu tweto. Kadi tulongokanga mambu ma lufiaulwisu mena muna Bibila ye tukalanga kumosi ye mpangi zeto ana bekutuzolanga.

16. Adieyi olongokele muna nona kia mpangi Nathan yo Priscilla?

¹⁶ Muna zaya una Yave kesadilanga Diambu diandi muna kutufiaulwisa yo kutukasakesa, badika e nona kia mpangi Nathan yo Priscilla kuna Estados Unidos. Mu mvu miavioka, babaka e nzengo za kwenda sadila kuna kwavuanga ateleki ayingi o mfunu. Mpangi Nathan wavova vo: “Twakala ye vuvu vo Yave osambula e ngolo zeto.” Kansi vava balwaka kuna zunga kiampa, bawanana ye mambu mampasi kuna kinsalukisa, bayantika yela ye ke balenda solola salu ko. Muna kuma kiaki, bavutuka muna mbanza ina batuka ye bakwamanana nuana ye mpasi za zingu. Mpangi Nathan wavova vo: “Yayantika tokana e kuma Nzambi kalembi kutusambulwila mu mpila ina twayindulwilanga. Yayantika nkutu yindula vo nanga diambu diambi yavanga.” Kansi kuna kwalanda, mpangi Nathan yo Priscilla babakula vo Nzambi kababembola ko muna kolo kiakina banuananga ye mpasi. Mpangi Nathan wavova diaka vo: “Muna kolo kiakina, e Bibila kiakituka se nkundi ambote ona watuvananga malongi mambote, watukasakesanga yo kutufila. Vana fulu kia sia e sungididi muna mpasi zeto, twayantika sia e sungididi muna mpila ina Yave katusadisilanga. Ediadi diatusadisa mu kala ye ziku vo Yave okwamanana kutusadisa kimana twalenda zizidila e mpasi za kusentu.”

17. Aweyi mpangi ankento Helga katambulwila lufiaulwisu? (Tala mpe mafoto.)

¹⁷ Mpangi zeto mpe i nto a lufiaulwisu kwa yeto. Mu nkia mpila? Badika e nona kia mpangi Helga ona ozingilanga kuna Hungria. Mu mvu miayingi, wanuana ye mambu mayingi mampasi mantwasila lukendalalu ye ntokani zasaka. Kansi, vava keyindulanga mvu miami miawonso, obakulanga una Yave kasadila ampangi muna nkutakani muna kumfiaulwisa. Wavova vo: “Yasalanga, yalunga-lunganga mwan’ame wayelanga ye yanuananga mpe ye mambu mankaka mampasi. Vava Yave kamonanga vo kiakala diaka ye nkuma ko, ntangwa zawonso wansadisanga. Muna mvu 30 miviokele, Nzambi kasidi funga ko muna lungisa o nsilu andi wakumfiaulwisa. Ntangwa zawonso osadilanga ampangi muna kunkasakesa muna mvovo miau mia ngemba. Nkumbu miayingi mpe bekuntwikilanga mensagem, nkanda yovo kunsanisina muna ntangwa ivuanga lusanisinu o mfunu.”

18. Aweyi tulenda fiaulwisila akaka?

¹⁸ O fiaulwisa akaka i mpila tutangininanga Nzambi eto ye lau diampwena kwa yeto. Aweyi tulenda wo vangila? Muna wunikinanga kuna luzindalalu ekolo akaka bevovanga, sadila mvovo mia lufiaulwisu yo sadisa konso muntu ovavanga lusadisu. (Nga. 3:27) Tufwete vanganga e ngolo mu fiaulwisa wantu awonso ana bena mu mpasi, kumosi ye awana ke besambilanga Nzambi ko. Vava mfinangani zeto bekalanga mu mpasi, nze fwilwa, mayela yovo ntokani zasaka, tukubakingulanga, tukubawunikinanga yo kubatangila sono ya Bibila ya lufiaulwisu. Otanginina Yave wa “Nzambi a fiauzi wawonso” nluta ditwasanga. Tulenda sadisa mpangi zeto mu zindalala ye tuyoyesa e ntima mia awana ke besadilanga Yave ko kimana bayangalela e ludi.—Mat. 5:16.

NTANGWA ZAWONSO YAVE OKALA KAKA YETO

19. Adieyi Yave kevanganga muna wete dieto? Aweyi tulenda kuntanginina?

¹⁹ Yave otokanenanga e wete dia wantu awonso ana bekunzolanga. Ke singa kutubembola nkutu ko muna ntangw’a mpasi. Wauna o se kelunga-lungilanga mwan’andi, Yave mpe olunga-lunganga selo yandi yakwikizi. Okutufilanga, okutuvananga ina tuvuidi o mfunu, okututaninanga yo kutufiaulwisa. Tulenda tanginina Se dieto dia nzodi vava tusadisanga yo kasakesa akaka muna ntangw’a mpasi. Dialudi vo mu nza yayi tukwamanana nuana ye mambu mampasi, kansi tulenda bunda e vuvu vo ntangwa zawonso Yave okala kaka yeto. Kadi wasia nsilu vo: “Kumoni wonga ko, kadi ngina yaku.” (Yes. 41:10) Muna kuma kiaki, tukalanga ye ziku vo ke tuna yeto mosi ko.