Римдиктерге

1 Иса Машаяктын* кулу, элчи болгонго тандалган, Кудайдын жакшы кабарын* жарыялаганга дайындалган* Пабылдын каты.+ 2 Кудай пайгамбарлары аркылуу Ыйык Жазмада эчак эле убада кылган ал жакшы кабар — 3 анын Уулу, Мырзабыз Иса Машаяк, жөнүндөгү кабар. Ал Дөөтүнүн+ тукумунан чыгып, адам болуп төрөлгөн. 4 Бирок Кудай аны ыйык руху* менен тирилткенден кийин+ өзүнүн Уулу+ деп жарыялаган. 5 Элдердин баары+ Исага ишенип, баш ийип, анын ысмы даңкталышы үчүн, ал аркылуу мага* ырайым кылынып, элчилик кызмат+ тапшырылды. 6 Ошол элдердин арасында Иса Машаяктын жолдоочусу болгонго тандалган силер да барсыңар. 7 Кудай сүйгөн, ыйык эл болгонго тандалган Римдеги бир туугандарыбыз, мен бул катымды баарыңарга жазып жатам.

Асмандагы Атабыз Кудай менен Мырзабыз Иса Машаяк силерге ырайымын төгүп, тынчтык берсин.

8 Эң алгач, баарыңар үчүн Кудайыма Иса Машаяк аркылуу ыраазычылык билдирем, анткени силердин ишенимиңер жөнүндө дүйнө жүзү боюнча айтылып жатат. 9 Мен Уулу жөнүндө жакшы кабар айтып, жан-дилимден ыйык кызмат кылып жаткан Кудайдан тиленгенде дайыма силер жөнүндө да тиленем.+ Буга Кудай күбө. 10 Мен Кудайдан, анын эркине ылайык келсе, акыр-аягы силерге барсам экен деп жалынып жүрөм. 11 Силерди көргөнгө куштармын, анткени Кудай берген белекти силер менен бөлүшүп*, силерге дем-күч бергим келет. 12 Тагыраак айтканда, силердин ишенимиңерди көргөндө мен күч-кубат алып, менин ишенимимди көргөндө силер күч-кубат алып, бири-бирибизди кубаттандырышыбызды+ каалайм.

13 Бир туугандарым, башка элдердин арасында Кудайдын кабарын айтып, жакшы натыйжага жеткенимдей эле, силерге барганымда да ошондой болушу үчүн, силерге барганга көп жолу ниеттенгем. Бирок ушул убакка чейин тоскоолдуктарга туш болуп келгенимди билишиңерди каалайм. 14 Мен гректерге да, бөтөн жерликтерге да*, билимдүүлөргө да, билими жокторго да жардам бергенге милдеттүүмүн*. 15 Ошондуктан Римде+ жашаган силерге да жакшы кабарды айтканга дилгирмин. 16 Мен жакшы кабарды тараткандан уялбайм.+ Анткени ал кабар аркылуу Кудай ишеними бар ар бир адамды:+ адегенде жүйүттөрдү,+ андан кийин гректерди*+ куткарыш үчүн күчүн көрсөтүп жатат. 17 Ыйык Жазмада: «Адил адам ишениминин аркасында өмүр сүрөт»,+— деп жазылгандай, ишеними барлар жакшы кабар аркылуу Кудайдын адил экенин айкын көрө алышат, бул алардын ишенимин чыңдайт.+

18 Асмандагы Кудай ага баш ийбеген жана адил эмес адамдарга каарын+ төгүп келет. Себеби алар Кудайдын көз алдында туура эмес иштерди кылып, башкаларга ал жөнүндөгү чындыкты билгенге тоскоолдук кылып жатышат.+ 19 Чынында, аларга Кудай жөнүндө билиш керек болгон нерселердин баары ачылып берилген, себеби Кудай өзү ачып берген.+ 20 Кудайды бир да адам көрбөсө да, алар анын түбөлүктүү күчүн,+ касиет-сапаттарын жараткан нерселеринен көрө алышат.+ Себеби мунун баары дүйнө жаратылгандан бери эле жаратылыштан айкын көрүнүп турат. Ошондуктан алардын эч кимиси актана албайт. 21 Анткени андай адамдар Кудайды билип туруп аны даңкташкан жок, ага ыраазычылык билдиришкен жок. Тескерисинче, акылсыздык кылып, куру ойлорго берилип кетишти, көкүрөктөрү көр болуп, эч нерсе көрбөй калышты.+ 22 Алар өздөрүн акылдуу эсептешет, бирок чынында акылсыз. 23 Өлбөс Кудайды даңктагандын ордуна, өлө турган адамдын, канаттуулардын, төрт аяктуу жаныбарлар менен сойлоп жүрүүчүлөрдүн сөлөкөттөрүн даңкташат.+

24 Ошондуктан Кудай, алар өздөрүнүн каалоосуна* жетеленип жашагысы келгендиктен, алардын ыпыластыкка белчесинен батып, өз денесин арамдашына жол берип койду. 25 Алар Кудай жөнүндөгү чындыкты бурмалап, жалган нерсеге ишенишет, Жараткан Кудайга эмес, жаратылган нерселерге сыйынып, кызмат кылышат. Бирок түбөлүккө даңкталганга Жараткан гана татыктуу. Оомийн*. 26 Ошол себептен Кудай алардын уятсыз жыныстык кумарларга+ батышына жол берип койду: аялдары эркектер менен эмес, аялдар менен жыныстык мамиледе болуп, Кудайдын эркине каршы иш кылып жатышат.+ 27 Ошол сыяктуу эле, эркектери да аялдарга эмес, эркектерге кумарын арттырып,+ ыпылас иштерге барып жатышат. Алар ушундай күнөөсү үчүн жазасын толук алып жатышат.+

28 Кудайды таанып-билүүнүн зарылдыгы жок* деп ойлошкондуктан, Кудай аларга жаман ойлоруна жетеленип, жаман иштерди кыла беришине жол берип койду.+ 29 Алар адилетсиздиктин,+ ыймансыздыктын, ач көздүктүн,+ жамандыктын ар кандай түрүнө белчесинен батышты, көрө албастык кылып,+ киши өлтүрүп,+ чатакташып, алдап,+ кара ниеттик кылып+ жатышат. Алар — ушакчы, 30 жалаачы,+ Кудайды жек көргөн, уятсыз, бой көтөргөн, мактанчаак, кантип жамандык кылышты ойлоп тапкан*, ата-энесинин тилин албаган,+ 31 түшүнүгү жок,+ сөзүнө турбаган, жакындарын сүйбөгөн, кайрымсыз адамдар. 32 Алар Кудайдын адилеттүү өкүмүн — мындай иштерди кылып жүргөндөрдүн өлүшү керек экенин+ — жакшы билишсе да, ал иштерди өздөрү эле кылып тим болбой, андай иштерди кылып жүргөндөрдү кубатташат.