Аян
11 Мага таякка* окшогон камыш+ берилип: «Тур да, Кудайдын ыйык жайын*, жыпарзат түтөткүчтү* жана ал жерде сыйынып жаткандарды чене. 2 Ал эми ыйык жайдын сыртындагы короону жөн кой, ченебе, себеби ал башка элдерге берилген. Алар ыйык шаарды+ 42 ай тебелеп-тепсешет.+ 3 Мен өзүмдүн 2 күбөмдү жиберем. Алар таар жамынып, 1 260 күн Кудайдын кабарын айтышат»,— деп айтылды. 4 Жер жүзүнүн Теңиринин алдында турган ал 2 күбө+ — 2 зайтун дарагы+ менен 2 чыракпая+.
5 Эгер кимдир бирөө ал күбөлөргө зыян келтиргиси келсе, алардын оозунан от чыгып, душмандарын жалмап кетет. Ал экөөнө зыян келтиргиси келгендердин баары ушинтип өлтүрүлөт. 6 Кудайдын кабарын айтып жаткан күндөрүндө жамгыр жаабашы үчүн,+ аларга асманды жаап койгонго+ Кудайдан бийлик берилген, ошондой эле сууну канга айландырганга,+ каалаган убагында жерге ар кандай балээлерди жибергенге да бийлик берилген.
7 Алар Кудайдын кабарын айтып бүткөндө, түпсүз туңгуюктан чыккан жырткыч алар менен согушат да, аларды жеңип, өлтүрөт.+ 8 Анан ал экөөнүн өлүгү каймана мааниде Содом жана Мисир* деп аталган улуу шаардын чоң көчөсүндө жатат. Алардын Мырзасы Иса да ошол жакта устунга кадалган. 9 Ар кайсы уруудан, улуттан, элден чыккан, ар кандай тилдерде сүйлөгөн көптөгөн адамдар ал экөөнүн өлүгүн үч жарым күн+ карашат жана алардын сөөгүн мүрзөгө койдурбай коюшат. 10 Жер жүзүндө жашагандар алардын өлгөнүнө кубанып-шаттанышат, бири-бирине белектерди жиберишет, анткени ал 2 пайгамбар аларды кыйнап келген болчу.
11 Үч жарым күндөн кийин Кудай өмүр демин берип,+ экөө кайрадан жашай баштады. Муну көргөндөрдүн баарын катуу коркунуч басты. 12 Анан ал экөө асмандан: «Бул жакка чыккыла»,— деген катуу үндү угушту. Алар булут ичинде асманга көтөрүлүп кетишти, муну душмандары көрдү*. 13 Ошол замат* катуу жер титирөө болуп, шаардын ондон бир бөлүгү кыйрап калды. Жер титирөөдөн 7 000 киши өлдү. Калгандарын коркунуч басып, асмандын Эгедери болгон Кудайды даңкташты.
14 Экинчи балээ+ өтүп кетти. Бирок үчүнчү балээ тездик менен жакындап келатат.
15 Жетинчи периште сурнайын тартканда,+ асманда: «Кудайыбыз+ менен анын Машаягынын+ Падышалыгы бүт адамзатты башкара баштады. Ал* түбөлүктөн түбөлүккө падышалык кылат»,+— деген катуу үндөр угулду.
16 Ошондо Кудайдын алдында өз тактыларында отурган 24 аксакал+ жүзтөмөндөп жыгылып, Кудайга сыйынышты да: 17 «Азыр да,+ мурун да бар болгон Кудурети Чексиз Жахаба Кудай, сага ыраазыбыз, анткени улуу бийлигиңди колуңа алып, падышалык кыла баштадың.+ 18 Бирок элдер катуу жаалданышты, сен да каарыңды төктүң. Өлгөндөрдү соттош үчүн жана өзүңө кызмат кылган пайгамбарларыңа,+ ыйыктарыңа, ысмыңдан корккондорго, жогорку даражалууларына да, карапайымдарына да сыйлык бериш үчүн,+ ошондой эле жерди кыйраткандарды кыйратыш үчүн белгилеген убактың келди»,+— дешти.
19 Кудайдын асмандагы ыйык жайы* ачылып, келишим сандыгы көрүндү.+ Ошондо чагылган жарк-журк этип, үндөр угулуп, күн күркүрөп, жер титиреп, катуу мөндүр жаады.