Падышалар 1-китеп
19 Ахап+ Изабелге+ Илиястын кылган иштерин, пайгамбарлардын баарын кылычтап өлтүргөнүн бүт айтып берди.+ 2 Ошондо Изабел Илияска киши жөнөтүп: «Тигилердин жаны кыйылгандай эле, эртең ушу убакта сенин да жаныңды кыйбасам, кудайларым мени катуу жазаласын»,— деп айттырып жиберди. 3 Муну укканда Илияс коркуп, жанын сактап калыш үчүн+ Жүйүт жериндеги+ Беир-Шебага+ качып барды. Ал кызматчысын ошол жерге калтырды. 4 Өзү болсо чөлдө бир күн жол жүрүп, бир бадалдын түбүнө барып отурду да: «Болду, мындан ары чыдай албайм! Оо, Жахаба, жанымды алчы,+ ата-бабаларымдан эмнем артык?» — деп өзүнө өлүм тилей баштады.
5 Анан ошол бадалдын түбүнө жатып, уктап калды. Бир маалда периште аны акырын түртүп+ ойготуп: «Тур, тамактанып ал»,— деди.+ 6 Илияс караса, баш жагында кызарып ысып турган таштардын үстүндө нан, анын жанында бир кумура суу туруптур. Ал нанды жеп, сууну ичти да, кайра уктап калды. 7 Бир нече убактан кийин Жахабанын периштеси экинчи жолу келди да, аны акырын түртүп: «Тур, тамактанып ал, узак жол жүрөсүң»,— деди. 8 Илияс туруп, нандан жеп, суудан ичти. Күчтөнүп алган соң 40 күн, 40 түн жол жүрүп, чыныгы Кудайдын тоосуна, тээ Хорепке чейин барды.+
9 Анан бир үңкүргө кирип, ошол жерде түнөдү.+ Бир убакта Жахаба андан: «Илияс, бул жерде эмне кылып жүрөсүң?» — деп сурады. 10 Ал: «Асман аскерлеринин Кудайы Жахаба,+ мен сага бүт ынтам менен кызмат кылып келатам. Ысрайыл эли болсо келишимиңди бузуп,+ курмандык жайларыңды талкалап, пайгамбарларыңды кылычтап өлтүрүштү.+ Жалгыз мен эле калдым, бирок менин да жанымды кыйганы жатышат»,— деди.+ 11 Кудай ага: «Бул жерден чыгып, ушул тоодо менин алдыма, Жахабанын алдына, тур»,— деди. Анан Жахаба Илиястын жанынан өтүп баратканда,+ Жахабанын алдында тоолорду бөлүп-жарган, аскаларды талкалаган катуу шамал болду,+ бирок Жахаба шамалдын ичинде эмес болчу. Андан кийин жер титирөө+ болду, бирок Жахаба жер титирөөдө эмес болчу. 12 Жер титирегенден кийин, от пайда болду,+ бирок Жахаба оттун ичинде да эмес болчу. Андан соң акырын чыккан жумшак үн угулду.+ 13 Аны угары менен Илияс кийими менен бетин жаап,+ үңкүрдүн оозуна барып турду. Ошондо: «Бул жерде эмне кылып жүрөсүң, Илияс?» — деген үн угулду. 14 Илияс: «Асман аскерлеринин Кудайы Жахаба, мен сага бүт ынтам менен кызмат кылып келатам. Ысрайыл эли болсо келишимиңди бузуп,+ курмандык жайларыңды талкалап, пайгамбарларыңды кылычтап өлтүрүштү. Жалгыз мен эле калдым, бирок менин да жанымды кыйганы жатышат»,— деди.+
15 Жахаба ага: «Артка кайрылып, Дамасктын чөлүнө бар. Ал жакка барганыңда Хазаелди+ майлап, Сирияга падыша кылып дайында. 16 Нимшинин небереси Жехуну+ Ысрайылга падыша кылып, абыл-меколалык Шапат уулу Элишаны* болсо өзүңдүн ордуңа пайгамбар кылып дайында.+ 17 Хазаелдин кылычынан+ качып кутулганды Жеху өлтүрөт,+ Жехунун кылычынан качып кутулганды Элиша өлтүрөт.+ 18 Ысрайылда Баалдын+ алдында тизе бүкпөгөн, аны өппөгөн+ дагы 7 000 кишим бар»,+— деди.
19 Анан Илияс барып, 12 жуп бука менен жер айдап жаткан Шапат уулу Элишаны тапты. Элиша акыркы жуп буканын артында бараткан эле. Илияс жанына барып, өзүнүн кийимин+ анын үстүнө жаап, андан ары кетти. 20 Ошондо Элиша букаларды калтырып, Илиястын артынан чуркап барды да: «Адегенде барып, атам менен апамды өөп, коштошуп келейин, анан артыңыздан барам»,— деди. Ал: «Макул, барып кел, каршылыгым жок»,— деди. 21 Элиша кайтып барып, эки буканы курмандыкка чалды да, соконун жыгачтарын жагып, эт бышырды. Анан элге таратып берди, алар жешти. Андан кийин Элиша Илиястын артынан барып, ага кызмат кыла баштады.+