Петирдин 1-каты

4 Демек, Машаяк адам болуп жүргөн кезинде азап чеккен болсо,+ силер да Машаякка окшоп ой жүгүрткөнгө даяр болгула, анткени азап чеккен адам күнөө кылбай калган болот.+ 2 Ал калган өмүрүн пенделик каалоолорун канааттандырып эмес,+ Кудайдын эркин аткарып өткөрөт.+ 3 Мурун уятсыз жүрүм-турумга*, ээ-жаа бербеген кумарларга берилип, ичкиликти көп ичип, жосунсуз той-тамашаларга, ичкилик ичүү мелдештерине катышып, жийиркеничтүү буркандарга табынып*,+ Кудайды тааныбаган адамдардай+ жашап келгениңер жетишет. 4 Андай адамдар азыр өздөрү менен кошо ошондой жаман иштерди жасабай калганыңарга таң калып, силерди жамандап жатышат.+ 5 Бирок алар тирүүлөрдү да, өлгөндөрдү да соттогонго даяр турган соттун алдында жооп беришет.+ 6 Ошондуктан өлгөндөргө* да жакшы кабар таратылган,+ башкалар аларды сыртына карап соттошсо да, алар Кудайдын көз алдында анын ыйык рухунун жетеги менен жашай алышы үчүн таратылган.

7 Бардык нерсенин аягы жакындап калды. Ошон үчүн акыл-эстүү болгула,+ Кудайдан дайыма тиленгиле*.+ 8 Айта кетчү дагы бир маанилүү нерсе, бири-бириңерди жан-дилиңер менен сүйгүлө,+ анткени сүйүү көп күнөөлөрдү жаап коёт.+ 9 Бири-бириңерге наалыбай меймандостук көрсөткүлө.+ 10 Кудай ар бириңерге кандайдыр бир жөндөм* берген. Ошол жөндөмүңөргө жараша Кудайдын ар кандай жолдор менен көрсөткөн ырайымына ээ болгон жакшы кызматчылар* катары бири-бириңерге кызмат кылгыла.+ 11 Ким сүйлөсө, Кудайдын сөздөрүн айтып жатканы көрүнүп тургудай сүйлөсүн. Ким башкаларга кызмат кылса, Кудай берген күчкө таянып кызмат кылсын.+ Ошондо Кудай Иса Машаяк аркылуу бардык жагынан даңкталат.+ Даңк менен кудурет түбөлүктөн түбөлүккө ага таандык. Оомийн*.

12 Сүйүктүү бир туугандарым, сыналышыңар үчүн оттой кыйынчылыктарга кабылганыңарда таң калбагыла,+ бул таң кала турган деле нерсе эмес. 13 Анын ордуна, Машаякка окшоп азап тартып жатканыңарга+ кубангыла.+ Ошондо анын даңкы айкын көрүнгөндө да кубанып-шаттанасыңар.+ 14 Эгерде силерди Машаяктын жолдоочусу болгонуңар үчүн кордоп жатышса, анда бактылуусуңар,+ себеби бул силерде Кудайдын даңктуу ыйык руху бар экенин көрсөтүп турат.

15 Араңардан эч ким киши өлтүрүп же уурулук кылып, же дагы башка жаман иш кылып, же башкалардын ишине кийлигишип азап тартпасын.+ 16 Ал эми Машаяктын жолдоочусу болгону үчүн азап тартса, анда уялбасын.+ Кайра, андан ары да анын жолдоочусу катары жашап, Кудайды даңктай берсин. 17 Анткени сот үчүн белгиленген убакыт келип калды. Ал Кудайдын элинен башталат.+ Эгерде сот бизден башталса,+ анда Кудайдын жакшы кабарын укпай койгондор* эмне болот?+ 18 «Эгер адил киши араң куткарылса, анда ыймансыз менен күнөөкөр эмне болот?!»+ 19 Ошондуктан Кудайдын эркин аткарганы үчүн азап тартып жаткандар мындан ары да жакшы иштерди кылып, өздөрүн ишеничтүү Жаратканга тапшырышсын.+