Olembiwa na Mateyu

13 Dambo lelo, Yesu oomaruwa waniwa dowa garati mpepetele mwa nyanja. 2 Gulu lilukulu la athu loosonkana vevo agaratile liye, teto liye oogwela mungalawa nogarati, moi gulu letene la athulo looimela mpepetele mwa nyanjeyo. 3 Eno liye ooawandela vyongo vinjinji vo-indi-eda chito mafanizo ira: “Kavuruwanani! Muthu m’mo-iwa oodowa fesa mbewu. 4 Vevo afesa liye mbewudo, mbewu dimo-i doomorela m’mbali mwa sewu moi mbalame dooza nodidja. 5 Mbewu dimo-i doomorela vamabwe vevo vakede kala theya yoyeva moi chifukwa ya vyevi mbewudo doomela mombaraanya. 6 Koma ungazile zuwa, mbewudo doonyala moi vogomi-eda viwa doouma chifukwa yoi michichidiwa kadavolowile vati. 7 Mbewu dimo-i doomorela vaminga moi mingado doolepeli-a ira mbewudo diulukule. 8 Koma mbewu dimo-i doomorela va theya yapama moi doowambeela bala vipaso. Mbewu imo-i yoobala vipaso 100, imo-iwa 60 teto imo-iwa 30. 9 Muthu unoyo un’na mabaru avwe.”

10 Ndiye ofunjedae kooza nomufuka ira: “Chifukwa n’ni munaonga na athwala vo-indi-eda chito mafanizo?” 11 Koma liye oowasomeda ira: “Nyo muva-iwa mwai oyi muvwecheche visisi vyopatuleya vya Umwene waudimu, koma athwala kativa-iwe mwai unola. 12 Chifukwa unoyo un’na vyongo vinjinji, unoza aenjedeliwe moi unoza akale na vyongo vyoinjiva. Koma unoyo kan’na yongo, unoza awakiwe vyevyo un’na liye. 13 Chichifukwa iwa ndinaonga na aluwa vo-indi-eda chito mafanizo. Chifukwa ngakale ira kanoing’ana, koma katinaona iliyetene. Ngakale ira kanovwa, katinavwechecha vyevyo vinaongiwa moi katinazindikila vyevyo vinatapulelaathu. 14 Ulosi wa Yesaya unokwakwanela va athu anala. Ulosiyo unaonga ira: ‘Munoza muvwe, koma kamunaza muzindikila vyevyo vinatapulelaathu. Munoza muing’ane, koma kamunaza muona yongo iliyetene. 15 Chifukwa athwala kooumi-a mirima diwa moi koovwa na mabarwiwa koma katinapanga vyevyo kavwileathu. Ko-eya maswiwa ira katione koma teto ko-eya mabarwiwa ira kativwe nozindikila vyevyo vinatapulelaathu. Vyo-arelavo viwa pivyoi m’murimani mwiwa katinavwechecha vyevyo vinatapulelaathu notembenuwa ira ndiachili-e.’

16 Koma nyo muli osangalala chifukwa maswinyu kanoona koma teto mabarwinyu kanovwa. 17 Chifukwa ndithu ndinaauwandelani, anamaongela anjinji koma teto athu olungama koolakalaka ira kaone vyongo vyevyo munaviona nyo koma kativionile, koma teto ira kavwe vyongo vyevyo munavwa nyo koma kativivwile.

18 Sopano vuruwanani fanizo la muthu ofesa mbewu. 19 Mbewu dedo damorele m’mbali mwa sewu dile ngu muthu uliwetene unoyo unavwa mawu a Umwene koma lepela zindikila vyevyo kanatapulelaathu, moi vyera eno otakaloyo unoza nodichosa m’murimani mwa muthu unola. 20 Koma mbewu dedo dafesiwe vamabwe, ngu muthu unoyo uvwile mawu nowasomedela mombaraanya koma teto mosangalala. 21 Komave chifukwa yoi michichidiwa kadivolowile vati unoulukula wa thawi yoyeva. Koma agumana na masauso kapena aambeela zuzumi-iwa chifukwa ya uthenga wapama, liye unofooka mombaraanya. 22 Mbewu dedo dafesiwe vaminga, ngu muthu unoyo unavwa mawu, koma chifukwa ya nkhawa da moyo wa muthawiila* koma teto chinyengo yakopolo ya chuma vinolepeli-a mawayo ulukula moi kanabala vipaso. 23 Koma mbewu ineyo yafesiwe va theya yapama, ngu muthu unoyo uvwile mawu nozindikila vyevyo kanatapulelaathu, unoyo abalile vipaso, m’mo-iwa abalile vipaso 100, m’mo-iwa 60 teto m’mo-iwa 30.”

24 Oowafotokozela teto fanizo limo-iliwa ira: “Umwene waudimu uli ngati muthu unoyo afesile mbewu yapama m’munda mwae. 25 Koma athu kagonanga, mudanae ooza nofesa namsongole m’munda wa tiriguyo nodowanga. 26 Tiriguyo angaulukulile nokumi-a njere, namsongole teto oowambeela oneela. 27 Ndiye akapolo a mwinyailo wa mundole kooza nomufuka ira, ‘Mbwiyeni, kodi ndesanga mwafesile mbewu dapama m’munda mwinyu? Nanga namsongole ukumele waani?’ 28 Liye oowasomeda ira, ‘Vikala mudananga unoyo upangile vyevi.’ ‘Ndiye akapolwayo koomufuka ira, ‘Kodi munafuna ira nidowe namudule namsongoleyo?’ 29 Koma liye oowasomeda ira, ‘Naari, ovela ira vodula namsongoleyo munokoza dulela limo-i na tirigu. 30 Iyani vyetene viulukulele limo-i mpakana thawi yo-anda. Munyengo yo-anda ndinoza ndiwandele o-anda ira: Yowambeela sonkani-ani namsongole nomumanga mitolo ira athumeiwe. Vanduli viwa musonkani-e tirigu munyumbanga yosungelamo vyongo.’”

31 Oowafotokozela teto fanizo limo-iliwa ira: “Umwene waudimu uli ngati kongolo ya mpilu* ineyo muthu alandile liye nodowa izala m’munda mwae. 32 Kongolo inela chiing’onong’ono vinjinji kwaranya kongolo detene, koma yamela inoulukula vinjinji kwaranya mbewu detene daudimba teto inokala tengo, moi mbalame damulengalenga dinomanga thunji mutambi diwa.”

33 Oowafotokozela teto fanizo limo-iliwa ira: “Umwene waudimu uli ngati vyofufumi-a vyevyo iyana m’mo-iwa alandile liye novitangani-a na uthu okwakwana mabeseni maralu alukulu oezela, moi uthu wetene unoyo oofufuma.”

34 Yesu oowonga vyongo vyetene vyevi na gulu la athulo vo-indi-eda chito mafanizo. Thawi detene liye oowonga na aluwa vo-indi-eda chito mafanizo, 35 ira vyevyo Mulungu aongile liye zela mwa namaongela vikwakwaneli-ediwe. Namaongeloyo aongile ira: “Ndinoza ndi-ule vamulomo vanga noonga mafanizo. Ndinoza ndifalise vyongo vyevyo vyabiseile kumela vowambeela.”*

36 Angawandelile gulu la athulo ira lidowenga, oovolowa m’mba. Ndiye ofunjedae kooza wa liye noonga ira: “Nitapuleleni fanizo la namsongole m’munda wa tirigu.” 37 Liye oosomeda ira: “Unoyo afesile mbewu yapama ngu Mwana wa muthu. 38 Munda chiilambo teto mbewu yapama mba a-ima a Umwene. Koma namsongole mba a-ima a otakaloyo, 39 teto mudani unoyo afesile namsongole ngu Mdjelekezi. Thawi yo-anda inaimelela mapeto a thawiila* moi o-anda mbewu mba angelo. 40 Mofwanafwana na namsongole unoyo unasonkani-iwa nomuthumeya vamulo, vinaza vikala teto eno va mapeto a thawiila.* 41 Mwana wa muthu unoza atumize angelwae moi kanoza kachosemo mu Umwenae vyongo vyetene vyokwakwatuwi-a koma teto unoza achose athu oovwela malamulo. 42 Vanduli viwa aluwa kanoza kavochediwe mung’anjo ya mulo. Mwemo kanoza kaule nokukuta mano. 43 Vathawi ineyo athu olungama kanoza kawale vinjinji ngati zuwa mu Umwene wa Babiwa. Muthu unoyo un’na mabaru avwe.

44 Umwene waudimu uli ngati chuma yobiseya m’munda, ineyo muthu aifwanyile liye noisunga. Chifukwa ya imwemwe ineyo an’na liye, oodowa guli-a vyongo vyetene vyevyo an’na liye nogula mundoyo.

45 Koma teto Umwene waudimu uli ngati wamalonda oendaenda unoyo unasaelasaela ngale da mtengo wavadimu. 46 Angafwanyile ngale imo-i ya mtengo wavadimu, oodowa moi mombaraanya ooguli-a vyongo vyetene vyevyo an’na liye nogula ngaleyo.

47 Koma teto Umwene waudimu uli ngati thavi lelo livochediwe munyanja moi linosonkani-a somba da mitundu do-iyana-iyana. 48 Thavilo lazaala kanolikokela ukumani moi kanogarati vati nosakulangamo somba dapama nodi-elanga m’mitanga, koma somba doofuneya kanoditatila. 49 Pumwemo teto vinazeathu vikalele va mapeto a thawiila.* Angelo kanoza kachose athu otakala vaari va athu olungama 50 moi kanoza kaavochede mung’anjo ya mulo. Mwemo kanoza kaule nokukuta mano.

51 Yesu oowafuka ira kodi munovwechecha tapulela wa vyongo vyetene vyevi?” Aluwa koomusomeda ira: “Ee.” 52 Vanduli viwa liye ooawandela ira: “Voi muvwechecha vyongo vyetene vyevi, iziwani ira mphunzisi uliwetene unoyo ufunji-iwe vya Umwene waudimu uli ngati mwinyailo wa nyumba, unoyo unakumi-a vyongo visha na vyawale m’malo anayo unasungelamo liye chumae.”

53 Liye angamari-ile onga mafanizo anala oovenyawo wewo. 54 Angafiile mudela la waniwa oowambeela afunji-a musunagoge mwiwa, moi athwayo koodabwa noonga ira: “Kodi muthu unola, zelu na chito dakopolo dedi unadilanda waani? 55 Kodi muthu unola kai mwana wa kalipentala opala matabwa? Kodi m’mae kai Mariya, teto achimwenae kai Yakobo, Yosefe, Simoni na Yudasi? 56 Teto arongolae etene kai nin’na weuno? Nanga liye vyetene vyevi uvilandile waani?” 57 Eno aluwa kookumudwa na liye moi katamuroromele. Koma Yesu ooawandela ira: “Namaongela kanalemekeziwa udela lawaniwa, koma unolemekeziwa udela limo-i.” 58 Chifukwa yoi aluwa katamuroromela liye kaapangile chito dinjinji dakopolo wewo.