Olembiwa na Maliko

15 M’bandakucha, asembe alukulu limo-i na andimuwa koma teto alembi, tapulela ira Khoti letene Lilukulu la Ayuda,* koosonkana vamo-i ira kagwilizane vyevyo kanamupangenaathu Yesu. Vanduli viwa koomumanga nomudowana ira kadowe kamupeleke wa Pilato. 2 Eno Pilato oomufuka Yesu ira: “Kodi uli Mwene wa Ayuda?” Liye oosomeda ira: “Vili eno, monga mwemo muongele nyo.” 3 Koma asembe alukulu koomunamedela vyongo vinjinji. 4 Ndiye Pilato oomufuka nawili ira: “Kodi kunasomeda iliyetene? Kaona injiva wa milandu dedo kanaunamedelaathudi.” 5 Koma Yesu kaasomedile iliyetene, moi Pilato oodabwa vinjinji.

6 Vaikondwelelo iliyetene ya Pasika, Pilato ookaana izolowezi yomasula mkaidi m’mo-i unoyo athwayo kamuvepileathu. 7 Vathawi inela muthu m’mo-iwa zina lae Baraba ali mundende limo-i na athu oukela boma. Aluwa koopha muthu vathawi ineyo kaukelaathu boma. 8 Eno gulu la athu loofiya nowambeela vepa ira aamasulele mkaidi mogwilizana na vyevyo Pilato aapangela liye thawi detene. 9 Liye oowafuka ira: “Kodi munafuna ira ndiumasuleleni Mwene wa Ayuda?” 10 Chifukwa Pilato ooiziwa ira asembe alukulu kamupelekile chifukwa ya sanje. 11 Komave asembe alukulu koolimbikisa athu ira kavepe ira aamasulele Baraba. 12 Vosomeda, Pilato oowafuka ira: “Nanga ula unoyo munamuromola nyo ira Mwene wa Ayuda, ndimupangena n’ni?” 13 Aluwa kookuwa ira: “Apachikiwe unoyo!”* 14 Koma Pilato oopitiliza afuka ira: “Chifukwa n’ni? Kodi muthula uchimwile n’ni?” Koma athwayo koopitilizave kuwa mwakopolo ira: “Unoyo apachikiwe ba-i!”* 15 Vofuna kwakwaneli-eda vyevyo athwayo kafunaathu, Pilato oowamasulela Baraba. Ndiye oolamula ira Yesu avaziwe, vanduli viwa oomupeleka wa athu ira kadowe kamuphe vomupachika vatengo.

16 Asilikali koomulanda nomudowana muwari mwa mpanda va nyumba ya bwanamkubwa. Wewo koosonkani-a gulu letene la asilikali. 17 Ndiye koomuwari-a yowara yofiila, teto kooluwa chipewa ya umwene yaminga nomuwari-a umuru. 18 Moi koowambeela mukuwela ira: “Kacheluwani, nyo Mwene wa Ayuda!” 19 Koma teto koomuvaza m’muru na bango nomutapeda moi koomukokorela. 20 Kangamari-ile munyoza, koomukurula yowara yofiila ineyo kamuwari-ileathu moi koomuwari-a malayae aunde vanduli viwa kookuma dowa mukomela vatengo. 21 Koma teto aluwa koomulamula muthu m’mo-iwa wawu Kurene zina lae Simoni unoyo avira sewu unoyo kumela udela la umavande ira atukule tengo ozuzumelavo* wa Yesu. Muthu unola ali babae wa Alekizanda na Rufu.

22 Eno koomufiyana vamalo oromoliwa ira Gologota. Mawu anala kanatapulela ira, “Malo a Chibade.”* 23 Wewo aluwa koomuva-a vinyu otangani-a na mule, koma liye ookoonda. 24 Moi koomukomela vatengo nogaana malayae aunde vopanga maele, ira kaone yongo ineyo muthu uliwetene unalande liye. 25 Ndiye m’ma 9 koloko mamawa,* aluwa koomukomela vatengo. 26 Aluwa kookomela ikwangwani vadimu va murwae nolembavo mulandu unoyo kamupheleathu ira: “Mwene wa Ayuda.” 27 Koma teto aluwa koopachika achifamba ambin’li limo-i na liye. M’mo-i kamupachikile undanda lae lodjana teto m’mo-iwa kamupachikile undanda lae lamazele. 28* —— 29 Athu anayo kavira vakwikwi na malo anayo koowonga mawu omunyoza Yesu moi koopukusa miru diwa noonganga ira: “We unoyo waonga ira unokoza gwi-a kachisi nomumanga wa malambo maralu, 30 vivulumuche votita vatengo ozuzumelavoyo!”* 31 Naaluwene teto asembe alukulu limo-i na alembi koomunyoza. Aluwa kaonga ira: “Liye ookwakwani-a vulumucha athu amo-iwa, koma unaalepela vivulumucha ekave! 32 Sopano Kristu, Mwene wa Aisaraeli, atite vatengo ozuzumelavoyo,* ira iyo nione ira niroromele.” Naaluwene teto achifamba anayo kapachikiwe limo-i na liye koomunyoza.

33 Ambeela 12 koloko tana* vailambo yetene vookala dima, mpakana 3 koloko tana.* 34 M’ma 3 koloko tana, Yesu ookuwa mwakopolo ira: “Eʹli, Eʹli, laʹma sa·bach·thaʹni?” Mawu anala kanatapulela ira: “Mulungwanga, Mulungwanga, chifukwa n’ni mundi-iile?” 35 Athu amo-iwa anayo kaimelile vakwikwi kangavwile vyevi koowambeela onga ira: “Kavuruwanani! Unamuitana Eliya.” 36 Vanduli viwa muthu m’mo-iwa ootamanga dowa ela siponje muvinyu owaawa moi ooi-ela ubango nomuva-a ira ang’we. Moi aongile ira: “Mu-iyeni! Nione akala Eliya unaze za mutiti-a vatengova.” 37 Sopano Yesu ookuwa mogweli-a mawu vanduli viwa ookhwa. 38 Thawi ineyo nguwo yochinga ya munyumba yopatuleya yoong’ambeya vaari kumela vadimu mpakana vati. 39 Sopano, msogoleli wa asilikali unoyo aimelile vakwikwi na Yesu, angaonile vyevo vyaireile vathawi ineyo akhwa liye, aongile ira: “Ndithu, muthula ali Mwana wa Mulungu.”

40 Vookala teto a-iyana amo-iwa anayo kaimelile vandendai onanga vyevyo vyaireya. Vookala Mariya wawu Magadala, Mariya m’mae wa Yakobo n’ng’onong’ono na Yose koma teto vookala Salome. 41 A-iyana anala kaenda limo-i na liye nomukami-anga vathawi ineyo ali liye wu Galileya. Vookala teto a-iyana amo-iwa anjinji anayo kazile limo-i na liye kumela wu Yelusalemu.

42 Sopano voi yali thawi ya mazulo vinjinji koma teto lali Dambo Lokoozeela, kapena ira lali dambo loi mechelo liwa ti Sabata, 43 Yosefe wawu Arimateya, muthu oiziweya wa Mukhoti Lilukulu la Ayuda, unoyo aembekezela Umwene wa Mulungu ooza. Liye oodowa molimba murima wa Pilato dowa vepa mtembo wa Yesu. 44 Koma Pilato ookaikela akala Yesu ali angakhwile. Eno oomuitani-a msogoleli wa asilikali nomufuka akala Yesu ali angakhwile wale. 45 Angasimikizele kumela wa msogoleli wa asilikaliyo, oolola ira Yosefe adowe alande mteboyo. 46 Yosefe oogula nguwo yapama vinjinji moi angatiti-ile mtembo wa Yesu ooupota na nguweyo, dowa u-ela m’manda* anayo aasemile liye valibwe. Vanduli viwa oogubuducha libwe lilukulu no-eya vamulango wa mandayo. 47 Koma Mariya wawu Magadala na Mariya m’mae wa Yose, koopitiliza ing’anechecha vamanda anayo Yesu a-eliwe liye.