Olembiwa na Luka

17 Vanduli viwa Yesu ooawandela ofunjedae ira: “Kavinawandeye ira vyokwakwatuwi-a kavikalevo. Koma soka wa muthu unoyo unapangi-a ira amo-iwa kakwakwatuwe! 2 Vinokala pama vinjinji ira liye amangeleliwe libwe lilukulu muliko-i mwae nomuvocheda munyanja, iyana noi akumudwi-e m’mo-i mwa a-ima ang’onong’ono anala. 3 Samalani. Akala balawo upangile chimo umusumulule moi akala ulapile umukululukele. 4 Ngakale angauchimwele maulendo 7 va dambo, vanduli viwa liye za wa weyo maulendo 7 za onga ira, ‘Ndilapa,’ umukululukele.”

5 Vanduli viwa anamarumiwayo koomuwandela Mbwiye ira: “Nienjedeleni iroromelo.” 6 Ndiye Mbwiye ooawandela ira: “Aakale ira mukaana iroromelo yoyeva mofwanafwana na kongolo ya mpilu, moowanda wandela tengo wa mambulesila ira, ‘Venya vano, udowe wavizale munyanja!’ moi oouvwelani.

7 Mbaani wa nyo unoyo unamuwandele kapolwae unoyo ukede fiya wene kumela umunda kapena kumela oweta khosa ira, ‘Za vatebulova uze udje’? 8 M’malomwiwa liye unaza amuwandela ira, ‘Wara vyowara vyawo vyo-indela chito era eno undipiyele yodja ya mazulo moi unditumikele mpakana ndingamari-ile dja nong’wa, vanduli viwa nawen’ne teto udje nong’wa.’ 9 Kodi munaganiza ira liye unoza amuyamikele kapoloyo chifukwa ya vyevyo upangile liye? Naari. 10 Chimozimozi nanyen’ne teto, mwapanga vyetene vyevyo mwava-iwe nyo va chitwinyu, muongenga ira: ‘Iyo nili akapolo o-okaana chito. Nikede panga vyevyo nafuneya iyo panga.’”

11 Ndiye vevo adowa liye wu Yelusalemu, avirile m’malile a Samariya na Galileya. 12 Vevo avolowa liye mu mzinda umo-iwa, oogumana na alombwana 10 amakate koma aluwa kali kangaimelile vandendai na liye. 13 Vanduli viwa aluwa kookuwa mogweli-a mawu ira: “Yesu, Mphunzisi, nipangeleni chifundo!” 14 Yesu angaaonile ooawandela ira: “Dowani mwavioni-ede wa asembe.” Ndiye vevo kadowaathu koochila. 15 M’mo-i wa aluwa angaonile ira uchila, oowela atamandanga Mulungu mogweli-a mawu. 16 Liye angafiile wa Yesu ookokora mpakana kovae vati, moi oomuyamikela. Muthu unola ali Msamariya. 17 Ndiye Yesu aongile ira: “Athu etene anayo kachili-iwe kali 10 nanga athu amo-iwa 9 kali waani? 18 Kodi kavali muthu uliwetene unoyo uzide za lemekeza Mulungu patulavo muthu wa tundu umo-iwa oka unola?” 19 Ndiye Yesu oomuwandela muthuyo ira: “Maruwa udowenga, iroromelo yawo iuchili-a.”

20 Afarisi kangamufukile ira Umwene wa Mulungu unaza alini, liye oosomeda ira: “Umwene wa Mulungu kunaza uza mundila yoi athu etene kauzindikile. 21 Moi athu katinaza kaonga ira, ‘Kaonani uli uno!’ kapena, ‘Kaonani uli ule!’ Chifukwa Umwene wa Mulungu uli vaari vinyu.”

22 Vanduli viwa ooawandela ofunjedae ira: “Thawi inoza ifiye vevo munaze nyo mulakalake ona dambo la Mwana wa muthu koma kamunaza muliona. 23 Athu kanoza kauwandeleni ira, ‘Kaonani uli ule!’ kapena ‘Kaonani uli uno!’ Koma nyo kamuze mudowe wewo kapena a-arela. 24 Chifukwa mofwanafwana na mwemo mphezi inavyerimelaathu kumela umbali imo-iwa yaudimu dowa fiya umbali imo-iwa, vinaza vikala teto eno va dambo la Mwana wa muthu. 25 Koma yowambeela unafuneya gumana na mavuto anjinji koma teto koondiwa na athu a m’bado ula. 26 Koma teto mofwanafwana na vyevyo vyaireile m’malambo a Nowa, vinaza vikala teto chimozimozi m’malambo a Mwana wa muthu. 27 M’malambo anayo athu koodja nong’wa. Alombwana kootela teto a-iyana kooteliwa mpakana dambo lelo Nowa avolowile liye mu ingalawa, moi Igumula yooza nowaononga athu etene anayo. 28 Chimozimozi teto na vyevyo vyaireile m’malambo a Loti. Athu koodja, koong’wa, koogula vyongo, kooguli-a, koozala mbewu koma teto koomanga manyumba. 29 Koma dambo lelo Loti akumile liye mu Sodomu, udimu oomora mabwe okara mulo* moi koopha athu etene. 30 Vinaza vikala teto chimozimozi va dambo lelo, Mwana wa muthu unaze liye aoneele.

31 Va dambo lelo muthu unoyo unaze akale vadimu va nyumba, kaze atite ira adowe atukule katundu m’mbamo. Chimozimozi teto muthu unoyo uli umunda kaze awelele waniwa ira adowe atukule vyongo vyae. 32 Umbuwelani vyevyo vyamuireele iyana wa Loti. 33 Muthu uliwetene unoyo unafuna vulumucha moywae, unoza autatile, koma uliwetene unoyo unatatila moywae unoza aufwanye. 34 Ndithu ndinaauwandelani, ma-iyu anayo athu ambin’li kanaza kakala kangagonatile limo-i vabedi. M’mo-i unoza atukuliwe, koma m’mo-i unoza a-iiwe. 35 A-iyana ambin’li kanaza kakala kachilanga vachilo m’mo-i unoza atukuliwe koma m’mo-iwoyo unoza a-iiwe.” 36* —— 37 Eno aluwa koomufuka ira: “Kodi vyevi vinaza viireya waani Mbwiyeni?” Liye ooawandela ira: “Wewo uli thuthu lokhwa, viwombankhanga vinaza visonkana teto wewo.”