Olembiwa na Luka
2 Sopano m’malambo anayo, Kaisara Augustu oolamula ira athu etene muilambweyo kadowe kalembi-e mu kaundula. 2 (Kalembela unola ali owambeela moi ooireya vevo Kureniyo ali liye bwanamkubwa wa Siriya.) 3 Athu etene koodowa lembi-a moi uliwetene oodowa wu mzinda wa waniwa. 4 Yosefe naliyene ookuma wu Galileya, mu mzinda wa Nazareti dowa wu Yudeya, wu mzinda wa Davide oromoliwa ira Betelehemu, chifukwa ali wa m’banja koma teto wa fuko la Davide. 5 Oodowa lembi-a limo-i na Mariya unoyo amutelile liye mogwilizana na vyevyo kalonjezanileathu. Vathawi inela Mariya ali anga-alile vang’ono bala. 6 Kangali wewo, thawi yoi abale yookwakwana. 7 Liye oobala mwanae owambeela walombwana moi oomukuneela na nguwo nomugonati-a modjelamo viweto, chifukwa yoi munyumba dofiyedamo alendo kamwali malo.
8 Mudela leli mookala teto abusa anayo kagona umalo odji-elawo viweto noing’anelanga khosa diwa ma-iyu wetene. 9 Morurumucha ngelo wa Yehova* oofiya vevo kaliathu, teto ulemelelo wa Yehova* oowala vamalo etene anayo moi aluwa koowova vinjinji. 10 Koma ngeloyo ooawandela ira: “Kamuove! Miyo ndizide za lengeza wa nyo uthenga wapama wa imwemwe ilukulu ineyo athu etene kanazeathu kakaena. 11 Chifukwa peeno, mu mzinda wa Davide mubaliwa mpulumusinyu, unoyo ngu Kristu Mbwiye. 12 Ndinouva-ani izindikilo ila: Wewo munodowa mwamufwanye mwana n’ng’onong’ono kangamukuneele na nguwo nomugonati-a modjelamo viweto.” 13 Morurumucha, vevo voowoneya gulu lilukulu la angelo lingali limo-i na ngeloyo moi loowambeela tamanda Mulungu ira: 14 “Ulemelelo udowe wa Mulungu wa udimu vinjinji, teto vailambo yavati vano murendele vaari va athu anayo unasangalalana liye.”
15 Eno angelwayo kangawelele udimu, abusayo koowambeela wandelana ira: “Tiyemoni nidowe wu Betelehemu ira nidowe naone vyevyo viireile, mogwilizana na vyevyo Yehova* uniiziwi-ile liye.” 16 Aluwa koodowa mombaraanya moi koomufwanya Mariya na Yosefe koma teto mwana n’ng’onong’onoyo, kangamugonati-ile modjelamo viweto. 17 Abusayo kangaonile vyevi, koofotokoza uthenga unoyo kawandeliweathu okuza mwanoyo. 18 Athu etene anayo kavwile vyevi koodabwa na vyevyo abusayo kaawandelileathu. 19 Koma Mariya oosunga mawu etene anala m’murimani mwae moi oowambeela ganizela tapulela wa vyongo vyevi. 20 Vanduli viwa abusale koodowa, kalemekezanga koma teto katamandanga Mulungu chifukwa ya vyongo vyetene vyevyo kavwileathu koma teto vyevyo kavionileathu, mogwilizana na vyevyo kawandeliweathu.
21 Vangavirile malambo 8, thawi yoi kapange mdulidwe wa mwanoyo ingakwakwanile, koomuva-a zina loi Yesu. Leli ti zina lelo ngelole aongile liye Mariya aanakale oembekezela.
22 Koma teto thawi yoi aluwa kaweli-iwe mogwilizana na Ilamulo ya Mose ingakwakwanile, koomudowana mwanoyo wu Yelusalemu dowa mupeleka wa Yehova.* 23 Vyevi vyali vyogwilizana na vyevyo vyalembiwe mu Ilamulo ya Yehova* ira: “Mwana uliwetene walombwana owambeela baliwa unaza akala owela wa Yehova.”* 24 Wewo aluwa koopeleka sembe mogwilizana na vyevyo Ilamulo ya Yehova* inaongaathu ira: “maziya ambin’li kapena a-ima ambin’li a kangaiwa.”
25 Ndiye mu Yelusalemu mookala muthu m’mo-iwa zina lae Simiyoni. Lombwana unola ali olungama koma teto ovipeleka wa Mulungu. Liye oodedi-edela thawi ineyo Mulungu unaze liye amiyali-e Isaraeli moi zimu owela wali va liye. 26 Koma teto Mulungu oomuululela vo-indi-eda chito zimu owela ira kanaza akhwa aanamuone Kristu wa Yehova.* 27 Ndiye mosogoleliwa na zimu owela, liye ooza wu kachisi. Moi vevo makolwae a Yesu, kamuzilenaathu ira kamupangele vyevyo Ilamulo yafunaathu, 28 liye oomulanda mwanoyo m’mandani mwae nowambeela tamanda Mulungu ira: 29 “Sopano, Mbwiye Mulukulu Vinjinji, munolola kapolwinyu dowa mwamurendele mogwilizana na vyevyo mwaongile nyo, 30 chifukwa maswanga koona ndilinyu yovulumuchela athu 31 ineyo mukozile nyo vamaso va athu a mitundu detene. 32 Maswanga koona wala ochosa nguwo yopimba ineyo inalepeli-a ira athu a mitundu dimo-i kationenga, koma teto ndiona ulemelelo wa athwinyu Aisaraeli.” 33 Babae wa mwanoyo koma teto m’mae kakeda dabwa na vyevyo Simiyoni aonga liye vyokuza mwanoyo. 34 Koma teto Simiyoni oowadalisa makolwayo moi oomuwandela Mariya, m’mae wa mwanoyo ira: “Kavuruwana! Mwanola u-eliwa ira anjinji kagwe koma teto ira anjinji kavenye mu Isaraeli. Koma teto ira akale izindikilo ineyo athu anjinji kanazeathu kairuni-e 35 (supada lolapa, linoza liulate) ira vyevyo athu anjinji kanaganizaathu m’murimani mwiwa vioneele vowela.”
36 Vookala teto namaongela wa-iyana, zina lae Ana mwana wa Fanueli, wa fuko la Aseri. Iyana unola ali okalamba vinjinji moi akede kala na mamunae wa chaka 7 doka kumela vevo katelanileathu.* 37 Sopano ali iyana wa masiye moi an’na chaka 84 koma kaasauweleya va kachisi. Liye oopanga utumiki opatuleya tana na ma-iyu moi oosala dja koma teto oopempela mopembezela. 38 Vathawi ineyo liye oofiya vakwikwi nowambeela muyamikela Mulungu koma teto onga vyokuza mwanoyo wa athu etene anayo kaembekezela vulumuchiwa wa Yelusalemu.
39 Eno kangamari-ile panga vyetene mogwilizana na Ilamulo ya Yehova,* koowelela wu Galileya, wu mzinda wa waniwa wu Nazareti. 40 Mwanoyo oopitiliza ulukula koma teto kala wakopolo. Zelu dae dooinjiva moi Mulungu oopitiliza sangalala na liye.
41 Chaka na chaka makolwae koowomeliwa dowa wu Yelusalemu, wu Ikondwelelo ya Pasika. 42 Ndiye angan’na chaka 12, aluwa koomudowana wewo mogwilizana na mwambo wa Ikondwelelo. 43 Ikondwelelweyo ingamalile, aluwa koomaruwa nowelela waniwa. Koma Yesu oo-ala wu Yelusalemu koma makolwae kataiziwile vyevi. 44 Aluwa kaganiza ira liye uli mugulu la athu avaulendwayo, moi kooenda ulendo wa dambo latuta. Vanduli viwa koowambeela musaelasaela mwa abaliwa na afwiwa. 45 Koma kangalepelile mufwanya, koowelela wu Yelusalemu. Moi wewo koomusaela valivetene. 46 Ndiye vangavirile malambo maralu, koomufwanya angali mukachisi, angagaratile vaari va aphunzisi aavuruwananga koma teto aafukanga vyofuka. 47 Koma athu etene anayo kamuvuruwana koodabwa vinjinji na mwemo asomedela liye koma teto voona ira ali ovwechecha vinjinji vyongo. 48 Makolwae kangamuonile koodabwa vinjinji, moi m’mae oomufuka ira: “Mwananga, chifukwa n’ni univuti-ile eni? Miyo na babawo nookaana nkhawa vinjinji moi nera usaelasaela.” 49 Koma liye oowasomeda ira: “Chifukwa n’ni mwandisaela? Kodi nyo kamunaiziwa ira ndinafuneya fwanyeya mu nyumba ya Babanga?” 50 Koma aluwa katavwechechile vyevyo aawandela liye.
51 Vanduli viwa liye oomaruwa limo-i na aluwa nowelela wu Nazareti moi oopitiliza avwela. Veva teto m’maeyo oosunga mosamala vinjinji mawu etene anala m’murimani mwae. 52 Koma Yesu oopitiliza ulukula usinkhu na zelu. Moi Mulungu na athu koopitiliza sangalala na liye.