Olembiwa na Luka
4 Vanduli viwa Yesu oovenyawo wu Yorodano angazaaliwe na zimu owela moi zimuyo oomulanda nomuendi-a m’malo o-iyana-iyana muipululu 2 wa malambo 40, wewo aesiwa liye na Mdjelekezi. Wa malambo etene anayo kaadjile iliyetene moi malambwayo kangamalile, ookaana ndala. 3 Mdjelekeziyo angaonile vyevi oomuwandela ira: “Akala muli mwana wa Mulungu, wandelani libweli ira likale mkate.” 4 Koma Yesu oomusomeda ira: “Malemba kanaonga ira, ‘Muthu kanakale na moyo na yodja yoka.’”
5 Eno oomudowana vamalo ogwela vinjinji moi oomuoni-a maumwene etene availambo yavati wathawi yoyeva. 6 Ndiye Mdjelekezi oomuwandela ira: “Ndinouva-ani ulamulilo va maumwene etene anala na ulemelelo wetene, chifukwa ulamulilo wetene upelekiwa wa miyo moi ndinokoza upeleka wa muthu uliwetene unoyo ndinafuna miyo muva-a. 7 Ndiye akala nyo munandilambele ndila imo-i yoka, ulamulilo wetene unola unaza ukala weenyu.” 8 Yesu oomusomeda ira: “Malemba kanaonga ira, ‘Yehova* Mulungwawo ngunoyo unafuneya we mulambela moi unafuneya mutumikela liye ekave ba-i.’”
9 Vanduli viwa oomudowana wu Yelusalemu moi oomugweli-a vadimu va chisi la mpanda wa kachisi* nomuwandela ira: “Akala muli mwana wa Mulungu, muvivoche vati kumela vano. 10 Vale Malemba kanaonga ira, ‘Liye unoza alamule angelwae vyokuza nyo, ira kautetezeni,’ 11 moi ‘Kanoza kautukuleni m’mandani mwiwa, ira nyalo linyu kalivaze libwe.’” 12 Yesu oomusomeda ira: “Malemba kanaonga ira, ‘Kamumuyese Yehova* Mulungwinyu.’” 13 Eno Mdjelekeziyo angamari-ile muyesa, oomu-iya mpakana thawi imo-iwa yapama.
14 Sopano Yesu oowelela wu Galileya angazaaliwe na kopolo ya zimu owela. Moi mbilae yapama yoofalikela valivetene m’madela etene avakwikwi. 15 Koma teto oowambeela funji-a m’masunagoge mwiwa moi athu etene koomulemekeza.
16 Vanduli viwa oodowa wu Nazareti wewo aulukulele liye. Ndiye mogwilizana na vyevyo apanga liye thawi detene va dambo la Sabata, oovolowa musunagoge moi ooimela ira awelenge Malemba. 17 Ndiye koomuva-a mpukutu wa namaongela Yesaya. Liye oo-ula mpukutuyo nofwanya vevo valembiwe mawu oyi: 18 “Zimu wa Yehova* uli va miyo, chifukwa liye oondisakula ira ndilengeze uthenga wapama wa athu osauwa. Oondiruma ira ndize ndilengeze vya ufulu wa athu anayo ka-indiwe dowa kala akapolo uilambo imo-iwa koma teto ira o-oona kaambeele ona. Oondiruma teto ira ndize ndimasule athu opondeleziwa ira kakale va ufulu, 19 koma teto ira ndize ndilaleele vya chaka yosomedeleya wa Yehova.”* 20 Angamari-ile welenga mpukutuyo oou-eya noupeleka wa muthu unoyo atumikela mwemo moi oogarati. Athu etene anayo kali musunagogemo koomuing’anechecha. 21 Ndiye oowambeela awandela ira: “Peeno lemba lelo mukede nyo livwa chinenevevali, likwakwaneli-ediwa.”
22 Ndiye athu etene koowambeela onga vyapama vyokuza liye koma teto koodabwa na mawu o-inda murima anayo aongile liye, moi kaonga ira: “Kodi unola kai mwana wa Yosefe?” 23 Angavwide vyevi, liye ooawandela ira: “Mookaikela munoza muonge wa miyo mawu ala oyi, ‘Weyo unoyo unachili-a athu amo-iwa, vichili-e wekave. Vyongo vinjinji vyevyo navwile iyo ira woovipanga wu Kaperenao, uvipange teto waninyu uno.’” 24 Liye aongile ira: “Ndithu ndinaauwandelani, kalivo namaongela unoyo unalemekeziwa udela la waniwa. 25 Ndithu ndinaauwandelani ira: Muthawi ya Eliya, mu Isaraeli mookala a-iyana anjinji amasiye, vevo udimu wa-eiweathu wachaka taaru na medi 6 moi vailambo yetene vookala ndala ilukulu. 26 Koma Eliya kaatumiziwe wa uliwetene wa a-iyana anayo. M’malomwiwa ootumiziwa wa iyana wamasiye wawu Zarefati muilambo ya Sidoni. 27 Koma teto mu Isaraeli mookala athu anjinji amakate vathawi ya namaongela Elisa. Komave kalivo uliwetene wa aluwa unoyo achili-iwe, koma Namani wawu Siriya eka.” 28 Sopano athu etene anayo kavuruwana vyongo vyevi musunagogemo koolunduwa vinjinji. 29 Aluwa koomaruwa moi mombaraanya vinjinji koomukumi-eda unde wa mzinda. Vanduli viwa koomudowana vadimu va mwango vevo vali mzindiwa, ira kamuvochede uphedi. 30 Koma Yesu akede vira vaari viwa dowanga.
31 Vanduli viwa oodowa wu Kaperenao, mu mzinda wawu Galileya. Moi liye oofunji-a athu va dambo la Sabata. 32 Wewo athu koodabwa vinjinji na mwemo afunji-ela liye, chifukwa oowonga motonyi-eda ira ukaana ulamulilo. 33 Ndiye musunagogemo mookala muthu o-indiwa na zimu otakala, moi ookuwa mwakopolo ira: 34 “Aa! Kodi munafuna n’ni wa iyo, nyo Yesu Mnazareti? Kodi muzide ira muniwononge? Miyo ndinouiziwani pama vinjinji, ira nyo muli owela wa Mulungu!” 35 Koma Yesu oosumulula zimuyo ira: “Miyala, teto kuma mwa liye.” Thawi ineyo iwandeyo yoopangi-a ira agwe vati vaari viwa, vanduli viwa yookuma mwa liye koma kayamuporechile. 36 Athu etene kangaonile vyevi koodabwa vinjinji moi koowambeela kambilana ira: “Kaonani, mawae mbakopolo vinjinji! Chifukwa unosumulula mizimu dotakala nodilamula mwakopolo moi mizimudo dinokuma.” 37 Eno mbilae yoopitiliza falikela valivetene m’madela etene avakwikwi.
38 Angakumile musunagogemo, oovolowa m’mba mwa Simoni. Vathawi ineyo apongozae a Simoni kali kabulelanga malungo alukulu, eno koomuvepa ira aakami-e. 39 Ndiye Yesu oodowa vevo kagonatileathu nowachili-a moi malungwayo koomala. Thawi ineyo aluwa koovenya nowambeela apiyela yodja.
40 Koma vevo zuwa lavolowaathu, etene anayo kan’na athu obulela marenda o-iyana-iyana koowazana wa liye. Moi liye oowachili-a vo-ela mandae va aluwa. 41 Viwanda teto vyookuma mwa athu anjinji vikuwanga ira: “Nyo muli Mwana wa Mulungu.” Koma liye oosumulula viwandavyo moi kaalolile ira vionge chifukwa vyoomuiziwa ira ngu Kristu.
42 Unde ungachile, oomaruwa dowa umalo o-okala athu ira adowe akale waekave. Koma gulu la athu loowambeela musaelasaela mpakana loofiya wewo ali liye, moi athwayo koomuvepa ira kavenyewo wewo. 43 Koma liye ooawandela ira: “Ndinafuneya dowa lengeza uthenga wapama wa Umwene wa Mulungu umizinda dimo-idiwa, chifukwa Mulungu andirumile ira ndize ndipange vyevi.” 44 Eno oodowa laleela m’masunagoge awu Yudeya.