Olembiwa na Yohani

1 Vowambeela, vookala m’mo-iwa unoyo aiziweya ira Mawu, moi Mawuyo ali na Mulungu koma teto Mawuyo ali mulungu.* 2 Liye ali na Mulungu kumela vowambeela. 3 Mulungu oomu-indi-eda chito volenga vyongo vyetene moi kavali yongo ngakale imo-i ineyo yalengiwe oozela mwa liye.

4 Moyo ookalavo zela mwa liye moi moyo unola wali wala omoneela athu. 5 Walawo unomoneela mudima koma dimeyo kiwandile gonji-a walawo.

6 Ooza muthu m’mo-iwa unoyo arumiwe na Mulungu moi zina lae ali Yohani. 7 Muthu unola ooza ngati mboni, ira aze apangele umboni vyokuza wala na yolinga yoi athu o-iyana-iyana karoromele zela mwa liye. 8 Liye kaali walawo, koma akede za ira apangele umboni vyokuza walawo.

9 Wala wewo unamoneela athu a mitundu detene wali unga-alile vang’ono za muilambo. 10 Liye ali vailambo moi Mulungu oomu-indi-eda chito volenga ilambo, koma ilambweyo kayamuiziwile. 11 Liye oodowa muilambo ya waniwa, koma athu a waniwayo katamuwachelile. 12 Komave athu etene anayo kamuwachelile, oowava-a kopolo ira kakale a-ima a Mulungu, chifukwa yoi koororomela zina lae. 13 Aluwa katabaliwe kumela wa athu kapena chifukwa yofuna wa athu kapena chifukwa yofuna wa muthu, koma kabaliwe mogwilizana na ifunelo ya Mulungu.

14 Eno Mawuyo ookala muthu moi akala vaari vi-u. Iyo noowona ulemelelwae, ulemelelo ofwanafwana na unoyo mwana obaliwa ekave unawachela liye kumela wa babae. Mulungu oomuomela murima vinjinji* koma teto oofunji-a choonadi. 15 (Yohani oopangela umboni vya liye, moi ookuwa ira: “Ula ngunoyo ndamuonga miyo ira, ‘Unoyo unaza munduli mwangamu ngu mulukulu kwaranya miyo, chifukwa ookalavo miyo ndaanabaliwe.’”) 16 Chifukwa yoi liye ali ooma murima vinjinji, thawi detene noowachela oma murima ulukulu. 17 Voi Mulungu oopeleka Ilamulo zela mwa Mose, oma murima ulukulu koma teto choonadi vyookalavo zela mwa Yesu Kristu. 18 Kavali muthu unoyo amuonilevo Mulungu kumela wale, koma mwana obaliwa ekave unoyo uli vakwikwi na Babae* ngunoyo afotokozile vyokuza Mulunguyo.

19 Yohani oopangela umboni vevo Ayuda katumizileathu asembe na Alevi kumela wu Yelusalemu dowa mufuka ira: “Kodi uli mbaani?” 20 Liye oosomeda moi kaakoondile. Aongile ira: “Miyo kandili Kristu.” 21 Aluwa koomufuka ira: “Nanga uli mbaani? Kodi uli Eliya?” Liye oosomeda ira: “Naari kandili Eliya.” “Kapena uli namaongela?” Liye oosomeda ira: “Naari.” 22 Eno aluwa koomufuka ira: “Nanga uli mbaani? Niwandele ira nidowe naasomede athu anayo kanirumile. Weyo mwinyailo unavionga ira uli mbaani?” 23 Liye oosomeda ira: “Ndili mawu a muthu m’mo-iwene unoyo unakuwa muipululu ira, ‘Ongolani ndila ya Yehova,’* monga mwemo namaongela Yesaya aongele liye.” 24 Athwayo karumiwe na Afarisi. 25 Eno koomufuka ira: “Akala kuli Kristu, Eliya kapena Namaongela, chifukwa n’ni unabatiza athu?” 26 Yohani oowasomeda ira: “Miyo ndinobatiza athu mwiko. Koma vaari vinyu vikala muthu m’mo-iwene unoyo nyo kamunamuiziwa. 27 Liye ngunoyo unaza munduli mwangamu moi miyo kandili ofwanelela masula migo-i da sapato dae.” 28 Vyongo vyevi vyaireile wu Betaniya, ukombela imo-iwa ya Yorodano, wewo Yohani abatiza liye athu.

29 Dambo lo-arela Yohani oomuona Yesu azanga wa liye, moi aongile ira: “Kaonani, Mwanawakhosa wa Mulungu unoyo unachosa uchimo vailambo yavati! 30 Ula ngunoyo ndamuonga miyo ira: ‘Unoyo unaza munduli mwangamu ngu mulukulu kwaranya miyo, chifukwa ookalavo miyo ndaanabaliwe.’ 31 Miyo teto kandamuiziwa, koma chifukwa ineyo ndinabatizela miyo athu mwiko choi liye aoneele wa Isaraeli.” 32 Yohani oopangela teto umboni voonga ira: “Ndoowona zimu utitanga ngati kangaiwa kumela udimu moi zimuyo ookalave va liye. 33 Miyo teto kandamuiziwa, koma Mulungu unoyo andirumile ira ndize ndibatizenga athu mwiko oondiwandela ira: ‘Waza uona zimu utitanga kumela udimu za garateya va muthu m’mo-iwene, unoyo ngunoyo unabatiza athu na zimu owela.’ 34 Miyo ndoowona vyevi moi ndipangela umboni ira liye ngu Mwana wa Mulungu.”

35 Dambo lo-arela Yohani ali angaimelile limo-i na ofunjedae ambin’li, 36 moi angamuonile Yesu aendanga, aongile ira: “Kaonani, Mwanawakhosa wa Mulungu!” 37 Ofunjedae ambin’lale kangavwile vyevi, koomu-arela Yesu. 38 Vanduli viwa Yesu ootembenuwa, moi angaaonile kamu-arelanga, oowafuka ira: “Kodi munafuna n’ni?” Aluwa koomusomeda ira: “Rabi, kodi munakala waani?” (Zina leli linatapulela “Mphunzisi”). 39 Liye ooawandela ira: “Tiyemoni mwaonewo.” Eno aluwa koodowa limo-i na Yesu dowa ona wewo akala liye moi aluwa kookala limo-i na liye dambo letene. Thawi yali ingali m’ma 4 koloko mazulo.* 40 Andreya, nchimwenae wa Simoni Petulo ali m’mo-i wa ofunjeda ambin’layo, anayo kavwile vyevyo Yohani aongile liye nomu-arela Yesu. 41 Muthu owambeela unoyo agumanilena liye ali nchimwenae Simoni moi oomuwandela ira: “Iyo nimufwanya Mesiya” (zina leli linatapulela “Kristu”), 42 moi oomudowana wa Yesu. Yesu angamuonile aongile ira: “Weyo uli Simoni mwana wa Yohani, zina lawo linakala Kefa” (lelo linatapulela “Petulo”).

43 Dambo lo-arela, Yesu ooganiza vyoi adowe wu Galileya. Ndiye oogumana na Filipo moi oomuwandela ira: “Ukale o-arelanga.” 44 Filipo ali okumela wu Betisaida, mzinda unoyo Andreya na Petulo kabaliweleathu. 45 Vanduli viwa Filipo oogumana na Natanayeli nomuwandela ira: “Iyo nimufwanya Yesu, mwana wa Yosefe, wawu Nazareti. Ilamulo ya Mose koma teto vyevyo anamaongela kalembileathu vinoonga vya muthu unola.” 46 Koma Natanayeli oomufuka ira: “Kodi mu Nazareti munokoza kuma muthu uliwetene wapama?” Filipo oomuwandela ira: “Tiyemo wamuone.” 47 Yesu angamuonile Natanayeli azanga wewo ali liye, aongile ira: “Onani Muisaraeli, unoyo mwa liye kamuli chinyengo.” 48 Natanayeli oomufuka ira: “Mundiiziwile avi?” Yesu oomusomeda ira: “Filipo aanauitane, miyo ndoouona ungagaratile vati va tengo wa nankuyule.” 49 Natanayeli oomusomeda ira: “Rabi, nyo muli Mwana wa Mulungu, muli Mwene wa Isaraeli.” 50 Yesu oomusomeda ira: “Kodi uroromela chifukwa yoi ndiuwandela ira ndoouona wangali vati va tengo wa nankuyu? Unoza uone vyongo vilukulu kwaranya vyevi.” 51 Vanduli viwa ooawandela ira: “Ndithu ndinaauwandelani etene nyen’ne, ira munoza muone udimu unga-uleile, angelo a Mulungu kagwelanga koma teto katitanga dowa wewo uli Mwana wa muthu.”