Olembiwa na Yohani
20 Dambo lowambeela la mulunguyo, Mariya wawu Magadala oodowa umandawo* mamawa vinjinji, ungali dima, moi oowona ira libwe lelo ka-eilenaathu vamulango wa mandayo* lichosiwavo. 2 Eno ootamanga dowa wa Simoni Petulo na wa ofunjeda m’mo-iwa, unoyo Yesu amuomeliwana liye vinjinji. Liye ooawandela ira: “Mtembo wa Mbwiye koouchosamo m’manda* mule, moi kandinaiziwa wewo u-eliweathu.”
3 Eno Petulo na ofunjeda m’mo-iwoyo koomaruwa dowa umandawo. 4 Ofunjeda ambin’layo kaambeele limo-i tamanga, koma ofunjeda m’mo-iwoyo ootamanga vinjinji mukwaranya Petulo moi liye ngunoyo aambeele fiya umandawo. 5 Angasudumele m’mandamo, oowona nguwo dingali vati, koma kaavolowilemo. 6 Vanduli viwa Simoni Petulo unoyo aza munduli mwae oofiya, moi oovolowa m’mandamo. Mwemo oowona nguwo dile dingali vati. 7 Koma nguwo ineyo kapotilenaathu muru wa Yesu katai-elile vamo-i na nguwo dimo-idiwa, koma kooivinda noi-ela vaekiwa. 8 Vanduli viwa ofunjeda unoyo aambeele fiya umandole naliyene teto oovolowa m’mandamo, moi oowona nororomela vyevyo awandeliwe liye. 9 Vathawi ineyo aluwa kali kaanavwecheche vyevyo Malemba kanaongaathu ira Yesu unafuneya venyi-iwa wa okhwa. 10 Vanduli viwa ofunjedayo koowelela waniwa.
11 Koma Mariya oo-ala umandawo angakede imela aulanga. Vevo aula liye, ooworama ira aone m’mandamo 12 moi oowona angelo ambin’li anayo kawarile vyowara vyowela kangagaratile vevo vali mtembo wa Yesu. M’mo-i agaratile umuru wae, m’mo-iwa agaratile umendo wae. 13 Aluwa koomufuka ira: “M’mani, chifukwa n’ni munaula?” Liye oowasomeda ira: “Koomulanda Mbwiyanga, moi kandinaiziwa wewo kamu-elileathu.” 14 Angaongile vyevi, ootembenuwa moi oomuona Yesu angaimelile vevo, koma kaamuzindikilile ira ngu Yesu. 15 Yesu oomufuka iyanoyo ira: “M’mani, chifukwa n’ni munaula? Kodi munamufuna mbaani?” Iyanoyo aganiza ira ngu muthu unoyo asamalela mundoyo, moi oomusomeda ira: “Babani, akala mumuchosilemo ngu nyo, ndiwandeleni chonde wewo mumu-elile nyo moi ndinodowa ndamutukulewo.” 16 Yesu oomuwandela ira: “Mariya!” Liye ootembenuwa nomuwandela mu Iheberi ira: “Rab·boʹni!” (tapulela ira “Mphunzisi!”) 17 Yesu oomuwandela ira: “Kundikaamele chifukwa thawi yoi ndidowe wa Babanga kinakwakwane. Koma dowa wa abalanga moi udowe waawandele ira, ‘Miyo ndinadowa wa Babanga na wa Babinyu, wa Mulungwanga na wa Mulungwinyu.’” 18 Mariya wawu Magadala oodowa wa ofunjedayo moi ooawandela ira: “Miyo ndimuona Mbwiye!” Moi ooawandela vyetene vyevyo Yesu amuwandelile liye.
19 Mazulo a dambo lelo, dambo lowambeela la mulungu, ofunjedayo koosonkana vamo-i. Munyumba ineyo kasonkanileathu koo-eya visewo chifukwa yoi kaova Ayuda. Koma Yesu oovolowa noimela vaari viwa moi ooawandela ira: “Murendele ukale na nyo.” 20 Angaongile vyevi, oowaoni-a mandae na muthiri mwae. Eno ofunjedayo koosangalala kangamuonile Mbwiye. 21 Yesu ooawandela nawili ira: “Murendele ukale na nyo. Mofwanafwana na mwemo Baba andirumele liye, namiyene teto ndinourumani.” 22 Angaongile vyevi, oowakupedela mpweya noawandela ira: “Wachelani zimu owela. 23 Mwamukululukela muthu unoyo upangile chimo, Mulungu teto umukululukela wale. Koma akala kamumukululukele muthu unoyo upangile chimo, Mulungu teto kamukululukele.”
24 Koma Tomasi unoyo aiziweya teto ira Didimo, m’mo-i wa ofunjeda 12 kaalivo vathawi ineyo Yesu aoneela liye vaari viwa. 25 Eno ofunjeda amo-iwayo koomuwandela ira: “Iyo nimuona Mbwiye!” Koma liye oowasomeda ira: “Akala kandinaona mabala a misomali m’mandani mwae no-ela nyalanga m’mabala a misomali koma teto ela ndanda langa muthiri mwae, ndithu miyo kandinaroromela.”
26 Vangavirile malambo 8, ofunjedayo kali teto m’mba moi Tomasi ali limo-i na aluwa. Yesu oovolowa m’mbamo ngakale ira visewo vyali vyo-eya moi ooimela vaari viwa noonga ira: “Murendele ukale na nyo.” 27 Vanduli viwa oomuwandela Tomasi ira: “Ela nyalawo va, koma teto ona m’mandani mwangamu. Zana ndanda lawo u-inde muthiri mwangamu moi u-iye kaikela* koma uroromele.” 28 Tomasi oomusomeda ira: “Mbwiyanga koma teto Mulungwanga!” 29 Yesu oomusomeda ira: “Kodi uroromela chifukwa yoi undiona? Osangalala ngu muthu unoyo unaroromela ngakale ira kanaone.”
30 Onga vyoona, Yesu oopanga teto vizindikilo vinjinji vamaso va ofunjedae, vyevyo kavilembiwe mu bukumu. 31 Koma vi, vilembiwa ira muroromele ira Yesu ngu Kristu, Mwana wa Mulungu, koma teto chifukwa yoi muroromela, mukaena moyo muzina lae.