Olembiwa na Yohani
9 Yesu aendanga musewu, oomuona muthu unoyo abaliwe na vuto lo-oona. 2 Ofunjedae koomufuka ira: “Mphunzisi, achimwile mbaani ira muthula abaliwe na vuto lo-oona? Ngu muthula kapena makolwae?” 3 Yesu oosomeda ira: “Muthula kapena makolwae, etene katachimwile. Koma vyevi vyooireya ira chito da Mulungu dioneele zela mwa liye. 4 Ninafuneya inda chito da Mulungu unoyo andirumile unde waanadimbe. Chifukwa ma-iyu kanoza kafiye moi muthu kanawande inda chito. 5 Vevo ndili miyo muilambo, ndili wala wailambwela.” 6 Angaongile vyevi, ootapeda mare vati notangani-a madogo na marayo, vanduli viwa oo-ela madogwayo, m’maso mwa muthuyo. 7 Ndiye oomuwandela ira: “Dowa wa-ambe vathanda la Siloamu” (zina leli linatapulela “Otumiziwa”). Eno oodowa amba moi oozawo aonanga.
8 Ndiye athu owandamanana koma teto athu amo-iwa anayo mundulimu kamuonile avepanga koowambeela onga ira: “Kodi muthula kai unole agarati m’mbali mwa sewu novepanga?” 9 Athu amo-iwa kaonga ira: “Nguliyene.” Amo-iwa teto kaonga ira: “Naari, kakede fwanafwana.” Koma mwinyailo ooawandela ira: “Vyoona, ngumiyene.” 10 Eno koomufuka ira: “Ndiye maswawala ka-uleile avi?” 11 Liye oosomeda ira: “Muthu m’mo-iwa zina lae Yesu oo-ela madogo m’maso mwangamu. Vanduli viwa oondiwandela ira, ‘Dowa wu Siloamu wa-ambe’. Ndiye ndoodowa amba moi ndiambeela ona.” 12 Vanduli viwa athwayo koomufuka ira: “Muthu unoyo uli waani?” Liye oowasomeda ira: “Kandinaiziwa.”
13 Aluwa koomulanda muthu unoyo vowambeela ali o-oonole moi koomudowana wa Afarisi. 14 Dambo lelo Yesu a-elile liye madogo m’maso mwa muthuyo lali la Sabata. 15 Vathawi ineyo naaluwene teto Afarisi koowambeela mufuka muthule mwemo aambeelile liye ona. Liye oowafotokozela ira: “Yesu oo-ela madogo m’maso mwanga, ndiye ndoodowa amba, vanduli viwa ndoowambeela ona.” 16 Ndiye amo-iwa mwa Afarisi koowambeela onga ira: “Muthu unola kai okumela wa Mulungu, chifukwa kanasunga Sabata.” Amo-iwa kaonga ira: “Kodi muthu ochimwa unokoza panga vizindikilo ngati vyevi?” Eno athwayo koogawaneya. 17 Afarisayo koomufuka muthu unoyo ali o-oonoyo ira: “Nanga we uni avi vya muthu unola, voi liye u-ula maswawo?” Muthuyo aongile ira: “Ngu namaongela.”
18 Komave Ayudayo kataroromele ira muthuyo vowambeela ali o-oona moi uwambeela ona, eno koowaitani-a makolwae a muthuyo. 19 Aluwa koowafuka makolwayayo ira: “Kodi ula ngu mwaninyu unoyo munaonga nyo ira abaliwe o-oona? Nanga viwandeile avi ira aambeele ona?” 20 Makolwayayo koosomeda ira: “Iyo ninoiziwa ira ula ngu mwani-u koma teto ira abaliwe o-oona. 21 Koma kaninaiziwa ira viwandeile avi ira aambeele ona, koma teto kaninamuiziwa muthu unoyo umu-ulile maswae. Mufukeni mwinyailo. Ngu ndimuwene unola, afotokoze ekave.” 22 Makolwayayo kaongile vyevi chifukwa yoi kaova asogoleli aipembezo a Iyuda. Chifukwa aluwa kali kangakambilanile wale ira akala muthu unasomedele ira Yesu ngu Kristu, achosiwenga musunagoge. 23 Mbaona makolwayayo kaongile ira: “Ngu ndimuwene unola. Mufukeni mwinyailo.”
24 Eno aluwa koomuitana nawili muthu unoyo ali o-oonole nomuwandela ira: “Lemekeza Mulungu, iyo ninoiziwa ira muthu unola ngochimwa.” 25 Liye oowasomeda ira: “Vyoi liye ngochimwa, miyo kandinaiziwa. Yongo ineyo ndinaiziwa miyo choi, vowambeela ndali o-oona koma vano ndiambeela ona.” 26 Ndiye aluwa koomufuka ira: “Aupangilena avi ira au-ule maswawo?” 27 Liye oowasomeda ira: “Ndiuwandelani wale koma nyo kamwavuruwana. Nanga chifukwa n’ni munandifuka nawili? Kapena nanyen’ne teto munafuna mukale ofunjedae?” 28 Angaongile vyevi, aluwa koomunyoza noonga ira: “Weyo ngunoyo uli ofunjeda wa muthu unole, koma iyo nili ofunjeda a Mose. 29 Iyo ninoiziwa ira Mulungu oowonga na Mose, koma vya muthu ula, kaninaiziwa wewo akumele liye.” 30 Muthuyo oowasomeda ira: “Vyevi pivyodabwi-a vinjinji, mwaonganga ira kamunaiziwa wewo ukumele liye, koma liye u-ula maswanga. 31 Ninoiziwa ira Mulungu kanamuvuruwana muthu ochimwa, koma akala muthu unaova Mulungu moi unopanga vyevyo unafuna liye, Mulunguyo unomuvuruwana muthuyo. 32 Ambeela wale kaninavwevo ira muthu m’mo-iwa u-ula maso a muthu unoyo abaliwe o-oona. 33 Aakale ira muthu unola kai okumela wa Mulungu, kaawande panga vyongo vyevi.” 34 Aluwa koomusomeda ira: “Weyo wabaliwe ungali ochimwa. Ndiye kodi unafuna unifunji-e iyo?” Vingairile eno koomuchosa musunagoge!
35 Yesu oovwa ira muthule koomuchosa musunagoge. Moi angagumanile na liye oomufuka ira: “Kodi unomuroromela Mwana wa muthu?” 36 Muthuyo oomusomeda ira: “Kodi mwana wa muthu mbaani? Ndiwandeleni mbwiyeni ira ndimuroromele.” 37 Yesu oomuwandela ira: “Umuona wale, moi ngunoyo unaonga na weyo.” 38 Liye aongile ira: “Ndiuroromelani Mbwiyeni.” Moi oomukokorela. 39 Ndiye Yesu aongile ira: “Ndooza muilambwela za peleka iweluzo yoi, athu o-oona kaambeele ona moi athu anayo kanaona kakale o-oona.” 40 Afarisi anayo kali limo-i na liye koovwa vyevi, moi koomufuka Yesu ira: “Kodi unaganiza ira na-iyene teto nili o-oona?” 41 Yesu ooawandela ira: “Aakale ira kamunaona, kamwakaana chimo. Koma voi munaonga ira ‘Ninoona,’ chimo linyu kalinaza likululukiwa.”