Vyoira Vya Anamarumiwa

2 Sopano va dambo la Ikondwelelo ya Pentekosite ofunjeda etene kali kangasonkanile vamo-i. 2 Morurumucha, udimu oovweya phokoso la lipevo lakopolo, moi phokosolo loozaala m’mba mwetene mwemo kaliathu. 3 Vanduli viwa aluwa koowona vyongo vyooneya ngati malumi a mulo, moi vyongovyo vyoogawaneya nokala vamuru va muthu uliwetene. 4 Ndiye athu etene anayo koozaaliwa na zimu owela moi koowambeela onga viongelo vyo-iyana-iyana, mosogoleliwa na zimuyo.

5 Vathawi ineyo, Ayuda oova Mulungu okumela m’mitundu detene da vailambo yavati kakala wu Yelusalemu. 6 Eno phokosolo lingavweile, vamalovo voosonkana gulu lilukulu la athu. Athwayo koodabwa vinjinji, chifukwa koovwa uliwetene wa ofunjedayo aonganga muiongelo yae. 7 Aluwa koodabwa vinjinji chifukwa ya vyevi moi koowambeela fukana ekiwa ira: “Kodi athu etene anayo kanaongala kai awu Galileya? 8 Ndiye vinawandeya avi ira uliwetene vagulu li-uli avwenga iongelo yae? 9 Vano vikala Apati, Amedi na Aelamu. Vikala teto athu okumela wu Mesopotamiya, wu Yudeya, wu Kapadokiya, wu Ponto na uigawo ya Asia. 10 Vikala athu okumela wu Fulugiya, wu Pamfuliya, wu Iguputo na umadela awu Libiya anayo kali vakwikwi na wu Kurene. Vikala teto alendo okumela wu Roma, anayo kali Ayuda koma teto vikala athu anayo kavolowile mu Iyuda. 11 Koma teto vikala Akerete na Aluya. Etene iyene ninowavwa kaonganga vyongo vilukulu vya Mulungu muviongelo vi-u.” 12 Athu etene koodabwa vinjinji teto koomaliwa zelu moi koowambeela fukana ekiwa ira: “Kodi vyongo vyevi vinatapulela n’ni?” 13 Koma athu amo-iwa koowambeela ateya onganga ira: “Kolezela na vinyu musha anala.”

14 Koma Petulo ooimela vamo-i na anamarumiwa 11. Moi oowonga na athwayo mokuwa ira: “Nyo athu awu Yudeya na nyo etene a mu Yelusalemu, vuruwanani mosamala vyevyo ndinafuna miyo uwandelani. 15 Athwala katilezelile ngati mwemo munaganizela nyo, chifukwa vano thawi ili 9 koloko mamawa.* 16 Koma vyevi vinaireyavi pivyevyo vyaongiwe zela mwa namaongela Yoweli ira: 17 ‘Mulungu uongile ira: “M’malambo omari-a, ndinoza ndipeleke zimwanga owela wa athu a mitundu detene, moi a-iminyu aalombwana na aa-iyana kanoza kalosele. Azombwe kanoza kaone masomphenya moi athu okalamba kanoza karo-e vyoro-a. 18 M’malambo anayo ndinoza ndipeleke zimwanga owela wa atumikanga aalombwana na aa-iyana, moi aluwa kanoza kalosele. 19 Ndinoza ndipange vyodabwi-a udimu koma teto vizindikilo vailambo yavati. Vanoza vakale magazi, mulo na uchi ogwela mudimu. 20 Zuwa linoza lichenje kala dima moi mwedi unoza ufiile ngati magazi. Vyevi vinoza viireye dambo lilukulu koma teto la ulemelelo la Yehova* laanafiye. 21 Teto muthu uliwetene unoyo unaitanela va zina la Yehova* unoza avulumuwe.”’

22 “Nyo Aisaraeli, vuruwanani mawu ala: Yesu wawu Nazareti ngu muthu unoyo Mulungu auoni-ileni liye vowela. Oopanga vyevi zela muchito dakopolo, dodabwi-a koma teto vizindikilo, vyevyo Mulungu apangile liye vaari vinyu zela mwa liye, ngati mwemo munaiziwela nyo. 23 Mulungu ooiziwa wale ira liye unoza apelekiwe, moi nyo moopangi-a ira liye aphiwe na athu o-ovwela malamulo vomupachika vatengo. 24 Koma Mulungu oomuvenyi-a vomumasula wu vyovoreya* vyokhwa, chifukwa kavyali vyowandeya ira khwa umugonji-e. 25 Vale Davide aongile vya muthu unola ira, ‘Ndino-ela Yehova* vasogolo vanga thawi detene. Chifukwa yoi liye uli undanda langa lodjana, kandinaza nditekenyeya. 26 Vachifukwa inela murimanga oosangalala moi ndinoonga mosangalala vinjinji. Koma teto miyo ndinoza ndisangalale na idedi-edo, 27 chifukwa kamunaza mundi-iya* m’Manda,* moi kamunaza mulola ira thuthu la muthwinyu ororomeleya livunde. 28 Nyo mupangi-a ira ndiiziwe ndila da moyo, moi munoza mupangi-e ira ndisangalalenga vinjinji ndakala vakwikwi na nyo.’*

29 “Abalanga, ndinoonga momasuwa vya mbwii-u Davide. Liye ookhwa no-eliwa m’manda, moi mandae kookalavo mpakana vano. 30 Liye ali namaongela moi ooiziwa ira Mulungu oomulonjeza, ira m’mo-i mwa a-imae unoza akale vapandwae wa umwene. 31 Liye ooiziwa wale vyausogolo moi oowonga wale vyovenya wa Kristu ira ka-iiwe m’Manda,* koma teto ira thuthu lae kalavundile. 32 Yesu unola Mulungu oomuvenyi-a, moi etene iyene nili mboni da khani inela. 33 Liye oolemekeziwa moi ookala undanda lodjana la Mulungu teto oowachela zimu owela unoyo alonjeziwe liye kumela wa Babae. Eno liye univa-a zimu owela unoyo munauona nyo koma teto uvwa. 34 Teto Davide kaadowile udimu, koma liye aongile ira, ‘Yehova* oomuwandela Mbwiyanga ira: “Kala undanda langa lodjana 35 mpakana ndinga-elile adanawo vati va manyalwawo.”’ 36 Eno nyumba yetene ya Isaraeli iiziwe ira Yesu unoyo mwamuphile nyo vomupachika vatengo, Mulungu oomu-ela kala Mbwiye na Kristu.”

37 Aluwa kangavwile mawu anala, koovuteya vinjinji m’murimani moi koomufuka Petulo na anamarumiwa amo-iwayo ira: “Abali, nipange n’ni?” 38 Petulo oowasomeda ira: “Lapani, moi uliwetene abatiziwe muzina la Yesu Kristu ira machimwinyu kakululukiwe. Mwera eno munoza muwachele mphaso yaulele ya zimu owela. 39 Chifukwa lonjezo leli lipelekiwe wa nyo, wa a-iminyu, koma teto wa athu etene aundendai, na etene anayo Yehova* Mulungwi-u unafuna liye asakula.” 40 Petulo oopangela umboni mokwakwanela voonga mawu amo-iwa anjinji. Koma teto oopitiliza akumbanyela voonga ira: “Vivulumucheni wa athu a maganizo otakalala.” 41 Eno athu anayo kawachelile mawae mosangalala koobatiziwa, moi dambo lelo iwelengelo ya ofunjedayo yooenjedeleya na athu 3 000. 42 Eno aluwa koopitiliza arela vyevyo anamarumiwayo kafunji-aathu, koma teto koopitiliza waleda,* djela limo-i koma teto pempela.

43 Athu etene koowambeela ova vinjinji moi anamarumiwayo koowambeela panga vyongo vyodabwi-a koma teto vizindikilo vyoinjiva. 44 Athu etene anayo kali ororomela kakala limo-i moi koogaana vyongo vyetene vyevyo kan’naathu. 45 Aluwa kooguli-a malwiwa na vyongo vyetene vyevyo kan’naathu nogawa ndalama diwa wa athu amo-iwa, mogwilizana na vyevyo muthu uliwetene afuneya liye. 46 Dambo lililetene koosonkana mukachisi mogwilizana. Kooitanelana yodja munyumba diwa koma teto koogaana vyodja mosangalala koma teto na murima wetene. 47 Kootamanda Mulungu koma teto athu amo-iwa etene koowaomeliwana. Dambo lililetene, Yehova* oopitiliza enjedela athu anayo aavulumucha liye.