Vyoira Vya Anamarumiwa
23 Paulo ooing’anechecha Khoti Lilukulu la Ayudalo moi aongile ira: “Abalanga, ndipanga vyongo mo-oruni-iwa na ikumbutimanga ngakale vang’ono vamaso va Mulungu mpakana peeno.” 2 Hananiya ndimuwa wa asembe angavwide vyevi, oowalamula athu anayo kaimelile vakwikwi na Paulo ira kamuvaze vamulomo. 3 Koma Paulo oomuwandela ira: “Unoona, Mulungu unoulanga, muthu wachinyengowe. Ugaratile vevo ira undiweluze mo-arela Ilamulo, koma unaaphwanya teto Ilamulweyo vowalamula athu ira kandivaze?” 4 Athu anayo kaimelile vakwikwi na liye kaongile ira: “Kodi unamunyoza ndimuwa wa asembe wa Mulungu?” 5 Paulo aongile ira: “Abali, miyo kandaiziwa ira ngu ndimuwa wa asembe. Chifukwa Malemba kanaonga ira, ‘Olamulela wa athu a tundwawo kumuongele vyaibewe.’”
6 Paulo angaonile ira amo-iwa mwa athwayo kali Asaduki moi amo-iwa kali Afarisi, ookuwa mukhotimo ira: “Abalanga, miyo ndili Mfarisi, mwana wa Afarisi. Vano ndinaweluziwa chifukwa yoi ndinororomela vyoi okhwa kanoza kavenyi-iwe.” 7 Angaongile vyevi, Afarisi na Asaduki koowambeela kangana vinjinji, moi gulu la athulo loogawaneya. 8 Chifukwa Asaduki kanaonga ira muthu akhwa kanaza avenyi-iwa koma teto kanaonga ira kuli angelo kapena yolengiwa iliyetene yauzimu. Koma Afarisi kanosomedela vowela ira vyongo vyetene vyevi vikalavo. 9 Eno vookala phokoso lilukulu, moi alembi amo-iwa a mugulu la Afarisi kooimela nowambeela runi-a mwauwali ira: “Iyo kaninafwanya yongo ineyo muthula ulakwile liye. Koma akala zimu owela kapena ngelo uongile na liye . . .” 10 Mkanganoyo ungaulukulile vinjinji, ndimuwa wa asilikali oowambeela ova ira athwayo kanokoza mupha Paulo. Eno oolamula asilikali ira kadowe kamuchosevo vaguluvo nomudowana muwari mwa mpanda wa asilikali.
11 Koma ma-iyu a dambo lelo, Mbwiye ooimela vakwikwi na Paulo moi oomuwandela ira: “Limba murima. Chifukwa undipangela umboni mokwakwanela wu Yelusalemu, moi unodowa teto wandipangele umboni wu Roma.”
12 Unde ungachile, Ayuda koopanga iwembu moi koolumbelela voira vitembelela ira katinadja koma teto katinang’wa yongo iliyetene mpakana kangamuphile Paulo. 13 Alombwana anayo kapangile iwembu inela kali 40. 14 Alombwana anala koodowa wa asembe alukulu na andimuwa dowa onga ira: “Iyo nilumbela voira vitembelela ira kaninadja yongo iliyetene mpakana ningamuphile Paulo. 15 Sopano nyo limo-i na Khoti Lilukulu la Ayuda, mumuwandele ndimuwa wa asilikali ira amutumize Paulo wa nyo ikalenga ngati munafuna muvwecheche pama khanae. Koma aanafiye iyo ninoza nimuphe.”
16 Koma mwana walombwana wa murongolae wa Paulo oovwa vyoi athwayo koopangana ira kadowe kamuembekezelenga vasewu, moi oodowa wu mpanda wa asilikali dowa muwandela Paulo vyevi. 17 Eno Paulo oomuitana m’mo-i wa asogoleli a asilikali moi oomuwandela ira: “Umulande zombwela umudowena wa ndimuwa wa asilikali chifukwa ukaana mawu oyi adowe amuwandele.” 18 Eno oomulanda nomudowana wa ndimuwa wa asilikali moi aongile ira: “Paulo, mkaidile, oondiitana moi undiwandela ira ndimuzena zombwela wa nyo. Ava ukaana mawu oyi auwandeleni.” 19 Ndimuwa wa asilikaliyo oomu-inda ndanda zombweyo nomudowana vambali moi oomufuka ira: “Unafuna undiwandele n’ni?” 20 Liye aongile ira: “Ayuda koogwilizana vyoi kauvepeni ira mechelo mumudowena Paulo wu Khoti Lilukulu la Ayuda, kalanga ngati kanafuna kadowe kavwecheche pama mulandwae. 21 Koma kamulole ira kaunyengeleleni, chifukwa alombwana okwaranya 40 kanafuna kadowe kamuembekezelenga vasewu. Athu anala koolumbela voira vitembelela ira katinadja koma teto katinang’wa yongo iliyetene mpakana kangamuphile Paulo. Moi eni kookozeya, kanakeda embekezela ilolezo inyu.” 22 Ndimuwa wa asilikaliyo oomuwandela zombweyo ira adowenga koma oomulamula ira: “Kumuwandele muthu uliwetene ira undifotokozela vyevi.”
23 Ndiye ooitani-a asogoleli ambin’li a asilikali moi ooawandela ira: “Wandelani asilikali 200 ira kakozeye enda ulendo odowa wu Kaisareya m’ma 9 koloko* ma-iyu a peeno. Vakale teto alombwana 70 ogwela vamahachi koma teto asilikali 200 olanda mimwalango. 24 Muwava-e teto mahachi ira kamugweli-evo Paulo na yolinga yoi adowe afiye wa bwanamkubwa Felike angali otetezeya.” 25 Ndiye liye oolemba kalata yoonga ira:
26 “Miyo Kalaudiyo Lusiya, ndinaulembelani nyo Olemekezeya vinjinji, Bwanamkubwa Felike: Wachelani moni! 27 Muthula oo-indiwa na Ayuda moi kakede ala vang’ono ira kamuphe. Koma thawi ineyo ndoofiya na gulu langa la asilikali moi ndoomuvulumucha, chifukwa ndoovwa ira liye ngu mzika ya Roma. 28 Ndiye vofuna iziwa ineyo achimwile liye, ndoomudowana wu Khoti Lilukulu la Ayuda. 29 Wewo ndoovwa ira athu kanamuimba mulandu vakhani yokuza Ilamulo iwa. Koma kaafwanyeilena mulandu uliwetene ofwanelela phiwa kapena eliwa mundende. 30 Komave voi ndiiziwa iwembu ineyo kamupangeleathu muthula, ndimutumiza wa nyo, moi ndialamula athu anayo kanamuimba mulandwayo ira kaze kaonge mulandwae vamaso vinyu.”
31 Eno asilikalayo koomulanda Paulo ma-iyu mogwilizana na vyevyo kalamuliweathu moi koomudowana wu Antipatiri. 32 Dambo lo-arela koowa-iya alombwana ogwela vamahachale ira kapitilizeve muveleela Paulo, koma aluwa koowelela wu mpanda wa asilikali. 33 Alombwana ogwela vamahachayo koofiya wu Kaisareya moi koomuva-a bwanamkubwa kalatele koma teto koomu-iya wewo Paulo. 34 Eno bwanamkuboyo oowelenga kalateyo moi oomufuka Paulo wewo akumele liye. Liye oomuwandela ira akumele wu Kilikiya. 35 Ndiye liye aongile ira: “Ndinovuruwana mulandwawo wetene athu ouimba mulandwayo kafiya.” Moi oolamula ira kadowe kamusunge munyumba ya Mwene Herodi nomuing’anelanga.