Vyoira Vya Anamarumiwa
27 Ningamaruwile ulendwi-u wavanyanja odowa wu Itale, Paulo na akaidi amo-iwa koopelekiwa m’mandani mwa msogoleli wa asilikali zina lae Yuliyo, wa mugulu la asilikali la Augustu. 2 Wu Adiramutiyo noogwela ngalawa ineyo yali inga-alile vang’ono maruwa ulendo odowa vamalo anayo vafiyeda ngalawa m’mbali mwa nyanja muigawo ya Asia. Vanduli viwa noomaruwa limo-i na Arisitako, unoyo ali wawu Makedoniya mu mzinda wa Tesalonika. 3 Dambo lo-arela noofiya wu Sidoni, moi Yuliyo oomuomela murima Paulo moi oomulola ira adowe wa afwae ira kadowe kamusamalele.
4 Ningaambeele ulendo wavanyanja kumela wewo, nooenda m’mbali mwa ilumba ya Kupuro ineyo yaniteteza wu lipevo lelo lakumela wewo nadowa iyo. 5 Nooenda vanyanja molambalala ilambo ya Kilikiya na Pamfuliya moi noofiya vamalo anayo vafiyeda ngalawa wu Mura, wu Lukiya. 6 Msogoleli wa asilikali oofwanya ngalawa yokumela wu Alekizandiriya ineyo yadowa wu Itale moi oonigweli-a mwemo. 7 Eno nooenda mwavang’ono vang’ono wa malambo mangasene moi noofiya wu Kinido movuteela. Chifukwa ya lipevo lelo lakumela usogolo wi-u, noovirela wu Salimone ira ilumba ya Kerete initetezenga wu lipevolo. 8 Ningaendile movuteela m’mbali mwa ilumba inela, noofiya malo amo-iwa oromoliwa ira Madoko Apama, vevo vafiyeda ngalawa vakwikwi na mzinda wa Laseya.
9 Sopano vali vangavirile thawi yolapa, moi enda ulendo wavanyanja wali oopi-a chifukwa ngakale thawi yosala dja va Dambo la Mwambo Opimba Machimo yali ingavirile wale. Eno Paulo oowava-a malangizo. 10 Liye ooawandela ira: “Miyo ndinaona ira napitiliza enda ulendola ninoonongi-a vyongo vyoinjiva. Ninoonongi-a katundu koma teto ngalawa, moi iyo ninokoza khwa.” 11 Koma msogoleli wa asilikali oomuvwela oendi-a ngalaweyo koma teto mwinyailo wa ngalaweyo moi kaavwele vyevyo Paulo aongile liye. 12 Voi malo ofiyedavo ngalawa anala katali apama kalavo vathawi yodidila, athu anjinji koogwilizana vyoi kavenyevo. Aluwa koofunechecha ona akala kanakwakwani-e dowa fiya wu Finikesi ira kadowe kakale wewo thawi yodidila. Finikesi kali malo ofiyedavo ngalawa wu Kerete moi mbali imo-iwa yamalo anala yaing’ana umpoto mbali ya umamawa, teto mbali imo-iwa ya malo anala yaing’ana um’mwela mbali ya umamawa.
13 Lipevo lokumela um’mwela lingaambeele vang’onovang’ono, aluwa koowona ira kanoenda pama ulendwiwa. Eno koogweli-a nangula moi koowambeela enda m’mbali mwa ilumba ya Kerete. 14 Koma vangavirile thawi yoyeva, lipevo lakopolo loromoliwa ira Yulakilo* loowambeela vaza ngalaweyo. 15 Voi ngalaweyo yoovaziwa na lipevo lakopolo moi kanawandile iwongolela ira idowenga wewo lipevolo lakumaathu, noo-iya palasa moi ngalaweyo yoowambeela dowa wewo lipevolo ladowaathu. 16 Vanduli viwa noowambeela enda va ilumba imo-iwene ing’onong’ono yoromoliwa ira Kauda ineyo yaniteteza wu lipevo. Komave noolepela ongolela ngalawa ing’onong’ono ineyo yamangeleliwe unduli wa ngalawa ineyo nagwelile iyo. 17 Ndiye kangagweli-ile ngalaweyo mungalawa ilukulu ineyo nagwelile iyo, koowambeela imanga ngalaweyo na vyomangela ira ilimbe. Moi voova ira ngalaweyo inokoza bwina mumiseva wu Suriti,* aluwa kootiti-a migo-i domangelana nguwo ya ngalaweyo moi yoowambeela ndunyiwa na lipevo. 18 Koma voi lipevo lakopolo loonivaza koma teto loonindunya mwakopolo, dambo lo-arela athu koowambeela tatila katundu ira ngalaweyo kinyemeliwe. 19 Va dambo lanaralu, aluwa kootatila migo-i dogweli-ana nguwo ya ngalaweyo.
20 Ningaonile ira zuwa koma teto nyenyedi kavioneile wa malambo anjinji koma teto ninaandunyiwa na lipevo lakopolo, noowambeela kaikela vyoi ninovulumuwa. 21 Vangavirile malambo anjinji athwayo ka-anadje yongo, Paulo ooimela vaari viwa moi aongile ira: “Aakale ira moovwela malangizwanga, oyi kanivenyewo wu Kerete ule, kanavuteya eni koma teto katundu kaaonongeya. 22 Komave kamukumbanye chifukwa kavali muthu unoyo unakhwe, koma ngalawa yoka inela inoonongeya. 23 Ma-iyu kavirilala ngelo wa Mulungwanga unoyo ndinamupangela miyo utumiki opatuleya, ooimela vakwikwi na miyo 24 moi oondiwandela ira: ‘Kuove Paulo. Unafuneya dowa oneela wa Kaisara. Moi iziwa ira chifukwa ya weyo, Mulungu unovulumucha athu etene anayo kali limo-i na weyo va ulendola.’ 25 Eno limbani murima, chifukwa ndinororomela ira Mulungu unopanga vyetene vyevyo undiwandelile liye. 26 Komave ngalawela, inoonongeya vakwikwi na ilumba imo-iwene.”
27 Va dambo la 14 ma-iyu, lipevo loowambeela nindunyela mbali na mbali va nyanja ya Adiriya. Ndiye vaari va ma-iyu, oendi-a ngalaweyo koowambeela ganiza ira niyandamela ukumani. 28 Eno koolinga dii-a wa nyanjeyo moi kafwanyile ira yali mamita 36. Kangaendile vang’ono koolinga nawili moi kafwanyile ira yali mamita 27. 29 Koma voova ira ngalaweyo inokoza vaza mabwe, aluwa koovocheda anangula 4 unduli wa ngalaweyo moi koofunechecha unde ungachile. 30 Sopano oendi-a ngalaweyo koofuna tawamo. Eno kootiti-ela ngalawa ing’onong’ono munyanjamo vonamedela ira kanafuna kavochede anangula usogolo wa ngalaweyo. 31 Paulo oomuwandela msogoleli wa asilikali limo-i na asilikalayo ira: “Athwala kakeda venyamo mungalawa muno, ndithu kamunavulumuwa.” 32 Ndiye asilikalayo koophaza migo-i da ngalawa ing’onong’ono moi kooi-iya ira idowenga.
33 Unde unga-alile vang’ono cha, Paulo ooawandela athu etene ira kadje. Liye aongile ira: “Vofiya vano vivira malambo 14 mudedi-anga koma teto mungan’na nkhawa moi kamudjile yongo iliyetene. 34 Eno ndinoulimbikisani ira mudje ira vyongo viuendeleni pama. Chifukwa ngakale sisi limo-i la m’muruni mwinyu kalinaonongeya.” 35 Angaongile vyevi, oolanda mkate. Vanduli viwa oopempela wa Mulungu vamaso va athu etene noumeyameya mkateyo moi liye oowambeela dja. 36 Vanduli viwa, athu etene koolimba murima moi koowambeela dja. 37 Athu etene anayo nali mungalawamo, nalivo athu 276. 38 Athu etene kangadjile norumbala, kootatilela tirigu munyanja ira ngalaweyo kinyemeliwe.
39 Unde ungachile, aluwa kataiziwile ira kali waani, koma koowona malo amo-iwene vevo vali miseva moi koofunechecha ira akala pivyowandeya kadowe kaimeche ngalaweyo vevo. 40 Eno koophaza migo-i da anangula nodivocheda munyanja. Koomasula teto migo-i domangela vyongo vyoongolelana. Koogweli-a mudimu nguwo yausogolo ya ngalaweyo, moi koowambeela volowela vamalo vevo vaoneya misevavo. 41 Vanduli viwa koofiya vamisevavo moi usogolo wa ngalaweyo oondora vati m’misevamo. Chifukwa ya vyevi, ngalaweyo kayasusa moi mafunde akopolo koowambeela ivaza unduli uwa moi yoowambeela thweya mapisimapisi. 42 Ndiye asilikali kooganiza vyoi kaaphe akaidi ira kavafwanyeye uliwetene osambilela notawa. 43 Koma msogoleli wa asilikali oofunechecha ira adowe amufiyena Paulo angali wapamene, eno oowaruni-a ira katipange vyevyo kafunaathuvyo. Ndiye ooawandela athu oiziwa sambilela ira kalupele munyanjamo ira kakale owambeela dowa fiya unde. 44 Ooawandela teto athu amo-iwa etene ira kalambuwe vo-indi-eda chito matabwa koma teto mapisi a ngalaweyo. Vogomi-eda viwa athu etene koofiya ukumani kangali apamene.