Olembiwa na Mateyu

5 Yesu angaonile gulu la athu, oogwela m’mwango moi angagaratile, ofunjedae kooza wa liye. 2 Vanduli viwa oowambeela afunji-a ira:

3 “Osangalala mbaathu anayo kanazindikila ira kanofuneya sogoleliwa na Mulungu chifukwa Umwene waudimu ngweewa.

4 Osangalala mbaathu anayo kanavwa chisoni chifukwa kanoza kalimbikisiwe.

5 Osangalala mbaathu ovwela Mulungu* chifukwa kanoza kawachele madaliso vailambo yavati.

6 Osangalala mbaathu anayo kan’na ndala na thona la chilungamo chifukwa kanoza karumbale.

7 Osangalala mbaathu anayo kan’na chifundo chifukwa kanoza kapangeliwe chifundo.

8 Osangalala mbaathu owela murima chifukwa kanoza kamuone Mulungu.

9 Osangalala mbaathu anayo kanalimbikisa murendele chifukwa kanoza karomoliwe a-ima a Mulungu.

10 Osangalala mbaathu anayo kanazuzumi-iwa chifukwa ya chilungamo moi Umwene waudimu ngweewa.

11 Muli osangalala vevo athu kanaunyozaniathu, uzuzumi-ani koma teto unamedelani vyotakala vilivyetene chifukwa ya miyo. 12 Sangalalani vinjinji chifukwa madaliso anayo Mulungu unaze liye auva-eni mboinjiva,* moi iziwani ira naaluwene teto anamaongela awale koozuzumi-iwa nyo mwaanakalewo.

13 Nyo muli mwinyu wailambo yavati. Koma akala mwinyu umalile kopolo, kodi vinokoza wandeya iweli-eda kopolweyo akoka? Kuna-inde chito nawili koma unafuneya utatila unde ira athu kaunyingalenga.

14 Nyo muli wala wailambo. Mzinda wakala vamwango kunabiseya. 15 Athu kakari-a nyale katinaikuneela na dengo, koma kanoi-ela vamalo o-elavo nyale na yolinga yoi imoneelenga m’mba mwetene. 16 Mofwanafwana na vyevi, nanyen’ne muoni-enga wala winyu vamaso va athu, ira kaone chito dinyu dapama na yolinga yoi kalemekeze Babinyu waudimu.

17 Kamuganize ira ndazide vailambo yavati ira ndize ndiononge Ilamulo kapena vyevyo anamaongela kalembileathu. Kandazede za viononga koma ndazede za vikwakwaneli-eda. 18 Ndithu ndinaausimikizelani ira udimu na ilambo yavati vinokoza chosiwa moorucha, iyana noi ilembo ing’onong’ono vinjinji mu Ilamulo ilepele kwakwanela. 19 Eno uliwetene oovwela ngakale lamulo limo-i mwa malamulo anala nofunji-anga teto amo-iwa ira kapangenga vyevyo, kanaza avolowa mu Umwene waudimu. Koma uliwetene o-arela koma teto funji-a malamulo anala unoza akale ofwanelela volowa mu Umwene waudimu. 20 Ndinauwandelani ira akala chilungamwinyu ili ngati ya alembi na Afarisi, ndithu kamunaza muvolowa mu Umwene waudimu.

21 Nyo moovwa ira athu awale koowandeliwa ira: ‘Kamuphe muthu. Uliwetene unoyo uphile muthu, upalamula mulandu waukhoti.’ 22 Koma miyo ndinauwandelani ira muthu uliwetene opitiliza mulunduwela balae upalamula mulandu waukhoti. Moi uliwetene omuongela balae mawu aibewe upalamula mulandu Waukhoti Lilukulu. Koma teto uliwetene omuonga fwae ira, ‘Uli chisiru!’ unoza aonongiwe wu Gehena* wa mulo.

23 Ndiye akala unafuna peleka mphaswawo vaguwa la sembe, koma ungali vevo uumbuwela ira uchimwelana na balawo, 24 iya mphaswawo vasogolo vaguwa la sembe vevo era eno uvenyevo. Yowambeela udowe wagarati-e murendele na balawoyo. Era eno uze upeleke mphaswawo.

25 Wachimwelana na muthu umali-enga khani mombaraanya vevo unaudowana liye ukhoti, na yolinga yoi ouimba mulanduyo kadowe aupeleke wa oweluza. Koma teto ira oweluzoyo kadowe aupeleke wa silikali waukhoti ira silikaliyo au-ele mundende. 26 Onga vyoona, mundendemo kunaza ukumamo mpakana ungalivele ndalama detene dedo kanafunaathu.*

27 Nyo moovwa vyevyo vyalembiwe ira: ‘Kamupange igololo.’ 28 Koma miyo ndinauwandelani ira uliwetene omuing’anechecha iyana mpakana fiya vomulakalaka, upanga nae wale igololo m’murimani mwae. 29 Ndiye akala liso lawo linauchimwi-a,* ulichosemo nolitatila. Chifukwa chipama ira kukaena iwalo imo-i, iyana noi thuthu lawo letene lize lionongiwe wu Gehena.* 30 Koma teto akala ndanda lawo linauchimwi-a, ulidule nolitatila. Chifukwa chipama ira kukaena iwalo imo-i, iyana noi thuthu lawo letene lize lionongiwe wu Gehena.*

31 Vale kalembile teto ira: ‘Uliwetene unoyo umali-ile banja na iyanae, amuva-enga iyanoyo kalata yomali-ela banja.’ 32 Koma miyo ndinauwandelani ira uliwetene unoyo umali-ile banja na iyanae, koma iyanoyo kapangile iwerewere,* unomupangi-a ira apange igololo ateliwa na muthu m’mo-iwa. Moi uliwetene unoyo unamutele iyanoyo naliyene teto upanga igololo.

33 Koma teto moovwa vyevyo athu awale kawandeliweathu ira: ‘Kamulumbelenga koma lepela kwakwaneli-eda, m’malomwiwa mukwakwaneli-edenga vyevyo mwalonjezile nyo wa Yehova.’ 34 Koma miyo ndinauwandelani ira: Kamulumbelenga ngakale vang’ono, voromola udimu, chifukwa kuwewo uli pando waumwene wa Mulungu, 35 kapena voromola ilambo yavati chifukwa mbamalo anayo unanyingalavo liye, kapena teto voromola Yelusalemu chifukwa ngu mzinda wa Mwene wakopolo. 36 Kamulumbelenga voromola murwinyu, chifukwa kamunawande tanducha sisi linyu, ngakale limo-i, ira likale lowela kapena lodimba. 37 Koma mwaira ‘Ee’ akale ee, teto mwaira ‘Naari’ akale naari, chifukwa mawu oenjedela vevo kanakumela wa Satana.

38 Nyo moovwa vyevyo athu awale kawandeliweathu ira: ‘Liso livela liso, lino livela lino.’ 39 Koma miyo ndinauwandelani ira: Kamulimbanenga na muthu otakala, koma muthu m’mo-iwa auvazani likofi tama la mbali imo-i, mumuva-enga teto tama la mbali imo-iweyo. 40 Akala muthu unafuna ulandela ukhoti ira auwake malayawo amuwari, umuva-enga teto malaya aunde. 41 Akala muthu waudindo uulamulile ira umutukulele katundu ulendo olapa kilomita imo-i, umutukulelenga katunduyo ulendo olapa makilomita ambin’li. 42 Muthu auvepa yongo umuva-enga, teto muthu unoyo unafuna ngongola* yongo wa weyo, umungongoli-e kumukoondi-e.

43 Nyo moovwa ira: ‘Umuomeliwengana fwawo teto uidanenga na mdanawo.’ 44 Koma miyo ndinauwandelani ira: Pitilizani aomeliwana adaninyu nowapempelela anayo kanauzuzumi-ani, 45 ira mutonyi-ede ira muli a-ima a Babinyu waudimu. Chifukwa liye unopeleka zuwa lae wa athu apama na otakala, teto unorumbwi-a zongwe wa athu olungama na wa athu oolungama. 46 Ndiye mwakedanga aomeliwana athu oka anayo kanauomeliwanani, munaza muwachela mphoto yoi avi? Kodi okomi-a misonkho naaluwene teto katinapanga vyevyo? 47 Akala munakeda peleka moni wa abalinyu oka, kodi chin’ni yailendo ineyo munapanga nyo? Kodi athu oolungama, naaluwene teto katinapanga vyevyo? 48 Eno kalani angwilo,* mofwanafwana na Babinyu waudimu unoyo uli wangwilo.”