MURU 59
Pivyowandeya Vilela Amo-iwa Kauzuzumi-angani
Athu kanokoza ambeela nizuzumi-a kapena niruni-a nayolinga yoi ni-iye tumikela Yehova. Koma kodi vyevi vinafuneela nidabwi-a?
1. Chifukwa n’ni ninafuneela embekezela ira athu kanokoza ambeela nizuzumi-a?
Baibulo linaonga ira: “Etene ofuna kaana moyo ovipeleka wa Mulungu mwa Kiristu Yesu, naaluwene kanoza kazuzumi-iwe.” (2 Timoteyu 3:12) Yesu oozuzumi-iwa chifukwa kaali mbali ya ilambo ya Satanela. Na-iyene kanili mbali yailambwela, eeno kaninadabwa maboma kapena vipembezo vyamuilambwela vyanizuzumi-anga. — Yohani 15:18, 19.
2. Chin’ni inanikami-e kozeela zuzumi-iwa?
Ninafuneya ambeela thawi inela roromela Yehova. Dambo lililetene nifwanyenga thawi yopepela waliye koma teto welenga Mawae. Ninafuneela teto irana misonkano dapingo thawi detene. Vyongo vyevi vinoukami-ani ira kamufooke mwagumananga na vyoshisha ngakale vyokumela wa athu a m’banja linyu. Namarumiwa Paulo unoyo azuzumi-iwa vinjinji olemba ira: “Yehova ngumalimba ndikami-eda. Kan’naza ndiova.” — Aheberi 13:6.
Ninololela teto zuzumi-iwa naesaesanga laleela thawi detene. Laleela unonikami-a ira niroromelenga vinjinji Yehova koma teto ira kaniovenga athu. (Miyambo 29:25) Mwalaleelanga molimba murima vathawi ila, kavinaza viuruchani dowanave laleela boma liza likoondi-a chitwi-u. — 1 Atesalonika 2:2.
3. Kodi vilela nazuzumi-iwanga kwapama moi avi?
Pivyoona ira kaninasangalala nazuzumi-iwanga. Komave navilelanga vevo ninazuzumi-iwa iyo iroromelo yi-u inolimba vinjinji. Ninokala vausamwali olimba vinjinji na Yehova chifukwa vathawi ineyo ninaona iyo ira kaninakwakwani-e vilela, pavevo unanikami-a liye. (Welengani Yakobo 1:2-4) Yehova aonanga nizuzumi-iwanga vinomuvoreya vinjinji. Koma liye unosangalala aonanga ira ninoesaesa vilela. Baibulo lini: “Akala munavilela vovuteya chifukwa yoira vyapama, vyevyo pivyapama wa Mulungu.” (1 Petulo 2:20) Nadowanave kala ororomeleya athu amo-iwa kanizuzumi-anga, Yehova unoza anidalise voniva-a moyo wo-omala muilambo yoi kamunaza mukala athu oniruni-a. — Mateyu 24:13.
FUNJEDANI VYOWENJEDELEYA
Onani chifukwa iwa vili vyowandeya vilela amo-iwa kanizuzumi-anga koma teto mwemo Yehova unanidalisele liye nadowanave kala ororomeleya.
4. Pivyowandeya vilela mwaruni-iwanga na athu a m’banja linyu
Yesu ooiziwa pama ira athu amo-iwa a m’banja li-u katinagwilizane na vyevyo nisakulile iyo vyoi nilambelenga Yehova. Welengani Mateyu 10:34-36, era eeno tapanyani yofuka yo-arelela:
Mogwilizana na lembali, kodi abali-u kanaire n’ni nasakula tumikela Yehova?
Ira muone isazo ya vyevi, onelani VIDIYO, era eeno tapanyani yofuka yo-arelela.
Kodi munaire avi akala balinyu kapena fwinyu unafuna ira mu-iye tumikela Yehova?
Welengani Salimo 27:10 na Maliko 10:29, 30. Mwawelenga lemba lililetene tapanyani yofuka yo-arelela:
Kodi lonjezoli linaukami-eni avi abalinyu kapena afwinyu kauruni-angani?
5. Kamu-iye tumikela Yehova mwazuzumi-iwanga
Ninafuneela limba murima ira nidowenave tumikela Yehova athu amo-iwa kanizuzumi-anga. Onelani VIDIYO, era eeno tapanyani yofuka yo-arelela.
Kodi visazo vya muvidiywela viulimbi-ileni avi?
Welengani Vyoira 5:27-29 na Aheberi 10:24, 25. Mwawelenga lemba lililetene tapanyani yofuka yo-arelela:
Chifukwa n’ni ninafuneela dowanave tumikela Yehova ngakale boma linganiruni-ile sonkana kapena inda chitwi-u yolaleela?
6. Yehova unoza aukami-eni ira muwande vilela
A Mboni da Yehova a misinku do-iyana-iyana kanodowanave tumikela Yehova mororomeleya ngakale kazuzumi-iwanga. Ira muone vyevyo vinaakami-a vilela, onelani VIDIYO. era eeno tapanyani yofuka yo-arelela.
Muvidiywela, chin’ni yakami-ile abali na arongolala ira kawande vilela?
Welengani Aroma 8:35, 37-39 na Afilipi 4:13. Mwawelenga lemba lililetene tapanyani yofuka yo-arelela:
Kodi lembali linatonyi-eda avi ira pivyowandeya vilela mwagumananga na vyoshisha vilivyetene?
Welengani Mateyu 5:10-12, era eeno tapanyani yofuka yo-arelela:
Chifukwa n’ni munawande sangalalangave vevo munazuzumi-iwa nyo?
A Mboni da Yehova anjinji kata-iile tumikela Yehova ngakale vevo kazuzumi-iwaathu. Nanyene munokwakwani-a
ATHU AMO-IWA KANAONAGA IRA: “Kandinawande vilela amo-iwa kandizuzumi-anga.”
Kodi mbamalemba aavi anayo kanamukami-e muthu unola kala olimba murima?
VYEVYO NIFUNJEDILE IYO
Yehova unoyamikela tindi lelo ninaira iyo vomutumikela ngakale amo-iwa kanizuzumi-anga. Liye unoniva-a kopolo dedo dinanikami-e vilelela.
Vyofuka Vyoweli-eda
Chifukwa n’ni Akiristu kanafuneela embekezela ira kanerenga zuzumi-iwa?
Kodi munafuneela panga n’ni vathawi ila vokozeela zuzumi-iwa?
Chin’ni inaukami-eni ira kamukaikelenga ira munokoza tumikelangave Yehova mororomeleya ngakale mugumananga na vyoshisha?
ONANI VIMO-I
Onani mwemo Yehova mwakami-ele liye m’bali m’mo-iwa vilela angakoondile volowela ndale.
Onani vyevyo vyakami-ile athu abanja limo-iliwa ira katumikelenga Yehova mororomeleya wa chaka dinjinji ngakale ira koozuzumi-iwa.
Anatumikira Yehova Panthawi Imene Zinthu Zinali Zitasintha (7:11)
Onani vyevyo munaire nyo ira muirenga vyongo molimba murima mwazuzumi-iwanga.
“Tizikonzekera Kuti Tidzathe Kupirira Pozunzidwa” (Nsanja ya Olonda, July 2019)
Kodi niirenga n’ni athu a m’banja li-u kanizuzumi-anga? Nanga ninaire avi ira niirenga vyongo mwamurendele koma teto ira nikaleve ororomeleya wa Yehova?
“Choonadi Sichibweretsa ‘Mtendere Koma Lupanga’” (Nsanja ya Olonda, October 2017)