Olembiwa na Maliko

14 Sopano wakede ala malambo men’li ira lifiye dambo la Pasika na Ikondwelelo ya Mikate Do-okaana Vyofufumi-a. Ndiye asembe alukulu na alembi koosaelasaela ndila ira kamu-inde Yesu moenjela nomumanga na yolinga yoi kamuphe. 2 Aluwa kaonga ira: “Kanize nimu-inde va dambo la ikondwelelo, ovela ira athu kanoza kapange ipolowe.”

3 Vathawi ineyo Yesu ali liye wu Betaniya m’mba mwa Simoni wamakate, iyana m’mo-iwa oofiya angalandile botolo lopangiwa na libwe la alabasitala mungali makura onukela. Makurayo kali a nado onukela vinjinji moi kali odura vinjinji. Liye oo-ula botololo, nowambeela mukutulela Yesu makurayo m’muru. 4 Athu amo-iwa kangaonile vyevi, koowambeela kambilana motakaleliwa ira: “Chifukwa n’ni unaononga eni makura onukelala? 5 Makura onukelala kookoza guli-iwa ndalama dokwaranya madinari* 300 moi ndalamado doopelekiwa wa athu osauwa!” Eno aluwa kootakaleliwa vinjinji chifukwa ya vyevyo iyanoyo apangile liye.* 6 Koma Yesu ooawandela ira: “Mu-iyeni, chifukwa n’ni munamuvuti-a? Liye undipangela vyongo vyapama vinjinji. 7 Chifukwa osauwayo munokalanawo thawi detene, moi munokoza apangela vyapama thawi iliyetene ineyo munafuna nyo. Koma kamunaza mukalave na miyo thawi detene. 8 Iyanola upanga vyevyo uwandile liye. Liye u-ela makura onukelala vathuthu vanga, vokozeela eliwa wanga m’manda. 9 Ndithu ndinauwandelani ira, uliwetene wewo uthenga wapama unazeathu ulaleiwe vailambo yetene, athu kanoza kafotokozenga vyevyo iyanola upangile liye vomuumbuwela.”

10 Vanduli viwa Yudasi Isikariyoti, m’mo-i wa ofunjeda 12, oodowa wa asembe alukulu na yolinga yoi adowe amupeleke Yesu wa aluwa. 11 Asembayo kangavwile vyevi, koosangalala moi koomulonjeza ira kanomuva-a ndalama da siliva. Eno liye oowambeela saelasaela mpata wapama ira amupeleke.

12 Va dambo lowambeela la ikondwelelo ya Mikate Do-okaana Vyofufumi-a, vevo kapelekaathu sembe ya nyama ya Pasika monga mwemo kapangelaathu thawi detene, ofunjedae koomufuka ira: “Kodi munafuna ira nidowe nausakaedeleni waani malo odjelawo Pasika?” 13 Ndiye Yesu ooruma ofunjedae ambin’li noawandela ira: “Dowani mu mzinda moi mwemo munodowa mwagumane na lombwana m’mo-iwa angatukulile suwo wa ma-inje. Mudowe mwamu-are, 14 moi nyumba ineyo unavolowe liye, mudowe mwamuwandele mwinyailo wa nyumbeyo ira, ‘Mphunzisi uongile ira: “Subi la alendo lili waani ira miyo ndidjelemo Pasika limo-i na ofunjedanga?”’ 15 Liye unodowa auoni-eni subi lilukulu lamudimu losamaleliwa pama. Mudowe mwanisakaedele mwemo Pasika.” 16 Eno ofunjedayo koodowa novolowa mu mzinda moi vyooireya monga mwemo Yesu aawandelile liye. Moi wewo aluwa koolinganiza vyongo vyetene vyofuneya va Pasika.

17 Mazulo, Yesu oofiya limo-i na ofunjedae 12. 18 Ndiye vevo kadjaathu vatebulo, Yesu ooawandela ira: “Ndithu ndinauwandelani ira, m’mo-i wa nyo, unoyo unadja limo-i na miyo, unondipeleka.” 19 Aluwa kookaana chisoni vinjinji moi uliwetene wa aluwa oowambeela mufuka ira: “Kodi mwina ngu miyo?” 20 Liye aongile ira: “Ngu m’mo-i wa nyo 12, unoyo unadja m’mbale imo-i na miyo. 21 Mwana wa muthu unodowa, mogwilizana na vyevyo Malemba kanaongaathu vyokuza liye. Koma soka wa muthu unoyo unamupeleka Mwana wa muthu! Vyookala pama aakale ira muthu unola kabaliwile.”

22 Vevo kapitilizaathu dja, liye oolanda mkate nopempela wa Mulungu. Vanduli viwa ooumeyameya nowava-a moi aongile ira: “Landani, mkatela unaimelela thuthu langa.” 23 Vanduli viwa oolanda kapu ya vinyu moi angapempelile, oowava-a moi etene koong’wa. 24 Ndiye ooawandela ira: “Vinyula unaimelela ‘magazanga a pangano,’ anayo kanaze kakhesiwe chifukwa ya athu anjinji. 25 Ndithu ndinauwandelani ira, kandinaza nding’wa nawili yong’wa iliyetene yopangiwa kumela wu mphesa ngati inela mpakana dambo lelo ndinaze miyo nding’we yong’wa isha mu Umwene wa Mulungu.” 26 Vogomi-eda viwa, kangamari-ile imba nyimbo dotamanda Mulungu,* koodowa wu Mwango wa Maolivi.

27 Yesu ooawandela ira: “Etene nyen’ne munotawa nondi-iya mekave, chifukwa Malemba kanaonga ira: ‘Ndinoza ndiphe m’busa moi khosa dinoza dibalaleye.’ 28 Koma ndaza ndivenyi-iwa, ndinoza ndisogole dowa fiya wu Galileya nyo mwaanafiyewo.” 29 Koma Petulo oosomeda ira: “Ngakale etene anala kangatawile nou-iyani, miyo mekave kandinaza nditawa.” 30 Angaongile eno Yesu oomuwandela ira: “Ndithu ndinauwandela ira, ma-iyu a peeno, tambala aanaule maulendo men’li, weyo unondikoonda maulendo maralu.” 31 Koma liye oopitiliza onga ira: “Akala uli khwa, miyo ndinokhwa limo-i na nyo, koma kandinaukoondani ngakale vang’ono.” Moi ofunjeda amo-iwa etene koowambeela onga teto chimozimozi.

32 Vanduli viwa koofiya vamalo oromoliwa Gesemani moi Yesu ooawandela ofunjedae ira: “Garatini veva, miyo ndinadowa ndapempele.” 33 Vevo adowa liye wewo oomulanda Petulo, Yakobo na Yohani moi oowambeela kaana chisoni koma teto vuteya vinjinji m’murimani mwae. 34 Vanduli viwa liye ooawandela ira: “Miyo ndikaana* chisoni vinjinji mpakana ala vang’ono khwana. Garatini veva, teto mukaleve maso.” 35 Eno angadowile vasogolo vang’ono, ookokora mpakana kovae vati moi oowambeela pempela ira akala pivyowandeya, thawi inela imukwaranye. 36 Moi aongile ira: “Abba,* Babani, vyongo vyetene pivyowandeya wa nyo. Ndichoseleni kapu inela. Koma o-okala mofuna mwanga, koma mofuna mwinyu.” 37 Angazile vevo vali ofunjedae aafwanyile kagonanga. Eno oomufuka Petulo ira: “Simoni, vyoona unaagona? Kodi kun’na kopolo ira ukaleve maso wa ola limo-i loka? 38 Kalanive maso, teto mupitilizeve pempela ira kamuvolowe m’maesero. Pivyoona ira murima ngofunechecha, koma thuthu tilofooka.” 39 Vanduli viwa oodowa nawili dowa pempela moi ooweli-eda mawu amo-ive anale. 40 Angazile ulendo wanambili aafwanyile teto kagonanga, chifukwa yoi kookaana kove, eno aluwa katamusomedile iliyetene. 41 Ooza ulendo wanaralu noawandela ira: “Vyoona thawi ngati ila nyo munaagona novuma? Ba-i! Thawi ikwakwana! Kaonani! Mwana wa muthu unaapelekiwa m’mandani mwa athu ochimwa. 42 Venyani, tiyemoni nidowenga. Kaonani! Unoyo unafuna ndipeleka uli vakwikwi.”

43 Thawi ineyo, aanamari-e onga, Yudasi m’mo-i wa ofunjeda 12, oofiya limo-i na gulu lilukulu la athu kangalandile masupada na vimwiri. Aluwa karumiwe na asembe alukulu koma teto andimuwa. 44 Vathawi inela, muthu unoyo afuna mupelekole, ali angaava-ile athwayo izindikilo yoi: “Muthu unoyo ndinamukise miyo ngunoyo, mudowe mwamu-inde nomudowana moi muonecheche ira katawe.” 45 Ndiye Yudasi oodowa vevo vali Yesu noonga ira: “Rabi!” Moi oomukisa. 46 Eno aluwa koomu-inda nomumanga. 47 Koma m’mo-i mwa athu anayo kaimelile vakwikwi ookumi-a supada lae nopaza libaru la kapolo wa ndimuwa wa asembe. 48 Koma Yesu oowafuka ira: “Bwanji muzile za ndi-inda mungalandile masupada na vimwiri ngati munafuna muze mulimbane na wachifamba? 49 Dambo na dambo ndali limo-i na nyo mukachisi nofunji-anga, koma kamwandi-indile. Komave, vyevi vinaireya na yolinga yoi Malemba kakwakwaneli-ediwe.”

50 Ndiye ofunjedae etene koomutawa nomu-iya ekave. 51 Koma zombwe m’mo-iwa unoyo awarile nguwo imo-i yoka yapama vinjinji, oowambeela mu-arela Yesu vakwikwi moi athwayo kooesaesa ira kamu-inde. 52 Koma zombweyo oo-iya nguweyo m’mandani mwiwa notawa angali mandave.*

53 Sopano aluwa koomulanda Yesu nomudowana wa ndimuwa wa asembe moi asembe alukulu koma teto andimuwa na asembe etene koosonkana wewo. 54 Koma Petulo oopitiliza mu-arela angali vandendai, mpakana oofiya va nyumba ya ndimuwa wa asembeyo. Petuloyo oogarati limo-i na achito a m’mbamo nootanga mulo. 55 Ndiye asembe alukulu na Khoti letene Lilukulu la Ayuda koosaelasaela umboni oyi kamunamedele Yesu mulandu na yolinga yoi kamuphe, koma katafwanyile umboni uliwetene. 56 Athu anjinji koopeleka umboni onama ira kamunamedele mulandu, koma maumboni anayo kapelekaathu katagwilizana moi kooruni-ana. 57 Koma teto, athu amo-iwa kooimela nopelekanga umboni omunamedela ira: 58 “Iyo noomuvwa aonganga ira, ‘Miyo ndinoza ndimugwi-e kachisila unoyo amangiwe na athu moi wa malambo maralu oka ndinoza ndimumange m’mo-iwa o-okala omangiwa na athu.’” 59 Komave ngakale ira aluwa koowonga vyevi, umboni unoyo kapelekaathu kawagwilizana.

60 Vanduli viwa, ndimuwa wa asembe ooimela vaari viwa nomufuka Yesu ira: “Chifukwa n’ni kunasomeda? Kodi kunavwa vyevyo athwala kanaongaathuvi?” 61 Koma liye kaasomedile iliyetene. Ndiye ndimuwa wa asembeyo oowambeela mufuka ira: “Kodi uli Kristu Mwana wa Odalisiwoyo?” 62 Ndiye Yesu aongile ira: “Ee ngu miyo, moi ambeela vathawiila mpakana usogolo munoza mumuone Mwana wa muthu angagaratile undanda lodjana lakopolo. Munoza mumuone teto azanga m’mirambo daudimu.” 63 Ndimuwa wa asembe angavwile vyevi oong’amba vyowara vyae noonga ira: “Kodi vanofuneya teto mboni dimo-idiwa veva? 64 Nyo muvivwela ekinyu mwemo unamunyozela liye Mulungu. Ndiye veva munaona avi?”* Athu etene kaongile ira unafuneya phiwa ba-i. 65 Moi athu amo-iwa koowambeela mutapeda umaso, mukuneela umaso nomuvazanga na khonya. Aluwa koomuwandela ira: “Ro-a!” Kangamuvazile likofi, asilikali avakhoti koomulanda.

66 Sopano Petulo angali vati, muwari mwa mpanda, vooza m’mo-i mwa asikana achito a ndimuwa wa asembe. 67 Angamuonile Petulo aothanga mulo, oomuing’anechecha noonga ira: “Nanyen’ne teto mwali limo-i na Yesu Mnazareti.” 68 Koma liye ookoonda noonga ira: “Miyo kandinamuiziwa ngakale vang’ono muthu unoyo moi kandinavwechecha vyevyo unaonga we.” Angapangile eno ookuma vande dowa vamulango wa mpanda.* 69 Vevo teto sikana wachito oomuona moi oowambeela awandela athu anayo kaimelile vakwikwi ira: “Muthu ula teto uli mugulu la ofunjedae.” 70 Veva teto Petulo ookoonda. Vangavirile thawi yoyeva, athu anayo kaimelile vakwikwi koowambeela muwandela Petulo ira: “Mookaikela, nawen’ne teto uli mugulu la ofunjedae. Moi nawen’ne uli wawu Galileya.” 71 Koma liye oowambeela vitembelela ekave nolumbela ira: “Muthu unoyo munamuongana nyooyo miyo kandinamuiziwa.” 72 Thawi ineyo tambala ooula ulendo wanambili moi Petulo ooumbuwela mawu anayo Yesu aongile liye oyi: “Tambala aanaule maulendo men’li, weyo unondikoonda maulendo maralu.” Moi ookaana chisoni vinjinji nowambeela ula.