Olembiwa na Yohani
21 Vyevi vingamalile, Yesu oowoneela nawili wa ofunjedayo wu nyanja ya Tiberiyo.* Oneela wae waireile moi eni: 2 Simoni Petulo, Tomasi (unoyo aromoliwa ira Didimo), Natanayeli wawu Kana wawu Galileya, a-ima a Zebedayo na ofunjeda amo-iwa ambin’li etene anala kali vamo-i. 3 Ndiye Simoni Petulo aongile ira: “Miyo ndinadowa ndaphe somba.” Aluwa koomuwandela ira: “Na-iyene teto ninodowa limo-i na weyo.” Aluwa koodowa nogwela ngalawa, koma ma-iyu anayo kataphile somba iliyetene.
4 Koma vevo unde wachaathu, Yesu ooimela m’mbali mwa nyanja, koma ofunjedayo katamuzindikilile ira ngu Yesu. 5 Vanduli viwa Yesu aongile ira: “A-imanga, kodi mukaana yodja iliyetene?”* Aluwa koomusomeda ira, “Naari!” 6 Liye ooawandela ira: “Vochani thavili umbali ya undanda lodjana wa ngalaweyo moi munopha somba.” Eno aluwa koovocha thavilo, koma katakwakwani-ile likokela mungalawamo chifukwa yoinjiva wa somba. 7 Vingairile eno ofunjeda unoyo Yesu amuomeliwana liye vinjinji oomuwandela Petulo ira: “Ngu Mbwiye!” Simoni Petulo angavwile ira ngu Mbwiye, oowara malayae aunde, chifukwa ali mandave,* moi oolupela munyanja. 8 Koma ofunjeda amo-iwayo kooza na ngalawa ing’onong’ono kakokanga thavi lozaala na somba, chifukwa katali vandendai vinjinji na ukumani. Wakede ala mamita otamangela 90 oka ira kafiye ukumani.*
9 Kangafiile ukumani koowona mulo vangali somba koma teto koowona mkate. 10 Yesu ooawandela ira: “Zanani uno dimo-i mwa somba dedo muphile nyo.” 11 Eno Simoni Petulo oogwela mungalawamo nokokela ukumani thavi lozaala na somba dilukulu dilukulu dokwakwana 153. Koma ngakale ira mookala somba doinjiva, thavilo kalang’ambeile. 12 Yesu ooawandela ira: “Zani mudje.” Koma kalivo ngakale m’mo-i wa ofunjedayo unoyo alimbile murima mufuka ira: “Kodi muli mbaani?” chifukwa kooiziwa ira ngu Mbwiye. 13 Yesu oodowa landa mkate nowava-a, moi oopanga chimozimozi na somba. 14 Unola wali ulendo wanaralu Yesu aoneelanga wa ofunjedae vanduli voi uvenyi-iwa wa okhwa.
15 Kangamari-ile dja, Yesu oomufuka Simoni Petulo ira: “Simoni mwana wa Yohani, kodi unondiomeliwana kwaranya vi?” Liye oomusomeda ira: “Ee Mbwiyeni, nyo munoiziwa ira ndinouomeliwanani vinjinji.” Liye oomuwandela ira: “Dji-a a-ima a khosa danga.” 16 Vanduli viwa oomufuka ulendo wanambili ira: “Simoni mwana wa Yohani, kodi unondiomeliwana?” Liye oomusomeda ira: “Ee Mbwiyeni, nyo munoiziwa ira ndinouomeliwanani vinjinji.” Ndiye oomuwandela ira: “Weta a-ima a khosa danga.” 17 Oomufuka teto ulendo wanaralu ira: “Simoni mwana wa Yohani, kodi unondiomeliwana vinjinji?” Petulo oovwa chisoni chifukwa yoi oomufuka ulendo wanaralu ira: “Kodi unondiomeliwana vinjinji?” Eno liye aongile ira: “Mbwiyeni, nyo munoiziwa vyongo vyetene. Munoiziwa teto pama ira ndinouomeliwanani vinjinji.” Yesu oomuwandela ira: “Dji-a a-ima a khosa danga. 18 Ndithu ndinaauwandela ira, vevo wali we zombwe, wawara wekave dowa wewo wafuna we. Koma waza ukalamba, unoza utapule mandawo moi muthu m’mo-iwa unoza auwari-e moi unoza autukule noudowana umalo oyi kunafunawo.” 19 Yesu aongile vyevi vofuna tonyi-eda ira Petulo unoza akhwe mundila yoi unoza alemekeze Mulungu. Angaongile vyevi, oomuwandela ira: “Pitiliza ndi-arela.”
20 Petulo ootembenuwa moi oomuona ofunjeda unoyo Yesu amuomeliwana liye aa-arelanga. Ofunjeda unola ngunoyo ali vakwikwi na Yesu va yodja ya mazulo moi ngunoyo amufukile ira: “Mbwiyeni, kodi mbaani unoyo unafuna upelekani?” 21 Eno Petulo angamuonile, oomufuka Yesu ira: “Mbwiyeni, nanga ula unaza apanga n’ni?” 22 Yesu aongile ira: “Akala miyo ndinafune ira akaleve na moyo mpakana vevo ndinaze miyo, kodi weyo vinaukuza avi? Weyo ukede pitiliza ndi-arela.” 23 Eno khani inela yoofala vaari va abali ira ofunjeda unola kanaza akhwa. Komave Yesu kaamuwandelile ira kanaza akhwa, koma aongile ira: “Akala miyo ndinafune ira akaleve na moyo mpakana vevo ndinaze miyo, kodi weyo vinaukuza avi?”
24 Ofunjeda unola ngunoyo apangele umboni vyongo vyevi. Liye ngunoyo teto alembile vyongo vyevi moi ninoiziwa ira umbonae ngoona.
25 Vikala vyongo vinjinji vyevyo Yesu apangile liye. Aakale ira vyetene vilembiwa imo-i na imo-i, ndinaganiza ira vailambwela kavafwanyeya malo osungela mipukutu dedo dalembiwe.