Olembiwa na Maliko

1 Ambeela wa uthenga wapama oonga vya Yesu Kristu, Mwana wa Mulungu: 2 Mogwilizana na vyevyo vyalembiwe m’buku la namaongela Yesaya ira: “(Kaona! Miyo ndinomutumiza mtumikanga ira asogole* dowa usakaedela ndila.) 3 Muthu m’mo-iwene unaakuwa muipululu ira: ‘Sakaedani ndila ya Yehova!* Muongole misewu dae.’” 4 Yohani M’batizi ali muipululu moi oolaleela ira athu kanafuneya batiziwa monga izindikilo yotonyi-eda lapa ira machimwiwa kakululukiwe. 5 Eno athu etene anayo kakala mudela la Yudeya koma teto anayo kakala mu Yelusalemu koodowa wa liye. Yohani oowabatiza* mu-inje wa Yorodano moi athwayo kooulula machimwiwa vamaso va athu. 6 Yohani awara yowara yopangiwa na maoya a ngamila na lamba waikopa muyuni mwae moi yodja yae yali aserebo na nuwi. 7 Liye alaleela ira: “Muthu m’mo-iwa mulukulu ondikwaranya miyo unaaza munduli mwanga moi miyo kandili ofwanelela masula migo-i da sapato dae. 8 Miyo ndiubatizani na ma-inje, koma liye unoza aubatizeni na zimu owela.”

9 M’malambo anayo, Yesu ooza kumela wu Nazareti wawu Galileya moi oobatiziwa na Yohani mu-inje wa Yorodano. 10 Angakede kuma mwikomo, liye oowona udimu u-uleyanga koma teto oowona zimu owela utitanga ngati kangaiwa za muputela. 11 Ndiye voovweya mawu okumela udimu oyi: “Weyo uli Mwananga unoyo ndinamuomeliwana miyo, moi unondisangalasa vinjinji.”

12 Thawi ineyo zimu oweloyo oomulimbikisa ira adowe uipululu. 13 Eno liye ookala muipululu malambo 40, aesiwanga na Satana. Muipululumo mookala teto vinyama vyaukokolani moi angelo koomutumikela.

14 Yohani angamangiwe, Yesu oodowa wu Galileya dowa laleela uthenga wapama wa Mulungu. 15 Liye aonga ira: “Thawi ineyo ya-eliwe ikwakwana, moi Umwene wa Mulungu uwandamela. Lapani, teto muroromele uthenga wapama!”

16 Vevo Yesu aenda liye mpepetele mwa nyanja ya Galileya,* oomuona Simoni na nchimwenae Andreya, kavochedanga mathaviwa munyanjamo chifukwa yoi aluwa kali asozi. 17 Eno Yesu ooawandela ira: “Ndi-areleni, moi ndinoupangi-ani ira mukale asozi a athu.” 18 Thawi ineyo aluwa koo-iya mataviwa nomu-arela. 19 Angaendile vang’ono, oomuona Yakobo mwana wa Zebedayo na nchimwenae Yohani, kangali mungalawa kasowanga mataviwa. 20 Thawi ineyo liye oowaitana. Eno aluwa koomu-iya babiwa Zebedayo mungalawamo limo-i na athu aganyo moi koomu-arela. 21 Aluwa koodowa wu Kaperenao.

Dambo la Sabata lingafiile, liye oovolowa musunagoge nowambeela funji-a. 22 Musunagogemo athu koodabwa vinjinji na mwemo afunji-ela liye, chifukwa afunji-a monga muthu okala na ulamulilo, o-okala ngati mwemo alembi kapangelaathu. 23 Vathawi ineyo, musunagogemo mookala muthu o-indiwa na zimu otakala, moi muthuyo ookuwa ira: 24 “Kodi munafuna n’ni wa iyo, nyo Yesu Mnazareti? Kodi muzide ira muniononge? Miyo ndinouiziwani pama vinjinji, ira nyo muli owela wa Mulungu!” 25 Koma Yesu oosumulula zimuyo ira: “Miyala, teto kuma mwa liye!” 26 Eno zimu otakaloyo oomupangi-a ira aphuphe moi ookuwa mogweli-a mawu. Vanduli viwa zimuyo ookuma mwa muthuyo. 27 Athu etene kangaonile vyevi, koodabwa vinjinji moi koowambeela kambilana ira: “Kodi inela chin’ni? Chichiphunziso isha! Liye ukaana kopolo dokumi-a mizimu dotakala moi mizimudo dinomuvwela.” 28 Eno mbilae yoofalikela mombaraanya vinjinji muigawo yetene ya Galileya.

29 Vanduli viwa aluwa koovenyawo usunagogewo dowa waniwa wa Simoni na Andreya, kangali limo-i na Yakobo na Yohani. 30 Koma apongozae a Simoni kali kangagonatile, kabulelanga malungo. Mombaraanya aluwa koomuwandela Yesu vyevi. 31 Eno liye oodowa vevo kaliathu moi oowa-inda ndanda nowavenyi-a. Angapangile eno, malungwayo koomala thawi ineyo, moi aluwa koovenya dowa ambeela aphiyela yodja.

32 Mazulo zuwa lingavolowile, athu koowambeela muzelana athu etene anayo kabulela koma teto o-indiwa na viwanda. 33 Moi athu etene a mu mzindoyo koosonkana vandevo. 34 Eno Yesu oochili-a athu anjinji anayo kabulela marenda o-iyana-iyana moi ookumi-a viwanda vinjinji. Koma kaalolile ira viwandavyo vionge, chifukwa vyooiziwa ira liye ngu Kristu.

35 Mamawa vinjinji, Yesu oovenya nokuma vande dowa kala umalo aekave. Wewo liye oowambeela pempela. 36 Koma Simoni na athu anayo kali limo-i na liye koowambeela musaela 37 moi kangamufwanyile, kamuwandelile ira: “Athu etene kanaausaelani.” 38 Koma liye oowasomeda ira: “Tiyemoni nidowe umalo amo-iwa. Nidowe m’mizinda davakwikwi ira nalaleele teto wewo, chifukwa ndazide za panga vyevi.” 39 Moi oodowa, dowa laleela m’masunagoge mwiwa muigawo yetene ya Galileya koma teto kumi-a viwanda.

40 Wewo teto muthu m’mo-iwa wamakate oofiya wa liye moi oomukokorela nomuchondelela ira: “Ndinoiziwa ira akala munafuna, munokoza ndichili-a.” 41 Chifukwa ya chifundo, Yesu ootapula ndanda lae nomu-inda moi oomuwandela ira: “Ee ndinofuna. Marendawo kamale.” 42 Thawi ineyo makatayo koomala, moi oochila. 43 Vanduli viwa oomuva-a malangizo akopolo moi thawi ineyo oomuwandela ira adowenga. 44 Amuwandelile ira: “Samala, kumuwandele muthu uliwetene vyevi, koma udowe wavioni-ede wa asembe chifukwa yoi uchili-iwa. Udowe wapeleke vyongo vyevyo Mose alamulile liye, ira ukale umboni wa aluwa.” 45 Koma muthuyo adowanga, oowambeela lengeza vyevyo vyaireile koma teto falisa khaniyo m’madela amo-iwa. Vyevi vyoopangi-a ira Yesu kakwakwani-e volowa mu mzinda uliwetene mooneela moi akala umalo o-okala athu. Koma ngakale vyali eno, athu kooza wa liye kumela m’madela etene.