Olembiwa na Luka

5 Vathawi imo-iwa, gulu la athu loovuruwana vevo Yesu afunji-a liye mawu a Mulungu m’mbali mwa nyanja ya Genesareti* moi athwayo koomupanikiza. 2 Ndiye liye oowona ngalawa mbin’li kangadiimechile mpepetele mwa nyanjeyo, koma otota somba kali kangatitilemo moi kali kachapanga mataviwa. 3 Eno liye oogwela mungalawa imo-i, ineyo yali ya Simoni moi oomuvepa ira aisusi-ede mwiko vang’ono. Vanduli viwa liye oogarati mungalawamo nowambeela funji-a gulu la athulo. 4 Angamari-ile afunji-a, oomuwandela Simoni ira: “Palasela ngalawela odii-a, teto muvoche mathavinyu ira muphe somba.” 5 Koma Simoni amusomedile ira: “Mphunzisi, iyo ni-inda chito ma-iyu etene koma kaniphile somba iliyetene. Koma voi muongile ngu nyo, ndinovocha mathavala.” 6 Kangapangile eno, koo-inda somba doinjiva vinjinji. Moi mathaviwa koowambeela ng’ambeya. 7 Eno koowaitana afwiwa anayo kali mungalawa imo-iwa ira kaze kaakami-e. Aluwa kooza, moi sombado doozaala ngalawa detene mbin’li, moi ngalawado doowambeela bwina. 8 Simoni Petulo angaonile vyevi, ookokora vamaso va Yesu moi oomuwandela ira: “Mbwiyeni, venyavoni vali miyo vano chifukwa ndili muthu ochimwa.” 9 Simoni koma teto athu anayo kali limo-i na liye koodabwa vinjinji na somba dedo kaphileathu. 10 Koma teto Yakobo na Yohani, a-ima a Zebedayo, anayo kapha somba limo-i na Simoni koodabwa vinjinji. Koma Yesu oomuwandela Simoni ira: “Kuove. Ambeela peeno unatotenga athu amoyo.” 11 Eno koofiyana ngalawado ukumani, moi aluwa koo-iya yongo iliyetene nomu-arela Yesu.

12 Vathawi imo-iwa vevo ali liye mu mzinda umo-iwa, oogumana na muthu m’mo-iwa wamakate thuthu letene. Muthuyo angamuonile Yesu, ookokora mpakana kovae vati moi oomuvepa ira: “Mbwiyeni, ndinoiziwa ira akala munafuna, munokoza ndichili-a.” 13 Eno Yesu ootapula ndanda lae nomu-inda moi oomuwandela ira: “Ee ndinofuna. Marendawo kamale.” Thawi ineyo makatayo koomala. 14 Vanduli viwa oomulamula muthuyo ira kamuwandele muthu uliwetene, moi amuwandelile ira: “Koma udowe wavioni-ede wa wasembe, teto udowe wapeleke sembe, monga mwemo Mose alamulele liye, ira sembeyo ikale umboni wa aluwa.” 15 Koma mbilae yoofalikela vinjinji moi magulu a athu kooza wa liye ira kaze kamuvuruwane koma teto ira kaze kachili-iwe marendiwa. 16 Komave thawi dinjinji liye oodowa umalo aekave dowa pempela.

17 Dambo limo-iliwa vevo Yesu afunji-a liye, Afarisi na aphunzisi a Ilamulo anayo kakumele umadela etene a wu Galileya, wu Yudeya na wu Yelusalemu koogarati vevo. Moi kopolo ya Yehova* yali va liye ira awande chili-a athu. 18 Vanduli viwa voofiya athu kangamutukulile muthu okhwa viwalo va machila. Aluwa kooesaesa ira kamuvolochi-e muthuyo m’mbamo na yolinga yoi kadowe kamufiyena vakwikwi na Yesu. 19 Koma kangalepelile muvirana chifukwa yoinjiva wa athu, aluwa koogwela vadimu va nyumbeyo. Moi koopasula vadimuvo, nomutiti-elavo muthuyo mpakana dowa mufiyana vevo vali Yesu. 20 Liye angaonile iroromelo iwa oomuwandela muthuyo ira: “Machimwawo kookululukiwa.” 21 Vanduli viwa alembi na Afarisi koowambeela vifuka ira: “Kodi unola ngu mbaani ira amunyozenga Mulungu eni? Ngu mbaani teto m’mo-iwa unoyo unakululukele machimo patulavo Mulungu?” 22 Koma Yesu angaiziwile vyevyo kaganizaathu oowafuka ira: “Kodi munaganiza n’ni m’murimani mwinyu? 23 Kodi yokweya chiivi onga ira, ‘Machimwawo kookululukiwa,’ kapena onga ira, ‘Maruwa uyende’? 24 Koma ira muiziwe ira Mwana wa muthu ukaana kopolo dokululukela athu machimo vailambo yavati—” ndiye oomuwandela muthu okhwa viwaloyo ira: “Ndinaonga na weyo, Maruwa, tukula machilawo udowenga waninyu.” 25 Thawi ineyo liye ooimela athu etene kaonanga, moi ootukula machilae dowanga waniwa, atamandanga Mulungu. 26 Ndiye athu etene anayo koodabwa vinjinji teto koowambeela tamanda Mulungu, moi koowova vinjinji. Aluwa kaonga ira: “Peeno niona vyongo vyodabwi-a vinjinji!”

27 Vanduli va vyevi, Yesu oovenyawo wewo. Ndiye oomuona muthu m’mo-iwa okomi-a misonkho zina lae Levi angagaratile mu ofesi yokomelamo misonkho, moi oomuwandela ira: “Za ukale o-arelanga.” 28 Liye oo-iya vyongo vyetene moi oowambeela mu-arela. 29 Vanduli viwa Leviyo oomupangela Yesu phwando lilukulu waniwa. Wewo ooza athu anjinji okomi-a misonkho koma teto ochimwa moi kadja* limo-i na Yesu koma teto ofunjedae. 30 Afarisi na alembi kangaonile vyevi, koowambeela ng’ung’uza nowafuka ofunjedae ira: “Chifukwa n’ni nyo munadja nong’wa limo-i na okomi-a misonkho koma teto athu ochimwa?” 31 Yesu oowasomeda ira: “Athu apama katinafuneya dokotala, koma obulela mbanayo kanamufuna. 32 Miyo kandazide za itana athu olungama, koma ndazide za itana athu ochimwa ira kalape.”

33 Aluwa koomuwandela ira: “Ofunjeda a Yohani kanosala dja wiliwili koma teto kanopempela mochondelela. Ofunjeda a Afarisi kanopanga teto chimozimozi, koma ofunjedinyu kanakeda dja nong’wa.” 34 Yesu oowasomeda ira: “Kodi nyo munokoza awandela afwae a malimba tela ira kasale dja malimba teloyo angali limo-i na aluwa? 35 Koma inoza ifiye thawi vevo malimba teloyo unaze liye achosiwe vaari viwa. Vathawi ineyo, aluwa kanoza kasale dja.”

36 Koma teto ooawandela fanizo loi: “Kavali muthu unoyo unacheka igamba va malaya aunde asha noisowela va malaya aunde awale. Muthu apanga eno, igamba isheyo inokoka nong’amba malaya awalayo, chifukwa yoi igamba isheyo kinagwilizana na malaya awalayo. 37 Koma teto kavali muthu unoyo una-ela vinyu musha m’matumba aikopa awale. Muthu apanga eno, vinyu mushoyo unophuli-a matumba aikopayo moi unotatiya. Koma teto matumba aikopayo kanoonongeya. 38 Koma vinyu musha unafuneya eliwa m’matumba aikopa asha. 39 Muthu ang’wa vinyu wawale kanafuna teto vinyu musha, chifukwa unaonga ira, ‘Vinyu wawalela ulipama vinjinji.’”