Olembiwa na Luka
16 Vanduli viwa Yesu ooawandela ofunjedae ira: “Muthu m’mo-iwa olemela ookaana mtumiki oing’anela nyumbae, unoyo athu amo-iwa kamunamedeleathu ira unomuonongela chumae. 2 Eno oomuitana nomuwandela ira, ‘Ndivwa vyotakala vyevyo unapangawe. Dowa walembe lipoti la mwemo ukalilewe u-indelanga chito yoing’anela nyumbela undiva-e, chifukwa kunapitiliza ing’anela chito da vandevanga vano.’ 3 Ndiye mtumikiyo aongile m’murimani mwae ira, ‘Ndipange avi veva? Abwananga kanafuna kandichose chito. Kandinawande lima chifukwa kandin’na kopolo, teto ndinaanyaswa ira ndikale ovepavepa. 4 Eyaa! Ndiiziwa vyoi ndipange ira kandichosa chito, athu kadowe kandiwachele pama m’manyumba mwiwa.’ 5 Ndiye oowaitana athu etene anayo kan’na ngongole wa abwanae m’mo-i na m’mo-i, moi oomufuka muthu owambeela ira, ‘Un’na ngongole yoinjiva moi avi wa abwananga?’ 6 Liye asomedile ira, ‘Misuwo* 100 da makura a maolivi.’ Liye oomuwandela ira, ‘Landa kalata ya mgwilizano ya ngongolawo moi ulembe mombaraanya ira un’na ngongole ya misuwo 50.’ 7 Vanduli viwa oomufuka muthu m’mo-iwa ira, ‘Nanga weyo, ngongolawo chi yoinjiva moi avi?’ Liye asomedile ira, ‘Madengo 100 a tirigu.’* Liye oomuwandela ira, ‘Landa kalata ya mgwilizano ya ngongolawo moi ulembevo ira un’na ngongole ya madengo 80.’ 8 Abwanae koomuyamikela mtumiki unola, ngakale ira ali o-olungama, chifukwa oopanga vyongo mwazelu.* Voi a-ima amuthawiila* kanopanga vyongo mwazelu na athu a tundwiwa kwaranya a-ima owala.
9 Nanyen’ne teto ndinaauwandelani ira: Fwanyani afwinyu vo-indi-eda chito chuma yo-olungama, ira chumeyo yamala, kadowe kauwacheleni m’malo okala mpakana walewale. 10 Muthu unoyo uli ororomeleya va yongo ing’onong’ono unokala teto ororomeleya va yongo ilukulu, moi muthu unoyo uli oororomeleya va yongo ing’onong’ono unokala teto oororomeleya va yongo ilukulu. 11 Eno akala kamutonyi-edile ira muli ororomeleya va chuma yoolungama, mbaani unoyo unauva-eni chito yoing’anela chuma imo-iwa? 12 Koma teto akala kamutonyi-edile ira muli ororomeleya va vyongo vya athu amo-iwa, mbaani unoyo unauva-eni mphoto ineyo ausungeleni liye? 13 Mtumiki kanakale kapolo wa ambwiye ambin’li, chifukwa unokoza idana na m’mo-i nomuomeliwana m’mo-iwoyo, kapena unokoza kala ororomeleya wa m’mo-i nomunyoza m’mo-iwoyo. Kamunakale akapolo a Mulungu na Chuma thawi imo-ive.”
14 Sopano Afarisi anayo kaomeliwana vinjinji ndalama, koovuruwana vyetene vyevi moi koowambeela munyoza. 15 Eno liye ooawandela ira: “Nyo munoonga vamaso va athu ira muli olungama, koma Mulungu unoiziwa mirima dinyu. Chifukwa yongo ineyo athu kanaionaathu ira chi yofuneya vinjinji chi yotakala vamaso va Mulungu.
16 Athu koolaleela vya Ilamulo na vyevyo anamaongela kalembileathu mpakana za fiya muthawi ya Yohani. Ambeela thawi ineyo, uthenga wapama unoyo unalengeziwa ngokuza Umwene wa Mulungu, moi athu o-iyana-iyana kanoesaesa mwatindi ira kadowe kavolowemo. 17 Onga vyoona, kai vyorucha ira udimu na ilambo yavati vichosiwe iyana noi ilembo ing’onong’ono vinjinji mu Ilamulo ilepele kwakwaneli-ediwa.
18 Muthu uliwetene unoyo umu-iile iyanae notela iyana m’mo-iwa, upanga igololo moi uliwetene unoyo unamutele iyanoyo naliyene teto upanga igololo.
19 Vookala muthu m’mo-iwa olemela unoyo aomeliwa wara vyowara vyofiila koma teto vyodura vinjinji. Liye oosangalala koma teto djelela dambo na dambo. 20 Koma teto vookala muthu m’mo-iwa osauwa, unoyo an’na mabala thuthu letene zina lae Lazalo, moi athu koomugarati-a vamulango ulukulu wa muthu wachumoyo. 21 Liye oolakalaka ira adjenga vinyenyeswa vinamora vatebulo va muthu wachumoyo. Anambwa teto kooza nonyangudanga mabalae. 22 Vangavirile thawi, muthu osauwole ookhwa moi angelo koomulanda dowa mu-ela vakwikwi na Aburahamu.*
Naliyene teto muthu wachumole ookhwa moi oo-eliwa m’manda. 23 Angali m’Mandamo* koma teto azuzumanga, ooing’ana udimu nomuona Aburahamu angali vandendai moi Lazalo ali vakwikwi na liye.* 24 Eno liye oowonga mokuwa ira, ‘Babani Aburahamu, ndipangeleni chifundo. Murumeni Lazalo ira abwini-e nyalae m’ma-inje ira adidili-e lumi langa, chifukwa ndinaavuteya vinjinji na mulola.’ 25 Koma Aburahamu oomusomeda ira, ‘Mwananga, kudiwale ira vathawi ineyo wan’nawe moyo, oowachela vyongo vyawo vyetene vyapama, moi Lazalo oowachela vyongo vyotakala. Ndiye vano liye unaasangalala uno, koma weyo unaazuzuma. 26 Koma teto vaari va iyo na nyo vi-eliwa zenje lodii-a vinjinji, moi athu anayo kanafuna za wewo kumela uno katinawande. Koma teto athu katinalambuwe kumela wewo za uno.’ 27 Ndiye muthu wachumoyo aongile ira, ‘Voi vili eno, ndinauvepani babani ira mumurume Lazalo ira adowe wa babanga. 28 Chifukwa ndikaana achimwenanga 5 wewo, ndiye adowe aachenjeze, ira naaluwene teto katize umalo ozuzumela uno.’ 29 Koma Aburahamu amusomedile ira, ‘Aluwa kookaana mabuku anayo kalembiwe na Mose koma teto anamaongela, ndiye kavwele vyevyo vili m’mabuku anayo.’ 30 Vanduli viwa liye aongile ira, ‘Naari babani Aburahamu, koma akala muthu m’mo-iwa okumela wa okhwa unadowe wewo, ndithu aluwa kanoza kalape.’ 31 Koma liye amuwandelile ira, ‘Akala katinavwela vyevyo Mose na anamaongela kalembileathu, ngakale muthu m’mo-iwa angavenyile wa okhwa aluwa katinamuvweleve.’”