Olembiwa na Mateyu

12 Vathawi imo-iwa, Yesu limo-i na ofunjedae kaviranga m’munda wa tirigu va dambo la Sabata. Ofunjedae kookaana ndala moi koowambeela vurula tirigu nodjanga. 2 Afarisi kangaonile vyevi koomuwandela ira: “Kaona! Ofunjedawo kanapanga vyongo vyevyo kai vyofwanelela vipanga va dambo la Sabata.” 3 Koma liye oowasomeda ira: “Kodi kamuwelengile vyevyo Davide limo-i na alombwana anayo kali limo-i na liye kapangileathu, kangan’na ndala? 4 Liye oovolowa munyumba ya Mulungu moi oodja mikate dopelekiwa sembe wa Mulungu.* Aluwa katafuneya dja mikate dedi chifukwa malinga na malamulo, asembe oka mbanayo kafuneya dja. 5 Kapena kodi kamuwelengile Muilamulo ira asembe a mukachisi koo-inda chito dambo la Sabata koma aluwa kalave o-olakwa? 6 Koma miyo ndinauwandelani ira muthu m’mo-iwa mulukulu okwaranya kachisi uli vano. 7 Komave, aakale ira moovwechecha tapulela wa mawu oyi, ‘Ndinafuna chifundo o-okala sembe,’ kamwaweluza athu o-olakwa. 8 Chifukwa Mwana wa muthu ngu Mbwiye wa Sabata.”

9 Angamaruwile vevo, oodowa volowa musunagoge mwiwa. 10 Mwemo mookala muthu orangala ndanda. Eno vofuna mufwanyela chifukwa Yesu ira kamuimbe mulandu koomufuka ira, “Kodi pivyololeya muchili-a muthu obulela vadambo la Sabata?” 11 Koma liye oowasomeda ira: “Akala mun’na khosa imo-i yoka, ndiye khoseyo imorela muzenje va dambo la Sabata, kodi kalivo unoyo unaichosemo? 12 Koma muthu ngofuneya vinjinji kwaranya khosa! Eno pivyololeya panga yongo yapama va dambo la Sabata.” 13 Vanduli viwa liye oomuwandela muthuyo ira: “Tapula ndanda lawo.” Liye ootapula ndandalo moi lookala pama mofwanafwana na ndanda limo-iliwalo. 14 Koma Afarisayo kookuma unde dowa saela ndila yoi kamuphele. 15 Yesu angaiziwile vyevi, oovenyawo wewo. Athu anjinji koomu-arela moi oowachili-a etene, 16 koma liye oowalamula mwakopolo ira katimuulule. 17 Oopanga vyevi ira vyevyo Mulungu aongile liye zela mwa namaongela Yesaya vikwakwaneli-ediwe. Liye aongile ira:

18 “Konani! Ula ngu mtumikanga unoyo ndimusakulile miyo, unoyo ndinamuomeliwana miyo, unoyo unandisangalasa vinjinji. Ndinoza ndi-ele zimwanga va liye moi athu a mitundu dimo-i unoza aatonyi-ede pamapama chilungamo yeniyeni. 19 Liye kanaza akangana na muthu kapena kuwa moi kalivo unoyo unaze avwe mawae m’misewu dilukuludilukulu. 20 Bango lophwanyeya kanaza alikotola teto go-i wa nyale unoyo unakumi-a uchi kanaza autimi-a, mpakana angakwakwani-ile zana chilungamo. 21 Ndithu, mitundu da athu dinoza diembekezele vyongo vyapama zela muzina lae.”

22 Vanduli viwa koomuzelana muthu o-indiwa na iwanda, unoyo teto an’na vuto lo-oona koma teto unoyo an’na vuto lo-oonga moi liye oomuchili-a, teto muthuyo oowambeela onga koma teto ona. 23 Vingairile eno, gulu la athulo loodabwa vinjinji moi koowambeela onga ira: “Kodi unola kai Mwana wa Davide?” 24 Afarisi kangavwile vyevi koowonga ira: “Unola kanakumi-a viwanda na kopolo dae koma na kopolo da Belezebule,* olamulela viwanda.” 25 Liye angaiziwile maganizwiwa, ooawandela ira: “Umwene uliwetene ogawaneya unomala, moi mzinda kapena nyumba iliyetene yogawaneya kinalimba. 26 Mofwanafwana na vyevi, akala Satana unamukumi-a Satana, ndiye kuti ugawaneya. Nanga umwenae unakalevo avi? 27 Koma teto akala miyo ndinakumi-a viwanda na kopolo da Belezebule, nanga o-arelinyu kanavikumi-a na kopolo da mbaani? Chichifukwa iwa o-arelinyu kanoza kauweluzeni ira muli olakwa. 28 Koma akala miyo ndinakumi-a viwanda na kopolo da zimu wa Mulungu, ndiye kuti Umwene wa Mulungu uufiyelani morurumucha. 29 Kodi muthu unokoza volowa m’mba mwa muthu wakopolo nomuwaka katundwae, koma aanamumange muthu wakopoloyo? Yowambeela unafuneya mumanga era eno pavevo unawande liye tukula katundu m’mbamo. 30 Muthu uliwetene unoyo kali umbalanga unoruni-ana na miyo koma teto unoyo kana-indana chito yosonkani-a athu limo-i na miyo unowabalalecha.

31 Va chifukwa inela ndinauwandelani ira, athu kanoza kakululukeliwe chimo la tundu uliwetene na mawu etene onyoza, koma onyoza zimu kanaza akululukeliwa. 32 Mwaisazo, uliwetene oonga mawu onyoza mwana wa muthu, unoza akululukeliwe. Koma uliwetene oonga mawu onyoza zimu owela, kanaza akululukeliwa, muthawiila* kapena muthawi inazeyo.

33 Akala nyo muli tengo wapama, vipaso vinyu vinoza vikale vyapama, koma akala muli tengo otakala, vipaso vinyu vinaza vikala vyotakala, chifukwa tengo unoiziweya na vipaso viwa. 34 A-ima a nyowanyo, munaonge avi vyongo vyapama koma mungali otakala? Chifukwa vamulomo vanoonga vyongo vyevyo vizaalile m’murimani. 35 Muthu wapama unoonga vyongo vyapama chifukwa m’murimani mwae muzaalile vyongo vyapama, muthu otakala unoonga vyongo vyotakala chifukwa m’murimani mwae muzaalile vyongo vyotakala. 36 Ndinauwandelani ira va Dambo la Iweluzo, athu kanoza kasomede mulandu va mawu etene otakala anayo kanaongaathu. 37 Chifukwa akala mawawo kali apama unoza uweluziwe ira uli olungama koma akala mawawo kali otakala unoza uweluziwe ira uli otakala.”

38 Ndiye alembi na Afarisi amo-iwa koomuvepa ira: “Mphunzisi, ninafuna munioni-e izindikilo.” 39 Yesu oowasomeda ira: “M’bado otakala koma teto waigololo* unofunechecha izindikilo, koma kunaza uva-iwa izindikilo iliyetene koma izindikilo ya Yona yoka. 40 Chifukwa mofwanafwana na Yona unoyo akalile m’mbani mwa somba malambo maralu, tana na ma-iyu, naliyene teto Mwana wa muthu unoza akale m’manda malambo maralu, tana na ma-iyu. 41 Athu awu Ninevi kanoza kavenye va Dambo la Iweluzo limo-i na m’bado ula moi kanoza kauruni-e, chifukwa yoi aluwa koolapa kangavwile ulaliki wa Yona. Koma sopano muthu m’mo-iwa mulukulu omukwaranya Yona uli vano. 42 Mfumukazi wa um’mwela unoza avenyi-iwe wa okhwa va Dambo la Iweluzo na m’bado ula moi unoza auruni-e, chifukwa mfumukazi unola ooza kumela umagomi-edo a ilambo yavati ira aze avwe zelu da Solomo. Koma sopano muthu m’mo-iwa mulukulu omukwaranya Solomo uli vano.

43 Zimu otakala wakuma mwa muthu, unosaelasaela malo okala ndiye akala ira kufwanyile malo, 44 unaongecha ira, ‘Ndinowelela mu nyumba ineyo ndakumilemo miyo.’ Wafiya unafwanya ira kamunakala muthu uliwetene koma muvyeliwa pama koma teto musamaleliwa pama. 45 Wera eno unodowa tukula mizimu dimo-idiwa 7 dotakala vinjinji moi davolowa mwa muthu dinakala mwemo. Vyo-arelavo viwa pivyoi, vyoira vya muthuyo vinakala vyotakala vinjinji kwaranya vowambeela. Mu pumwemo teto vinazeathu vikalele na m’bado otakalola.”

46 Vevo aonga liye na gulu la athulo, am’mae na achimwenae kooza. Aluwa kooimela vande chifukwa kafuna kaongi-ane na liye. 47 Eno muthu m’mo-iwa oomuwandela ira: “Am’minyu na achimweninyu kali vandeva, kanafuna kaongi-ane na nyo.” 48 Yesu oomusomeda muthuyo ira: “Kodi m’manga mbaani, nanga achimwenanga mbaani?” 49 Vanduli viwa liye ootapula ndanda lae nowatonya ofunjedae, noonga ira: “Am’manga na achimwenanga mbala! 50 Chifukwa uliwetene unoyo unapanga vyevyo Babanga waudimu unafuna liye, unoyo ngu nchimwenanga, murongolanga koma teto m’manga.”