Olembiwa na Yohani
19 Vanduli viwa Pilato oomulanda Yesu nomuwashula. 2 Moi asilikali kooluwa chipewa ya umwene ya minga nomuwari-a umuru. Koomuwari-a teto malaya aunde ofiila. 3 Ndiye aluwa koodowa vakwikwi na liye noonganga ira: “Mucheliwe avi, nyo Mwene wa Ayuda!” Koma teto koomuvaza makofi umaso. 4 Pilato ookuma nawili vande noawandela athwayo ira: “Kaonani! ndinomukumi-a vande vano wa nyo, ira muiziwe ira kandimufwanyilena mulandu uliwetene.” 5 Eno Yesu ookuma vande angawarile chipewa ya umwene ya minga na malaya aunde ofiila. Ndiye Pilato ooawandela athwayo ira: “Kaonani! Muthule ngula!” 6 Koma asembe alukulu na alonda kangamuonile, kookuwa ira: “Apachikiwe unoyo! Apachikiwe unoyo!”* Pilato ooawandela athwayo ira: “Mulandeni mudowe mwamupachike ekinyu,* chifukwa miyo kandimufwanyilena mulandu uliwetene.” 7 Ayudayo koomusomeda ira: “Malinga na ilamulo ineyo nin’na iyo, muthula unafuneya phiwa chifukwa unavionga ira ngu mwana wa Mulungu.”
8 Pilato angavwile vyevyo kaongileathu, oowova vinjinji, 9 ndiye oovolowa nawili munyumba yoweluzela milandu moi oomufuka Yesu ira: “Kodi ukumele waani?” Koma Yesu kaamusomedile iliyetene. 10 Ndiye Pilato oomuwandela ira: “Kodi kunafuna ndisomeda? Kodi kunaiziwa ira miyo ndikaana kopolo doumasula koma teto kopolo doupachika?”* 11 Yesu oomusomeda ira: “Kamwakaana kopolo iliyetene va miyo aakale ira kamuva-iwe kopolodo kumela udimu. Mbaona muthu unoyo undipelekile wa nyo ukaana chimo lilukulu vinjinji.”
12 Chifukwa ya vyevi Pilato ooesaesa saela ndila ira amumasule Yesu. Koma Ayudayo kookuwa ira: “Mwamumasula muthu unola, ndiye kuti nyo kamuli fwae wa Kaisara. Chifukwa muthu unoyo unaviona ngati mwene ngoruni-ana na Kaisara.” 13 Ndiye Pilato angavwile mawu anala, oomukumi-a Yesu vande, moi liye oogarati vapandwae oweluzela milandu, vamalo anayo karomoliwa ira Bwalo Losakaediwa na Mabwe, koma mu Iheberi karomoliwa ira Gabʹba·tha. 14 Leli lali Dambo Lokozeela Pasika moi thawi yali m’ma 12 koloko tana.* Ndiye ooawandela Ayudayo ira: “Kaonani! Mweninyu ngunola!” 15 Koma aluwa kookuwa ira: “Aphiwe! Aphiwe! Apachikiwe unoyo!”* Pilato oowafuka ira: “Kodi ndimupachike mweninyu?” Asembe alukulu koosomeda ira: “Kanin’na mwene m’mo-iwa iyo koma mweni-u ngu Kaisara ba-i.” 16 Vanduli viwa Pilato oomupeleka Yesu wa aluwa ira kadowe kamuphe vomupachika vatengo.
Veva Yesu ali m’mandani mwiwa. 17 Liye ootukula ekave tengwae ozuzumelavo* nokuma dowa umalo anayo karomoliwa ira Chibade,* koma mu Iheberi karomoliwa ira Gologota. 18 Wewo aluwa koomupachika vatengo limo-i na alombwana amo-iwa ambin’li, m’mo-i ali mbali ya umuwono odjana, teto m’mo-iwa ali umazele, moi Yesu ali vaari. 19 Pilato oolemba teto zina la udindo noli-ela vatengo ozuzumelavoyo.* Alembile ira: “Yesu Mnazareti, Mwene wa Ayuda.” 20 Ayuda anjinji koowelenga zina la udindo leli, chifukwa malo anayo Yesu apachikiwevo liye kali vakwikwi na mzinda, moi zinalo lalembiwe mu Iheberi, mu Ilatini na mu Igiriki. 21 Koma asembe alukulu a Ayudayo koomuwandela Pilato ira: “Kamulembe ira ‘Mwene wa Ayuda’ koma mulembe ira liye aonga ira, ‘Miyo ndili Mwene wa Ayuda.’” 22 Koma Pilato oowasomeda ira: “Vyevyo ndilembile miyo, kavinachenjiwa.”
23 Asilikalayo kangamukomele Yesu vatengo, koolanda malayae aunde nowagawa vipisi 4, ira silikali uliwetene alande ipisi imo-i. Koolanda teto malayae a muwari. Koma malaya a muwarayo katan’na vogumani-a, moi kasowiwe kumela vadimu mpakana vati. 24 Eno aluwa kookambilana ira: “Malayala kaniang’ambe, koma tiyemoni nipange maele ira niiziwe unoyo unalande malayala.” Vyevi vyookwakwaneli-eda lemba, lelo linaonga ira: “Aluwa koogaana vyowara vyanga, moi koopanga maele va vyowara vyanga.” Eno asilikalayo koopanga vyevyo kakambilanileathu.
25 Koma vakwikwi na tengo ozuzumelavo* wa Yesu, vooimela m’mae na dimbilae wa m’maeyo, na Mariya iyanae wa Kulopa, koma teto Mariya wawu Magadala. 26 Eno Yesu angamuonile m’mae na ofunjeda unoyo amuomeliwana liye kangaimelile vakwikwi, oomuwandela m’maeyo ira: “M’mani, ambeela peeno, ula unakala mwaninyu.” 27 Vanduli viwa oomuwandela ofunjedoyo ira: “Ambeela peeno ala kanakala am’mawo.” Thawi ineyo ofunjedoyo oomulanda m’maeyo nomudowana waniwa.
28 Vanduli viwa, Yesu angaiziwile ira vyetene viireya, ira malemba kakwakwaneli-ediwe aongile ira: “Ndikaana thona.” 29 Vamalovo vookala suwo ozaala na vinyu owaawa. Eno aluwa koolanda siponje noibwini-a muvinyuyo moi kooi-ela wu tengo wa hisope* nomuva-a. 30 Yesu angawachelile vinyu owaawoyo, aongile ira: “Ndikwakwaneli-eda ifunelo inyu!” moi ooworami-a murwae nokhwa.*
31 Voi lali Dambo Lokozeela Sabata, Ayudayo katafunile ira mitembo dikaleve vamitengo dozuzumelavodo dambo la Sabata, (chifukwa Sabata la dambo leli lali lilukulu), moi aluwa koomuvepa Pilato ira aalole ira kadowe kakotole mendo da athu anayo kapachikiwayo notiti-a mitembo diwa. 32 Eno asilikali kooza nokotola mendo da athu ambin’li anayo kapachikiwe limo-i na Yesu. 33 Koma kangafiile vevo vali Yesu, kafwanyile ira ukhwa wale eno katakotolile mendo dae. 34 Koma m’mo-i wa asilikalayo oomulata na mwalango muthiri moi thawi ineyo vookuma magazi na ma-inje. 35 Muthu unoyo aonile vyevi ngunoyo upelekile umboni unola moi umbonae ngolondola. Liye unoiziwa ira unoonga vyoona, ira nanyen’ne teto muroromele. 36 Onga vyoona, vyevi vyooireya ira vikwakwaneli-ede lemba lelo linaonga ira: “Katinaza* kakotola likuva lae ngakale limo-i.” 37 Koma teto lemba limo-iliwa linaonga ira: “Aluwa kanoza kaing’ane wa muthu unoyo kamulatileathu.”
38 Vanduli va vyevi, Yosefe wawu Arimateya, oodowa wa Pilato dowa vepa mtembo wa Yesu. Liye ali ofunjeda wa Yesu waisisi chifukwa yoi aova Ayuda. Pilato oopeleka ilolezo moi liye oodowa landa mtembo wa Yesu. 39 Nikodemo unoyo azide wa Yesu ma-iyu vowambeela, naliyene teto ooza angalandile mule otangani-a na aloye, okwaranya makilogalamu 32.* 40 Eno aluwa koolanda mtembo wa Yesu noupota na nguwo da malilo donukela, mogwilizana na mwambo unoyo Ayuda ka-arelaathu vo-ela malilo. 41 Wewo kamupachikileathu ookala munda unoyo mwali manda* asha, moi kali kaana-elemo muthu kumela vowambeela. 42 Ndiye voi lali Dambo Lokozeela Ikondwelelo ya Ayuda, koma teto mandayo kali vakwikwi, aluwa koo-ela mtembo wa Yesu mwemo.