Vyoira Vya Anamarumiwa
26 Agiripa oomuwandela Paulo ira: “Unokoza onga mbalawo.” Ndiye Paulo ooimecha muono moi oowambeela onga voviteteza ira:
2 “Nyo mwene Agiripa, miyo ndili osangalala ira peeno ndinoviteteza vamaso vinyu, va vyongo vyetene vyevyo Ayuda kanandinamedelaathu. 3 Simbwasimbwa chifukwa yoi nyo munoiziwa pama miyambo da Ayuda koma teto vakhani dedo kanakanganaathu. Eno ndinauvepani ira mundivuruwane moleza murima.
4 Onga vyoona, Ayuda kanondiiziwa pama kumela vevo ndali miyo zombwe, koma teto vaari va athu a tundwanga na wu Yelusalemu, ndinoiziweya pama. 5 Aluwa kanondiiziwa ambeela wale vinjinji ira ndali Mfarisi wa mugulu lelo lalambela mokhwimi-a vyongo vinjinji. Moi kafuna, kanokoza ndipangela umboni va vyongo vyevi. 6 Koma sopano ndinaimbiwa mulandu chifukwa ya idedi-edo ya vyevyo Mulungu alonjezile liye makolwi-u. 7 Mafukwi-u 12 kanodedi-edela ona kwakwaneli-ediwa wa lonjezo leli moi kanomupangela Mulunguyo utumiki opatuleya mwatindi tana na ma-iyu. Eno Ayuda kanandiimba mulandu chifukwa ya idedi-edo inela.
8 Chifukwa n’ni nyo munaganiza ira kai vyowandeya ira Mulungu avenyi-e okhwa? 9 Miyo ndaganiza ira ndinafuneya panga vilivyetene vyevyo ndinawande miyo voruni-ana na zina la Yesu wawu Nazareti. 10 Moi vyevi pivyevyo ndapangile miyo wu Yelusalemu. Ndoo-eela mundende ofunjeda anjinji ndingava-iwe kopolo na asembe alukulu. Moi kaweluziwa ira kaphiwe, miyo ndoosomedela. 11 Thawi dinjinji ndoowava-a ilango m’masunagoge etene, vofuna akanyi-eda ira ka-iye vyevyo karoromelaathu. Voi ndootakaleliwa vinjinji na aluwa, ndoofiya vowazuzumi-a ngakale wu mizinda da undendai.
12 Dambo limo-i, ndoomaruwa ulendo odowa wu Damasiko ndingava-iwe kopolo koma teto ilolezo na asembe alukulu. 13 Koma ndingali musewu, thawi ingali 12 koloko tana, ndoowona wala okumela udimu kwaranya wala wa zuwa ungandirungunuwile limo-i na athu anayo ndan’na miyo vaulendoyo. 14 Ndiye etene noogwa vati, moi vanduli viwa ndoovwa mawu kaonganga na miyo mu Iheberi ira, ‘Saulo! Saulo! Chifukwa n’ni unandizuzumi-a? Unakeda vivuti-a vopanga vyongo ngati ng’ombe ineyo inavocha mendo dae novazanga vimwiri vyoshongowa.’* 15 Koma miyo ndoosomeda ira: ‘Mbwiyeni, kodi muli mbaani?’ Moi Mbwiye oondisomeda ira: ‘Ndili Yesu unoyo unamuzuzumi-a we. 16 Komave venya uimele. Ndioneela wa weyo na yolinga yoi ndiusakule ira ukale mtumikanga koma teto mboni ya vyongo vyetene vyokuza miyo, vyevyo uwonilewe koma teto vyevyo ndinaze miyo ndiuwoni-e. 17 Moi ndinoza ndiuvulumuche wa athu anala koma teto wa athu a mitundu dimo-i wewo ndinafuna miyo utumiza 18 ira udowe wa-ule maswiwa, nowachosa mudima adowi-a mowala. Koma teto achosa m’mandani mwa Satana nowadowi-a wa Mulungu. Udowe wapange vyevi ira machimwawo kakululukiwe ira uwachele cholowa limo-i na athu anayo kaweli-iwe chifukwa yondiroromela.’
19 Eno, nyo Mwene Agiripa, ndoowona ira ndivwele vyevyo ndaonile miyo m’masomphenya okumela udimwayo. 20 Miyo ndoolaleela uthenga wapama wa athu awu Damasiko, vanduli viwa wu Yelusalemu koma teto muilambo yetene ya Yudeya na wa athu a mitundu dimo-i, ira kalape nowambeela mulambela Mulungu vopanga vyongo vyotonyi-eda ira koolapa. 21 Mbaona Ayuda kandi-indile mukachisi ira kandiphe. 22 Komave, voi ndoowona Mulungu andikami-anga, ndinopitilizave pangela umboni wa athu ochuka koma teto wa athu onyozeya mpakana peeno. Kandinaonga iliyetene, koma ndinaonga vyevyo anamaongela limo-i na Mose kaongileathu ira vinoza viireye. 23 Ira Kristu unoza avuteye, moi monga owambeela venyi-iwa, unoza alaleele wa athu anala koma teto wa athu a mitundu dimo-i vyokuza wala.”
24 Vevo Paulo aonga liye vyevi vovitetezela, Fesito oowonga mogweli-a mawu ira: “We Paulo, ukaana misala eti! Funjeda vinjinji uupangi-a ira upenge!” 25 Koma Paulo aongile ira: “Olemekezeya a Fesito, miyo kandin’na misala, koma ndinaonga mawu a choonadi moi ndili wapamene. 26 Onga vyoona, ndinoonga momasuwa chifukwa yoi nyo mwene muiziwa pama vyevi moi kandinakaikela ira kavali ngakale yongo imo-i mwa vyevi ineyo nyo kamunaiiziwa, chifukwa vyevi kavyaireile mobisa. 27 Kodi nyo Mwene Agiripa, munororomela vyevyo anamaongela kalembileathu? Ndinoiziwa ira munoviroromela.” 28 Koma Agiripa oomuwandela Paulo ira: “Wathawi yoyeva unokoza ndichenja ira ndikale Mkristu.” 29 Ndiye Paulo aongile ira: “Pempelo langa wa Mulungu ti loi, kaya wathawi yoyeva kapena wathawi indendai, etene anayo kanandivuruwana peeno, o-okala nyo ekinyu, kakale ngati miyo iyavo maunyolo oka anala.”
30 Vanduli viwa mwene ooimela. Bwanamkubwa, na Berenike koma teto athu anayo kali limo-i na aluwa naaluwene teto kooimela. 31 Koma vevo kadowaathu koowambeela kambilana ira: “Muthula kapangile yongo iliyetene yomupangi-a ira aphiwe kapena mangiwa.” 32 Moi Agiripa oomuwandela Fesito ira: “Aakale ira kavepile ira khanae idowe yaweluziwe na Kaisara, muthula oomasuliwa.”