Vyoira Vya Anamarumiwa
22 “Nyo abalanga na ababanga, kavuruwanani mawanga oviteteza.” 2 Kangavwide ira unaonga na aluwa mu Iheberi, etene koomiyala, moi liye aongile ira: 3 “Miyo ndili Muyuda, obaliwela wu Tariso wawu Kilikiya, koma ndoofunji-iwa na Gamaliyeli mu mzinda unola. Liye oondifunji-a ira ndi-arelenga vinjinji Ilamulo ya makolwi-u moi ndali ovipeleka votumikela Mulungu ngati mwemo etene nyen’ne munapangela nyo peeno. 4 Ndoozuzumi-a o-arela Ndila ya Mbwiye mpakana ndoowapha. Ndoomanga alombwana na a-iyana nowa-eela mundende. 5 Moi ndimuwa wa asembe limo-i na bungwe letene la andimuwa kanokoza ndipangela umboni. Aluwa mbanayo kandiva-ile makalata ondiloli-a ira ndidowe ndamange abali awu Damasiko. Ndoomaruwa ira ndidowe nda-inde athu anayo kali wewo, nowazana wu Yelusalemu kangamangiwe ira kaze kava-iwe ilango.
6 Koma ndingali musewu, thawi ingali m’ma 12 koloko tana, ndinga-alile vang’ono fiya wu Damasiko, morurumucha ndoowona wala okumela udimu ungandirungunuwile. 7 Ndoogwa vati moi ndoovwa mawu oyi: ‘Saulo! Saulo! Chifukwa n’ni unandizuzumi-a?’ 8 Miyo ndoosomeda ira, ‘Mbwiyeni, kodi muli mbaani?’ Liye oondiwandela ira, ‘Ndili Yesu wawu Nazareti, unoyo unamuzuzumi-awe.’ 9 Athu anayo kali limo-i na miyo vaulendoyo, koowona walawo, koma katavwechechile mawu a muthu unoyo aonga na miyo. 10 Ndiye miyo ndoofuka ira, ‘Kodi ndipange n’ni Mbwiyeni?’ Mbwiye oondisomeda ira, ‘Maruwa udowe wu Damasiko. Wewo unodowa wawandeliwe vyetene vyevyo unafuneyawe panga.’ 11 Koma voi kandakwakwani-a ona yongo iliyetene chifukwa yowala wewo ndaonile miyo, athu anayo kali limo-i na miyo, koondi-inda muono mpakana dowa fiya wu Damasiko.
12 Ndiye Hananiya, muthu oova Mulungu mogwilizana na Ilamulo, unoyo an’na mbili yapama vaari va Ayuda etene a wewo ooza. 13 Liye ooimela vakwikwi moi oondiwandela ira: ‘Balanga Saulo, ambeela ona!’ Thawi ineyo ndoo-ula maswanga moi ndoowambeela ona. 14 Ndiye liye aongile ira: ‘Mulungu wa makolwi-u awale uusakula ira uiziwe ifunelo yae, umuone olungamoyo koma teto uvwe mawu avamulomo vae. 15 Chifukwa unoza ukale mbonae vamaso va athu etene ira uonge vyongo vyevyo uonilewe koma teto vyevyo uvwidewe. 16 Nanga unadimbeluwela n’ni? Maruwa ubatiziwe moi uchose machimwawo voitana va zina lae.’
17 Koma ndingawelele wu Yelusalemu nowambeela pempela mukachisi, ndoowona masomphenya. 18 M’masomphenyamo ndoomuona Mbwiye andiwandelanga ira, ‘Kumamo mu Yelusalemu mombaraanya, chifukwa aluwa katinaza kavuruwana uthengawo oonga vya miyo.’ 19 Moi miyo ndaongile ira, ‘Mbwiyeni, aluwa kanoiziwa pama ira ndoodowa m’masunagoge moi ndoowa-eela mundende koma teto awashula athu anayo kauroromelani. 20 Koma teto vevo mboninyu Sitefano aphiwa liye, miyo ndali vevo moi ndoosomedela. Teto ngu miyo unoyo aing’anela malaya aunde a athu anayo kamuphayo.’ 21 Koma oondiwandela ira, ‘Maruwa, chifukwa ndinoza ndiutumize undendai wa athu a mitundu dimo-i.’”
22 Vevo Paulo aonga liye mawu etene anala athwayo koomuvuruwana. Koma vanduli viwa athu etene kookuwa mwakopolo ira: “Muthu unola kanafuneya fwanyeya vailambo yavati! Kanafuneya kaana moyo!” 23 Koma voi aluwa kookuwa mwakopolo koma teto koovocheda mudimu malaiwa aunde nomwadelanga tumbulu mudimu, 24 ndimuwa wa asilikali oolamula ira kamuvolochi-e muwari mwa mpanda wa asilikali. Liye aongile ira kanafuneya kamufuke vyofuka kamuwashulanga na yolinga yoi kaiziwe ineyo ipangi-ile ira athu kafunenga mupha. 25 Koma kangamugonati-ile ira kamuwashule, Paulo oomufuka msogoleli wa asilikali unoyo aimelile vevo ira: “Kodi malamulo kanoulolani ira mumuwashule muthu unoyo uli mzika ya Roma mulandwae waanaweluziwe?” 26 Msogoleli wa asilikaliyo angavwide vyevi, oodowa wa ndimuwa wa asilikaliyo nomuwandela ira: “Munafuna mupange n’ni? Muthula ngu mzika ya Roma.” 27 Ndimuwa wa asilikaliyo ooza moi oomufuka Paulo ira: “Kandiwandele, kodi pivyoona ira uli mzika ya Roma?” Liye oosomeda ira: “Ee.” 28 Ndimuwa wa asilikaliyo aongile ira: “Miyo ndoolivela ndalama dinjinji ira ndigule ufulu okala mzika.” Paulo aongile ira: “Koma miyo ufulwanga okala mzika ya Roma ndeere baluwana.”
29 Thawi ineyo asilikali anayo kafuna mufuka vyofuka, koma teto anayo kafuna muwashula, koovenyavo mu-iya. Naliyene teto ndimuwa wa asilikaliyo oowova vinjinji angaiziwile ira muthu unoyo kamumangileathuyo ngu mzika ya Roma.
30 Va dambo lo-arela, ndimuwa wa asilikaliyo oomukumi-a Paulo vofuna iziwa ineyo yapangi-a ira Ayudayo kamuimbenga mulandu. Ndiye oolamula ira asembe alukulu limo-i na Khoti Lilukulu la Ayuda kasonkane vamo-i. Vanduli viwa oomuzana Paulo moi oomuimecha vaari viwa.