Olembiwa na Yohani
5 Vanduli va vyevi, ookala ikondwelelo ya Ayuda moi Yesu oomaruwa dowa wu Yelusalemu. 2 Wu Yelusalemu va Mulango Ulukulu wa Khosa vikala thanda lelo mu Iheberi linaromoliwa ira Betizata. M’mbali mwa thandalo mukala makonde 5. 3 Mukondemo moogarati athu anjinji obulela, o-oona, orangala koma teto okhwa viwalo. 4* —— 5 Vookala teto lombwana m’mo-iwa unoyo amalile chaka 38 abulelanga. 6 Yesu angamuonile muthu unola angali ogonatene, koma teto angaiziwile ira ukala abulelanga wathawi indendai, oomufuka ira: “Kodi unofuna chila?” 7 Muthu obuleloyo oomusomeda ira: “Mbwiyeni, kavali muthu oyi andibwini-e vathandava ma-inje katekumanga, moi ndera ndavolowevo muthu m’mo-iwa unondisogola dowa volowavo.” 8 Yesu oomuwandela ira: “Venya, tukula machilawo udowenga.” 9 Thawi ineyo muthule oochila moi ootukula machilae liye dowanga.
Dambo leli lali la Sabata. 10 Eno Ayuda koowambeela muwandela muthu unoyo achili-iweyo ira: “Peeno ti dambo la Sabata, kai vyololeya ira utukule machilala.” 11 Koma liye oowasomeda ira: “Muthu unoyo undichili-ile ngunoyo undiwandelile ira, ‘Tukula machilawo udowenga.’” 12 Aluwa koomufuka ira: “Mbaani unoyo uuwandelile ira, ‘Tukula machilawo udowenga’?” 13 Koma muthuyo kaamuiziwile unoyo amuchili-ile, chifukwa Yesu ali angavolowile mugulu la athu anayo kali vamalovo.
14 Vanduli viwa Yesu oogumana na muthule mukachisi moi oomuwandela ira: “Kaona uchila. Kudowe wachimwe nawili ira yongo imo-iwene yotakala kwaranya marenda kiuireele.” 15 Muthuyo oodowa wewo wali Ayuda noawandela ira Yesu ngunoyo amuchili-ile. 16 Ayudayo kangavwide vyevi koowambeela muvuti-a Yesu, chifukwa liye apanga vyongo vyevi va dambo la Sabata. 17 Koma liye ooawandela ira: “Babanga unopitilizave inda chito mpakana vano, namiyene teto ndinopitilizave inda chito.” 18 Vachifukwa inela Ayudayo koowambeela saelasaela ndila ira kamuphe Yesu, chifukwa enjedela vo-iya arela Sabata, aonga teto ira Mulungu ngu Babae, novifwanafwani-edanga na Mulunguyo.
19 Eno Yesu oosomeda ira: “Ndithu ndinaauwandelani, Mwana kanapange yongo iliyetene ineyo ukede liye ganiza vaekave, koma unopanga vyevyo uonile liye Babae apanganga. Chifukwa vyetene vyevyo Baboyo unapanga liye, Mwana unapanga teto vyevyo mofwanafwana na mwemo Baboyo munapangela liye. 20 Baboyo unomuomeliwana vinjinji Mwanae moi unomuoni-a vyongo vyetene vyevyo unapanga liye. Moi unoza amuoni-e chito dilukulu kwaranya dedi ira nyo mudabwe. 21 Mofwanafwana na Baba unoyo unavenyi-a okhwa nowava-a moyo, naliyene teto Mwana unopeleka moyo wa anayo unafuna liye ava-a. 22 Baba kanaweluza muthu uliwetene, koma upeleka udindo unola wa Mwanae, 23 ira athu etene kamulemekeze Mwana ngati mwemo kanamulemekezelaathu Baba. Muthu uliwetene unoyo kanamulemekeza Mwana kanamulemekeza teto Baba unoyo amurumile Mwanoyo. 24 Ndithu ndinaauwandelani, muthu uliwetene unoyo uvwile mawanga nomuroromela Mulungu unoyo andirumile, unoza afwanye moyo oomala moi kanaza aweluziwa koma unoza avulumuwe okhwa dowa wu moyo.
25 Ndithu ndinaauwandelani, thawi inoza ifiye moi chinela, vathawi ineyo okhwa kanazeathu kavwe mawu a Mwana wa Mulungu moi anayo kanaze kavwele kanoza kafwanye moyo. 26 Mofwanafwana na Baba unoyo un’na kopolo dopeleka moyo, umuva-a teto Mwanae kopolo dopeleka moyo. 27 Liye unomuva-a teto kopolo ira aweluzenga, chifukwa liye ngu Mwana wa muthu. 28 Kamudabwe na vyevi, chifukwa thawi inoza ifiye yoi athu etene anayo kali m’manda aikumbuso kanoza kavwe mawae 29 moi kanoza kakume. Anayo kapanga vyongo vyapama kanoza kavenye ira kawachele moyo moi anayo kapanga vyongo vyotakala kanoza kavenye ira kaweluziwe. 30 Miyo kandinapange yongo iliyetene ineyo ndikede miyo ganiza vamekave. Ndinoweluza mogwilizana na vyevyo ndivwile miyo, moi iweluzwanga chiyolungama, chifukwa kandinapanga vyofuna vyanga, koma vyofuna vya unoyo andirumile.
31 Akala ndinavipangela umboni mekave ndiye kuti umbonangoyo ngonama. 32 Vikala muthu m’mo-iwene unoyo unapangela umboni vya miyo moi ndinoiziwa ira umboni unoyo unandipangela liye ngoona. 33 Nyo moowaruma athu dowa wewo Yohani ali liye, moi liye upangela umboni choonadi. 34 Koma miyo kandinasomedela umboni okumela wa muthu, koma ndinaonga vyongo vyevi ira nyo muvulumuwe. 35 Muthu unola ali nyale yokara koma teto yowala, moi wathawi yoyeva nyo mwali ofunechecha sangalala vinjinji chifukwa yowala waewo. 36 Koma miyo ndikaana umboni ulukulu kwaranya wa Yohani, chifukwa chito dedo Babanga andiva-ile liye ira ndidikwakwaneli-ede, chito dedo ndinapanga miyodi, dinopangela umboni ira ndarumiwe na Baba. 37 Koma teto Baba unoyo andirumile oondipangela umboni. Nyo kamunavwevo mawae kapena ona thuthu lae. 38 Mawae katigarateile m’murimani mwinyu, chifukwa kamumuroromele unoyo Baboyo amurumile liye.
39 Nyo munosaela Malemba chifukwa munaganiza ira mwapanga vyevi munoza mufwanye moyo oomala, koma Malembayo mbanayo teto kanapangela umboni vya miyo. 40 Koma nyo kamunafuna za wa miyo ira muze mufwanye moyo. 41 Kandinafuna ulemelelo okumela wa athu, 42 koma ndinoiziwa pama ira m’murimani mwinyu chikondi ya Mulungu kilimo. 43 Miyo ndiza muzina la Babanga koma kamundiwachelile. Koma aakale ira m’mo-iwa uza muzina lae, moomuwachela. 44 Kodi munaroromele avi voi munawachela ulemelelo okumela wa athu, koma kamunaesaesa ira mufwanye ulemelelo okumela wa Mulungu? 45 Kamuganize ira miyo ndinodowa ndauongeleni wa Baba. Koma unauongelani ngu Mose, unoyo munamuroromela nyo. 46 Moi aakale ira moomuroromela Mose, moondiroromela teto miyo, chifukwa liye oolemba vyokuza miyo. 47 Koma akala kamunaroromela vyevyo alembile liye, ndiye munaroromele avi mawanga?”