Olembiwa na Yohani
4 Yesu angazindikilile ira Afarisi koovwa ira liye unofunji-a athu anjinji ira kakale ofunjedae koma teto unowabatiza kwaranya Yohani, 2 ngakale ira kai Yesu unoyo abatiza athu koma ofunjedae mbanayo kapanga vyevyo, 3 liye oovenyawo wu Yudeya dowa wu Galileya. 4 Koma afuneya ira avirele wu Samariya. 5 Eno oofiya mu mzinda wa Samariya oromoliwa ira Sukari, vakwikwi na munda unoyo Yakobo amuva-ile liye mwanae Yosefe. 6 Moi wewo ookala isime ya Yakobo. Ndiye Yesu angagomile na ulendoyo, oogarati vakwikwi na isimeyo.* Moi thawi yali m’ma 12 koloko tana.*
7 Ndiye iyana m’mo-iwa wawu Samariya oofiya vaisimevo za runga ma-inje. Yesu oomuvepa iyanoyo ira: “Mundiva-ewo ma-inje ong’wa m’mani.” 8 (Vathawi ineyo ofunjedae kali kangavolowile mu mzinda ira kadowe kagule yodja.) 9 Ndiye iyanoyo oomufuka Yesu ira: “Voi nyo muli Muyuda, bwanji munavepa ma-inje ong’wa wa miyo, iyana Waisamariya?” (Chifukwa Ayuda na Asamariya katinagwilizana.) 10 Yesu oomusomeda iyanoyo ira: “Aakale ira muiziwa vya mphaso yaulele ya Mulungu koma teto aakale ira mumuiziwa unoyo unauwandelani ira, ‘Mundiva-ewo ma-inje ong’wa,’ moomuvepa moi liye oouva-ani ma-inje amoyo.” 11 Iyanoyo oomuwandela ira: “Mbwiyeni, kamun’na yongo yorungelana ma-inje teto isimela chi yodii-a. Ndiye ma-inje amoyo muwalandile waani? 12 Kodi nyo muli mulukulu mukwaranya mbwii-u Yakobo, unoyo aniva-ile isimela, ineyo teto liye na a-imae limo-i na ng’ombe dae kang’waathu?” 13 Yesu oomusomeda ira: “Uliwetene unoyo ung’wile ma-injala unoza akaena thona. 14 Koma muthu unoyo unaze ang’we ma-inje anayo ndinaze miyo ndimuva-e kanaza akaana thona ngakale vang’ono. Ma-inje anayo ndinaze miyo ndimuva-e kanoza kakale ngati kasupe wa ma-inje anayo kanakuma mwa liye nomuva-a moyo oomala.” 15 Iyanoyo oomuwandela Yesu ira: “Mbwiyeni, ndiva-eni ma-inje anayo, ira kandize ndikaena thona koma teto ira kandizenga uno za runga ma-inje.”
16 Liye oomuwandela iyanoyo ira: “Dowani, mwamuitane mamuninyu aze uno.” 17 Iyanoyo oosomeda ira: “Kandin’na lombwana.” Yesu oomuwandela ira: “Muonga vyoona vevo musomedile nyo ira, ‘Kandin’na lombwana.’ 18 Chifukwa muteliwavo na alombwana 5, moi lombwana unoyo mun’na nyo vathawiila kai mamuninyu. Veva muonga vyoona.” 19 Iyanoyo oomuwandela ira: “Mbwiyeni, ndizindikila ira nyo muli namaongela. 20 Makolwi-u awale koolambela Mulungu m’mwango unola, koma nyo munaonga ira malo anayo athu kanafuneyaathu lambelelangawo Mulungu kali wu Yelusalemu.” 21 Yesu oomuwandela iyanoyo ira: “Ndithu ndinaauwandelani m’mani, thawi inoza ifiye vevo nyo kamunaza mumulambela Baba m’mwango unola ngakale teto wu Yelusalemu. 22 Nyo munalambela yongo yoi kamunaiiziwa. Iyo ninalambela yongo yoi ninoiiziwa, chifukwa ipulumuso inaambeela wa Ayuda. 23 Komave thawi inoza ifiye, moi ifiya wale, vevo olambela oona kanazeathu kamulambelenga Baba mosogoleliwa na zimu owela na choonadi, chifukwa Baba unafuna ira athu ngati anala kamulambelenga. 24 Mulungu ngu Zimu, moi anayo kanamulambela kanafuneya mulambela mosogoleliwa na zimu koma teto choonadi.” 25 Iyanoyo aongile ira: “Ndinoiziwa ira Mesiya unaaza, unoyo unaromoliwa teto ira Kristu. Liye aza, unoza anifotokozele vyongo vyetene.” 26 Yesu oomuwandela ira: “Muthu unoyo ngu miyo, unoyo ndinaonga na nyo.”
27 Vathawi ineyo ofunjedae koofiya, moi koodabwa chifukwa yoi liye aonga na iyana. Koma kalivo unoyo amufukile ira: “Munafuna n’ni wa liye?” kapena ira, “Chifukwa n’ni munaonga na iyanola?” 28 Eno iyanole oo-iya suwae wa ma-inje novolowa mu mzinda moi ooawandela athu ira: 29 “Tiyemoni mwamuone muthu unoyo undiwandelile vyongo vyetene vyevyo ndikalile miyo ndipanganga. Kodi unola kai Kristu?” 30 Aluwa kookuma mu mzindamo dowa wewo wali Yesu.
31 Vathawi inela ofunjedae kali kamuvepanga ira: “Rabi, ambeelani dja.” 32 Koma liye ooawandela ira: “Ndikaana yodja ineyo nyo kamunaiiziwa.” 33 Ndiye ofunjedayo koowambeela fukana ekiwa ira: “Kodi vikala muthu unoyo umuva-ile yodja?” 34 Yesu ooawandela ira: “Yodja yanga kupanga vyofuna vya unoyo andirumile nomari-a chitwae. 35 Kodi nyo kamunaonga ira ukede ala medi 4 ira niambeele anda? Koma miyo ndinauwandelani ira: Ing’anechechani m’mundamo. Mbewu diwaraala wale teto dinafuneya andiwa. Moi vathawiila 36 muthu o-anda unaawachela malipilwae moi unaasonkani-a vipaso umoyo oomala, ira ofesa mbewu na o-anda kasangalale limo-i. 37 Mbaona mawu anayo kanaonga ira: Muthu m’mo-iwa ngofesa teto muthu m’mo-iwa ngo-anda, mboona. 38 Miyo ndiutumizani ira mudowe mwa-ande vyongo vyoi kamuzalile. Athu amo-iwa koo-inda chito mwatindi moi nyo munaapindula na chito ineyo ka-indileathu.”
39 Asamariya anjinji okumela mu mzindoyo koomuroromela Yesu chifukwa ya mawu anayo iyanole aongile liye. Iyanoyo oopangela umboni ira: “Liye undiwandela vyongo vyetene vyevyo ndikalile miyo ndipanganga.” 40 Eno Asamariyayo kangafiile wa Yesu, koomuvepa ira akaleve na aluwa moi liye ookala wewo malambo men’li. 41 Vyo-arelavo viwa, athu anjinji koororomela chifukwa ya vyevyo aongile liye, 42 moi koomuwandela iyanoyo ira: “Iyo kaninakeda roromela chifukwa ya vyevyo uongile we, koma ninaroromela chifukwa yoi nivivwela eki-u moi ninoiziwa ira muthula ngu mpulumusi wailambo.”
43 Malambo men’layo kangamalile, liye oovenyawo wewo dowa wu Galileya. 44 Yesu mwinyailo oopangela umboni ira namaongela kanalemekeziwa udela lawaniwa. 45 Eno angafiile wu Galileya, athu a wewo koomuwachela pama chifukwa yoi kali kangaonile vyetene vyevyo apangile liye vaikondwelelo wu Yelusalemu, voi naaluwene teto kali wewo.
46 Vanduli viwa oofiya teto wu Kana wawu Galileya, wewo atanduchile liye ma-inje kala vinyu. Ndiye wewo ookala muthu m’mo-iwa unoyo a-inda chito wa mwene, moi mwanae walombwana oobulela wu Kaperenao. 47 Muthula angavwide ira Yesu ufiya wu Galileya kumela wu Yudeya, oodowa wa liye dowa muvepa ira adowe wu Kaperenao ira amuchili-e mwanaeyo, chifukwa ali anga-alile vang’ono khwa. 48 Koma Yesu oomuwandela ira: “Akala ira kamuonile vizindikilo kapena vyodabwi-a kamunaroromele ngakale vang’ono.” 49 Mtumiki wa mwenoyo oomuwandela ira: “Mbwiyeni, tiyemoni mwananga aanakhwe.” 50 Yesu oomuwandela ira: “Dowa, mwanawo uchila.” Muthuyo oororomela mawu anayo Yesu amuwandelile liye moi oowelela waniwa. 51 Koma vevo adowa liye, achitwae koomuchingamela za muwandela ira mwanae uchila. 52 Eno liye oowafuka thawi ineyo achilile liye moi aluwa koomusomeda ira: “Uchilile zilo m’ma 1 koloko tana.”* 53 Ndiye baboyo oozindikila ira yali thawi ineyo Yesu amuwandelile liye ira: “Mwanawo uchila.” Eno liye na banja lae letene koomuroromela Yesu. 54 Inela yali izindikilo yanambili ineyo Yesu apangile liye angakumile wu Yudeya dowa wu Galileya.