KHANI YOFUNJEDA 16
“Murongolawo Unoza Avenyi-iwe”
“Yesu oomuwandela [Marita] ira: ‘Murongolawo unoza avenyi-iwe.’” — YOH. 11:23.
NYIMBO 151 Iye Adzaitana
VYEVYO NINAFUNJEDE IYOa
1. Kodi muzombwe m’mo-iwa atonyi-edile avi ira unororomela vinjinji ira okhwa kanoza kavenyi-iwe?
MUZOMBWE m’mo-iwa zina laye Matthew ukaana marenda alukulu moi ukala apangiwanga ma opereshoni anjinji. Angan’na chaka 7, liye na makolwaye koowonela porogaramu ya JW Broadcasting®. Umapeto wa porogaramwiyo koowonela vidiyo ya nyimbo yotonyi-eda athu kawachelanga athu anayo kaawomeliwanaathu anayo kavenyi-iwe.b Porogaramwiyo yangamalile, Matthew oodowa vevo vali makolwaye nowa-inda manda, noonga ira: “Muona nyo m’Mani na nyo Babani, masiki ndikhwe ndinoza ndivenyi-iwe. Munokoza ndidedi-eda, vyetene vinoza vikale pama.” Kakedani ganizela mwemo makolwayo kasangalaleleathu ona ira mwaniwoyo unororomela vinjinji ira okhwa kanoza kavenyi-iwe.
2-3. Chifukwa n’ni pivyofuneya ira niganizelenga vinjinji lonjezo loi okhwa kanoza kavenyi-iwe?
2 Ninoira pama ira thawi na thawi niganizelenga lonjezo la m’Baibulo loi okhwa kanoza kavenyi-iwe. (Yoh. 5:28, 29) Chifukwa n’ni? Chifukwa kaninaiziwa thawi eneyo ninabulele iyo marenda alukulu kapena morurumucha muthu onoyo ninamuwomeliwana iyo unokoza tatiya. (Nam. 9:11; Yak. 4:13, 14) Roromela ira okhwa kanoza kavenyi-iwe unokoza nikami-eda ira nivilelenga mavuto n’nga anala. (1 Ates. 4:13) Malemba kanonisimikizela ira Babi-u waudimu unoniiziwa pama teto unoniwomeliwana vinjinji. (Luk. 12:7) Kakedani ganizela mwemo Yehova Mulungu munaniiziwela liye pama ira aze awande nivenyi-a na makalelo anayo nan’na iyo koma teto niwandanga umbuwela iliyetene. Moi Yehova ootonyi-eda ira unoniwomeliwana vinjinji voniva-a mwayi woi nize nikaena moyo o-omala koma teto nivenyi-a akala ninatatiye.
3 Mukhanila, yowambeela ninokambirana chifukwa iwa ninafuneela iyo roromela lonjezo loi okhwa kanoza kavenyi-iwe. Era eno ninokambirana khani ya m’Baibulo yolimbi-a iroromelo eneyo in’na mawu amulemba lelo linasogolela khanila. Vogomi-eda viwa ninofunjeda vyevyo ninaire iyo ira niroromelenga vinjinji ira okhwa kanoza kavenyi-iwe.
CHIFUKWA IWA NINAFUNEELA IYO ROROMELA LONJEZO LOI OKHWA KANOZA KAVENYI-IWE
4. Ira niroromele lonjezo, kodi ninafuneela kala osimikiza vya n’ni? Pelekani isazo.
4 Ira niroromele lonjezo limo-iliwalene, ninafuneela kala osimikiza ira unalonjezoyo ngofunechecha koma teto ukaana kopolo doirela vyevyo unalonjeza liye. Niyerekezele ira nyumbinyu iwonongeya vinjinji na lipevo lakopolo. Ndiye fwinyu uza noulonjezani ira, ‘Ndinoukami-ani manga nyumbinywila.’ Liye unaonga vyevi mosimikiza moi nyo kamunakaikela ira unofuna ukami-ani. Akala un’na luso lomanga koma teto ukaana vida vyetene vyofuneela, munoiziwa ira unokoza ukami-ani. Moi nyo munororomela lonjezo laye. Ndiye bwanji naonga vya lonjezo la Mulungu loi unoza avenyi-e okhwa? Kodi liye ngofunechecha koma teto ukaana kopolo dokwakwaneli-eda lonjezoli?
5-6. Chifukwa n’ni kaninakaikela ira Yehova unofunechecha za venyi-a okhwa?
5 Kodi Yehova unofunechecha za venyi-a okhwa? Pivyo-oira fuka. Liye oosogolela athu angasene ira kalembe m’Baibulo lonjezo laye loi unoza avenyi-e okhwa. (Yes. 26:19; Hos 13:14; Chiv. 20:11-13) Yehova alonjeza thawi detene unokwakwaneli-eda vyevyo ulonjezile liye. (Yos. 23:14) Moi liye ngofunechecha za venyi-a athu anayo katatiile. Chifukwa n’ni ninaonga eno?
6 Kaganizelani vyevyo Yobu aongile liye. Liye kaakaikela ira masiki angatatiile, Yehova oolakalaka za muona angan’na moyo. (Yob. 14:14, 15) Yehova unofunechecha za venyi-a atumikaye etene anayo katatiile, ira kakale athanzi koma teto osangalala. Nanga bwanji naonga vya athu mabiliyoni anayo katatiile kaanafwanye mwayi ofunjeda vya Yehova? Mulungwi-u wachikondi unofuna teto za avenyi-a. (Vyo. 24:15) Liye unafuna ira aluwa kakayena mwayi okala afwaye koma teto ira kaze kakayena mwayi okala vailambwela mpakana walewale. (Yoh. 3:16) Va pivyovaela oneya ira Yehova unofunechecha za venyi-a okhwa.
7-8. Chifukwa n’ni ninakale osimikiza ira Yehova ukaana kopolo dovenyi-a okhwa?
7 Kodi Yehova ukaana teto kopolo dowanda venyi-a okhwa? Ee. Liye “Ngwakopolo detene.” (Chiv. 1:8) Eno ukaana kopolo dowanda gonji-a mudani uliwetene masiki teto khwa. (1 Akor. 15:26) Ninolimbikisiwa koma teto miyali-iwa chifukwa yoiziwa vyevi. Kaganizelani vyevyo vyamuireele Murongola Emma Arnold. Liye na banja laye koogumanana mavuto alukulu anayo kashishile iroromelo iwa va thawi ya khondo yanambili ya Vailambo Yetene. Vofuna limbikisa mwaniwa wa-iyana chifukwa yophiwa wa athu anayo kaawomeliwanaathu undende dozuzumi-elawo athu da Nazi, Emma eere: “Akala athu katinaza kavenyi-iwa mpakana walewale era eno khwa ukaana kopolo kwaranya Mulungu, kai eno?” Kavali yongo yakopolo vinjinji kwaranya Yehova. Mulungu wa kopolo detene onoyo alengile moyo unowanda teto weli-eda moyo wa athu anayo katatiile.
8 Chifukwa imo-iwa eneyo inaniiri-a roromela ira Mulungu unowanda venyi-a athu anayo katatiile choi unoumbuwela vyongo kwaranya uliwetene. Liye unoromola zina la nyenyedi iliyetene. (Yes. 40:26) Unoumbuwela teto athu anayo katatiile. (Yob. 14:13; Luk. 20:37) Liye unoumbuwela vyongo ving’onong’ono vyokuza athu anayo unaze liye aavenyi-e tangani-avo makalelwiwa na mwemo kaoneelaathu, vyevyo vyaireile vamoywiwa koma teto vyevyo athu kaiziwaathu.
9. Chifukwa n’ni munaroromela lonjezo loi Yehova unoza avenyi-e okhwa?
9 Pivyovweya roromela lonjezo la Yehova loi unoza avenyi-e okhwa chifukwa ninoiziwa ira unofunechecha koma teto ukaana kopolo dokwakwaneli-eda lonjezoli. Kaganizelani chifukwa imo-iwa yoniiri-a roromela lonjezoli. Yehova ooiravo wale vyevi. Wale, liye oova-a alombwana angasene ororomeleya tangani-avo Yesu kopolo dovenyi-a okhwa. Sopano tiyemoni nikambirane khani yokuza m’mo-i wa athu anayo Yesu aavenyi-ile liye yofwanyeya mu Yohani chaputala 11.
FWAYE WA YESU OOTATIYA
10. Kodi chin’ni yaireile dambo limo-i Yesu alaleelanga ukombela imo-i ya Yorodano, nanga liye airile n’ni? (Yohani 11:1-3)
10 Welengani Yohani 11:1-3. Fwanafwani-ani ira munoona vyevyo vyaireile wu Betaniya umaambeelelo wa 33 C.E. Yesu uli na afwaye avamurima mudela leli, anayo ngu Lazalo na arongolaye ambin’li Mariya na Marita. (Luk. 10:38-42) Koma Lazalo uwambeela bulela moi arongolaye kanokumbanya. Aluwa kootumiza uthenga wa Yesu onoyo ali ukombela imo-iwa ya inje wa Yorodano, ulendo otamangela malambo men’li kumela wu Betaniya. (Yoh. 10:40) Pivyovwi-a chisoni ira Lazalo utatiya uthenga ungakede fiya wene wa Yesu. Masiki ira Yesu uiziwa ira fwaye utatiya liye unokalave wewo wali liyewo wa malambo amo-iwa ambin’li vanduli viwa unodowa wu Betaniya. Eno vanafiya liye mudelalo vivira malambo 4 kumela vevo Lazalo atatiile liye. Yesu unafuna aire yongo eneyo inakami-e afwayayo koma teto lemekeza Mulungu. — Yoh. 11:4, 6, 11, 17.
11. Kodi khanila inanifunji-a n’ni va mwemo ninafuneela iyo irela vyongo na afwi-u?
11 Khanila inanifunji-a mwemo ninafuneela iyo irela vyongo na afwi-u. Kaganizelani vi: Vevo Mariya na Marita katumizaathu uthenga wa Yesu, katamuvepile ira aze wu Betaniya. Aluwa kakede muwandela ira fwaye wavamurima unaabulela. (Yoh. 11:3) Lazalo angatatiile, Yesu ookoza muvenyi-a angali undendayi. Komave oosakula ira adowe wu Betaniya ira akale na afwaye, Mariya na Marita. Kodi mukaana fwinyu onoyo unaukami-ani mwaanamuvepe? Ndiye munoiziwa ira munokoza muroromela ira unokoza ukami-ani “vakala mavuto.” (Miya. 17:17) Mofwanafwana na Yesu tiyemoni nikalenga ororomeleya wa afwi-u. Sopano tiyemoni nipitilize khanila ira niwone vyevyo vinaireya.
12. Kodi Yesu amulonjezile n’ni Marita, n’nga chifukwa n’ni liye afuneela roromela lonjezoli? (Yohani 11:23-26)
12 Welengani Yohani 11:23-26. Marita uiziwa ira Yesu unowandamela wu Betaniya. Mombaraanya udowa dowa gumanana liye moi unaonga ira: “Mbwiyeni, mwaakale uno murongolanga kaatatiya.” (Yoh. 11:21) Vyevi pivyoona chifukwa Yesu oowanda muili-a Lazalo. Koma liye unoganiza vyoira yongo imo-iwa yavadela vinjinji. Liye unomulonjeza ira: “Murongolawo unoza avenyi-iwe.” Liye unomuwandela teto Marita chifukwa imo-iwa yomuiri-a roromela lonjezoli ira: “Miyo ndili venya na moyo.” Vyevi pivyoona chifukwa Mulungu oomuva-a kopolo dovenyi-a okhwa. Mundulimu liye oovenyi-avo musikana angakede tatiya wene koma teto oovenyi-avo muzombwe moi vinawoneya ira lali dambo lelo atatiile liye. (Luk. 7:11-15; 8:49-55) Koma kodi unokoza venyi-a muthu onoyo vavirile malambo 4 kumela vevo atatiile liye teto thuthu laye liambeela onongeya?
“LAZALO KUMA!”
Yesu oovwela chisoni vinjinji afwaye anayo kakhweliwe (Onani ndima 13-14)
13. Mogwilizana na Yohani 11:32-35, kodi Yesu airile n’ni angaonile Mariya na athu amo-i kaulanga? (Onani teto ithuzithuzi.)
13 Welengani Yohani 11:32-35. Kaganizelani vyevyo vinaireya vanduli viwa. Mariya onoyo ngu murongolaye wa Lazalo, unadowa dowa gumanana Yesu. Unoweli-eda teto vyevyo dimbilaye aongile liye ira: “Mbwiyeni, mwaakale uno murongolanga kaatatiya.” Liye na athu anayo un’na liye kookaana chisoni ilukulu. Voona koma teto vwa athwayo kaulanga, Yesu vimukuza vinjinji. Chifukwa yowawomeliwana vinjinji afwayayo, liye unomori-a misodi. Liye unoiziwa mwemo vinavoreelaathu muthu onoyo ninamuwomeliwana iyo atatiya. Pivyovaela oneya ira liye unofunechecha chosa eneyo iwairi-ile ira kakaena chisoni.
14. Kodi ninafunjeda n’ni vyokuza Yehova va vyevyo Yesu airile liye angamuonile Mariya aulanga?
14 Vyevyo Yesu airile liye angaonile Mariya aulanga vinonifunji-a ira Yehova ngu Mulungu wachifundo ilukulu. Chifukwa n’ni ninaonga eno? Monga mwemo naonele iyo mukhani ivirilele, Yesu unotonyi-eda ndendende mwemo Babaye munaganizela liye koma teto munavwela liye. (Yoh. 12:45) Eno nawelenganga ira Yesu oovwa chisoni angaonile afwaye kaulanga moi naliyene ooula, ninokoza onga ira Yehova unokuziwa aniwona niulanga chifukwa ya chisoni. (Sal. 56:8) Kodi vyevi kavinauiri-ani funa kala va usamwali na Mulungwi-u wachifundola?
Yesu ootonyi-eda ira ukaana kopolo dovenyi-a okhwa (Onani ndima 15-16)
15. Mogwilizana na Yohani 11:41-44, kodi chin’ni yaireile umanda a Lazalo? (Onani teto ithuzithuzi.)
15 Welengani Yohani 11:41-44. Yesu ufiya vamanda a Lazalo moi unowandela athu ira kachose libwe lelo ka-eilenaathu vamandavo. Koma Marita unoruni-a vyevi voonga ira mwina thuthulo liambeela nukha. Yesu unasomeda ira: “Kodi kandiuwanden’le ira waroromela unoza uwone ulemelelo wa Mulungu?” (Yoh. 11:39, 40) Vanduli viwa Yesu unoing’ana udimu nopepela athu etene kaonanga. Liye unafuna apeleke ulemelelo wetene wa Yehova va vyetene vyevyo vinafuna ireya. Eno Yesu unokuwa ira: “Lazalo kuma!” moi Lazalo unokuma m’mandamo. Va Yesu uira vyongo vyevyo athu amo-iwa kaonaathu ira kai vyowandeya.
16. Kodi khani ya mu Yohani chaputala 11, inanikami-a avi ira niroromelenga vinjinji ira okhwa kanoza kavenyi-iwe?
16 Khani ya mu Yohani chaputala 11, inonikami-a ira niroromelenga vinjinji ira okhwa kanoza kavenyi-iwe. Chifukwa n’ni ninaonga eno? Umbuwelani vyevyo Yesu amuwanden’le liye Marita ira: “Murongolawo unoza avenyi-iwe.” (Yoh. 11:23) Mofwanafwana na Babaye, Yesu unofunechecha venyi-a okhwa moi ukaana kopolo dokwakwaneli-eda lonjezo leli. Vyevyo airile liye vomori-a misodi vinatonyi-eda ira liye unofunechecha za mali-a khwa koma teto chisoni eneyo inaza chifukwa yokhwa. Lazalo angakumile m’mandamo, Yesu ootonyi-eda ira ukaana kopolo dowanda venyi-a okhwa. Kaumbuwelani teto vyevyo Yesu amuumbuchile liye Marita ira: “Kodi kandiuwanden’le ira waroromela unoza uwone ulemelelo wa Mulungu?” (Yoh. 11:40) Nikaana vifukwa vyovweya vyororomela ira lonjezo la Mulungu loi okhwa kanoza kavenyi-iwe linoza likwakwaneli-ediwe. Koma kodi ninaire avi ira niroromelenga vinjinji lonjezoli?
KODI NINAIRE AVI IRA NIROROMELENGA VINJINJI IRA OKHWA KANOZA KAVENYI-IWE?
17. Kodi niumbuwelenga n’ni nawelenganga khani da m’Baibulo da athu anayo kavenyi-iwe?
17 Muwelengenga koma teto ganizela khani da athu anayo kavenyi-iwe mundulimu. Baibulo linoromola khani da athu 8 anayo kavenyi-we nokaana moyo nawili vailambwela.c Bwanji ookoza vyoi mufunjede mosamala khani dedi? Mwawelenganga, muumbuwelenga ira khanidi tidokuza athu aimbarimbari anayo kali alombwana, a-iyana kama teto a-ima. Muonenga vyevyo munafunjedavo nyo. Muganizelenga mwemo khani iliyetene inatonyi-edelaathu ira Mulungu ngofunechecha koma teto ukaana kopolo dovenyi-ela athu. Kwaranya vyetene muganizelenga vyovenyi-iwa wa Yesu wewo uli ofuneya vinjinji. Umbuwelani ira athu anjinji koowona na maso Yesu angavenyi-iwe moi vyevi vinolimbi-a iroromelo yi-u. — 1 Akor. 15:3-6, 20-22.
18. Kodi munaire avi ira mupindulenga na nyimbo dokuza idedi-edo yoi okhwa kanoza kavenyi-iwe? (Onani teto mawu a mphedi.)
18 Muvuruwanenga, imba koma teto ganizela “nyimbo dauzimu” dedo dinaonga vya idedi-edo yovenyi-iwa wa okhwa.d (Aife. 5:19) Nyimbodi dinonikami-eda ira niroromelenga vinjinji idedi-edo yoi okhwa kanoza kavenyi-iwe. Mudivuruwanenga, diimba koma teto mukambiranenga mawuwa volambela winyu wavabanja. Muwalemeelenga mawuwa. Ndiye mwagumanana mavuto alukulu kapena muthu onoyo munamuwomeliwana nyo atatiya, muzimu wa Yehova unoza uukami-eni umbuwela nyimbodi koma teto umiyali-ani nouva-ani kopolo.
19. Kodi niganizelenga vyongo viivi vyevyo vinaze viireye athu kaza kavenyi-iwanga? (Onani bokosi loi “Kodi Munaza Muwafuka Vyoi Avi?”)
19 Muonenga vyongo m’maganizo mwinyu. Yehova univa-a luso loi niwandenga viona nangali muilambo isha. Murongola m’mo-iwa oosambaula ira: “Wa thawi indendayi ndikala ndifwanafwani-edanga ira ndili muilambo isha moi vinakala n’nga ndinovwa nukela wa maluwa a m’Paradaiso.” Kaganizelani vyoi munagumana na alombwana na a-iyana ororomeleya oromoliwa m’Baibulo. Kodi nyo munafuna ira muze mugumane na mbaani? Munaza mumufuka vyofuka viivi? Fwanafwani-edani ira munagumana na athu anayo munaawomeliwana nyo anayo katatiile moi munoona vyevyo vinaireya vevo munagumana nyo, monga mawu owambeela anayo munaongi-ana nyo, kumbarelana koma teto munomori-a misodi dachisangalalo.
20. Kodi ninafuneela simikiza ira n’ni?
20 Ninoyamikela vinjinji Yehova chifukwa ya lonjezo laye loi okhwa kanoza kavenyi-iwe. Kaninakaikela vyoi lonjezoli linoza likwakwaneli-ediwe. Chifukwa Yehova ngofunechecha koma teto ukaana kopolo doirela vyevi. Tiyemoni nikale osimikiza ira nipitilize roromela vinjinji idedi-edo yantengo wavadimwila. Nairanga vyevi ninoza nikale va usamwali na Mulungu onoyo ninaonge iyo ira unalonjeza uliwetene wa iyo ira, ‘Athu anayo munaawomeliwana nyo kanoza kavenyi-iwe.’
NYIMBO 147 Mulungu Watilonjeza Moyo Wosatha
a Akala muthu onoyo munamuomeliwana nyo utatiile, mookaikela munolimbikisiwa vinjinji na lonjezo loi okhwa kanoza kavenyi-iwe. Koma kodi munaasambaulele avi amo-iwa chifukwa iwa munaroromela lonjezo leli? N’nga munaire avi ira muliroromelenga vinjinji? Yolinga ya khanila kukami-eda etene iyene ira niroromelenga vinjinji lonjezoli.
b Vidiyo ya nyimbwela muruwa ngoi Dziko Latsopano Lili Pafupi moi yoowoni-iwa mu porogaramu ya JW Broadcast ya Novembala 2016.
c Onani bokosi loi “Anthu 8 Otchulidwa M’Baibulo Amene Anaukitsidwa” mu Nsanja ya Olonda ya August 1, 2015, tsamba 4.
d Onani nyimbo do-areladi m’buku la nyimbo loi: “Imbirani Yehova Mosangalala”: “Yerekezani Kuti Muli M’dziko Latsopano” (Nyimbo 139), “Yang’ananibe Pamphoto” (Nyimbo 144) koma teto “Iye Adzaitana” (Nyimbo 151) Teto munokoza ona nyimbo da broadcasting di va jw.org, “Dziko Latsopano Lili Pafupi,” na yoi “Muone.”