Kodi Ninaire Avi Ira Niroromelenga Vinjinji Lonjezo la Yehova la Ilambo Isha?

1-2. Kodi ninafuneela iranga n’ni voyembekezela ilambo isha?

NINOYAMIKELA vinjinji Yehova chifukwa ya lonjezo laye loi unoza achose ilambo yotakalela nozi-a ilambo isha. (2 Pe. 3:13) Masiki ira kaninaiziwa dambo lelo ilambo isha inazeathu ize, umboni unotonyi-eda ira kavinalanda thawi indendayi yaanafiye. — Mat. 24:32-34, 36; Vyo. 1:7.

² Kaya nikan’le muimbarimbari wa thawi indendayi moi avi, etene iyene ninafuneela roromela vinjinji lonjezo leli. Chifukwa n’ni? Chifukwa masiki iroromelo yolimba inokoza fooka. Teto-i namarumiwa Paulo awongile ira ookaana iroromelo “ti chimo lelo linanikola mo-orucha.” (Aheb. 12:1) Ira iroromelo yi-u kifooke, thawi detene ninafuneela ganizelanga vinjinji umboni wotonyi-eda ira ilambo isha inoza chineneveva.— Aheb. 11:1.

3. Kodi ninakambirana n’ni mukhanila?

³ Mukhanila ninokambirana ndila taaru dedo dinanikami-e ira niroromelenga vinjinji lonjezo la Yehova lokuza ilambo isha, dedo dili: (1) ganizela modii-a vyokuza dipo, (2) ganizela kopolo da Yehova, koma teto (3) ira vyongo vyokuza lambela. Era eno ninokambirana mwemo uthenga wa Yehova odowa wa Habakuku munanikami-edeleathu limbi-a iroromelo yi-u malambwano. Yowambeela, tiyemoni niwone vimo-i mwa vyongo vyevyo vinaireya vamoywi-u malambwano, vyevyo vinafuneye ira nikaena iroromelo yolimba valonjezo la ilambo isha.

VYONGO VYEVYO VINAFUNA IRA NIKAENA IROROMELO YOLIMBA

4. Kodi pi vyosakula vyiivi vyevyo vinafuneela iroromelo yolimba?

⁴ Dambo lililetene ninafuneela iroromelo yolimba ira nisakule vyoira vakhani do-iyana-iyana monga maphunzilo, vyosangalasa, athu owaledana, banja, a-ima koma teto chito. Ninoira pama vifukanga ira: ‘Kodi vyevyo ndinasakula miyo vinotonyi-eda ira kandinakaikela ira ilambo yotakalela chineneveva inovolowiwa m’malo na ilambo isha ya Mulungu? Kapena kodi ndinosakula vyongo mofwanafwana na athu anayo kanawona ira khwa mbamapeto a vyetene?’ (Mat. 6:19, 20; Luk. 12:16-21) Ninokoza sakulanga vyoira mwazelu akala ninaroromela ira ilambo isha ili vakwikwi vinjinji.

5-6. Chifukwa n’ni ninafuneela iroromelo yolimba nagumanana mavuto? Pelekani isazo.

⁵ Ninafuneela kaana iroromelo yolimba nagumanana mavuto. Ninokoza zuzumi-iwa, bulela marenda alukulu koma teto gumanana vyongo vimo-i vyofooki-a. Mwina vowambeela iyo podi wonanga ira ninokoza vilela mavuto anayo. Koma thawi dinjinji mavuto n’nga anala kanolanda thawi indedayi, eno ninafuneela iroromelo yolimba ira niavilele koma teto nipitilize mutumikela Yehova mosangalala. — Arom. 12:12; 1 Pe. 1:6, 7.

⁶ Muwari mwa mavutwayo, mwina ninokoza wona ira ilambo isha ya Yehova kinaza iza. Koma kodi vyevi vinatapulela ira iroromelo yi-u ifooka? Kai kwenikweni. Kaganizelani isazo ila: Akala nili munyengo yodidila vinjinji, mwina ninokoza wonanga ira nyengo yovi-a kinaza. Koma vanduli viwa nyengo yovi-eyo inoza. Mofwanafwana na vyevi, akala nifookile vinjinji mwina ninokoza wonanga ira ilambo isha kinaza iza. Koma akala iroromelo yi-u chiyolimba ninoiziwa ira malonjezo a Mulungu kanoza kakwakwaneli-ediwe. (Sal. 94:3, 14, 15; Aheb. 6:17-19) Iroromelweyo inonikami-a ira nipitilizenga ela lambela Yehova vamalo owambeela vamoywi-u.

7. Kodi ninafuneela samala na maganizo aavi?

⁷ Ninafuneela teto iroromelo yolimba ira ni-indenga chitwi-u yolaleela. Athu anjinji anayo ninaalaleela iyo kanoona ira “uthenga wapama” wokuza ilambo isha ya Mulungu, unaonga vya vyongo vyoi pi vyo-owandeya. (Mat. 24:14; Eze 33:32) Kaninafuneela landela maganizwiwa okaikelala. Eno ninafuneela pitiliza limbi-a iroromelo yi-u. Tiyemoni nione ndila taaru dedo ninairele iyo vyevi.

NIGANIZELENGA MODII-A VYOKUZA DIPO

8-9. Kodi ganizela modii-a vya dipo unalimbi-e avi iroromelo yi-u?

⁸ Ndila imo-iwa eneyo ninalimbi-ele iyo iroromelo yi-u kuganizela modii-a vyokuza dipo. Dipo ti lelo linanisimikizela ira malonjezo a Mulungu kanoza kakwakwaneli-ediwe. Naganizelanga mosamala mwemo dipo lapelekiweleathu koma teto vyevyo vyavolochi-iwevo, ninowambeela roromela vinjinji ira lonjezo la Mulungu loi ninoza nikaena moyo o-omala muilambo yapama linoza likwakwaneli-ediwe. Chifukwa n’ni ninaonga eno?

⁹ Kodi vafuneela n’ni ira dipo lipelekiwe? Yehova ootumiza Mwanaye omuwomeliwana owambeela baliwa koma teto fwaye wavamurima, ira aze abaliwe n’nga muthu wangwilo vailambwela. Angali vailambwela, Yesu oovilela mavuto o-iyana-iyana. Vanduli viwa oozuzumi-iwa koma teto khwa. Va Yehova oolivela ntengo ogwela vinjinji. Mulungwi-u wachikondi kaalole ira Mwanaye avuteye nokhwa vokeda funa ira nize nikaena moyo wapama koma wokwiiva. (Yoh. 3:16; 1 Pe. 1:18, 19) Chifukwa yoi oopeleka ntengo ogwela eni, Yehova unoza awonecheche ira nize nikaena moyo o-omala muilambo isha.

MUGANIZELENGA KOPOLO DA YEHOVA

10. Mogwilizana na Aifeso 3:20, kodi Yehova unokoza wanda ira n’ni?

¹⁰ Ndila yanambili eneyo ninalimbi-ele iyo iroromelo yi-u kuganizela kopolo da Yehova. Liye ukaana kopolo dokwakwaneli-eda iliyetene eneyo ulonjezile liye. Pivyoona ira wa athu, lonjezo la moyo o-omala muilambo isha linokoza oneya lo-owandeya. Koma thawi dinjinji Yehova unolonjeza vyongo vyoi athu katinawande viira. Liye ngu Mulungu Wakopolo detene. (Yob. 42:2; Malik. 10:27) Ndiye kodi kaninayembekezela ira unongolonjeza vyongo vyodawi-a? — Welengani Aifeso 3:20.

11. Pelekani isazo imo-i ya malonjezo odabwi-a a Mulungu. (Onani bokosi loi “Malonjezo Amo-i Odabwi-a Anayo Kakwakwaneli-ediwe.”)

¹¹ Kaganizelani vyongo vyooneya n’nga vyo-owandeya vyevyo Yehova alonjezile liye athwaye mundulimu. Liye oomusimikizela Aburahamu na Sara ira kanoza kakaena mwana masiki ira kali ouluula. (Gen. 17:15-17) Oomuwandela teto Aburahamu ira a-imaye kanoza kava-iwe ilambo ya Kanani. Muchaka dinjinji dedo a-ima a Aburahamu, Aizarayeli, kaliathu akapolo wu Iguputo, podi ira vyawoneya ira lonjezoli kalinaza likwakwaneli-ediwa. Koma lookwakwaneli-ediwa. Vangavirile chaka dinjinji, Yehova oolengeza ira Elizabeti onoyo ali ouluula unoza akaena mwana. Liye oomuwandela teto Mariya onoyo ali namwali ira unoza abale Mwanaye wamulombwana. Yehova ali angalonjezile vyoza wa Mwanayela chaka masauzande mundulimu m’munda wa Edeni moi ookwakwaneli-eda lonjezoli. (Gen. 3:15) Va vyoireya vyetene vyevi, Yehova ookwakwaneli-eda vyevyo alonjezile liye.

12. Kodi lemba la Yoswa 23:14 na Yesaya 55:10, 11, kananisimikizela vyoi avi vyokuza kopolo da Yehova?

¹² Naganizelanga vyevyo Yehova airilevo liye mundulimu volonjeza koma teto kwakwaneli-eda malonjezwayo, ninororomela vinjinji ira ukaana kopolo dozi-a ilambo isha. (Welengani Yoswa 23:14; Yesaya 55:10, 11.) Vyevi vinonikami-a kala okozeya kami-eda amo-iwa ira kaiziwe ira lonjezo la ilambo isha kai lokeda ro-a. Voonga vya udimu usha na ilambo isha, Yehova mwinyailo awongile ira: “Mawu anala mbororomeleya na aimbarimbari.” — Chiv. 21:1, 5.

NITANGANISIWENGA NA VYONGO VYOKUZA LAMBELA

13. Kodi misonkano da pingo dinalimbi-e avi iroromelo yi-u? Sambaulani.

¹³ Yongo yanaralu eneyo inanikami-e limbi-a iroromelo yi-u kuira vyongo vyokuza lambela. Mofwanafwani-a, kaganizelani mwemo misonkano da pingo dinanikami-edelaathu. Anna,b onoyo ukan’le airanga utumiki wa thawi detene mundila do-iyana-iyana, awongile ira: “Misonkano dinondikami-a kaana iroromelo yolimba. Masiki vyakala ira okamba khani kan’na luso lofunji-a kapena kasambaulile likundo lililetene lisha, thawi dinjinji ndinovwavo yongo imo-iwene eneyo inandikami-a vwechecha likundo limo-iliwalene la imbarimbari moi vyevi vinolimbi-a iroromelo yanga.” Pi vyookaiki-a ira ninoyamikela teto ndemanga dolimbi-a iroromelo da abali na arongoli-u.— Arom. 1:11, 12; 10:17.

14. Kodi indana chito yolaleela unalimbi-a avi iroromelo yi-u?

¹⁴ Ninolimbi-a teto iroromelo yi-u na-indangana chito yolaleela. (Aheb. 10:23) Barbara, onoyo ukan’le atumikelanga Yehova wachaka dokwaranya 70, awongile ira: “Thawi detene ndinoona ira chito yolaleela inondikami-a kaana iroromelo yolimba. Ndawandelanga vinjinji amo-i vyokuza malonjezo a Yehova, pavevo teto iroromelo yanga inalimbaathu vinjinji.”

15. Kodi funjeda vaeki-u unalimbi-a avi iroromelo yi-u? (Onani teto Ithuzithuzi.)

¹⁵ Vikala teto yongo imo-iwa yokuza lambela eneyo inalimbi-a iroromelo yi-u, eneyo ili funjeda vaeki-u. Susan unoona ira kaana ndandanda yofunjedela unomukami-a vinjinji. Liye eere: “Lamulungu ndinokozeela Phunzilo la Sanja ya Olonda la mulungu wo-arela. Lolemba na Lachiwili ndinokozeela misonkano damuwari mwa mulungu. Vamalambo o-alayo ndinakalecha ndisayelanga khani imo-iwene eneyo ndisakun’le miyo.” Voi thawi detene uno-arela ndandandaye yofunjedela, Susan unopitiliza limbi-a iroromelo yaye. Irene, onoyo ukan’le atumikelanga ulikulu li-u wachaka dinjinji, unoona ira funjeda maulosi a m’Baibulo unolimbi-a iroromelo yaye. Liye eere: “Vinondiiri-a chidwi wona ira masiki mbalic ding’onong’ono dokuza maulosi a Yehova, dinokwakwaneli-ediwa.”

“KANOZA KAKWAKWANELI-EDIWE NDITHU”

16. Kodi vyevyo Yehova amuwanden’le liye Habakuku vinanilimbikisa avi malambwano? (Aheberi 10:36, 37)

¹⁶ Atumiki amo-i a Yehova kookala kayembekezelanga mapeto ailambwela wa thawi indendayi. Wa athu, lonjezo la Mulunguli linokoza woneya n’nga linochedwa kwakwaneli-ediwa. Yehova unoiziwa mwemo atumikaye kanavwelaathu. Moi oomusimikizela Habakuku ira: “Uire vyevi voi masomphenyala kanadedi-eda thawiwa yo-eliwa teto kanotamangela umapeto uwa. Vyevyo vili m’masomphenyavi kai vyonama. Masiki masomphenyala kangazengelezile, uwadedi-edengave chifukwa kanoza kakwakwaneli-ediwe ndithu. Aluwa katinaza kadimbeluwa.” (Hab. 2:3) Kodi Mulungu awongile mawu anala vofuna mulimbikisa Habakuku eka? Kapena kodi kanokoza nilimbikisa iyo teto malambwano? Mosogoleliwa, namarumiwa Paulo oosambaula mawu anala wa Akiristu anayo kanayembekezela ilambo isha. (Welengani Aheberi 10:36, 37.) Eno masiki ira lonjezo la Mulungu loi unoza anivulumuche liwoneyanga n’nga linodimbeluwa, kaninakaikele ira ‘linoza likwakwaneli-ediwe ndithu, kalinaza lidimbeluwa.’

17. Kodi murongola m’mo-iwa una-indi-eda chito avi malangizo anayo Yehova amuva-ile liye Habakuku?

¹⁷ Wachaka dinjinji, atumiki a Yehova kookala ka-arelanga malangizwaye oyi “uwadedi-edengave.” Mofwanafwani-a, Murongola Louise aambeele tumikela Yehova mu 1939. Liye eere: “Vathawiyo ndaganiza ira kandinamari-a sukulu Armagedo yaanafiye. Koma vyevi kavyaireile. Wa chaka detene dedi, ndiwona ira eneyo inandikami-a kuwelenga khani dedo ndinakeda miyo diromola ira ‘athu anayo kadedi-ede,’ monga khani ya Nowa, Aburahamu, Yosefe na amo-i teto anjinji anayo kafuneela dedi-eda wathawi indendayi ka-anawachele vyevyo kadedi-edaathu. Pitiliza dedi-eda undikami-a miyo koma teto amo-iwa ira kanikaikelenga masiki vang’ono ira ilambo isha ili vakwikwi.” Athu anjinji anayo katumikele Yehova wathawi indendayi kanokoza somedela vyevi.

18. Kodi ira chidwi na vyachilengedwe unanikami-e avi ira niroromelenga vinjinji vya ilambo isha eneyo inaza?

¹⁸ Pivyoona ira ilambo isha kinafiye. Komave kaganizelani vyongo vyevyo munaviwona nyo monga nyenyedi, mitengo, vinyama koma teto athu afwinyu. Kalivo unakaikele ira vyongo vyevi vikalavo masiki ira va thawi imo-iwa kavyaliwo. Vyongovi vikalavo chifukwa yoi Yehova oovilenga. (Gen. 1:1, 26, 27) Mulungwi-u unofuna zi-a nawili ilambo isha. Liye unoza akwakwaneli-ede yolingaela. Muilambo isha athu kanoza kasangalale na moyo o-omala kangan’na thanzi lapama. Vathawiwa, Mulungu unoza aniva-e ilambo isha, moi mofwanafwana na chilengedwe ninawona iywela, ilambweyo inaza ikala yapama. — Yes. 65:17; Chiv. 21:3, 4.

19. Kodi munalimbi-e avi iroromelo inyu?

¹⁹ Vathawiila muirenga vyevyo munawande nyo ira mulimbi-e iroromelo inyu. Muyamikelenga vinjinji dipo. Muganizelenga kopolo da Yehova. Mutanganisiwenga na vyongo vyokuza lambela. Mwairanga vyevi, munokala mugulu la athu anayo “mwa iroromelo noleza murima, kanowachela vyongo vyevyo Mulungu alonjezile liye monga cholowa iwa.” — Aheb. 6:11, 12; Arom. 5:5.