Ndinokala O-otekenyeya Chifukwa Yororomela Yehova

MWEMO NDAAMBELELE MIYO ROROMELA YEHOVA

Ndabaliwele mu 1948 muzi m’ mo-iwa mung’ono ng’ono um’mwela yaumazulo muilambo ya Nigeria. Va thawiyo ababanga aang’onong’ono zina liwa a Moustapha ndipo vanduli viwa ndimuwanga zina lae Wahabi oobadiziwa kala wa Mboni da Yehova. Ndingan’na chaka 9, babanga ootatiya ndipo ndookumudwa vinjinji. Wahabi andiwandelile ira ndinoza ndiyaone teto ababanga kaza kavenyi-iwa. Mawu olimbikisala koopangi-a ira ndiyambeele funjeda Baibulo. Ndoobadiziwa mu 1963. Vangavilile thawi yoyeva ang’onong’onwanga araru naliwene koobadiziwa.

Mu 1965 ndoodowa dowa kalanga na ndimuwanga zina laye Wilson muzinda wa Lagos. Nasokana mupingo wa Igbobi ndipo noosangalala aleda na apainiya a mum’pingo unola. Ndingaonile mwemo kasangalalelaathu koma teto tindi liwa, vyoondilimbikisa ira miyo teto ndiyambeele upainiya. Ndipo ndoowambeela mu Januwale 1968.

M’bali Albert Olugbebi, unoyo atumikela wu Beteli ookoza sonkano wavadela ira anilimbikise azombwe iyo, ndipo ooniwandela ira um’poto wa Nigeria wafuneya apainiya avadela. Ndinoumbuwelave mawu olimbikisa anayo m’bali Olugbebi aniwandelile liye ira: “Muli azombwe ndipo munokoza indi-eda chito thawinyu koma teto kopolo dinyu votumikela Yehova. Viikala chito yoinjiva ineyo muna-indenyo.” Vofuna sazi-eda n’neneli Yesaya, ndoolemba fomu yofukedela utumiki unola.— Yes. 6:8.

Mu May 1968, ndootumiziwa monga m’painiya wavadela muzinda wa Kano umpoto wa ilambo ya Nigeria. Va thawila udelali wali uireyanga kondo yava chiweniweni ineyo yaambeelile mu 1967 mpakana mu 1970 ndipo yoopangi-a ira athu anjinji kaphiwe. Va-anavire thawi, kondwela yowambeela ireela wu mamawa wa ilambwela. Chifukwa yondiganizela, m’bali m’mo-iwa ondiwandela ira kandidowe. Koma miyo ndoomuwandela ira: “Zikomo chifukwa yondiganizela koma ngati Yehova unafuna ira ndidowe wewo kandinakaikela ira unodowa andikami-e.”

NDOOROROMELA YEHOVA UDELA LELO WAIREILE KONDO

Vyongo kavyali pama wu Kano Muzinda ulukulu wali ungaonongewile vinjinji chifukwa ya kondo. Nalaleelanga, thawi dimo-i nofwanya mitembo da athu anayo kapiwe. Ngakale ira wu Kano wukala mipingo dinjinji, abali anjinji kali kanga tawile. Wali ungakede ala ofalisa o-okwakwana 15 ndipo kali amantha koma teto okumudwa. Abali na arongola koosangalala vinjinji apainiya avadela 6 ningafiile wewo. Abali na arongolala kowambeela vwa pama ningawalimbikisile. Noowalimbikisa ira kaambeele nawili panga vyongo vyokuza lambela, tumiza malipotiwa wu ofesi ya thambi. Koma teto itani-a mabuku.

Vanduli viwa apainiya etene iyene nowambeela funjeda Chihausa. Athu anjinji kowambeela vuruwana ningaambeele laleela muiwongelo iwa. Athu muchipembezo ineyo yali ilukulu mudelalo katasangalala na chitwi-u yolaleela. Eno nafuneya samala. Dambo limo-i miyo na fwanga unoyo ndan’na miyo nootamangi-iwa na muthu m’mo-iwa angalandile mbene. Mwamwayi nootamanga vinjinji moi kaanifwanyile. Ngakale ira wali woophi-a, Yehova oonikami-a kala otetezeya ndipo chiwelengelo ya ofalisa yowambeela enjedeleya. (Sal. 4:8) Vano wu Kano wuli ofalisa okwaranya 500 m’mipingo 11.

NOORUNI-IWA WU NIGER

Ndikalile wu Kano wa medi doyeva, mu Ogaste 1968 ndootumiziwa wu Niamey, lelo tilikulu la ilambo ya Niger limo-i na apainiya avadela amo-i ambiili. Va-anavire thawi indendayi noozindikila ira wu Niger, wu West Africa, chiimo-i mavilambo vyovi-a vinjinji vailambo yetene. Nafuneya vilela vi-awo, koma teto funjeda chifulechi ineyo chiiwongelo ilukulu muilambweyo. Ngakale ira vookala mavuto etene anala, noororomela Yehova. Ndipo nowambeela laleela muzindoyo limo-i na ofalisa oyeva anayo kakala wewo. Va-anavire thawi indendai, muthu uliwetene unoyo aiziwa welenga muzinda wa Niamey ali angawachelile buku lelo nali-indi-eda iyo chito vofunji-a athu Baibulo loyi Coonadi Cimene Cimatsogolera ku Moyo Wamuyaya. Athu kakeda nisaelasaela ira kafwanye buku leli.

Vanduli viwa noozindikila ira andimuwa andimuwa aboma katasangalala na a Mboni da Yehova. Mu julayi 1969, noopanga sonkano wadela owambeela muilambweyo ndipo vookala athu otamangela 20. Vookala ofalisa ambiili oyi kabadiziwe vasonkanola. Koma vadambo lowambeela vooza apolisi ndipo kooimecha sonkanoyo. Koowatukula apainiya avadela koma teto oing’anela dela adowana upolisi. Ningafiile, aliwa koonifuka mafuso ndipo kooniwandela ira nize nidowe dambo lo-arela. Ningaonile ira vyongo vinokoza fiya votakala nookoza ira khani ya ubadizo ikambiwe unyumba ya m’bali vanduli viwa noodowa wu inje mwachisisi dowa badiza athu ambiilale

Vangavirile milungu doyeva, andimuwa andimuwa a mu unduna woona vya athu ovolowa na okuma muilambweyo koondiwandela miyo na apainiya avadela 5 ira nikume muilambweyo. Kooniwandela ira nikume muilambomo maola 48 ka-anakwakwane ndipo nafuneya koza eki-u maendelo. Noovwela ndipo noodowa wu ofesi ya tambi ya wu Nigeria wewo nava-iwe iyo mautumiki amo-i.

Miyo koonditumiza udela limo-iliwa wu Nigeria loromoliwa Orisunbare. Ndoosangalala inda chito yolaleela na ofalisa oyeva nayo kaliwewo. Vangakede vira medi 6, ofesi ya thambi yondiwandela miyo mekave ira ndidowe teto wu Niger. Vowambeela ndoodabwa ndipo ndookaana mantha koma vanduli viwa ndoofunechecha ira ndidowe ndagumane teto nawili na abali wu Niger.

Ndoowelela wu Niamey. Dambo lo-arela, muthu m’mo-iwa wa bizines wa wu Nigeria oozindikila ira ndili wa Mboni ndipo oowambeela fuka mafuso okuza Baibulo. Ndoowambeela funjeda naliye Baibulo ndipo anga-iile djasola koma teto ngw’a walwa vinjinji oobadiziwa. Vanduliviwa ndoosangalala kami-ana va chito yolaleela m’madela o-iyana iyana a wu Niger, wewo chiwelengelo ya ofalisa yagwelaathu vang’onovang’ono. Vevo ndafiya miyo waali ofalisa 31 ndipo vevo navenyao iyo wali ofalisa 69.

“KANDINAIZIWA MWEMO CHITO YOLALEELA INAENDELAATHU WU GUINEA”

Ya umapeto wa 1977, ndoowelela wu Nigeria ira ndawachele maphuzilo. Ningamari-ile maphuzilwayo, anayo kali amilungu diralu, M’bali Malcolm Vigo oondivepa ira ndiwelenge kalata yokumela wu ofesi ya thambi ya Sierra Leone. Abali awewo kafuna m ‘bali wathazi wo-otela koma teto unoyo unaanda onga Chingezi na Chifulenchi ira akale woing’anela dela wu Guinea. M’bali Vigo andiwandelile ira ndinofunji-iwa ira ndapange utumiki unola. Lie oosindikiza ira utumikila kai wokweya. Ndiye oondilangiza ira, “Uiganizele khanila wa-anasomede.” Mombaranya ndoosomedela ira, “Voi ngu Yehova unoyo unanditumiza ndinodowa.”

Ndoogwela ndege dowa wu Sierra Leone ndipo ndoodowa dowa gumana na abali a wu ofesi ya thambi. M’bali m’mo-iwa wa mu komiti ya Thambi andiwandelile ira, “Kaninaiziwa mwemo chito yolaleela inaendelaathu wu Guinea.” Ngakale ira ofesi ya thambila chiineyo yaing’anela chito yolaleela wu Guinea, katawanda lumikizana na ofalisa a wewo chifukwa ya mavuto a vyandale anayo kali wewo. Aliwa kali kangashishile maulendo angasene koma vyaali vyorucha tumizawo athu amo-i. Eno koondivepa ira ndidowe ulukulu la ilambweyo wu Conakry ira ndidowe ndavepe chilolezo yokala muilambweyo.

Ndingafiile wu Conakry ndoodowa wu ofesi ya kazembe wa ilambo ya Nigeria. Ndoomuwandela kazembeyo ira ndinofuna za laleela wu Guinea. Liye andiwandelile ira kandikale wewo chifukwa mwina ndinokoza mangiwa kapena vyongo vimo-i vyotakala vinokoza ndiireela. Oondiwandela ira, “Uwelele wu Nigeria walaleelenga wewo,” koma miyo ndomusomeda ira, “Ndinofunechecha kala wuno.” Eno Kazembeyo oolembela kalata nduna yoona vya athu ovolowa na okuma muilambo ya Guinea ndipo ndunoyo oondiwachela pama.

Vanduliviwa ndoowelela wu thambi ya wu Guinea Leone dowa afotokozela abali vyevyo ndunoyo aongile liye. Abalayo koosangalala vinjinji kangavwile mwemo Yehova andidalisele liye va ulendola. Ndali ndingava-iwe ufulu wokala muilambo ya Guinea.

Mu 1978 mpakana 1989, ndootumikela monga oing’anela dela wu Guinea na Sierra Leone koma teto monga oing’anela dela wo-idedela wu Liberia. Vowambeela ndoobulelabulela, ndipo thawi dimo-i vyevi vyooireya ndingali umadela awu ndendayi. Koma abali koesaesa ndilandela wu chipatala.

Va thawi imo-iwa ndoobulela malungo alukulu koma teto nyowa da m’mbani. Ndingachilile ndoovwa ira abali kakambilana vya wewo kanadoweathu kandisunge ndatatiya. Ngakale ira ndoogumana na vyoophi-a vyoi-eni kandiganizelevo vyo-iya utumikanga. Ndinororomelave ira chitetezo yeniyeni inakumela wa Mulungu unoyo unanivenyi-e ngati ningatatiile.

ROROMELA YEHOVA LIMO-I NA MU-IYANANGA

Mu 1988 ndoogumana na Dorcas unoyo apanga upainiya, ndipo ali woviyevi-a koma teto ookonda Yehova. Nootelana ndipo napangela limo-i utumiki woing’anela dela. Dorcas ngu mu-iyana wa chikondi koma teto wovipeleka. Thawi dimo-i nooenda wavati maulendo olapa mwina makilomita 25 kumela pimgo m’mo-iwa dowa wu pingo m’mo-iwa ningatukulile katundu. Nadowanga umipingo daundendayi vinjinji, nagwela magalimoto endanga vang’ono vang’ono m’miseu damatope koma teto mazenje.

Dorcas ngolimba murima vinjinji. Mwaisazo, thawi imo-iwa noolambuwa mi-inje yokaana gonya. Va thawi imo-iwa nangali vaulendo unoyo naendile iyo malambo 5 ndipo vamatabwa vamulato m’mo-iwa wali ungaonongeile. Eno noolambuwa mu-injeyo vo-indi-eda chito ngalawa. Dorcas angaimelile ira atite mungalaweyo, oomorela mwiko mwemo mwaali modii-a vinjinji. Etene kanaiziwa sambilela ndipo mu-injemo mookala gonya. Mwamwayi azombwe amo-iwa koovolowa mwikomo no muvulumucha. Wamalambo angasene etene nolepela gona naganizela vyevyo vyaireilevyo komave noopiliza utumiki-u.

Yaumambeelelo wa 1992 noodabwa vinjinji ningazindikilile ira Dorcas ngoyembekezela. Naganiza ira utumiki-u umalele vevo. Nooviwandela ira, “Yehova univa-a mpaso.” Vanduliviwa noomuva-a mwani-u wamu-iyanoyo zina loi Jahgift. Lelo mu Chingelezi linatatauza “Mpaso yokumela wa Jah”. Vangavirile chaka 4 kumela vevo abaliwile liye, nookala teto na mwana m’moi-wa zina lae Eric. Ninoona ira a-imi-u etene anala chimpaso yokumela wa Yehova. Jahgift ootumikela wa thawi yoyeva wu ofesi yotapulela mabuku wu Conakry, ndipo Eric ngu tumuki wokami-a.

Ngakale ira vathawiyo Dorcas oo-iya panga upainiya wavadela, opitilizave panga upainiya wogarateya wu alelanga a-imi-u. Yehova oondikami-a ira ndipitilizeve panga upainiya wavadela. A-imi-u kangaulukulile Dorcas oowambeela teto panga upainiya wavadela. Vano ninatumikela monga amishonale wu Conakry.

YEHOVA NGUNOYO UNATETEZA

Thawi detene ndiikala ndidowanga uliwetene wewo Yehova anditumiza liye. Thawi dinjinji niikala nionanga liye anitetezanga koma teto nidalisa. Roromela Yehova wuniteteza wu mavuto anjinji anayo kanasausa athu anayo kanaroromela chuma. Miyo na Dorcas niivionela eki-u ira chitetezo yeniyeni inakumela wa Yehova, unoyo uli “Mulungu wachipulumuso yi-u.” (1 Lim. 16:35) Kandinakaikela ira athu anayo kanamurorormela liye ‘unomanga moywiwa mulipunda la moyo ira utetezeye.’ — 1 Sam. 25:29.