Nisazi-edenga Mwemo Yehova na Yesu Munaganizelaathu

1-2. Kodi muomeliwana Yehova unatangani-avo n‘ni, nanga Yesu atonyi-edile avi ira oomuomeliwana Yehova na murimae wetene?

“MUMUOMELIWENGANA Yehova Mulungwinyu na muriminyu wetene, moywinyu wetene, kopolo dinyu detene, na maganizwinyu etene.” (Luka 10:27) Voonga mawu anala Yesu ootonyi-eda ira leli lali lamulo lofuneya vinjinji muilamulo ya Mose. Iziwani ira muomeliwana Yehova unotangani-avo murimi-u, unoyo unaimelela vyevyo ninaomeliwana iyo, mwemo ninavwela iyo koma teto mwemo ninaganizela iyo. Unotangani-avo teto vipeleka wa Yehova na murimi-u wetene koma teto kopolo di-u detene. Muomeliwana Yehova unotangani-avo teto maganizwi-u, anayo kanaimelela mwemo ninaonela iyo khani do-iyana iyana. Pivyoona ira kaninavwecheche mwemo Yehova munaganizela liye. Komave ninowanda vwechecha mwemo Mulungu munaganizela liye vofunjeda “maganizo a Kristu,” chifukwa Yesu unosazi-eda ndendende mwemo Babae munaganizela liye. — 1 Akor. 2:16

² Yesu oomuomeliwana vinjinji Babae na murimae wetene. Liye ooiziwa vyevyo Mulungu afuna liye ira apange, moi ali wokozeya panga vyongo mogwilizana na vyevyo Mulungu afuna liye ngakale ira ooiziwa vyoi vinopangi-a ira agumane na mavuto. Chifukwa yoi liye ooganizela vinjinjii vyomusangalasa Babae, Yesu kaalolile ira iliyetene imulepeli-e kwakwaneli-eda yolingae.

3. Kodi namarumiwa Petulo afunjedile n’ni wa Yesu, nanga alimbikisile Akristu afwae panga n’ni? (1 Petulo 4:1)

³ Petulo na anamarumiwa afwae kookaana mwai wokala na Yesu moi koofunjeda mwemo Yesuyo mwaganizela liye. Vevo Petulo alemba liye kalatae yowambeela yowandeliwa, oowalimbikisa Akristu ira kavikozeeli-e vokaana maganizo anayo Kristu an’na liye. (Welengani 1 Petulo 4:1.) Vevo Petulo aonga liye ira nanyene teto “kozeelani,” oo-indi-eda chito mawu anayo muiwongelo yowambeela kanafotokoza vya msilikali unoyo utukulile vida vyae vokozeela kondo. Eno Akristu kasazi-edanga mwemo Yesu mwaganizela liye kanakala ira koolanda ida yakopolo ineyo inaakami-e limbana na uchimo koma teto ilambo yolamuleliwa na Satanela. — 2 Akor. 10:3-5; Aife. 6:12.

4. Kodi khanila inanikami-a avi ira nisazi-edenga malangizo anayo Petulo apelekile liye?

⁴ Mukhanila ninokambilana mwemo Yesu mwaganizela liye moi ninoona teto mwemo ninamusazi-edele iyo. Ninoona vyevyo ninapange iyo ira (1) nisazi-edenga maganizo a Yehova, vyevyo vinanikami-e ira etene nikaena maganizo amo-i, (2) nikale oviyevi-a, koma teto (3) niganizenga pama nomuroromelanga Yehova vopempela wa liye.

NISAZI-EDENGA MWEMO YEHOVA MUNAGANIZELA LIYE

5. Kodi vathawi imo-i Petulo alepelile avi kala na maganizo ofwanafwana na a Yehova?

⁵ Kaganizelani vyevyo vyaireile vathawi imo-iwa vevo Petulo alepelile liye kaana maganizo a Yehova. Yesu oowawandela anamarumiwae ira liye unafuneya adowe wu Yelusalemu moi unodowa apelekiwe m’mandani mwa asogoleli aipembezo, unodowa azuzumi-iwe moi vogomi-eda viwa unodowa aphiwe. (Mat. 16:21) Vyevyo Yesu aongile liyevi vinaoneya ira vyoomurucha Petulo roromela akala Yehova unalole ira Yesu unoyo ali idedi-edo ya Isaraeli koma teto Mesiya wolonjeziwa, aphiwe. (Mat. 16:16) Eno Petulo oomulandela Yesu vambali nomuwandela momusumulula ira: “Viomeleni murima Mbwiyeni. Kamulole ira vyevi viuireeleni ngakale vang’ono.” (Mat. 16:22) Chifukwa yoi Petulo kaaganiza ngati Yehova vakhanila, liye kaana maganizo ofwanafwana na maganizo a Yesu.

6. Kodi Yesu atonyi-edile mundila iivi ira ooganiza ngati mwemo Yehova mwaganizela liye?

⁶ Maganizo a Yesu kali ogwilizana vinjinji na maganizo a Babae waudimu. Yesu oomuwandela Petulo ira: “Dowa unduli wanga, Satana! Weyo uli libwe lokwakwatuwi-a wa miyo chifukwa vyevyo unaganiza we kai maganizo a Mulungu, koma maganizo a athu.” (Mat. 16:23) Vinaoneya ira Petulo ookaana vyolinga vyapama, koma Yesu ookoonda arela malangizwae. Veva vikala phuzilo lofuneya wa iyo. Kayali yolinga ya Yehova ira Yesu aze akaena moyo oogumana na mavuto aliyetene. Vathawi inela Petulo oofunjeda likundo lofuneya vinjinji loi unafuneya kaana maganizo a Yehova.

7. Kodi Petulo atonyi-edile avi ira afuneela chenja ira maganizwae kagwilizanenga na a Yehova ? (Onani vatakuru lowambeela.)

⁷ Vangavirile thawi, Petulo ootonyi-eda ira oofuna funjeda ira aganizenga ngati mwemo Yehova munaganizela liye. Thawi ya Yehova yali ingakwakwanile yoi athu a mitundu dimo-i anayo kali ooduliwa kakale mbali ya gulu la athu a Mulungu. Petulo ootumiziwa ira adowe amulaleele Koneliyo, unoyo ali muthu wowambeela mwa athu a mitundu dimo-i kala Mkristu. Ayuda kataendelana na athu a mitundu dimo-i, eno vyali vyovweya ira Petulo afuneela kozeeli-iwa pama ira apange utumiki unoyo ava-iwe liye. Petulo angaiziwile vyevyo Mulungu afuna liye vakhanila oochenja maganizwae. Vyo-arelavo viwa pivyoi, Koneliyo angamuvepile ira adowe waniwa, Petulo oodowa ‘moonyinyirika.’ (Vyo. 10:28, 29) Liye oolaleela wa Koneliyo na athu a m’banja lae moi etene koobatiziwa. — Vyoira 10:21-23, 34, 35, 44-48.

8. Kodi ninatonyi-ede avi ira maganizwi-u kanogwilizana na maganizo a Yehova? (1 Petulo 3:8 na mawu a m’pedi)

⁸ Vangavirile chaka, Petulo oowalimbikisa Akristu afwae ira kakale “amaganizo amo-i.” (Welengani 1 Petulo 3:8 na mawu a m’pedi.) Monga athu a Yehova, ninokoza kaana maganizo ofwanafwana vosazi-eda maganizo a Yehova, anayo kanafotokoziwa m’Mawae Baibulo. Mwaisazo, Yesu oowalimbikisa o-arelae ira ka-elenga Umwene vamalo owambeela. (Mat. 6:33) Voganizela vyevi wofalisa m’mo-i wa mupingo mwinyu unokoza ganiza vyoi aambeele panga utumiki umo-iwene wathawi detene. M’malo momufooki-a, ninafuneya onga vyapama vyokuza vyevyo usakulile liyevyo koma teto mukami-a ira akwakwaneli-ede vyolinga vyae.

KALANI OVIYEVI-A

9-10. Kodi Yesu atonyi-edile avi viyevi-a mundila yavadela?

⁹ Vama-iyu ogomi-eda a moywae, Yesu oofunji-a Petulo na anamarumiwa afwae likundo lofuneya vinjinji lokuza viyevi-a. Vadambo lelo Yesu ali angarumile Petulo na Yohani ira kasakaede vyongo vimo-i na vimo-i, vokozeela yodja yomari-a ineyo kadjeleathu limo-i Yesuyo aanaphiwe. Vokozeelavo, vinaoneya ira kafuneela onechecha ira vikala beseni la ma-inje koma teto vyopukutela nayolinga yoi alendo anayo kaze, ka-ambi-iwe manyalo kaanambeele dja. Koma kodi mbaani unoyo a-inde chito yooneya ngati yonyozeela?

¹⁰ Moozengeleza, Yesu ootonyi-eda viyevi-a mundila yavadela vinjinji. Vinaoneya ira anamarumiwayo koodabwa vinjinji muona Yesu a-indanga chito ineyo thawi dinjinji ya-indiwa na athu o-inda chito davande. Yesu ookurula malayae aunde, nomanga yopukutela muyuni mwae, no-ela ma-inje m’beseni nowambeela a-ambi-a manyalo. (Yoh. 13:4, 5) Vinaoneya ira vyoomulandela thawi ira amari-e ambi-a manyalo a anamarumiwae etene 12, tangani-avo teto ambi-a manyalo a Yudasi, unoyo ali anga-alile vang’ono mupeleka. Koma moviyevi-a, Yesu oomari-a inda chitwela. Vanduli viwa moleza murima Yesu oonga ira: “Kodi munoiziwa chifukwa iwa ndi-ambi-ile manyalwinyu? Nyo munandiromolecha ira ‘Mphuzisi’ koma teto ‘Ambwiye,’ munaongecha vyoona, chifukwa miyo ndili Mphuzisi koma teto Ambwiye. Eno akala miyo unoyo ndili Ambwiye koma teto Mphuzisi, ndi-ambi-ile manyalwinyu, Nanyene teto munafuneya ambi-ananga manyalo.” — Yoh. 13:12-14.

11. Kodi Petulo atonyi-edile avi ira ali angafunjedile kala woviyevi-a? (1 Petulo:5:5) (Onani teto ithuzithuzi.)

¹¹ Petulo oofunjeda kala woviyevi-a kumela wa Yesu. Yesu angawelele udimu, Petulo oopanga vyodabwi-a vevo aili-ile liye muthu unoyo abaliwe angali worangala. (Vyo. 1:8, 9; 3:2, 6-8) Vyevyo vyaireilevyo vyoopangi-a ira athu anjinji kasonkane vamalwala. (Vyo. 3:11) Kodi Petulo oosakula ira ulemelelo udowe wa liye voganizela ira aulukulele muikalelo ineyo yaona ira chuka na udindo kofuneya vinjinji? Naari. Moviyevi-a Petulo kaalolile tamandiwa, m’malo mwiwa oopeleka ulemelelo wa Yehova na Yesu voonga ira: “Mu zina la [Yesu] koma teto chifukwa yoi ninororomela zina layelo, muthu unoyo munamuona nyoola koma teto muiziwa, uila.” (Vyo. 3:12-16) Mawu anayo Petulo a-indi-edile liye chito mu kalata ineyo alembele liye Akristu vakhani yofuneya yokala oviyevi-a, unaniumbucha vyevyo Yesu apangile liye vevo a-ambi-a liye manyalo a anamarumiwae. — Welengani 1 Petulo 5:5.

12. Mofwanafwana na Petulo, kodi ninatonyi-ede avi ira nili oviyevi-a?

¹² Ninokoza landela isazo ya Petulo vokala oviyevi-a. Umbuwelani ira viyevi-a unotangani-avo vyongo vinjinji ookala kedanga onga mawu apama. Mawu anayo Petulo a-indi-edile liye chito vofotokoza vyoviyevi-a, kanatonyi-eda ira Viyevi-a unotangani-avo— “mwemo ninaganizela iyo vyokuza iyo koma teto athu amo-iwa.” Ninopangela amo-i vyapama chifukwa yoi ninomuomeliwana Yehova na athu, ookala chifukwa yoi athu amo-i kanione. Ninotonyi-eda ira nili oviyevi-a akala ninasangalala votumikela Yehova na abali-u, ngakale ira athu amo-iwa katinaona vyevyo ninapanga iyo. — Mat. 6:1-4.

MUKALENGA “OGANIZA PAMA”

13. Kodi kala “oganiza pama” “unatangani-avo n’ni?”

¹³ Kodi kala “oganiza pama” unatangani-avo n’ni? (1 Pe. 4:7) Mkristu woganiza pama unoesaesa sakula vyongo volandela maganizo a Yehova. Mkristu woi eni unoiziwa ira kala vausamwali na Yehova kofuneya vinjinji kwaranya ilietene. Liye kanaviganizela kwaranya mwemo unafuneela liye viganizelela, chifukwa yoi unoiziwa ira kanaiziwa vyetene. Moi liye unotonyi-eda ira unomuroromela Mulungu vopempela wa liye thawi detene.a

14. Kodi vathawi imo-i Petulo alepelile avi muroromela Yehova?

¹⁴ Vama-iyu ogomi-eda a moywae Yesu aanaphiwe, oochenjeza ofunjedae ira: “Etene nyene munonditawa nondi-iya meka ma-iyu vano.” Petulo oosomeda mosimikiza ira: “Ngakale etene anala kangatawile nou-iyani, miyo mekave kandinaza nditawa!” Vama-iyu anala Yesu oolangiza ofunjedae ira: “Kalanive maso, teto mupitilizeve pempela.” (Mat. 26:31, 33, 41) Aakale ira Petulo u-arela malangizo anayo ava-iwe liye vowambeela, ookala olimba murima nosomedela ira ali wofunjeda wa Yesu. Koma m’malo mwiwa, liye oomukoonda mbwiyae moi vanduli viwa oovivwela chisoni.— Mat. 26:69-75.

15. Kodi Yesu atonyi-edile avi ira ali woganiza pama va ma-iyu ogomi-eda a moywae?

¹⁵ Yesu oomuroromela vinjinji Yehova. Ngakale ira ali wangwilo, Yesu oopempela moweli-edaweli-eda wa Babae. Vyevi vyoomukami-a ira alimbe murima nopanga vyevyo Yehova afuna liye. (Mat. 26:39, 42, 44; Yoh. 18:4, 5) Mookaikela ona Yesu apempelanga woomukami-a Petulo wa moywae wetene.

16. Kodi Petulo atonyi-edile avi ira ali woganiza pama? (1 Petulo 4:7)

¹⁶ Vangavirile thawi, Petulo oowambeela muroromela vinjinji Yehova vopempela wa liye. Yesu unoyo ali angakede venyi-iwa wene, oomusimikizela Petulo na anamarumiwa amo-i ira kanoza kaatumizele zimu owela ira kawande kwakwani-a inda chito yolaleela. Komave liye oowawandela ira kadedi-e wu Yerusalemu fiyeda vyevyo vyangaireile. (Luka 24:49; Vyo. 1:4, 5) Ndiye kodi Petulo apanga n’ni vodedi-edavo? Petulo na Akristu afwae “koolimbi-eda pempela.” (Vyo. 1:13, 14) Vanduli viwa, mukalataye yowambeela, Petulo oolimbikisa Akristu afwae ira kanafuneya kala oganiza pama koma teto muroromela Yehova vopempela wa liye. (Welengani 1 Petulo 4:7.) Petulo ookala m’bali wolimba mwauzimu koma teto woganiza pama, unoyo alimbikisa abali na arongolae. — Agal. 2:9.

17. Ngakale nangan’na luso limo-iliwa lene lavadela, kodi ninafuneela pitiliza panga n’ni? (Onani teto ithuzithuzi.)

¹⁷ Ira nikale oganiza pama, thawi detene ninafuneela pempela wa Yehova. Ninafuneya pempelanga wa Yehova ira anikami-enga, ngakale nangan’na maluso amo-iwene avadela. Ninopempela wa Yehova ira anisogolelenga, moi ninororomela ira liye unoiziwa vyevyo vili vyapama vinjinji wa iyo.

18. Kodi ninapange avi ira nichenje mwemo ninaganizela iyo nokaana maganizo ngati a Yehova?

¹⁸ Ninoyamikela vinjinji ira Yehova oonilenga mundila yoi niwandenga sazi-eda makalelwae. (Gen. 1:26) Pivyoona ira kaninawande musazi-eda ndendende. (Yes. 55:9) Komave mofwanafwana na Petulo, ninokoza chenja nokala na maganizo ngati a Yehova. Eno tiyemoni nipitilize ganiza ngati mwemo Yehova munaganizela liye, kala oviyevi-a koma teto kala oganiza pama.