Ndanda la Yehova Kai Lokwiiva

1. Kodi Mose atonyi-edile avi ira oororomela Yehova vosogolela Aisaraeli kuma wu Iguputo?

BUKU la Aheberi linoromola athu anjinji anayo karoromela Yehova. M’mo-i mwa athu anala ngu Mose. (Aheb. 3:2-5; 11:23-25) Liye ootonyi-eda iroromelo vevo asogolela liye Aisaraeli vokuma wu Iguputo moi kaovile Farao na asilikalae. Oororomela Yehova moi oosogolela Aisaraeli lambuwa Nyanja Yofiila koma teto vovira muipululu. (Aheb. 11:27-29) Aisaraeli anjinji kookaikela vyoi Yehova unokoza asamalela koma Mose oopitilizave muroromela Mulungu. Mose ookaana vifukwa vyomuroromela Mulungu, chifukwa Yehovoyo oopanga vyongo vyodabwi-a vopeleka ma-inje na yodja wa athwayo muipululu.a — Ekis. 15:22-25; Sal. 78:23-25.

2. Chifukwa n’ni Mulungu amufukile Mose ira: “Kodi Ndanda la Yehova tilokwiiva?” (Numeri 11:21-23)

² Ngakale ira Mose ookaana iroromelo yolimba, vathawi imo-iwa ookaikela vyevyo Yehova aongile liye. Vangavirile chaka imo-i kumela vevo kakumileathu wu Iguputo, Yehova oolonjeza athwae ira unoza aava-e nyama. Mose ookaikela akala Yehova unaava-e nyama yokwakwanela athu mamiliyoni anjinji anayo kali muipululu. Vosomeda, Yehova oomufuka Mose ira: “Kodi ndanda la Yehova tilokwiiva?” (Welengani Numeri 11:21-23.) Mawu oyi “ndanda la Yehova” kanaimelela zimu owela kapena ira kopolo ineyo Mulungu unai-indi-eda liye chito vopanga vyongo. Veva ninokoza onga ira Yehova amufuka Mose ira, ‘Kodi unaganiza ira kandinakwakwani-e panga vyevyo ndinaongamiyovi?’

3. Kodi kambilana khani ya Mose koma teto Aisaraeli unanikami-e avi?

³ Kodi nyo mookaikelavo akala Yehova unaze auva-eni vyofuneela va moywinyu na wa Banja linyu? Kaya vyevi vyoouireelavoni kapena naari, tiyemoni nikambilane khani ya Mose na ya Aisaraeli anayo kakaikela akala Mulungu unawava-e vyevyo kafuneelaathu. Makundo a m’Malemba anayo ninakambilane iyo kanonikami-a ira niroromelenga ira ndanda la Yehova kai lokwiiva.

VYEVYO NINAFUNJEDE IYO WA MOSE NA AISARAELI

4. Chifukwa n’ni athu anjinji kaambeele kaikela akala Yehova unaava-e yodja?

⁴ Kodi yaireile chin’ni ira Aisaraeli anjinji kaambeele kaikela vyoi Yehova unokoza ava-a vyevyo kafuneelaathu? Aisaraeli limo-i na “gulu la athu a mitundu do-iyana-iyana” kookala muipululu wa thawi yoyeva va ulendwiwa wokuma wu Iguputo dowa wu Ilambo Yolonjeziwa. (Ekis. 12:38; Doto. 8:15) Athu a mitundu do-iyana-iyanayo koowambeela dandaula ira koogomana dja mana. Moi Aisaraeli naaliwene teto koowambeela dandaula. (Num. 11:4-6) Athwayo koowambeela kumbwela vyodja vimo-i vyevyo kanaathu wu Iguputo. Mose angapanikizeile oowambeela ganiza ira liye ngunoyo afuneela ava-a athwayo yodja. — Num. 11:13, 14.

5-6. Kodi ninafunjeda n’ni va vyevyo Aisaraeli kalandeleathu wa athu amo-i?

⁵ Vinaoneya ira Aisaraeli koolandela ooyamikela wa athu a mitundu dimo-i. Na-iyene teto ninokoza landela murima wooyamikela unoyo athu amo-i kanaathu moi ninokoza lepelanga sangalala na vyevyo Yehova unaniva-a liye. Vyevi vinokoza ireya simbwasimbwa vevo ninaganizela iyo vyevyo nan’na iyo wale kapena teto nasililanga vyevyo athu amo-i kanaathu. Koma kaya vyongo vili avi, ninokoza sangalalanga nakala na murima woyamikela.

⁶ Aisaraeli kafuneya umbuwela ira Mulungu oowasimikizela ira kanoza kafwanye vyongo vyapama kafiya Muilambo Yolonjeziwa. Lonjezo leli lali loi linaza likwakwaneli-ediwa kafiya muilambo isha ookala muipululu. Na-iyene teto ninokoza panga pama ira niganizelenga vyevyo Yehova unilonjezile liye ira unoza aniva-e muilambo isha m’malo moganizelanga vyongo vyoi kanina muilambwela. Niganizelenga teto malemba anayo kananikami-e ira nimuroromelenga vinjinji Yehova.

7. Chifukwa n’ni ninafuneya roromela ira ndanda la Yehova kai lokwiiva?

⁷ Komave mwina munokoza dabwanga ira chifukwa n’ni Mulungu amufukile Mose ira: “Kodi ndanda la Yehova tilokwiiva?” Yehova afunile ira amukami-e Mose iziwa vyongo vin’li. Yowambeela, ndanda la Yehova ti lakopolo vinjinji. Yanambiili, ndandalaelo linokoza fiya valivetene vofuna akami-a athu. Mulungu oowanda ava-a Aisaraeli nyama ngakale ira kali muipululu waekiwa. Mulungu oo-indi-eda chito “ndanda la kopolo koma teto muonwae wotapuwa” ira aakami-e. (Sal. 136:11, 12) Eno nagumana na mavuto kanikaikelenga ira ndanda la Yehova linokoza fiya vevo nili iyo nonikami-a. — Sal. 138:6, 7.

8. Kodi ninapewe avi vyevyo athu amo-i kapangaathu kangali muipululu? (Onani teto ithuzithuzi.)

⁸ Va-anavire thawi indendai, Yehova ookwakwaneli-eda vyevyo alonjezile liye moi oowava-a athwayo vizili vinjinji. Koma Aisaraeli katayamikele vyongo vyodabwi-a vyevyo Mulungu awapangele liye. M’malo moyamikela, athu anjinji kootonyi-eda murima wa djela. Aluwa koo-inda vizili vinjinji wa dambo letene. Yehova oolunduwa na athu “anayo katonyi-edile murima wa djela’’ moi oowalanga. (Num. 11:31-34) Kodi ninafunjedavo n’ni? Ninafuneya samala ira kaniambeele murima wadjela. Kaya nili olemela kapena osauwa, ninafuneya esaesa ira nisunge ‘chumi-u udimu’ vokala vausamwali wapama na Yehova koma teto Yesu Kristu. (Mat. 6:19, 20; Luka 16:9) Nera eno kaninakaikelenga ngakale vang’ono ira Yehova unoza anisamalele.

9. Vakhani yoi Yehova unoza anikami-e, kodi ninakale osimikiza vya n’ni?

⁹ Yehova ngokozeya kami-a athwae malambwano. Koma Vyevi kavinatapulela ira kaninasauwelenga ndalama kapena yodja.b Va likundo ti loi Yehova kanani-iye eki-u. Liye unoza anisamalele va mavuto o-iyana-iyana anayo ninagumanena iyo. Tiyemoni nikambilane ndila mbiili dedo ninatonyi-edele iyo ira ninororomela ira Yehova unoza anisamalele: (1) nagumananga na mavuto a vyachuma (2) naganizelanga vya mwemo ninaze iyo nifwanyele vyofuneya vamoyo usogolo.

NAGUMANANGA NA MAVUTO A VYACHUMA

10. Kodi mba mavuto a vyachuma aavi anayo ninagumanena iyo?

¹⁰ Vevo mapeto a ilambwela kanaandamelaathu, mavuto a vyachuma kanerenga enjedeleya. Vyongo monga mavuto a vyandale, kondo, ngozi damuilengedwe kapena marenda o-iyana-iyana, vinokoza ambeeli-a mavuto a vyachuma. Vinokoza nionongela ndalama, katundu, nyumba kapena teto chito inokoza nimalela. Ninokoza funeela saela chito imo-iwa kapena tamela wu dela limo-iliwa na yolinga yoi nisamalelenga banja li-u. Ndiye chin’ni inanikami-e ira nimuroromelenga Yehova vosakula vyoira?

11. Kodi chin’ni inaukami-eni mwagumana na mavuto a vyachuma? (Luka 12:29-31)

¹¹ Yongo yofuneya vinjinji ineyo ninapange iyo kupempela wa Yehova. (Miya. 16:3) Nimuvepenga ira anikami-e sakula pama vyoira koma teto ira anikami-e ira ‘kanivuteyenga murima’ chifukwa ya mavutwi-u. (Welengani Luka 12:29-31.) Mumuvepenga teto ira aukami-eni kaana murima woyamikela. (1 Tim. 6:7, 8) Musaelenga m’mabukwi-u ira muiziwe vyevyo munapange nyo akala munagumane na mavuto a vyachuma. Athu anjinji kanaonga ira khani da va jw.org doowakami-a vevo kagumanaathu na mavuto a vyachuma.

12. Kodi pivyofuka viivi vyevyo vinakami-e Mkristu vosakula vyoira vyokuza banja lae?

¹² Athu amo-i koosomedelavo dowa indela chito umalo olapelana na banja liwa koma vyo-arelavo viwa kavyali vyapama. Mwasakulanga chito, kamukedenga ganizela ndalama dedo munafwanyenganyo. Koma muganizelenga teto mwemo inakuzeleathu usamwalinyu na Yehova. (Luka 14:28) Munokoza vifuka ira: ‘Chin’ni inaireele banja langa akala ndinadowe undendai? Kodi ndinerenga kwakwani-a fwanyeya vamisonkano koma teto mu utumiki?’ Akala mun’na a-ima munafuneya teto vifuka yofuka ila: ‘Akala ndinavenyevo, kodi ndinalele avi a-imanga “vowava-a malangizo koma teto afunji-a mogwilizana na vyevyo Yehova unaonga liye?’’’ (Aife. 6:4) Muyendelenga maganizo a Mulungu ookala a abalinyu kapena a afwinyu anayo katinalemekeza makundo a m’Malemba.c Tony, unoyo unakala wu mazulo a ilambo ya Asia, ukala avepiwanga maulendo angasene ira a-indele chito yapama unde. Koma angaipempelele khanila koma teto kambilana na iyanae ooganiza ira kalole. M’malo mwiwa kookambilana vyoi kaevi-e vyongo vyevyo kanagulaathu m’banja mwiwa. Tonny aongile ira: “Vofiya vano ndiikami-a athu anjinji iziwa Yehova moi a-imi-u kanoomeliwa choonadi. Banja li-u liifunjeda ira akala nina-arele lemba la Mateyu 6:33, Yehova unoza anisamalele.”

KOZEELA VYAUSOGOLO

13. Kodi pivyongo viivi vyevyo ninapenge iyo vokozeela vyausogolo?

¹³ Kodi ninatonyi-ede avi ira ninomuroromela Yehova nakozeelanga vyausogolo vathawi ineyo ninaze iyo nikalambe? Baibulo linonilimbikisa ira ni-indenga chito mwatindi ira kanize nivuteye fwanya vyofuneya va moyo usogolo. (Miya. 6:6-11) Akala pivyowandeya, chizelu sunga ndalama imo-iwene ira nize nii-indi-ede chito usogolo. Chifukwa ndalama inoteteza. (Nam. 7:12) Koma kanilole ira saela ndalama ukale yongo yofuneya vinjinji vamoywi-u.

14. Chifukwa n’ni ninafuneya ganizela vya lemba la Aheberi 13:5 nakozeelanga vyausogolo?

¹⁴ Yesu ootonyi-eda ira kai zelu kaana ndalama koma ookala “wolemela wa Mulungu.”(Luka 12:16-21) Vale aongile ira vyamechelo kavinaiziweya. (Miya. 23:4, 5; Yak. 4:13-15) Iyo Akristu ninogumana teto na vuto limo-iliwa. Yesu aongile ira ninafuneya kozeya i-ya chumi-u ira nikale o-arelae. (Luka 14:33.) Akristu awu Yudeya koololela i-ya vyongo viwa moi katadandaula. (Aheb. 10:34) Malambwano teto abali na arongola anjinji koololela iya vyongo viwa kapena chito diwa nayolinga yoi kativolowele ndale. (Chiv. 13:16, 17) Kodi chin’ni ineyo yawakami-ile ira kapange vyevyo? Aluwa kanororomela vinjinji lonjezo la Yehova loi: “Kandinaza ndiu-iyani kapena utatilani ngakale vang’ono.” (Welengani Aheberi 13:5.) Ninoesaesa kozeela vyausogolo, koma nagumana na mavuto a mwazizizi ninororomela ira Yehova unoza anikami-e.

15. Kodi makolo kanafuneya kaana maganizo oyi avi vakhani ya a-imiwa? (Onani teto ithuzithuzi.)

¹⁵ Muvikalelo vimo-i, mabanja kanokala na a-ima na yolinga yoi a-imayo kaze kawakami-enga makolwayo kaza kakalamba. Baibulo linaonga ira makolo kanafuneya samalelanga a-imiwa. (2 Akor. 12:14) Pivyoona ira makolo kakalamba kanafuneya kami-iwa na a-imiwa moi a-ima anjinji kanosangalala kami-a makolwiwa. (1 Tim. 5:4) Koma makolo Aikristu kanozindikila ira kanokala osangalala vinjinji akala kanakaena a-ima nowakami-anga kala atumiki a Yehova ookala kaana yolinga yoi a-imayo kaze kawakami-enga aluwa kaza kakalamba usogolo. — 3 Yoh. 4.

16. Kodi makolo kanapange n’ni vokozeeli-a a-imiwa ira kaze kafwanyenga vyofuneya va moyo? (Aifeso 4:28)

¹⁶ Muwava-enga a-iminyu isazo yapama vakhani yororomela Yehova. Muwafunji-enga inda chito mwatindi ambeela kangali ang’onong’ono. (Miya. 29:21; welengani Aifeso 4:28.) Kaulukulanga muwawandelenga ira kalimbi-edenga sukulu. Makolo kanafuneya saela koma teto indi-eda chito makundo a m’Baikbulo vokami-a a-imiwa ira ka-indi-edenga chito pama maphuzilo nayolinga yoi kaze kafwanyenga vyofuneya va moyo wu katumikelanga Yehova.

17. Kodi kaninafuneya kaikela vya n’ni?

¹⁷ Iyo atumiki a Yehova ninafuneela roromelanga ira Yehova ukaana kopolo koma teto murima wofunechecha nikami-a fwanya vyofuneya. Vevo mapeto a ilambwela kanaandamelaathu ninerenga shishiwa vakhani yororomela Yehova. Ndiye kaya ninagumana na vyoi avi, ninafuneya roromelanga ira Yehova unoza a-indi-ede chito kopolo dae vonikami-a fwanya vyofuneela va moyo. Kanikaikelenga ira muonwae wotapuwa koma teto ndanda lae la kopolo linokoza nikami-a uliwetene wewo nili iyo.