Mukami-enga Ofunjeda Baibulo Ira Afiye Vowambeela Tumikela Yehova

1-2. (a) Chifukwa n’ni ofunjeda Baibulo amo-i kanazengeleza ambeela tumikela Yehova? (b) Kodi ninakambilana n’ni mukhanila?

KODI vathawi imo-iwa nanyen’ne moozengeleza ira mukale wa mboni da Yehova? Mwina moova ira afwinyu, athu o-indana chito, kapena abalinyu kokooza kumudwa mwakala wa Mboni da Yehova. Kapena teto moona ira kamunakwakwani-e arela makundo a Mulungu. Akala vyali eno, munokoza vwechecha chifukwa iwa ofunjeda Baibulo amo-iwa kanazengeleza ira kasakule ira kaambeele mutumikela Yehova.

² Yesu oozindikila ira vyongo ngati vyevi vinokoza lepeli-a muthu ambeela tumikela Yehova. (Mat. 13:20-22) Komave liye ka-iile akami-a athu anayo kazengereza mu-arela. M’malo mwiwa oowafunji-a ofunjedae iziwa mwemo kanakami-eleathu athu oyi eno (1) iziwa vyongo vyevyo vinaalepeli-a dowa vasogolo, (2) muomeluwana vinjinji Yehova, (3) ona mwemo kanafuneelaathu ela vyongo vyokuza lambela vamalo owambeela koma teto (4) limbana na mavuto anayo kanagumananaathu. Kodi nina-indi-ede avi chito makundo anayo Yesu awandelile liye ofunjedae na-indi-edanga chito buku la Sangalalani na Moyo Mpakana Walewale! Vokami-a ofunjeda Baibulo ira atumikelenga Yehova?

MUMUKAMI-ENGA OFUNJEDA BAIBULO IZIWA INEYO INAMULEPELI-A DOWA VASOGOLO

3. Kodi mwina chin’ni yalepeli-e Nikodemo kala o-arela wa Yesu?

³ Nikodemo, unoyo ali m’mo-i mwa oweluza wa Khoti Lilukulu la Ayuda, va thawi imo-iwa ookaana vuto lelo lamulepeli-a kala ofunjeda wa Yesu. Vangakede vira medi 6 kumela vevo Yesu aambeele liye utumikae, Nikodemo oozindikila ira Yesu arumiwe na Mulungu. (Yoh. 3:1, 2) Koma liye oosakula gumana na Yesu mwaisisi “chifukwa oova Ayuda.” (Yoh. 7:13; 12:42) Mwina liye aganiza ira unotatila vyongo vinjinji akala ofunjeda wa Yesu.a

4. Kodi Yesu amukami-ile avi Nikodemo iziwa vyevyo Mulungu afuna liye ira apange?

⁴ Nikodemo ooiziwa Ilamulo, komave afuneya kami-iwa ira aiziwe vyevyo Yehova unafuna liye ira apange. Ndiye kodi Yesu amukami-ile avi? Yesu kaakoondile moi oopanga vyoi kagumane na Nikodemo ma-iyu. Yesu oomufotokozela pama vyevyo afuneya liye panga ira akale o-arelae. Vomuwandela vyevyo afuneya liye panga oomufotokozela movweya pama ira afuneya lapa machimwae, no batiziwa mwiko koma teto muroromela Mwana wa Mulungu. — Yoh. 3:5, 14-21.

5. Kodi ninamukami-e avi ofunjeda Baibulo iziwa vyevyo vinamulepeli-e dowa vasogolo?

⁵ Ngakale ofunjeda Baibulo unoyo unavwechecha pama malemba, unokoza funeya kami-iwa iziwa vyevyo vinamulepeli-a dowa vasogolo. Mwaisazo, vyongo vimo-i vyomulepeli-a vinokoza kala chito ineyo una-inda liye kapena teto runi-iwa na abalae. Eno mufwanyenga thawi yoi mumukami-enga. Mwina munokoza muwandela ira muendena limo-i kapena teto muitanela waninyu. Vathawi ngati inela, munokoza muwandela ira amasuwenga ufotokozelani mavuto anayo unagumanana liye. Mumulimbikisenga ofunjedoyo ira achenje akala vanafuneya panga eno, ookala ausangalaseni nyo koma atonyi-edenga ira unomuomeliwana Yehova.

6. Kodi munamukami-e avi ofunjeda Baibulo ira alimbe murima nowambeela arela vyevyo unafunjeda liye? (1 Akorinto 16:13)

⁶ Ofunjeda Baibulo aroromelanga ira Yehova unokoza mukami-a arela makundo a m’Baibulo, unokoza limba murima nowambeela arela vyevyo unafunjeda liye. (Welengani 1 Akorinto 16:13.) Vyevyo munapanga nyo vifwanafwanenga na vyevyo mphuzisi unapanga liye. Va thawi ineyo mwali nyo vasukulu, kodi mwamuomeluwana mphuzisi oyi avi? Mookaikela, moomuomeluwana mpuzisi unoyo aleza na nyo murima koma teto ukami-ani ona ira munokoza panga vinjinji. Mofwanafwana na vyevi, mphuzisi wapama wa Baibulo unofunji-a ofunjedae iziwa vyevyo Mulungu unafuna liye ira nipangenga, koma teto unomusimikizela ira Yehova unokoza mukami-a chenja akala vanafuneya panga eno. Kodi munapange avi ira mukale mphuzisi wapama?

MUMUKAMI-ENGA OFUNJEDA BAIBULO IRA AMUOMELUWENGANA VINJINJI YEHOVA

7. Kodi Yesu akami-ile avi athu anayo kamuvuruwana ira kamuomeluwengana vinjinji Yehova?

⁷ Yesu ooiziwa ira muomeluwana Mulungu unokoza kami-a ofunjedae ira ka-indi-edenga chito vyevyo kafunjedaathu. Thawi dinjinji liye oowafunji-a vyongo vyowakami-a ira kamuomeliwengana vinjinji babiwa waudimu. Mwaisazo, va thawi imo-iwa liye oomuyerekezela Yehova na baba unoyo unapeleka vyongo vyapama wa a-imae. (Mat. 7:9-11) Mwina ninokoza onga ira amo-i mwa athu anayo kamuvuruwana katakalilevo na baba wachikondi ngati unola. Kaganizelani mwemo aluwa kavweleathu Yesu angawafotokozele fanizo la baba wachifundo unoyo awachelile na manda men’li mwanae unoyo a-olowile. Aluwa koona mwemo Yehova mwaomeluwana liye a-imae a vailambo yavati.— Luka 15:20-24.

8. Kodi ninamukami-e avi ofunjeda Baibulo ira amuomeluwengana vinjinji Yehova?

⁸ Nanyen’ne teto munokoza kami-a ofunjeda Baibulo ira amuomeliwengana vinjinji Yehova vomufotokozela thawi detene makalelo apama anayo Mulungu un’na liye. Va phuzilo lililetene mumukami-enga ona gwilizana wewo ulivo vaari va vyevyo unafunjeda liye na likundo loi Yehova ngwa chikondi. Mwakambilananga vyokuza dipo, mumufotokozelenga mwemo dipolo linamukuzelaathu. (Arom. 5:8; 1 Yoh. 4:10) Ofunjedoyo unokoza ambeela muomeliwana vinjinji Yehova aganizelanga ira Yehovoyo unomuomeliwana liye vaekave. — Agal. 2:20.

9. Kodi chin’ni yamukami-ile michael ira aambeele tumikela Yehova?

⁹ Kaganizelani isazo ya Michael, wawu Indonesia. Liye aulukulele m’banja la mboni koma kaabatiziwile. Angan’na chaka 18, oodowa wu ilambo imo-iwa dowa inda chito yoendi-a magalimoto alukulu. Vanduli viwa ootela koma a-iile banja lae wu Indonesia liye dowa pitiliza inda chito uilambo imo-iwa. Vathawi ineyo iyanae na mwanae koowambeela funjeda Baibulo moi koodowa vasogolo. M’mae angatatiile, Michael ooganiza vyowelela wu Indonesia ira asamalelenga babae moi oosomedela ira afunjedenga Baibulo, moi vokambilana mbali yoi “Funjedani vyoenjedeleya” mu puzilo 27, m’buku loi Sangalalani na Moyo Mpakana Walewale! Michael ookuziwa vinjinji. Voganizela mwemo Yehova avwele liye angaonile mwanae avuteyanga, Michael oomori-a misodi. Liye oowambela yamikela vinjinji m’phaso ya dipo moi vyevi vyoomukami-a ira achenje vyongo va moywae nobatiziwa.

MUKAMI-ENGA OFUNJEDA BAIBULO IRA AONENGA TUMIKELA YEHOVA KALA OFUNEYA

10. Kodi Yesu aakami-ile avi ofunjedae ira ka-elenga vyongo vyokuza lambela vamalo owambeela vamoywiwa? (Luka 5:5-11) (Onani teto ithuzithuzi.)

¹⁰ Ofunjeda a Yesu koomuzindikila mombaraanya ira liye ali Mesiya. Koma kafuneya kami-iwa ira kaonenga chito yolaleela kala yofuneya vinjinji va moywiwa. Petulo na Andireya kali kangakalile ofunjeda a Yesu wa thawi yolapa vevo aawandele liye ira kakale o-arelae a thawi detene. (Mat. 4:18, 19) Aluwa koopanga bizimesi yoguli-a somba, mwina kapanga limo-i na Yakobo na Yohani. (Maliko 1:16-20) Vevo Petulo na Andireya “ka-iileathu mataviwa,” vinaoneya ira koofwanya ndila yoi kafwanyelenga mabanjiwa vyofuneya va moyo wu kamu-arelanga Yesu. Kodi chin’ni yaakami-ile ira kaonenga chito yolaleela kala yofuneya vinjinji kwaranya ndalama? Khani ya m’buku la Luka inonifotokozela ira Yesu oopanga yodabwi-a ineyo yaakami-ile ira karoromelenga ira Yehova unoza aava-e vyofuneya va moywiwa. — Welengani Luka 5:5-11.

11. Kodi nina-indi-ede chito avi vyevyo vyaireile vamoywi-u ira nilimbi-e iroromelo ya anayo ninafunjedana iyo Baibulo?

¹¹ Kaninawande panga vyodabwi-a ngati Yesu, koma ninokoza mufotokozela ofunjeda Baibulo mwemo Yehova munakami-ela liye athu anayo kana-ela vyongo vyokuza lambela vamalo owambeela. Mwaisazo, kodi munoumbuela mwemo Yehova mwaukami-eleni liye mwangaambeelile fwanyeya va misonkano da pingo? Mwina mwafuneya kambilana na abwaninyu ira kamuna-indenga chito va thawi yowenjedela akala thawiyo ili yodowa umisonkano. Mwamuwandelanga vyevyo vyauireeleni, mumufotokozelenga mwemo iroromelwinyu yalimbeleathu mwangaonile mwemo Yehova aukami-eleni liye va vyongo vyevyo mwasakulile nyo ira mu-elenga vyongo vyokuza lambela vamalo owambeela.

12. (a) Chifukwa n’ni ninafuneya dowa uphuzilo li-u na abali koma teto arongola o-iyana-iyana? (b) Kodi muna-indi-ede chito avi mavidiyo vomukami-a ofunjedinyu? Pelekani isazo.

¹² Ofunjedinyu unokoza pindula teto avwanga mwemo Akristu amo-iwa kachenjeleathu vyongo va moywiwa ira ka-elenga lambela Yehova va malo owambeela. Eno mwapangi-anga phuzilo la Baibulo, mudowengawo na abali koma teto arongola anayo kagumanile na vyongo vyo-iyana-iyana va moywiwa. Muwafukenga ira kafotokoze mwemo kafunjedeleathu choonadi koma teto vyevyo kapangileathu ira ka-elenga tumikela Yehova va malo owambeela. Enjedela vevo, muonelenga limo-i na ofunjedinyu mavidiyo avagawo loi “Funjedani Vyowenjedeleya” kapena “Onani Vimo-i” m’buku la Sangalalani na Moyo Mpakana Walewale! Mwaisazo, mwafunjedanga phunzilo 37, munokoza kambilana makundo a muvidiyo yoi Yehova Unoza Anisamalele.

MUMUKAMI-ENGA OFUNJEDA BAIBULO IRA AVILELENGA MAVUTO ANAYO UNAGUMANENA LIYE

13. Kodi Yesu aakami-ile avi ofunjedae kozeela runi-iwa?

¹³ Moweli-edaweli-eda, Yesu oowawandela ofunjedae ira kanoza kazuzumi-iwe na athu amo-i koma teto abaliwa. (Mat. 5:11; 10:22, 36) Umapeto wa utumikae, liye oowachenjeza ofunjedayo ira kanoza kaphiwe chifukwa yolambela Yehova. (Mat. 24:9; Yoh. 15:20; 16:2) Eno oowawandela ira kakalenga chelu kalaleelanga. Oowalangiza teto ira katikanganenga na athu oruni-a koma teto kakalenga osamala vinjinji.

14. Kodi ninamukami-e avi ofunjedi-u kozeela runi-iwa? (2 Timoteyu 3:12)

¹⁴ Ninokoza kami-a ofunjedi-u ira akozeelenga runi-iwa vomufotokozela vyevyo unagumanena liye kumela wa athu o-indana chito, afwae, koma teto abalae. (Welengani 2 Timoteyu 3:12.) Afwae amo-i kanokoza munyozanga chifukwa yo-arela makundo a m’Baibulo. Athu amo-i koma teto abalae kanokoza nyozanga vyevyo unaroromela liye. Mwamukozeeli-edanga mombaraanya vinokoza mukami-a ira aze akale okozeya aruni-iwanga.

15. Kodi chin’ni ineyo inamukami-e ofunjeda Baibulo ira avilelenga aruni-iwanga na abalae?

¹⁵ Ofunjeda Baibulo aruni-iwanga na abalae mumulimbikisenga ira aganizelenga ineyo ipangi-ile abalayayo ira kakumudwe. Mwina aluwa kanokoza onanga ira balioyo u-olochiwa kapena vinokoza kala ira aluwa kanoidana na Mbani da Yehova. Ngakale abalae a Yesu, va thawi imo-iwa katasangalala na vyevyo apanga liye. (Maliko 3:21; Yoh. 7:5) Mumukami-enga ofunjedoyo ira akalenga oleza murima koma teto aongenga mooma murima na athu amo-iwa tangani-avo abalae.

16. Kodi ninamukami-e avi ofunjeda Baibulo ira afotokozenga mwaluso vyevyo unaroromela liye?

¹⁶ Ngakale ira abalae kanokoza tonyi-eda chidwi chi pama ira ofunjedoyo kaafotokozelenga vyongo vinjinji va thawi imo-ive ovela ira vinokoza agomi-a moi vyevyo vinokoza apangi-a ira katifunenga teto vuruwana. Eno mumulimbikisenga ira afotokozenga vyevyo unaroromela liye na yolinga yoi awandenga kambilana na athu amo-iwa. (Akol. 4:6) Koma teto mwina unokoza alimbikisa abalayayo ira kavolowenga va jw.org. Vyevi vinokoza akami-a ira kafunjedenga vinjinji vyokuza Mboni da Yehova va thawiwa.

17. Kodi munamukami-e avi ofunjedinyu ira awandenga someda athu anayo kanakaana maganizo olakweya okuza Mboni da Yehova? (Onani teto ithuzithuzi.)

¹⁷ Munokoza indi-eda chito gawo la va jw.org loi “Vyofukiwa Wiliwili” vokami-a ofunjedinyu iziwa mwemo munasomedele liye vyofuka vyevyo abalae kapena afwae awu chito kanamufukeathu. (2 Tim. 2:24, 25) Umapeto wa phuzilo lililetene la m’buku loi Sangalalani na Moyo Mpakana Walewale! Mukambilanenga gawo loi “Athu Amo-iwa Kanaonga Ira.” Mumulimbikisenga ofunjedoyo ira ashishedelenga someda mwaekave. Mumukami-enga akala vanafuneya sakaeda vyosomeda vyaevyo ira vikale vyapama. Vyevi vinokoza mukami-a ira afotokozenga molimba murima vyevyo unaroromela liye.

18. Kodi ninamukami-e avi ofunjedi-u ira aambeele laleela na pingo? (Mateyu 10:27)

¹⁸ Yesu oolamula ofunjedae ira kalaleelenga uthenga wapama wa athu etene. (Welengani Mateyu 10:27.) Ofunjedinyu aambeela mombaraanya fotokozela amo-iwa vyevyo unaroromela liye, pa vevo teto unaambeela liye muroromela vinjinji Yehova. Ndiye kodi munamukami-e avi ira akaena yolinga inela? Valengeziwa vya chito yavadela yolaleela mumulimbikisenga ofunjedinyu ira aganizelenga vyevyo unapange liye ira afwanelele kala ofalisa. Munokoza mufotokozela chifukwa iwa athu anjinji kanaona ira vinokala vyo-orucha ambeela laleela va thawi ngati inela. Liye unokoza pindula teto akala unakaena yolinga ira akambenga khani va misonkano da muwari mwa mulungu. Akwakwaneli-edanga yolinga inela, unoza afunjede mwemo munafotokozele liye pama vyevyo unaroromela liye.

MUMUTONYI-EDENGA OFUNJEDINYU IRA MUNOMUROROMELA

19. Kodi Yesu atonyi-edile avi ira oowaroromela ofunjedae, nanga ninamusazi-ede avi?

¹⁹ Yesu aanadowe udimu, oowawandela ofunjedae ira, thawi imo-i aluwa kanoza kakale limo-i na liye. Aluwa kataiziwa ira Yesu atapulela ira aluwa kanoza kadowe udimu. Komave Yesu akeda ganiza vyororomeleya uwa, ookala kaikela uwa. (Yoh. 14:1-5, 8) Liye ooiziwa ira vanafuneya thawi yokwakwanela ira aluwa kavwecheche vyongo vimo-i, monga vyokuza idedi-edo yodowa udimu. (Yoh. 16:12) Na-iyene teto nitonyi-edenga ira ninororomela ira ofunjedi-u unofuna musangalasa Yehova.

20. Kodi murongola m’mo-iwa wawu Malawi atonyi-edile avi ira oomuroromela ofunjedae?

²⁰ Kanikaikelenga ira ofunjedi-u unofuna panga vyongo vyofwanelela. Isazo vakhanila ngu murongola m’mo-iwa wau Malawi zina lae Chifundo. Liye afunjeda Baibulo na muzimai m’mo-iwa wa ikatolika zina lae Alinafe vo-indi-eda chito buku loi Sangalalani Na Moyo Mpakana Walewale! Kangafiile umapeto wa phunzilo 14, Chifundo oomufuka maganizwae va khani yo-indi-eda chito vifwanafwani-edo volambela. Alinafe oolunduwa na yofukela moi oosomeda ira: “Muthu uliwetene unokoza sakula indi-eda chito vifwanafwani-edo kapena naari.” Chifundo akeda ganiza ira phunzilolo kalinapitilila, koma moleza murima oopitilizave funjeda na alinafe adedi-edelanga ira dambo limo-i unoza avwecheche. Vangavirile medi doyeva, Chifundo oomufuka ofunjedola yofuka ineyo ili muphuzilo 34 ira: “Vofiya vano, kodi funjeda Baibulo koma teto vyokuza Mulungu oona Yehova, uukami-ileni avi?” Vofotokoza vyevyo Alinafe asomedile liye, Chifundo aongile ira: “Liye oofotokoza makundo anjinji osangalasa. Limo-i mwa makundwayo kali oyi a Mboni da Yehova katinapanga iliyetene ineyo Baibulo kalinasomedela.” Vaanavire thawi indendai, Alinafe oo-iya indi-eda chito vifwanafwani-edo moi oobatiziwa.

21. Kodi ninamulimbikise avi ofunjeda Baibulo ira akale ofunechecha sakula mutumikela Yehova?

²¹ Ngakale ira Yehova “ngunoyo unaulukuli-a,” iyo nikaana udindo okami-a ofunjeda Baibulo ira adowe vasogolo. (1 Akor. 3:7) Vikala vyongo vinjinji vyevyo ninapanga iyo enjedela vomufunji-a ira aiziwe vyevyo Mulungu unafuna liye. Ninomukami-a ira amuomeluwengana vinjinji Yehova. Ninomulimbikisa teto ira atonyi-edenga ira unomuomeluwana Yehova koma teto mu-ela vamalo owambeela. Ninomufunji-a teto ira amuroromelenga Yehova agumana na mavuto. Namutonyi-edanga ira ninomuroromela, ninomukami-a ira kakaikelenga ira unokoza arelanga makundo a Yehova koma teto sakula mutumikela.