Yehova Unonikami-a Ira Nivilelenga Maeselo

1. Chifukwa n’ni ninafuneya vilela, nanga ngu mbaani unoyo unanikami-e? (1 Petulo 5:10)

M’MALAMBO omari-ala, atumiki a Yehova kanovilela mavuto o-iyana-iyana. Mwaisazo, amo-iwa kanobulela marenda alukulu. Amo-iwa kokaana chisoni chifukwa yoi muthu unoyo kamuomeluwanaathu ookhwa. Amo-iwa teto kanaazuzumi-iwa na abaliwa kapena athu aboma. (Mat. 10:18, 36, 37) Kaya nyo munagumana na mavuto oyi avi, kamukaikelenga ira Yehova unoza aukami-eni vilela nouva-ani kopolo ira mupitilize mutumikela mpakana mapeto.— Welengani 1 Petulo 5:10.

2. Monga Akristu, kodi chin’ni ineyo inanikami-a vilela?

² Kodi vilela unatapulela n’ni? Vilela, unatapulela kalave ororomeleya wa Yehova nomutumikelangave mosangalala ngakale ira ninogumana na mavuto, ninozuzumi-iwa na athu koma teto ninogumana na maeselo. Ninokoza vilela chifukwa yoi Yehova unoniva-a “kopolo yokwaranya yaibadwa.” (2 Akor. 4:7) Moi iyovano kaninakwakwani-e vilela vaeki-u. Mukhanila, ninokambilana vyongo 4 vyevyo Yehova univa-ile liye vonikami-a ira nivilelenga. Ninoona teto mwemo iliyetene mwa vyongo vyevi inanikami-eleathu ira nikwakwani-enga vilela.

YEHOVA UNIVA-A MWAI WA PEMPELO

3. Chifukwa n’ni ninaonge ira pempelo chiyongo yodabwi-a?

³ Yehova unipangela vyongo vyodabwi-a vinjinji vonikami-a ira nivilelenga. Moi imo-i mwa vyongo vyevi chi pempelo. Liye upangi-a ira nikwakwani-enga ongi-ana na liye ngakale ira iyovano nili athu ochimwa. (Aheb. 4:16) Kaganizelani vi: Iyo athu ninokoza pempela wa Yehova va thawi iliyetene koma teto vakhani iliyetene. Moi Yehova unokoza nivuruwana ngakale nangapempelile muiongelo iliyetene koma teto nangagaratile vamalo alietene. Koma teto unokoza nivuruwana ngakale vevo nili iyo waeki-u koma teto vevo nili iyo mundende. (Yona 2:1, 2; Vyo. 16:25, 26) Vevo ninakumbanya iyo vinjinji kapena vevo naanaiziwa iyo vyevyo ninamufotokozele iyo Yehova, liye unakala aiziwanga vyevyo ninafuna iyo onga. Onga vyoona pempelo chindila yodabwi-a vinjinji yoongi-elana na babi-u waudimu Yehova. — Arom. 8:26, 27.

4. Chifukwa n’ni mapempelwi-u ovepa ira Yehova anikami-e vilela kanakala ogwilizana na ifunelwae?

⁴ Kodi iyovano ninokoza muvepa Yehova ira anikami-enga vilela? Ee, chifukwa m’Mawae Baibulo, Yehova unonisimikizela ira “iliyetene ineyo ninamuvepe iyo mogwilizana na vyevyo unafuna liye unonivuruwana.” (1 Yoh. 5:14) Koma teto panga vyevi kogwilizana na ifunelo yae. Chifukwa n’ni ninaonga eno? Ninaonga eno chifukwa navilelanga maeselo ninomukami-a Yehova musomeda Satana Mdjerekezi unoyo unamuongela vyonama. (Miya. 27:11) Enjedela vevo Baibulo linaonga ira Yehova ngofunechecha ira “aoni-e kopolo dae wa athu ovipeleka na murima wetene wa liye.” (2 Lim. 16:9) Eno kanikaikelenga ira Yehova ukaana kopolo koma teto unofunechecha nikami-a ira nivilelenga. — Yes. 30:18; 41:10; Luk. 11:13.

5. Kodi pempelo linanikami-e avi ira nifwanye murendele wa m’murimani? (Yesaya 26:3)

⁵ Baibulo linaonga ira mwapempelanga kumela vati vamurima, “murendele wa Mulungu unoyo athu katinawande uvwechecha unoza uteteze mirima dinyu na maganizwinyu.” (Afil. 4:7) Kodi mawu anala kanatapulela n’ni? Athu anayo katinatumikela Yehova naaluwene teto kanogumana na mavuto. Moi kanoesedela ndila do-iyana-iyana ira kafwanye murendele wa m’murima. Mwaisazo, athu amo-iwa kanoesaesa vipangi-a ira katiganizelenga yongo iliyetene tangani-avo ganizela vyongo vyevyo vinaapangi-a ira kakumbanyenga. Koma panga vyevi koopi-a vinjinji. Chifukwa iya ganizela yongo iliyetene unokoza pangi-a ira viwanda vifwanyelevo mwai, koma teto unokoza pangi-a ira niganizelenga vyongo vyolakweya. (Erekezelani na Mateyu 12:43-45.) Namuvepa Yehova murendele wa m’murimani, liye unoniva-a, moi murendele unoyo unaniva-e liye, unokwaranya murendele uliwetene unoyo athu kanaufwanyeathu zela mundila do-iyana-iyana. Napempela wa Yehova ninotonyi-eda ira ninomuroromela vinjinji, moi liye unoniva-a “murendele o-omala.” (Welengani Yesaya 26:3.) Ndila imo-i ineyo Yehova unaniva-ela liye murendele kunikami-a ira niumbuwelenga malemba anayo kananimiyali-a anayo naawelengile iyo m’Baibulo. Malemba anayo kanonikami-a ira nigarati-enga murimi-u vati chifukwa ninoiziwa ira Yehova unonisamalela moi unafuna ira vyongo viniendelenga pama.— Sal. 62:1, 2.

6. Kodi ninapange avi ira pempelo linikami-enga vinjinji? (Onani teto ithuzithuzi.)

⁶ Vyevyo munapange nyo. Mwagumana na maeselo amo-iwene, ‘mumurulelenga Yehova nkhawa dinyu’ moi mumuvepenga ira auva-eni murendele. (Sal. 55:22) Mumuvepenga teto zelu dedo dinaukami-eni ira mulimbanenga na maeselwayo. (Miya. 2:10, 11) Mwapempela wa Yehova ira aukami-eni vilela, kamudiwalenga teto muyamikela. (Afil. 4:6) Mukalenga chelu ira muonenga mwemo Yehova munaukami-elani liye vilela maeselo, moi mumuyamikelenga chifukwa ya vyevyo. Maeselo anayo munagumanana nyo, katiulepeli-eni ira muonenga madaliso anayo Yehova uuva-ileni liye wale. — Sal. 16:5, 6.

YEHOVA UNIVA-A MAWAE BAIBULO

7. Kodi funjeda Baibulo unanikami-e avi ira nivilelenga?

⁷ Yehova Mulungu ooniva-a mawae Baibulo ira kanikami-enga vilela. M’Baibulo mukala mavesi anjinji anayo kananisimikizela ira Yehova unonikami-a. Isazo vakhani inela ti lemba la Mateyu 6:8, lelo linaonga ira: “Babinyu unoiziwa vyevyo munafuneya nyo mwaanamuvepe.” Yesu ngunoyo aongile mawu anala moi liye unomuiziwa pama Yehova kwaranya muthu uliwetene. Eno, nikalenga osimikiza na murima wetene ira navuteyenga Yehova unoiziwa vyevyo ninafuneela iyo moi unoza anikami-e. M’Baibulo mukala malonjezo apama okumela wa Yehova anayo kananiva-e kopolo ira nipitilize vilela mavuto.— Sal. 94:19.

8. (a) Kodi ti likundo liivi la m’Baibulo lelo linanikami-e ira nivilelenga. (b) Nanga kodi chin’ni ineyo inanikami-e ira niumbuwelenga makundo a m’Baibulo?

⁸ M’Baibulo mukala teto malangizo anayo kananikami-a ira nivilelenga mavuto. Malangizwala kanonikami-a ira nisakulenga vyoira mwazelu. (Miya. 2:6, 7) Mwaisazo, Baibulo linonilimbikisa ira kanikumbanyelenga vinjinji vyongo vyevyo vinaireye usogolo, m’malomwiwa nimuroromelenga Yehova dambo lililetene. (Mat. 6:34) Nawelenganga Baibulo dambo lililetene noganizelanga modi-a vyevyo niwelengile iyovyo, vinoza vikale vyo-orucha ira niumbuwelenga malangizo anayo niawelengile iywayo vevo ninafuneela iyo sakula vyoira kapena vevo ninafuna iyo iziwa mwemo ninavilele iyo vuto limo-iliwa lene.

9. Kodi khani da m’Baibulo dinanikami-a avi ira niroromelenga vinjinji ira Yehova unoza anikami-e vilela?

⁹ M’Baibulo mukala teto khani da athu ngati iyo, anayo kamuroromela Yehova moi liye oowakami-a. (Aheb. 11:32-34; Yak. 5:17) Naganizelanga mwemo Yehova mwaakami-ele liye ninolimbi-a iroromelo yi-u yoi na-iyene Yehova unoza anikami-e koma teto ira liye “pivothawelavo vi-u koma teto kopolo di-u, likami-edo lofwanyeya mo-orucha va thawi ya mavuto.” (Sal. 46:1) Teto naganizelanga mwemo atumiki a Yehova mwatonyi-edeleathu iroromelo iwa mwa liye, nopitiliza mutumikela va thawi yorucha, na-iyene ninolimbikisiwa ira nipitilize vilela. — Yak. 5:10, 11.

10. Kodi munapange avi ira mawu a Mulungu kaukami-engani vinjinji?

¹⁰ Vyevyo munapange nyo. Muwelengenga Baibulo dambo lililetene moi musungenga malemba anayo munaona nyo ira kanokoza ukami-ani. Athu anjinji kanaona ira welenga lemba la dambo mamawa, unowakami-a ira kaganizelenga vyongo vyolimbikisa dambo letene. Welenga lemba la dambo, dambo lililetene woomukami-a murongola m’mo-i zina lae Mariea vevo makolwae etene ambin’li kabulelaathu marenda a khansa. Kodi chin’ni yamukami-a ira avilelenga vevo asamalela liye makolwae m’malambo omari-a amoywiwa? Liye aongile ira: “Mamawa uliwetene ndoowelenga lemba la dambo koma teto liganizelanga. Vyevi vyoondikami-a ira ndiganizelenga vyokuza Yehova koma teto makundo am’Malemba m’malo mokedanga ganizela mavuto anayo ndagumanana miyo.” — Sal. 61:2.

YEHOVA UNIVA-A AKRISTU AFWI-U

11. Kodi iziwa ira abali na arongoli-u kanogumana teto na mavuto unanilimbikisa avi?

¹¹ Yehova ooniva-a abali na arongola vailambo yetene ira kanikami-enga vilela. Ninolimbikisiwa “voiziwa ira [abali] na arongoli-u vailambo yetene kanogumana teto na mavuto.” (1 Pe. 5:9) Ndiye kaya ninagumana na mavuto oyi avi, abali na arongoli-u teto kanogumana na mavuto ngati anayo moi kanowavilela. Eno na-iyene ninokoza kala osimikiza ira ninokoza avilela. — Vyo. 14:22.

12. Kodi Akristu afwi-u kananikami-e avi, nanga iyovano ninaakami-ede avi? (2 Akorinto 1:3, 4)

¹² Abali na arongoli-u kanokoza nilimbikisa zela muvyoonga koma teto muvyoira viwa. Vyevi pivyevyo vyamuireele teto namarumiwa Paulo. Thawi dinjinji liye oowayamikela athu anayo kamukami-a va thawi ineyo ali liye vaukaidi oovenyavo vande. M’makalatae ooromola mazina a athu anayo kamukami-ile angali vaukaidi oovenyavo vande. Moi abalayo koomulimbikisa, mumiyali-a koma teto muva-a vyongo vyevyo afuneela liye, moi liye oowayamikela chifukwa ya vyevi. (Afil. 2:25, 29, 30; Akol. 4:10, 11) Malambwano teto abali na arongoli-u kanonikami-a vilela nagumana na mavuto. Moi naaluwene teto kagumana na mavuto na-iyene ninowakami-a.— Welengani 2 Akorinto 1:3, 4.

13. Kodi chin’ni yamukami-ile Maya ira avilele?

¹³ Abali na arongola wu Russia koomulimbikisa murongola m’mo-iwa zina lae Maya. Mu 2020, apolisi aitetezo koovolowa morurumucha munyumba ya murongolola ambeela saelasaela vyongo. Vanduli viwa koomuimba mulandu chifukwa yowawandela amo-iwa vyevyo unaroromela liye. Murongola Maya aongile ira: “Va thawi ineyo ndakumbanya miyo vinjinji abali na arongola koondiimbela foni, koma teto koondilembela mamesenji na makalata ondisimikizela ira kanondiomeluwana. Thawi detene ndooiziwa ira abali na arongola kanondiomeluwana moi kali ngati athu am’banja langa. Koma keda kumela mu 2020, pavevo ndasimikizele miyo vinjinji vya likundo leli.”

14. Kodi ninapange avi ira nipindulenga va vyevyo Akristu afwi-u kanapangaathu vonikami-a? (Onani teto ithuzithuzi.)

¹⁴ Vyevyo Munapange nyo. Mwagumananga na mavuto, mukalenga vakwikwi na abali na arongolinyu. Kamuzengelezenga pempela wa Yehova ira aukami-engani. Aluwa kali ngati “malo ovitalelavo lipevo” koma teto “malo ovitalelavo zongwe wakopolo.” (Yes. 32:2.) Muumbuwelenga ira Akristu afwinyu kanogumana teto na mavuto ofwanafwana na anayo munagumanana nyo. Mwaomelanga murima abali na arongolinyu anayo kanavuteya, munokala osangalala moi vinoukami-ani ira nanyene teto muvilelenga mavutwinyu. — Vyo. 20:35.

YEHOVA UNIVA-A IDEDI-EDO YAUSOGOLO

15. Kodi idedi-edo yausogolo yamukami-ile avi Yesu, nanga inakami-a avi atumiki a Yehova ororomeleya? (Aheberi 12:2)

¹⁵ Yehova univa-a idedi-edo yosimikizeleya ineyo inanikami-a pitiliza vilela. Kaganizelani mwemo idedi-edo yamukami-eleathu Yesu vilela vadambo lorucha vinjinji va moywaye. (Welengani Aheberi 12:2.) Yesu ooiziwa ira akala unakale ororomeleya unopangi-a ira zina la Yehova liweli-iwe. Oodedi-edela teto za welela wa Babae koma teto vira wa thawi, za lamulela na abalae ozoziwa a 14400 mu Umwene waudimu. Mofwanafwana na vyevi, idedi-edwi-u yoza kala na moyo oomala vailambo yavatila inonikami-a vilela mavuto anayo ninagumanana iyo muilambo ya Satanela.

16. Kodi idedi-edo yamukami-ile avi murongola Ana ira avilele, nanga ninafunjeda n’ni va vyevyo aongile liye?

¹⁶ Kaganizelani mwemo idedi-edo yoza kala muilambo isha yamukami-eleathu murongola m’mo-iwa wawu Russia zina lae Ana, unoyo mamaunae a-eeliwe mundende voembekezela imbiwa mulandu. Vyevi vyangaireile Ana aongile ira: “Pempela koma teto ganizela vya idedi-edwi-u yausogolo unondikami-a ira kandifooke. Ndinoiziwa ira mavutwala kanoza kamale. Vanduli viwa Yehova unoza agonji-e adanae moi unoza aniva-e mphoto.”

17. Kodi ninatonyi-ede avi ira ninoyamikela idedi-edo ineyo Yehova univa-ile liye? (Onani teto ithuzithuzi.)

¹⁷ Vyevyo munapange nyo. Mufwanyenga thawi yoganizela vyongo vyosangalasa vyevyo Yehova unilonjezile liye usogolo. Muelekezelenga mwemo moyo unazeathu ukalele muilambo isha koma teto madaliso anayo munaze nyo muwafwanye. Mwapanganga vyevi, mavuto anayo munagumanana nyo kanokoza oneya ngati “athawi yoyeva koma teto ang’onong’ono.” (2 Akor. 4:17) Muesaesenga teto awandela amo-i vyevyo munaroromela nyo. Athu amuilambwela kanogumana na mavuto anjinji moi katinaiziwa vyevyo Mulungu unilonjezile liye usogolowu eno muganizelenga mwemo vinakaleleathu vyorucha wa aluwa ira kavilelenga mavuto anayo kanagumananaathu. Eno kambilana na aluwa ngakale makundo oyeva unokoza akami-a ira kakaena chidwi yofuna iziwa vinjinji vyokuza Umwene wa Yehova na malonjezwae.

18. Chifukwa n’ni ninafuneya roromelanga vyevyo Yehova unilonjezile liye?

¹⁸ Vanduli voi Yobu uvilela mororomeleya mavuto anayo agumanana liye, liye oomuwandela Yehova ira: “Sopano ndiiziwa ira nyo munowanda panga vyongo vyetene, koma teto kavali iliyetene ineyo munafunanyo panga ineyo kamunakwakwani-e.” (Yobu 42:2) Yobu oofunjeda ira kavali iliyetene ineyo inamulepeli-e Yehova kwakwaneli-eda vyevyo ulonjezile liye. Likundo leli linokoza teto nilimbikisa iyovano ira nivilelenga mavuto. Nielekeze ira muzimayi m’mo-iwa ukumudwa chifukwa yoi madokotala anjinji koolepela muchili-a marendae. Koma vanduli viwa muzimayiyo unaagumana na dokotala m’mo-iwa unoyo ngwaluso koma teto ororomeleya moi unaamufotokolela mavuto anayo unagumanana liye koma teto mwemo munamukami-ele liye va mavutwayayo. Muzimayiyo unoambeela sangalala ngakale ira vanokoza landa thawi indendai ira achile. Liye unokoza anda vilela chifukwa yoi sopano ukaana idedi-edo yoi unoza achile. Mofwanafwana na vyevi, na-iyene teto ninokoza vilela chifukwa yoi nili osimikiza ira lonjezo la Mulungu la m’Paradaiso linoza likwakwaneli-ediwe moi iziwa vyevi unonikami-a ira nivilelenga.

19. Kodi ninafuneya panga n’ni ira nivilelenga?

¹⁹ Mukhanila niona ira Yehova unonikami-a vilela vo-indi-eda chito mawaye, pempelo, Akristu afwi-u koma teto idedi-edo. Naesaesanga indi-eda chito vyongo vyevi, Yehova unoza anikami-e vilela vuto lililetene lelo ninagumanana iyo mpakana vevo unaze liye amali-e mavuto etene amuilambwela. — Afil. 4:13.