1925​ — Chaka 100 Diviriledo

VYEVYO NINAEMBEKEZELA IYO VYALEPELEYA

Mu 1925 Ofunjeda Baibulo anjinji koodedi-edela ira ilambwela inokala Paradaizo. Chifukwa n’ni kaganiza eno? M’bali Albert Schroeder unoyo vanduli viwa atumikela m’Bungwe Lolamulela aongile ira: “Noororomela ira mu 1925 ozoziwa kanoza kadowe udimu, moi Akristu ororomeleya monga Abulahamu, Davide na amo-iwa kanoza kavenyi-iwe nosogolelanga athu vailambwela monga akalonga a Umwene wa Mulungu.” Komave abali na arongola amo-i kookumudwa kangaonile ira chaka inaadowa umapeto koma vyevyo kaembekezelaathu kavinaireya.— Miya. 13:12.

Ngakale ira aluwa kookumudwa, Ofunjeda Baibulo anjinji koopitilizave laleela uthenga wapama mwatindi. Aluwa koozindikila ira laleela vyokuza Yehova yali chito yofuneya vinjinji. Mwaisazo, tiyemoni nione vyevyo kapangileathu ira kalaleele athu anjinji uthenga wapama, vo-indi-eda chito wailesi.

KOOMANGA NYUMBA DINJINJI DOULUSELA MAWU

Mu 1924 athu anjinji koovuruwana wailesi ya WBBR. Vyevi vyoopangi-a ira mu 1925, Ofunjeda Baibulo kamange nyumba imo-iwa yakopolo vinjinji youlusela mawu vakwikwi nawu Chicago wu Illinois. Nyumbela yooiziweya na zina loi WORD. Ralph Leffler unoyo ngu kaswiri unoyo a-indilena chito yomanga nyumbela aongile ira, “mu nyengo yodidila mazulo, athu a m’madela aundendai koovuruwana wailesila.” Mwaisazo, banja limo-i lelo lakala undendai ulendo olapa makilomita 5,000 mu mzinda wa Pilot Station wu Alaska, loovuruwana imo-i mwa khani doambeela ulusiwa. Vanduli vovuruwana, banjali loowalembela kalata athu anayo ka-inda chito youlusa mawu va wailesila yowayamikela chifukwa ya porogalamu yauzimu yolimbikisa.

Sanja ya Olonda ya Dizembala 1, 1925 yoofotokoza mwemo athu a m’madera aundendai vinjinji mwakwakwani-elaathu vuruwana wailesila, yaongile ira: “Wailesila chi imo-i mwa mawailesi akopolo vinjinji muilambo ya United States. Athu anayo kakala m’mbali mwa nyanja umamawani na umazulo wa United States, wu Cuba koma teto wu mpoto weniweni wa Alaska kookwakwani-a vuruwana wailesila. Wailesila inokami-a athu anayo kali kaanavwevo choonadi ira kakaena chidwi yofuna vwa vinjinji.”

Vathawi ineyo Ofunjeda Baibulo koopanga vyoi ka-indi-edenga chito wailesi volaleela uthenga wapama wu Canada. Mu 1924 koomanga nyumba youlusela mawu yoromoliwa CHUC wu Saskatoon wu Saskatchewan. Nyumbela yali imo-i mwa nyumba daipembezo doulusela mawu wu Canada. Mu 1925, kootami-ela nyumba youlusela mawila umalo amo-iwa alukulu. Eno Bungwe la Watch Tower Society loogula nyumba yawale ya Regent Building ineyo kapangelamoathu masika wu Saskatoon, noisakaeda ira kauluselengamo mawu moi kootami-edamo masitudiyo mu nyumba inela.

Nyumba youlusela mawu inela yookami-a athu anjinji anayo kakala m’matauni ang’onong’ono, koma teto anayo kakala m’madela a m’mavande a wu Saskatchewan ira kavwe uthenga wapama wa thawi yowambeela. Mwaisazo, mutaoni imo-iwa yaundendai, muzimai m’mo-iwa zina lae Graham angavuruwanile wailesila oolemba kalata yovepa mabuku okami-a vofunjeda Baibulo. M’bali George Naish aongile ira, “Yovepa ya muzimaila yootonyi-eda ira oofuna funjeda mombaaraanya moi noomutumizela buku la Studies in the Scriptures.” Vaanavire thawi indendai, Muzimaila oowambeela laleela uthenga wa Umwene m’madela aundendai.

VWECHECHA MAKUNDO A CHOONADI

Sanja ya Olonda ya Marichi 1, 1925 yookaana muru oodiwaleya oyi “Baluwa wa Tundu.” Chifukwa n’ni khani inela yali yofuneya? Ofunjeda Baibulo kooiziwa ira Satana ukaana gulu lelo tilopangiwa na angelo otakala anayo katinaoneya, koma teto kanosogolela magulu a vipembezo, amalonda koma teto andale vailambwela. Komave vo-indi-eda chito khanila “kapolo ororomeleya koma teto wazelu” ookami-a abali zindikila ira naliyene teto Yehova ukaana gulu lae, lelo ti lo-iyana vinjinji na gulu la Satana, moi linoruni-a vinjinji vyoira vya gulu la Satana. (Mat. 24:45) Enjedela veva, kapolola oofotokoza ira Umwene wa Mulungu waambeele lamulela mu 1914, teto mu chaka inela mooambeeleya ‘khondo ineyo yaireile udimu’ moi Satana na viwanda vyae kootamangi-iwa udimu moi vatawiila kali vailambo yavatila. — Chiv. 12:7-9.

Ofunjeda Baibulo amo-i vyoowarucha vwechecha likundo lishali. Voganizela vyevi Sanjela yaongile ira: “Akala vali amo-i anayo katinasomedela vyevyo viongiwe mukhanila, ninowavepa ira kapitilize dedi-eda Ambwiye moleza murima, nopitiliza mutumikela mororomeleya.”

Tom Eyre wa wu Britain unoyo ali kopotala, (vathawi ila mawu anala kanaongiwa ira mpainiya) oofotokoza mwemo khanila mwakuzeleathu Ofunjeda Baibulo anjinji. Liye aongile ira: “Abali koosangalala na mwemo khanila mwafotokozeleathu buku la Chivumbuluso chaputala 12. Nangazindikilile ira Umwene ugarati-iwa udimu noosangalala vinjinji moi noofunechecha awandela athu amo-iwa vya uthenga wapamola. Khanila yoonilimbikisa ira nifunenga panga vinjinji va chito yolaleela, koma teto yoonikami-a iziwa ira Yehova unosogolela gulu lae ira nize nikwakwani-e panga vilukulu usogolo.”

PANGELA UMBONI VYA YEHOVA

Malambwano, a Mboni da Yehova kanoiziwa pama mawu a va Yesaya 43:10 oyi: “‘Nyo muli mboni danga,’ unaonga eno Yehova, ‘Ee, mtumikanga unoyo ndamusakulile miyo.’” Komave chaka ya 1925 yaanafiye lemba leli kala-indi-ediwa chito vinjinji m’mabukwi-u. Koma vyongo vyali vyanga-alile vang’ono chenja. Mu 1925 Sanja ya Olonda yoo-indi-eda chito lemba la Yesaya 43:10 na 12 mu khani 11 da m’magazini-u.

Umapeto wa Ogaste mu 1925, Ofunjeda Baibulo koopanga sonkano wachigawo muzinda wa Indianapolis wu Indiana. Vaporogalamu ya sonkanoyo M’bali Joseph F. Rutherford, oolembavo mawu owachelela alendo oyi: “Niza vasonkanola ira nifwanye . . . kopolo kumela wa Ambwiye nayolonga yoi nawelela wani napitilize inda chito yolaleela mwatindi.” Sonkano unoyo waireile malambo 8 oolimbikisa vinjinji athu ira ka-indi-edenga chito mpata uliwetene vopangela umboni vya Yehova.

Looluka va 29 Ogaste M’bali Rutherford ookamba khani ya muru oyi “Inda Chito Mwatindi.” Khanila yoonga vinjinji funeya o-inda chito yolaleela. Liye aongile ira: “Yehova unaawandela athwae ira . . . : ‘Nyo muli mboni danga . . . Moi miyo ndili Mulungu.’ Vanduli viwa oowalamula na mawu akopolo oyi, ‘Athu a mitundu do-iyana-iyana muwava-e izindikilo.’ Katilivo teto athu amo-i vailambo yavati anayo kanaava-a athu amo-iwa izindikilo patulavo [athwae], anayo kana zimu wa Ambwiye moi ti Mboni dae.”— Yes. 43:12; 62:10.

M’bali Rutherford angamari-ile kamba khanae oowelenga igamulo ya muru oyi “Uthenga wa Idedi-edo.” Abali na arongola koogwilizana na igamulweyo ineyo yaonga ira, ngu Umwene wa Mulungu oka unoyo unawande pangi-a ira “vyongo viendenga pama, zana madaliso a murendele, moyo wapama, ufulu koma teto isangalalo yoomala.” Vangavirile thawi igamulweyo yootapuleliwa muviongelo vyo-iyana-iyana nopulintiwa va mapepala, moi vanduli viwa koogawela athu otamangela 40 miliyoni.

Wa chaka dinjinji Ofunjeda Baibulo kali ka-anachenje zina ira kaambeele i-ndi-eda chito zina loi Mboni da Yehova. Komave aluwa koozindikila ira kookaana udindo olaleela vya zina la Yehova.

WELELA WA ATHU ANAYO KATONYI-EDILE CHIDWI

Vevo iwelengelo ya Ofunjeda Baibulo yapitilizaathu enjedeleya vailambo yetene, gulu la Yehova loolimbikisa abali ira m’malo mokedanga gawela mabuku kanafuneya teto dowanga wa athu anayo katonyi-edile chidwi kangavwile uthenga wapama. Vanduli va chito yavadela yogawela ipepala yoi Uthenga wa idedi-edo, Utumiki wa Umwenea waongile ira: “Pangani vyoi muwelele unyumba dedo kamwa-iileo mabuku koma mwakede iyao ipepala yoi Uthenga wa idedi-edo.”

Khani ya mu Utumiki wa Umwene wa Januwale 1925, yoofotokoza vya lipoti lelo ofunjeda Baibulo m’mo-iwa wu Plano muzinda wa Texas apelekile liye. Liye aongile ira: “Noopanga chidwi ona ira m’magawo anayo nalaleelemo iyo maulendo anjinji, athuwa koopanga chidwi kwaranya athu a m’magawo asha. Va chaka 10 diviriledi nikala nilaleelanga mu taoni imo-iwa ing’onong’ono mugawo li-u wa maulendo 5 . . . Vachineneeva Murongola Hendrix limo-i na m’manga koolaleela teto mu taonila moi koogawela mabuku anjinji kwaranya anayo nagawele iyo mundulimu.”

Muilambo ya Panama, kopotala m’moiwa aongile ira: “Athu anjinji anayo vowambeela kanitamangi-a munyumba diwa koochenja maganizo ndawelelao ndila yanambili kapena yanaralu. Chaka ivirilela ndoopanga vyoi ndiwelelenga wa athu anayo ndaalaleele miyo mundulimu, moi vyo-arelavo viwa vyali vyapama vinjinji.”

VYEVYO VYAIREILE VASOGOLO VIWA

Mukalatae ya va chaka yodowa wa makopotala etene, M’bali Rutherford oofotokoza vyevyo vyaireile mu chaka ineyo koma teto vyevyo vyafuneya ireya usogolo. Liye aongile ira: “Mu chaka ivirilela mookaana mwai olimbikisa athu anayo kali okumudwa koma teto a nkhawa. Chito inela iukami-ani ira musangalalenga . . . Mu chaka inazela munokaana mwai opangela umboni vya Mulungu na Umwenae koma teto tonyi-eda ira muli olambelae enieni. . . . Tiyemoni etene nipitilize kuwa mogweli-a voimba notamanda Mulungu koma teto Mweni-u.”

Vevo chaka ya 1925 yadowaathu umapeto, abali koopanga vyoi kaenjedele nyumba dimo-i wu Beteli ya wu Brooklyn. Moi mu chaka ya 1926 mooambeeleya chito ilukulu yomanga ineyo yali yaanaireyevo mu gulu la Yehova.